Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILI | ƆHYIA KƐ YƐYƐ ASƆNE Ɔ?

Asɔneyɛlɛ—Mɔɔ Ɔkola Ɔyɛ Ɔmaa Wɔ La

Asɔneyɛlɛ—Mɔɔ Ɔkola Ɔyɛ Ɔmaa Wɔ La

Kolaa na wɔayɛ debie la, bie a ɛbabiza kɛ, ‘Kɛzi ɔbaboa me ɛ?’ Asoo ɔle nvonleɛ kɛ ɛbabiza kpuya ɛhye wɔ asɔneyɛlɛ nwo ɔ? Kyɛkyɛ. Yɛkulo kɛ yɛnwu kɛ saa ɔbaboa yɛ a.

Wɔ edwɛkɛ mɔɔ limoa la anu, yɛzuzule daselɛ mɔɔ kile kɛ asɔneyɛlɛ ɛnle ɛzonlenlɛ nu debie mɔɔ bɛyɛ ye dahuu anzɛɛ adwenle nu ayileyɛlɛ ala. Nɔhalɛ Nyamenle ne tie nzɛlɛlɛ. Saa yɛdua adenle kpalɛ zo yɛsɛlɛ ninyɛne mɔɔ fɛta la a, ɔbadie yɛ. Nɔhalɛ nu, ɔtu yɛ folɛ kɛ yɛbikye ye. (Gyemise 4:8) Ɛhye ati, saa yɛyɛ asɔne dahuu a, duzu a yɛ nye la kɛ yɛbanyia a? Maa yɛnlea nvasoɛ bie mɔ.

Anzodwolɛ.

Saa ɛyia ngyegyelɛ wɔ wɔ ɛbɛlabɔlɛ nu a, ɛmaa adwenledwenle fo ɛ nwo zo ɔ? Baebolo ne maa yɛ anwosesebɛ kɛ yɛyɛ “nzɛlɛlɛ dahuu” wɔ mekɛ ɛhye mɔ anu na ‘yɛva mɔɔ yɛhyia nwolɛ la yɛdo Nyamenle anyunlu.’ (1 Tɛsalonaekama 5:17; Felepaema 4:6) Baebolo ne maa yɛ anwosesebɛ kɛ saa yɛsɛlɛ Nyamenle a, ‘Ye anzodwolɛ ne mɔɔ bo sonla ndelebɛbo muala azo la bazie yɛ ahonle nee yɛ adwenle gyɛlɛɛnye.’ (Felepaema 4:7) Saa yɛka yɛ ahonle nu edwɛkɛ yɛkile yɛ anwuma Selɛ ne a, yɛbahola yɛanyia anzodwolɛ. Nɔhalɛ nu, ɔsi yɛ adua kɛ yɛyɛ zɔ. Edwɛndolɛ 55:22 se, “Fa wɔ adesoa ne maa [Gyihova], na ɔbazɔ wɔ nu.”

“Fa wɔ adesoa ne maa [Gyihova], na ɔbazɔ wɔ nu.”—Edwɛndolɛ 55:22

Menli dɔɔnwo mɔɔ wɔ ewiade ye anu la ɛnyia anzodwolɛ ɛhye. Hee Ran mɔɔ wɔ South Korea la se: “Megyi ngyegyelɛ ɛsesebɛ nloa ɛdeɛ, noko meyɛ nwolɛ asɔne a, mete nganeɛ kɛ adesoa ne azo ɛde na menyia anwosesebɛ megyinla ɔ nloa.”  Cecilia mɔɔ wɔ Philippines la ka kɛ: “Kɛ ɛrɛladane la, medwenle me mra mraalɛ nee me mame mɔɔ ewule bie ati ɔngola ɔnnwu me kpalɛ la anwo somaa. Ɔlua asɔneyɛlɛ ti, mekola meyɛ me gyima dahuu mɔɔ mendwenle dɔɔnwo a. Meze kɛ Gyihova baboa me yeamaa meanlea bɛ.”

Yɛnyia arɛlekyekyelɛ nee anwosesebɛ wɔ sɔnea mekɛ nu.

Adwenledwenle kpole bie ɛdo wɔ ɔ, wɔ ngoane la esiane nu anzɛɛ ɛwɔ tɛnlabelɛ bie mɔɔ ɛnle kpalɛ la anu ɔ? “Arɛlekyekyelɛ Nyamenle ne” mɔɔ ɛbazɛlɛ ye la bamaa ɛ nwo adɔ wɔ bɔkɔɔ. Baebolo ne ka kɛ “ɔkyekye yɛ rɛle wɔ amaneɛnwunlɛ kɔsɔɔti anu.” (2 Kɔlentema 1:3, 4) Kɛ neazo la, mekɛ bie mɔɔ Gyisɛse ɛlɛdi nyane kpole la, “ɔhotole ɔzɛlɛle.”  Duzu a zile a? ‘Anwumabɔvolɛma vi anwuma rale na bɛramaanle ye anwosesebɛ.’ (Luku 22:41, 43) Nɔhavonli bieko mɔɔ amumuyɛma nwunlonwunlanle ye kɛ bɛmaa yeagyakyi Nyamenle gyima ne ɛyɛlɛ la a le Nihɛmaya. Ɔzɛlɛle kɛ: “O Nyamenle, kpogya me sa zo ɛ!” Mɔɔ hɔle zo la maa yɛnwu kɛ Nyamenle boale ye maanle ɔyele ɛzulolɛ biala ɔvile ye nu na ɔwiele ye gyima ne. (Nihɛmaya 6:9-16) Reginald mɔɔ wɔ Ghana la ka ye asɔneyɛlɛ nwo edwɛkɛ kɛ: “Saa meyɛ asɔne wɔ tɛnlabelɛ mɔɔ yɛ se la anu a, ɔmaa mete nganeɛ kɛ meha me ngyegyelɛ mehile awie mɔɔ bahola aboa me la na ɔkyekye me rɛle kɛ memmasulo fee.” Ɛhɛe, saa yɛyɛ asɔne a Nyamenle bahola akyekye yɛ rɛle.

