Wulu kɔ nuhua edwɛkɛ ne azo

Wulu kɔ nuninyɛne ne azo

 ƐBƐLABƆLƐ NU EDWƐKƐ

Mɔɔ Gyihova Ɛyɛ Ɛmaa Me La Zonle Somaa

Mɔɔ Gyihova Ɛyɛ Ɛmaa Me La Zonle Somaa

Mekɛ mɔɔ menyianle ɛvolɛ 17 la ɛnee mɔɔ medwenle nwo nee bodane mɔɔ gyi me nye zo la le kɛ mgbavolɛ dɔɔnwo ɛdeɛ ne ala la. Me nee me gɔnwo mɔ tu, yɛbia nzule na yɛbɔ bɔlo. Noko kenle ko nɔsolɛ bie me ɛbɛlabɔlɛ ne hakyile bɔkɔɔ. Moto dole me aze maanle menyɛle wuliravolɛ. Ɛhye zile la yebo ɛvolɛ kɛyɛ 30, na yemaa meha sua nu.

Menyinle wɔ Alicante mɔɔ wɔ Spain aduduleɛ ɛnweazo la azo. Ɛnee koyɛlɛ ɛnle me abusua ne anu, yemɔti kɛ kakula la ɛnee mefinde a ɔkyɛ na meara sua nu. Ɛnee menli mɔɔ yɛ taye boɛ la gyima nu bikye yɛ sua ne. José María mɔɔ yɛ gyima wɔ ɛkɛ ne la rayɛle me gɔnwo. Ɔle awie mɔɔ te ɔ nyunlu na ɔdwenle me nwo a. Ɛnee mennyia ye zɔ wɔ me abusua ne anu. Saa mewɔ anwongyelelɛ nu a, ɔle kɛ me diema nrenyia la​—agɔnwolɛ kpalɛ, ɔnva nwo kɛ ɔtɛla me ɛvolɛ 20 la.

Ɛnee José María nee Gyihova Alasevolɛ ɛlɛsukoa Baebolo ne. Mekola meka kɛ ɛnee ɔ nye die Ngɛlɛlera ne anwo, na ɔta ɔka Baebolo nu nɔhalɛ ne bie ɔkile me. Mefi ɛbulɛ nu metie ye, noko ɛnee me nye ɛnlie mɔɔ ɔka la anwo fee. Kɛ kpavolɛ la, memaanle ninyɛne dɔɔnwo liele me mekɛ. Noko akee, ɛnee ɛhye bahakyi.

ESIANE MƆƆ HAKYILE ME ƐBƐLABƆLƐ LA

Mengulo kɛ mebaha esiane ɛhye anwo edwɛkɛ dɔɔnwo. Mɔɔ mebaha la a le kɛ menyɛle ngoaseade na meannea boɛ. Kenle ko demua, me ɛbɛlabɔlɛ hakyile bɔkɔɔ. Kɛ kpavolɛ mɔɔ melɛ anwosesebɛ la, arɛlevilɛ nu ala menyɛle wuliravolɛ na bɛdole me asopiti. Ɛnee ɔyɛ se kɛ mebalie tɛnlabelɛ ɛhye meado nu. Mengɔle zo membizale me nwo kɛ, ‘Nvasoɛ wɔ zo kɛ mebadɛnla aze ɔ?’

José María rakpɔlale me, na ɔyɛle ngyehyɛleɛ ɔmaanle Gyihova Alasevolɛ mɔɔ wɔ ɛkɛ ne la rakpɔlale me wɔ asopiti ɛkɛ. Bɛ ɛkpɔlalɛ ne hanle me ahonle. Bɛyele me bɛvile ɛleka mɔɔ bɛlɛyɛ me ayile la, yeangyɛ yɛɛ membɔle ɔ bo kɛ mesukoa Baebolo ne a. Menwunle nɔhalɛ ne mɔɔ fane deɛmɔti menli nwu amaneɛ na bɛwu nee deɛmɔti Nyamenle maa ninyɛndane nwo adenle la. Eza menzukoale Nyamenle ɛwɔkɛ mɔɔ fane kenle bie anwo, mɔɔ alesama mɔɔ di munli la bayi azɛlɛ ne azo na awie biala ɛnrɛha ye ɛlɛ kɛ: “Me nwo ɛdo me.” (Ayezaya 33:24) Ɔle mekɛ mɔɔ limoa wɔ me ɛbɛlabɔlɛ nu mɔɔ menwunle anyelazo kɛnlɛma ɛhye a.

