Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILI | ƐBAHOLA WƆADE BAEBOLO NE ABO

Buluku Mɔɔ Ɛbahola Wɔade Ɔ Bo

Buluku Mɔɔ Ɛbahola Wɔade Ɔ Bo

Ɔda ali bɔkɔɔ kɛ, Baebolo ne le buluku mɔɔ ɛhyɛ kpalɛ kpalɛ a. Yeli ɛvolɛ nyɛ? Bɛbɔle Baebolo ne ɛhɛlɛlɛ bo wɔ Mɛdetɛlenia Aduduleɛ kɛyɛ ɛvolɛ 3,500 mɔɔ ɛze ɛhɔ la. Saa yɛbayɛ ndotonwo a, ɛnee ɔle mekɛ mɔɔ Chinama Shang abusuabialilɛ ne wɔ zo nee kɛyɛ ɛvoya bulu kolaa na Buddha ɛzonlenlɛ ne abɔ ɔ bo wɔ India la.—Nea ɛlɛka “ Baebolo Ne Anwo Nɔhalɛ Edwɛkɛ.”

Baebolo ne bua ɛbɛlabɔlɛ nu kpuya mɔɔ hyia na ɔmaa ahunlundwolɛ la

Saa buluku bie baboa menli na bɛanyia zolɛ nvasoɛ a, ɔwɔ kɛ bɛte ɔ bo na ɔfale bɛ nwo. Kɛ Baebolo ne de la ɛne. Ɔbua ɛbɛlabɔlɛ nu kpuya mɔɔ hyia na ɔmaa ahunlundwolɛ la.

Kɛ neazo la, asoo wɔbiza ye ɛlɛ kɛ, ‘Duzu ati a yɛwɔ ɛke a?’ Menli dɔɔnwo ɛnde kpuya ɛhye abo na zɔhane ala a ɔde ye ɛnɛ a. Noko, yɛbahola yɛanwu mualɛ ne wɔ buluku mɔɔ limoa wɔ Baebolo ne anu, Mɔlebɛbo, ati ko nee nwiɔ ne anu. Baebolo nu edwɛkɛ ɛhye fa yɛ kɔ “mɔlebɛbo ne”—ɛvolɛ mgbe mgbe mɔɔ ɛze ɛhɔ—mɔɔ bɛbɔle ewiade, nwɔlɔra ekpunli, nwɔlɔra nee azɛlɛ ne la. (Mɔlebɛbo 1:1) Akee ɔkile adenle mɔɔ ɔlua zo mɔɔ azɛlɛ ne rayɛle ɛleka mɔɔ bɛtɛnla, kɛzi ngoane ngakyile zile rale yɛɛ kɛzi bɛbɔle sonla nee biala bodane la.

BƐHƐLƐ BƐMAA YƐ KƐ YƐDE Ɔ BO

Baebolo ne maa yɛ folɛdulɛ mɔɔ ɔboa ɔmaa yɛgyinla ngyegyelɛ biala anloa. Ɔnyɛ se kɛ yɛbade ye folɛdulɛ ne abo. Ɛhye gua ye afoa nwiɔ.

Mɔɔ limoa, aneɛ mɔɔ bɛvale bɛhɛlɛle Baebolo ne la anu la ɛkɛ yɛɛ ɔyɛ anyelielɛ. Kɛ anrɛɛ bɛbava edwɛkɛ agbɔkɛ dɔɔnwo mɔɔ yɛnze anzɛɛ ɔle kpomgbondee la, bɛvale edwɛkɛ mɔɔ le nɔhalɛ anzɛɛ yɛte ɔ bo la bɛlile gyima. Bɛva edwɛkɛ agbɔkɛ mɔɔ yɛka ye ɛnɛ la bɛhilehile edwɛkɛ mɔɔ ɔ bo ɛdelɛ ɛnla aze la anu.

