Wulu kɔ nuhua edwɛkɛ ne azo

Wulu kɔ nuninyɛne ne azo

Ɛ Rɛle Ɛbɔ Wɔ Nyamenle Anwo Ɔ?

Ɛ Rɛle Ɛbɔ Wɔ Nyamenle Anwo Ɔ?

“DUZU ATI Ɔ? Duzu ati a Nyamenle ɛmaa ɛhye ɛdo me a?” Kpuya ɛhye mɔ gyegyele Sidnei mɔɔ ɛli ɛvolɛ 24 na ɔvi Brazil la. Esiane mɔɔ dole ye wɔ azule bie anu la ɛmaa yeha abuburama ehwili nu bɔkɔɔ.

Amaneɛnwunlɛ mɔɔ anwodolɛ, kulovolɛ bie ewule, esiane anzɛɛ konle fa ba la maa menli rɛle bɔ wɔ Nyamenle anwo. Ɛhye ɛnle debie fofolɛ. Esiane dɔɔnwo totole Dwobu mɔɔ dɛnlanle aze wɔ tete ne la. Ɔbɔle Nyamenle somolɛ mɔɔ ɔnle ye adenle zo la kɛ: “Mesu mefɛlɛ wɔ, na ɛnlie me zo; mesɛlɛ, noko ɛndie me. Wɔyɛ me atisesebɛ; ɛfa wɔ tumi kpole ne ɛyɛ me kpɔdekpɔde.”—Dwobu 30:20, 21.

Ɛnee Dwobu ɛnze ɛleka mɔɔ ye ngyegyelɛ ne abo vi nee deɛmɔti bɛrale ɔ nwo zo la. Ɔyɛ anyelielɛ kɛ, Baebolo ne maa yɛnwu deɛmɔti ninyɛne zɛhae sisi nee kɛzi ɔwɔ kɛ yɛdi nwolɛ gyima la.

ASOO NYAMENLE KULO KƐ MENLI NWU AMANEƐ?

Baebolo ne ka ye wɔ Nyamenle anwo kɛ: “Bodane ne, ye gyima di munli, ɔluakɛ ɔdi pɛlepɛle. Ɔle Nyamenle mɔɔ di nɔhalɛ, ɔnle amumuyɛ, ɔdi pɛlepɛle, ye edwɛkɛ le fɔɔnwo.” (Mɛla ne 32:4) Yemɔti, asoo ɔfɛta anzɛɛ ndelebɛbo wɔ nu kɛ Nyamenle mɔɔ ‘ɔdi pɛlepɛle, na ye edwɛkɛ le fɔɔnwo’ la bamaa alesama anwu amaneɛ anzɛɛ ɔbava amaneɛnwunlɛ yeahwe bɛ nzo anzɛɛ yeade bɛ nwo ɔ?

Emomu, Baebolo ne ka kile yɛ kɛ: “Saa awie kɔ ngyegyelɛ nu a ɔmmaka kɛ, ‘Nyamenle ɛlɛsɔ me anlea.’ Ɔluakɛ ɛtane ɛngola ɛnzɔ Nyamenle ɛnnea yɛɛ Nyamenle mumua ne ɛnzɔ awie biala ɛnnea.” (Gyemise 1:13) Nɔhalɛ nu, yɛnwu ye wɔ Baebolo ne anu kɛ Nyamenle maanle alesama asetɛnla kpalɛ wɔ mɔlebɛbo ne. Ɔmaanle Adam nee Yive awuke kɛnlɛma mɔɔ bɛngyia debie biala anwo na ɔmaanle bɛ gyima mɔɔ nvasoɛ wɔ zo la kɛ bɛyɛ. Nyamenle zele bɛ kɛ: “Bɛlɔ, bɛyɛ mɔnwo mɔnwo, bɛyi azɛlɛ ye na bɛzie azɛlɛ ye.” Ɛnee Adam nee Yive ɛnlɛ debie biala ɛngyinla zo ɛmbɔ Nyamenle somolɛ.—Mɔlebɛbo 1:28.

Noko, ɛnɛ tɛnlabelɛ ne ɛnle kpalɛ fee. Nɔhalɛ nu, alesama ngyegyelɛ ne le kpole ɔvi tete ne amuala. Ɔda ali kɛ: “Toonwo mɔɔ yeradwu ɛnɛ la abɔdeɛ muala ɛlɛte nyane kɛ asɛɛ yevo awolɛ zo.” (Wulomuma 8:22) Kɛ ɔrale ye ɛ?