Yɛnyia nrɛlɛbɛ yɛfi Nyamenle ɛkɛ.

Kpɔkɛ bie mɔ mɔɔ yɛsi la kola ka yɛ nee yɛ abusua ne kpalɛ. Kɛ ɔkɛyɛ na yɛazi kpɔkɛ kpalɛ ɛ? Baebolo ne se: “Saa bɛ nuhua bie hyia nrɛlɛbɛ [titili amaa yeava yeagyinla sɔnea nloa] a, ɔzɛlɛ Nyamenle na ɔkɛva ɔkɛmaa ye; ɔboalekɛ Nyamenle ati akunlu le kɛnlɛma na ɔyila bɛdabɛ mɔɔ bɛbiza ye debie la.” (Gyemise 1:5) Saa yɛsɛlɛ nrɛlɛbɛ a, Nyamenle bahola ava ye sunsum nwuanzanwuanza ne aboa yɛ amaa yɛazi kpɔkɛ kpalɛ. Nɔhalɛ nu, yɛbahola yɛazɛlɛ sunsum nwuanzanwuanza ne ɔluakɛ Gyisɛse zele yɛ kɛ ‘Selɛ ne mɔɔ wɔ anwuma la bava Sunsum Nwuanzanwuanza ne amaa bɛdabɛ mɔɔ bɛkɛbiza ye la!’Luku 11:13.

“Menzɛlɛle Gyihova dahuu kɛ ɔboa me ɔmaa menzi kpɔkɛ kpalɛ.”—Kwabena, Ghana

Gyisɛse noko kpondɛle moalɛ vile ye Papa ɛkɛ wɔ mekɛ mɔɔ ɔsi kpɔkɛ mɔɔ anwo hyia la. Baebolo ne ka kile yɛ kɛ mekɛ mɔɔ ɛnee ɔkulo kɛ ɔye mrenyia 12 mɔɔ bayɛ ye ɛzoanvolɛma la, “ɔzɛlɛle Nyamenle nɔe ne amuala.”Luku 6:12.

Kɛ Gyisɛse la, ɛnɛ menli dɔɔnwo ɛnyia anwosesebɛ wɔ mekɛ mɔɔ bɛkɛnwu kɛ Nyamenle ɛboa bɛ ɛmaa bɛzi kpɔkɛ kpalɛ la. Regina mɔɔ wɔ Philippines la ka ngyegyelɛ ngakyile mɔɔ ɔyiale, mɔɔ bie a le kɛ ɔnea ɔ nwo nee ye abusua ne wɔ mekɛ mɔɔ ɔ hu wule, ye gyima vile ɔ sa nee ngyegyelɛ mɔɔ ɔyiale wɔ ngakula ɛtetelɛ nu la anwo edwɛkɛ. Duzu a ɛboa ye ɛmaa yezi kpɔkɛ kpalɛ a? Ɔse, “Medua asɔneyɛlɛ zo mefa me nwo meto Gyihova anwo zo.” Kwabena mɔɔ wɔ Ghana la ka deɛmɔti ɔbizale Nyamenle moalɛ la anwo edwɛkɛ kɛ, “Suazilɛ gyima mɔɔ bɛtua me kakɛ kpalɛ la vile me sa.” Mɔɔ ɔlɛsuzu mɔɔ ɔbayɛ la anwo la, ɔse, “Menzɛlɛle Gyihova dahuu kɛ ɔboa me ɔmaa menzi kpɔkɛ kpalɛ.” Ɔtoa zo kɛ, “Meze ye wienyi kɛ Gyihova boale me maanle menyianle gyima mɔɔ baboa me yeamaa meali me sunsum nu nee me nwonane nu ngyianlɛ nwo gyima kpalɛ la.” Saa ɛyɛ debie mɔɔ bahola azɛkye ɛ nee Nyamenle agɔnwolɛvalɛ ne la anwo asɔne a, ɛbanwu kɛ ɔbaboa wɔ.

Yɛha ninyɛne ekyi mɔɔ asɔneyɛlɛ bahola ayɛ amaa yɛ la anwo edwɛkɛ. (Saa ɛkpondɛ nwolɛ neazo dɔɔnwo a, nea ɛlɛka “ Asɔneyɛlɛ Zo Nvasoɛ.”) Noko amaa wɔanyia nvasoɛ ɛhye mɔ la, ɔwɔ kɛ ɛdimoa ɛnwu Nyamenle nee ye ɛhulolɛdeɛ ne. Saa ɛhye a ɛkpondɛ a, yɛsi wɔ adua kɛ biza Gyihova Alasevolɛ ne mɔ maa bɛboa wɔ na sukoa Baebolo ne. * Ɛhye bayɛ debie mɔɔ limoa mɔɔ bamaa wɔabikye ‘nzɛlɛlɛ Tievolɛ ne’ a.Edwɛndolɛ 65:2.