Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILI | ƆHYIA KƐ YƐYƐ ASƆNE Ɔ?

Asoo Awie Ɛlɛtie Wɔ?

Asoo Awie Ɛlɛtie Wɔ?

Bie mɔ te nganeɛ kɛ nzɛlɛlɛ le mekɛ ɛzɛkyelɛ ala, ɔluakɛ awie biala ɛndie. Bie mɔ noko bɔ mɔdenle yɛ asɔne noko bɛte nganeɛ kɛ bɛnnyia nwolɛ mualɛ. Nrenyia bie mɔɔ ɔnlie ɔnli kɛ Nyamenle wɔ ɛkɛ la luale ngonyia adenle zo vale ye adwenle bule kɛ asɛɛ yenwu Nyamenle na ɔzɛlɛle kɛ: “Wɔmɔ ka edwɛkɛ ekyi gua me nzo nu.” Noko ɔhanle kɛ Nyamenle “yɛle koonwu.”

Noko, Baebolo ne si yɛ adua kɛ Nyamenle bie wɔ ɛkɛ na ɔtie yɛ asɔneyɛlɛ. Bɛhɛlɛle Baebolo edwɛkɛ ɛhye bɛmaanle menli mekɛ tendenle kɛ: “Nɔhalɛ, saa bɛsu bɛfɛlɛ [Nyamenle] a, ɔbanwu bɛ anwunvɔne. Saa ɔte bɛ ne a, ɔbalie bɛ zo.” (Ayezaya 30:19) Baebolo ngyɛnu fofolɛ ka kɛ: “[Gyihova] anye die sonla mɔɔ di pɛlepɛle la nzɛlɛlɛ nwo.”Mrɛlɛbulɛ 15:8.

Gyisɛse zɛlɛle ɔ Ze na ‘ɔdiele ye.’Hibuluma 5:7.

Eza Baebolo ne ka bɛdabɛ mɔɔ bɛdiele bɛ nzɛlɛlɛ la anwo edwɛkɛ. Ngyɛnu ko ka kɛ Gyisɛse ‘vale ye nzɛlɛlɛ dole Nyamenle mɔɔ yemɔ ala a kɛhola kɛye ye kɛvi ewule nu la anyunlu’ na “Nyamenle diele ye.” (Hibuluma 5:7) Ɛbahola wɔanwu neazo gyɛne dɔɔnwo wɔ Daneɛle 9:20, 21 nee 2 Edwɛkɛsisilɛ 7:1.

Kɛmɔti a bie mɔ te nganeɛ kɛ bɛnnyia bɛ nzɛlɛlɛ nwo mualɛ ɛ? Ɔwɔ kɛ yɛsɛlɛ Gyihova, * Nyamenle ne mɔɔ hɛlɛle Baebolo ne, na tɛ nyamenle gyɛne biala anzɛɛ yɛ nlenyia mɔ amaa yeadie yɛ. Eza Nyamenle kulo kɛ “yɛdua ye ɛhulolɛ zo yɛbiza” ninyɛne mɔɔ ɔkulo la. Ɔmaa yɛnwu kɛ saa yɛsɛlɛ wɔ adenle ɛhye azo a, “ɔtie yɛ.” (1 Dwɔn 5:14) Yemɔti, amaa bɛadie yɛ nzɛlɛlɛ la ɔwɔ kɛ yɛnwu Nyamenle ne mɔɔ hɛlɛle Baebolo ne la na yɛsukoa ye ɛhulolɛdeɛ.

Menli dɔɔnwo die di kɛ asɔneyɛlɛ ɛnle ɛzonlenlɛ nu debie mɔɔ yɛyɛ ala, emomu Nyamenle tie asɔneyɛlɛ na ɔbua. Isaac mɔɔ ɔvi Kenya la ka kɛ: “Menzɛlɛle kɛ mekɛde Baebolo ne abo. Yeangyɛ biala, awie rale me nwo ɛkɛ na ɔboale me.” Ɛnee Hilda mɔɔ wɔ Philippines la kpondɛ kɛ ɔgyakyi sigalɛtenlonlɛ. Ɔyɛle dedee mɔɔ ɛnee ɔnyɛ boɛ la, ɔ hu zuzule nwo hilele ye kɛ, “Duzu ati a ɛnzɛlɛ Nyamenle moalɛ a?” Ɔlile folɛdulɛ ne azo na ɔhanle kɛ: “Kɛzi Ɔboale me la zinle me nwo. Ɛnee ɔyɛ me kɛ me ti akunlu ɛnle sigalɛte zo. Akee mengyakyile ye bɔkɔɔ.”

Nyamenle baboa wɔ yeamaa wɔali wɔ ngyegyelɛ mɔɔ ɔ nee ye ɛhulolɛdeɛ yia la anwo gyima ɔ?

^ ɛden. 6 Baebolo ne maa yɛnwu kɛ Nyamenle duma a le Gyihova.