DUZU ATI A AMANEƐNWUNLƐ WƆ ƐKƐ A?

Amaa yɛade deɛmɔti amaneɛnwunlɛ wɔ ɛkɛ ne abo la ɔwɔ kɛ yɛkakye mekɛ mɔɔ ɔbɔle ɔ bo la. Anwumabɔvolɛ ne mɔɔ dele atua na nzinlii bɛvɛlɛle Seetan Abɔnsam la bɛlɛbɛlale Adam nee Yive. Ɔmaanle bɛkpole Nyamenle ngyinlazo mɔɔ fane kpalɛ nee ɛtane nwo mɛla ne mɔɔ ɔgyi ɛkɛ ne ɔmaa “kpalɛ nee ɛtane ɛnwunlɛ baka ne” mɔɔ ɔhanle kɛ bɛmmadi bie la. Abɔnsam zele Yive kɛ saa bɛyɛ Nyamenle anwo anzosesebɛ a bɛnrɛwu, ɔlua zo ɔdonle Nyamenle ɛzonle kɛ ɔle adalɛ. Seetan eza donle Nyamenle ɛzonle kɛ ɔmmaa ye menli ɛnzi bɛ ti anwo kpɔkɛ wɔ mɔɔ le kpalɛ nee ɛtane la anwo. (Mɔlebɛbo 2:17; 3:1-6) Ɛnee Seetan ɛlɛkile kɛ saa alesama twe bɛ nwo fi Nyamenle tumililɛ bo a, bɛ nwo badɔ bɛ. Ɛhye mɔ amuala vale edwɛkɛ mɔɔ anwo hyia la rale—Asoo ɔfɛta kɛ Nyamenle di tumi ɔ?

Abɔnsam maanle edwɛkɛ bieko rale. Ɔbɔle alesama somolɛ kɛ tɛ bɛ ɛhulolɛ nu a bɛfi bɛsonle Nyamenle a. Abɔnsam hanle nɔhavonli Dwobu anwo edwɛkɛ hilele Nyamenle kɛ: “Wɔbɔ ɔdaye, ɔ mra nee debie biala mɔɔ ɔlɛ la anwo bane. Dahuu ɛsinza ye, ye abusua ne nee debie biala mɔɔ ɔlɛ la. . . . Saa ɛkulo a die debie biala mɔɔ ɔlɛ la fi ɔ sa nu na ɛkɛde mgbole mɔɔ ɔkɛheha ɔkɛtietia wɔ la.” (Dwobu 1:10, 11) Edwɛkɛ mɔɔ Seetan hanle la fane Dwobu anwo ɛdeɛ, noko mɔɔ ɛnee ɔlɛkile la a le kɛ alesama amuala ɛnvi bɛ ɛhulolɛ nu a bɛsonle Nyamenle a.

KƐZI NYAMENLE BAZIEZIE EDWƐKƐ NE LA

Adenle kpalɛ boni a bɛbalua zo bɛaziezie edwɛkɛ ɛhye mɔ mɔɔ anwo hyia la bɔkɔɔ a? Nyamenle mɔɔ ze nrɛlɛbɛ tɛla awie biala la a lɛ ye sɔbelɛ a—mɔɔ ɔmmaa yɛ rɛle ɛmbɔ a. (Wulomuma 11:33) Ɔzile kpɔkɛ kɛ ɔbamaa alesama azie bɛ nwo mekɛ bie na mɔɔ bavi nu ara la bamaa bɛnwu ahenle mɔɔ ye tumililɛ ne fɛta la.

Ngyegyelɛ mɔɔ wɔ azɛlɛ ye azo ɛnɛ la di daselɛ  wienyi kɛ alesama tumililɛ ɛkpo aze. Ewiade arane ngakyile ne ɛngola ɛnva anzodwolɛ, banebɔlɛ nee anyelielɛ ɛmba, eza bɛlɛsɛkye azɛlɛ ne. Ɛhye si nɔhalɛ edwɛkɛ mɔɔ wɔ Baebolo ne anu la azo kɛ: “Meze kɛ sonla ɔdaye ɔnlɛ ɔ nwo; sonla ɔdaye ɔnlɛ ye ngoane zo tumi.” (Gyɛlɛmaya 10:23) Nyamenle tumililɛ ne angome a bahola ava dahuu anzodwolɛ, anyelielɛ nee anwodɔlɛ arɛlɛ alesama a ɔluakɛ ɔle Nyamenle bodane.—Ayezaya 45:18.

