Wulu kɔ nuhua edwɛkɛ ne azo

Wulu kɔ nuninyɛne ne azo

 TETE NRƐLƐBƐ MƆƆ BOA YƐ ƐNƐ LA

Fa Ɛtane Kyɛ

Fa Ɛtane Kyɛ

BAEBOLO NGYINLAZO: “Saa bie lɛ ɔ gɔnwo anwo ɛya a ɔva ɔhyɛ ye. Bɛva ɛtane bɛhyɛ, kɛmɔ Awulae ɛva bɛ nwo edwɛkɛ ɛhyɛ bɛ la.”Kɔlɔsaema 3:13.

Ɔkile duzu? Wɔ Baebolo ne anu, bɛva ɛtane bɛdo kakɛ nwo yɛɛ bɛva ɛtanefakyɛ bɛtoto kakɛdualɛ nwo. (Luku 11:4) Buluku ko bie ka kɛ wɔ Ngɛlɛlera ne anu, Giliki edwɛkɛkpɔkɛ mɔɔ bɛhile ɔ bo “fakyɛ” la kile kɛ “ɛfa kakɛ wɔahyɛ mɔɔ ɛnlie a.” Ɛhye ati, saa yɛfa awie mɔɔ ɛvo yɛ la ɛtane yɛkyɛ ye a, yɛmkpondɛ debie biala yɛnvi ye ɛkɛ. Ɛhulolɛ mɔɔ yɛlɛ kɛ yɛfa awie mɔ ɛtane yɛahyɛ bɛ la ɛngile kɛ yɛdie bɛ nvonleɛ ne yɛto nu anzɛɛ yɛyɛ kɛ asɛɛ mɔɔ bɛyɛ la ɛngyegye yɛ. Emomu, yɛsi kpɔkɛ kɛ yɛye ɛya mɔɔ awie ɛha yɛ la yɛavi yɛ nu, ɔnva nwo kɛ yɛlɛ adenle ‘yɛfa ɔ nwo ɛya’ la.

Nvasoɛ wɔ zo ɛnɛ ɔ? Kɛmɔ yɛnli munli la ati, yɛ kɔsɔɔti yɛyɛ ɛtane. (Wulomuma 3:23) Ɛhye ati nrɛlɛbɛ wɔ nu kɛ yɛbava awie mɔ ɛtane yɛahyɛ bɛ, ɔluakɛ tɛ ɛnɛ a tɛ ɛhyema yɛbahyia awie mɔɔ bava yɛ ɛtane ahyɛ yɛ la. Bieko, saa yɛfa ɛtane yɛkyɛ a, eza ɔboa yɛdayɛ mumua ne. Adenle boni azo?

Saa yɛfa ɛya yɛsie yɛ nu—na yɛanva ɛtane yɛangyɛ—a yɛboda yɛ nwo. Nganeɛdelɛ ɛtane zɛhae ɛmmaa yɛ nye ɛnlie, ɔmaa yɛyɛ basaa na yɛ rɛle bɔ. Eza bɛkola bɛmaa yɛ nwo to yɛ. Dk. Yoichi Chida nee Abɔlɔba Andrew Steptoe mɔɔ sukoa adwenle nee sonla nyɛleɛ nwo debie la hanle ye wɔ Journal of the American College of Cardiology anu kɛ: “Mɔɔ bɛnwu ye kenlensa ye la a le kɛ ɛya nee edwɛkɛ mɔɔ bɛfa bɛsie bɛ nu la maa bɛnyia ahonle ewule.”

Akee maa yɛzuzu nvasoɛ mɔɔ wɔ ɛtanefakyɛ zo la anwo. Saa yɛfa awie mɔ ɛtane yɛkyɛ bɛ a, ɔmaa koyɛlɛ nee anzodwolɛ tɛnla yɛ avinli, na yɛbɔ yɛ agɔnwolɛvalɛ ne anwo bane. Mɔɔ hyia kpalɛ la, yɛmaa ɔda ali kɛ yɛlɛsukoa Nyamenle, mɔɔ fa ɛtanevolɛma mɔɔ kɛnlu bɛ nwo ɛtane ɔkyɛ bɛ la. Na ɔkpondɛ kɛ yɛyɛ zɔhane ala.Maake 11:25; Ɛfɛsɛsema 4:32; 5:1.