Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILI | GYIHOVA ALASEVOLƐ A LE NWANE MƆ?

Duzu Menli A Le Gyihova Alasevolɛ?

Duzu Menli A Le Gyihova Alasevolɛ?

Yɛle maanle maanle avinli ahyehyɛdeɛ mɔɔ yɛnva yɛ nwo yɛnwulowula asɔne ekpunli gyɛne nu a. Yɛ ewiade amuala gyima ne ati ne wɔ United States ɛdeɛ, noko Gyihova Alasevolɛ ne mɔ dɔɔnwo wɔ maanle ngakyile zo. Yɛ nuhua kɛyɛ mgbe mɔtwɛ kilehile menli Baebolo ne wɔ maanle mɔɔ bo 230 la azo. Yɛyɛ ɛhye yɛfa yɛdi Gyisɛse edwɛkɛ mɔɔ se: “Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra” la azo.—Mateyu 24:14.

Ɔnva nwo ɛleka biala mɔɔ yɛde la, yɛnea boɛ kɛ yɛbali mɛla zo. Noko yɛbɔ mɔdenle kɛ yɛnrɛgyinla afoa biala wɔ maanyɛlɛ nu. Yɛyɛ ɛhye ɔluakɛ yɛdi Gyisɛse adehilelɛ mɔɔ yeva yemaa Kilisienema kɛ yɛnle “ɛtane ewiade ɛdeɛ” la azo. Ɛhye ati yɛnva yɛ nwo yɛnwulowula maanyɛlɛ nu anzɛɛ yɛngɔ konle. (Dwɔn 15:19; 17:16) Nɔhalɛ nu, wɔ Ewiade Konle II la anu, bɛguale Gyihova Alasevolɛ efiade, bɛhilele bɛ nyane dɔɔnwo ɔluakɛ bɛangyinla afoa biala la ati. Germany ɛsɔfo kpanyinli bie hɛlɛle kɛ: “Bɛmɛ ala a bɛ diedi ti bɛkpole kɛ bɛkɛhɔ sogya wɔ Germany Tumililɛ ne abo a.”

“[Gyihova Alasevolɛ] lɛ subane kpalɛ. Yɛkola yɛmaa menli zɛhae mɔɔ bɛnle angomedi la gyinlabelɛ kpole wɔ maanyɛlɛ nu—noko yɛ sa ɛnrɛha bɛ ɛlɛ. . . . Bɛbu arane mgbanyima noko bɛdie bɛdi kɛ Nyamenle Belemgbunlililɛ ne ala a kolaa di alesama ngyegyelɛ kɔsɔɔti anwo gyima a.”—Nová Svoboda adwelie kɛlata, Czech Republic.

Noko yɛndwe yɛ nwo yɛnvi menli nwo. Gyisɛse zɛlɛle Nyamenle maanle ye ɛdoavolɛma ne kɛ: “Membiza kɛ ɛye bɛ ɛvi ewiade ye anu.” (Dwɔn 17:15) Ɛhye ati, ɛbahola wɔanwu yɛ kɛ yɛyɛ gyima, yɛdi gua na yɛkɔ sukulu wɔ ɛleka mɔɔ yɛwɔ la.