Kɛ neazo la, Gyisɛse vale ninyɛne mɔɔ menli yɛ ye dahuu la yɛle ndonwo sikalɛ amaa yeahilehile bɛ ɛzukoalɛdeɛ mɔɔ ka ahonle la. Yɛnwu edwɛkɛ ɛhye mɔ dɔɔnwo wɔ ye Boka Zo Edwɛkɛhanlɛ ne, mɔɔ bɛhɛlɛ ye wɔ Mateyu buluku ne tile 5 kɔdwu 7 anu la. Awie mɔɔ kilehile edwɛkɛ nu la vɛlɛle ye “edwɛkɛ mɔɔ nvasoɛ wɔ zo” na ɔnwunle kɛ tɛ ye bodane a le kɛ “ɔmaa yɛ nzuzulɛ ala, emomu ɔkile  yɛ adenle nee mɔɔ ɔwɔ kɛ yɛyɛ la.” Ɛbahola wɔava mitini 15 kɔdwu 20 wɔagenga tile ɛhye mɔ, na ɔbazi ɛ nwo kɛ Gyisɛse edwɛkɛ ne mɔ le sikalɛ noko tumi wɔ nu a.

Debie bieko mɔɔ maa yɛte Baebolo ne abo la a le ninyɛne mɔɔ ɔka nwolɛ edwɛkɛ la. Ɔnle tete nwɔra buluku. Emomu kɛmɔ The World Book Encyclopedia ka ye la, “ɔka menli mɔɔ ɛlie duma nee koahweabanema” yɛɛ “bɛ ngyegyelɛ, bɛ anyelazo, bɛ azedɔlɛ, nee bɛ konimlilɛ nwo edwɛkɛ.” Ɔnyɛ se kɛ yɛbahola yɛade menli ɛhye mɔ edwɛkɛ ne nee ninyɛne mɔɔ sisile la abo na yɛanwu ɛzukoalɛdeɛ kpalɛ mɔɔ wɔ nu la.Wulomuma 15:4.

BƐYƐ BƐMAA MENLI KƆSƆƆTI

Amaa wɔade buluku bie abo la, ɔwɔ kɛ bɛkɛlɛ ye wɔ wɔ aneɛ nu. Ɛnɛ, bie a Baebolo ne wɔ aneɛ mɔɔ ɛte ɔ bo la anu, ɔnva nwo ɛleka mɔɔ ɛde anzɛɛ maanle mɔɔ ɛvi nu la. Suzu ndenle mɔɔ bɛluale zo bɛyɛle ɛhye la anwo nea.

Edwɛkɛbohilelɛ. Bɛlimoale bɛhɛlɛle Baebolo ne wɔ Hibulu, Arelam nee Giliki nu. Ɛhye ati ɛnee menli dɔɔnwo ɛngola ye kenga. Amaa aneɛ gyɛne ne mɔ asa aha ye la, edwɛkɛbohilelɛma mɔɔ lɛ ahonle kpalɛ la bɔle mɔdenle hilele ɔ bo. Ɔlua bɛ moalɛ zo, bɛhile Baebolo ne mumua anzɛɛ ye foa bie abo bɛhɔ aneɛ kɛyɛ 2,700 anu. Ɛhye kile kɛ alesama ɛya ngyɛnu 90 kola kenga Baebolo ne foa bie wɔ bɛ aneɛ nu.

Mbulukuyɛlɛ. Bɛlimoale bɛhɛlɛle Baebolo ne wɔ debie mɔɔ kola sɛkye la azo mɔɔ bie a le nane nwoma nee ngɛlata azinli zo. Amaa menli ade nuhua edwɛkɛ ne la, ɛnee ɔwɔ kɛ bɛtɔ bɛ rɛle aze bɛfa bɛ sa bɛkɛlɛ ye fane dɔɔnwo. Ɛnee ye ɛhɛlɛlɛ ne bolɛ yɛ se na menli ekyi bie a kola tɔ a. Noko milahyinli mɔɔ Gutenberg yɛle ye ɛvolɛ mɔɔ bo 550 la, maanle bɛyɛle Baebolo ne dɔɔnwo kpalɛ. Mgbondabulɛ bie kile kɛ, bɛva Baebolo ne mumua anzɛɛ ye foa bie mɔɔ bo mgbe mgbe nnu la bɛmaa.

Asɔne gyɛne nu buluku biala ɛndo Baebolo ne. Nɔhalɛ nu, Baebolo ne le buluku mɔɔ yɛbahola yɛade ɔ bo a. Noko akee, ɔ bo ɛdelɛ bahola ayɛ se. Noko moalɛ wɔ ɛkɛ. Nienwu a ɛbahola wɔanwu ye a? Na kɛzi ɔbaboa wɔ ɛ? Kpondɛ mualɛ ne wɔ edwɛkɛ mɔɔ doa zo la anu.