Kɛzi Nyamenle bamaa ye bodane mɔɔ ɔlɛ ɔmaa alesama la ara nu ɛ? Kakye kɛ Gyisɛse hilele ye ɛdoavolɛma ne kɛ bɛzɛlɛ kɛ: “Wɔ belemgbunlililɛ ɛrɛla; Bɛyɛ Wɔ ɛhulolɛdeɛ wɔ azɛlɛ ye azo, Kɛmɔ bɛyɛ ye wɔ anwuma lɔ la.” (Mateyu 6:10) Ɔnrɛhyɛ biala, Nyamenle balua ye Belemgbunlililɛ ne azo aye mɔɔ fa amaneɛnwunlɛ ba la kɔsɔɔti avi ɛkɛ. (Daneɛle 2:44) Ehyia, ewule ngakyile nee ewule bapɛ nu. Baebolo ne ka ye wɔ ehyiavolɛma anwo kɛ, Nyamenle balie “ehyianli nee mɔɔ ɛnlɛ boavolɛ la.” (Edwɛndolɛ 72:12-14) Mɔɔ fane anwodolɛ nwo la, Baebolo ne bɔ ɛwɔkɛ kɛ: “Na awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’” (Ayezaya 33:24) Gyisɛse hanle ye wɔ mowuamra mɔɔ Nyamenle kakye bɛ la anwo kɛ: “Mekɛ ɛlɛba mɔɔ mɔwuamra amuala bade ɔ ne wɔ bɛ nla ne mɔ anu, na bɛvi bɛ nla ne mɔ anu bɛbavinde.” (Dwɔn 5:28, 29) Ɛwɔkɛ mɔɔ ka ahonle la boni ɛne!

Saa yɛnyia diedi wɔ Nyamenle ɛwɔkɛ ne mɔ anu a, ɔbaboa yɛ yeamaa yɛali nganeɛdelɛ biala mɔɔ maa yɛ rɛle bɔ wɔ ɔ nwo la azo konim

DI BƐ RƐLE ƐBƆLƐ ZO KONIM

Sidnei mɔɔ yɛha ɔ nwo edwɛkɛ la yiale esiane ne la, ye ɛvolɛ 17 anzi ɔhanle kɛ: “Metɛbɔle Gyihova Nyamenle somolɛ ɛlɛ wɔ esiane ɛhye anwo, noko ɔwɔ kɛ medie meto nu kɛ mɔlebɛbo ne me rɛle bɔle wɔ ɔ nwo. Saa medwenle wuliravolɛ mɔɔ meyɛ la anwo a, ɔyɛ a me rɛle bɔ na mesu. Noko, Baebolo ne ɛmaa mede ɔ bo kɛ esiane ɛnle anzohwenlɛ mɔɔ vi Nyamenle ɛkɛ a. Kɛmɔ Baebolo ne ka la, “tɛ mekɛ ne amuala a bɛdi ye moavolɛ a.” Nzɛlɛlɛ mɔɔ mefa meto Gyihova anyunlu nee ngɛlɛlera kpɔtee bie mɔ mɔɔ mekenga la ɛmaa menyia sunsum nu anwosesebɛ na ɔboa me ɔmaa menyia adwenle kpalɛ.”—Nolobɔvo ne 9:11; Edwɛndolɛ 145:18; 2 Kɔlentema 4:8, 9, 16.

Saa yɛmaa deɛmɔti Nyamenle maa amaneɛnwunlɛ nwo adenle nee kɛzi ɔnrɛhyɛ ɔbaye yeavi ɛkɛ ne la tɛnla yɛ adwenle nu a, ɔbaboa yɛ yeamaa yɛali nganeɛdelɛ biala mɔɔ maa yɛ rɛle bɔ wɔ Nyamenle anwo la azo konim. Nyamenle ɛbɔ yɛ ɛwɔkɛ kɛ ‘ɔyila bɛdabɛ mɔɔ bɛkpondɛ ɔ bo zo la.’ Awie biala mɔɔ kɛlie ye nee ɔ Ra ne kɛli la anyunlu ɛnrɛgua aze anzɛɛ arɛle ɛnrɛbɔ.—Hibuluma 11:6; Wulomuma 10:11.