Mekɛ mɔɔ bɛyele me bɛvile asopiti la, menyianle anyuhɔlɛ ndɛndɛ wɔ me Baebolo ɛzukoalɛ nu. Ɔlua ehwili kpalɛ mɔɔ menyianle la ati, ɛnee mekola mekɔ Gyihova Alasevolɛ ne mɔ debiezukoalɛ ne bie na mebɔ edwɛkpa ne nolo. Bɛzɔnenle me wɔ November 5, 1988 wɔ debie mɔɔ bɛda nu bɛbia la anu wɔ mekɛ mɔɔ ɛnee meli ɛvolɛ 20 la. Gyihova Nyamenle ɛboa me ɛmaa menyia ɛbɛlabɔlɛ nwo adwenle kpalɛ. Noko duzu a mebahola meayɛ meahile nwolɛ anyezɔlɛ a?

 MELE WULIRAVOLƐ NOKO MENYIANLE ANYUHƆLƐ

Ɛnee meze kpɔkɛ kɛ menrɛmaa me tɛnlabelɛ ne ɛnrɛzi me adenle kɛ mebayɛ mɔɔ mebahola biala wɔ Gyihova ɛzonlenlɛ nu. Ɛnee mekpondɛ kɛ menyia anyuhɔlɛ. (1 Temɔte 4:15) Mɔlebɛbo ne, ɛnee ɔnla aze ɔluakɛ me abusua ne anye ɛnlie me diedi fofolɛ ne anwo. Noko ɛnee melɛ me gɔnwo mɔ diedima, mɔɔ bɛle me sunsum nu mediema mrenyia nee mraalɛ. Mediema ne mɔ bafa me kɔ debiezukoalɛ nee daselɛlilɛ dahuu.

Noko, mekɛ hɔle bie la, ɔlale ali kɛ mehyia awie mɔɔ banlea me kenle ko biala a. Mekɛ mɔɔ ɛnee mekpondɛ bie dedee la, menyianle asopiti bie mɔɔ bɛnea wuliravolɛma la wɔ Valencia. Ɔwɔ Alicante sɔlɔ na bɛ avinli bayɛ mayɛle 100 (km 160). Ɛkɛ ne rayɛle me sua nu bɔkɔɔ.

Meha sua nu ɛdeɛ, noko mezi kpɔkɛ kɛ mebaha me diedi ne anwo edwɛkɛ meahile awie mɔ

Meha sua nu ɛdeɛ, noko menzile pi kɛ mekɔ zo meazonle Gyihova. Menvale ezukoa mɔɔ bɛvale bɛmaanle me ɔluakɛ mele wuliravolɛ la ati nee moalɛ gyɛne mɔɔ menyianle la mendɔle kɔmpita na bɛhyehyɛle ye wɔ me ɛkpa ne foa ko. Eza mendɔle fonu. Nwonlomɔ biala, menli mɔɔ nea me la sɔ me kɔmpita nee me fonu ne sie zo. Mefa me kɛsa memiemia debie bie azo amaa meava kɔmpita ne meayɛ gyima. Eza melɛ baka bie mɔɔ mefa mesia me nloa anu. Baka ɛhye maa mekola mekɛlɛ debie na mefa mefɛlɛ awie wɔ me fonu ne azo.

Mefa me baka ne mebɔ nɔma wɔ me fonu ne azo

Kɛzi ninyɛne ɛhye mɔ ɛboa me ɛ? Mɔɔ limoa la, ɔmaa mekɔ jw.org wɛbsaete nee Ɛzinzalɛ Arane YINTANƐTE ZO MBULUKUZIELƐLEKA ne azo. Nea kɛzi ninyɛne ɛhye mɔ ɛboa me a! Mefa mekɛ dɔɔnwo mesukoa na meyɛ neɛnleanu wɔ mbuluku mɔɔ gyi Baebolo ne azo amaa meahɔ zo meazukoa Nyamenle nee ye subane ngɛnlɛma ne anwo debie. Mekɛ biala mɔɔ me nwo kɛyɛ me koonwu anzɛɛ me sa nu kɛdo la, menyia debie wɔ wɛbsaete ne azo mɔɔ maa me nye die a.

Eza me kɔmpita ne maa metie mɔɔ bɛyɛ ye wɔ asafo debiezukoalɛ bo la na mefa me nwo mewula nu. Mekola memaa mualɛ, meyɛ asɔne, memaa ɛdendɛlɛ na bɔbɔ mekenga Ɛzinzalɛ Arane magazine wɔ mekɛ mɔɔ bɛkɛva bɛkɛmaa me la. Mengola mengɔ debiezukoalɛ bo ɛdeɛ, noko mete nganeɛ kɛ meboka asafo ne anwo.

Fonu nee kɔmpita mɔɔ melɛ la maa mekola meyɛ daselɛlilɛ gyima ne bie. Nɔhalɛ nu, mengola menyɛ azua nu daselɛlilɛ kɛmɔ Gyihova Alasevolɛ ne mɔ yɛ la. Noko ɛhye ɛtɛsile me adenle. Medua ninyɛne ɛhye mɔ azo meka me diedi ne anwo edwɛkɛ mekile awie mɔ. Nɔhalɛ nu, me nye die kɛ mebava me fonu ne meali adwelie, ɔlua ɛhye ati mgbanyima ne mɔ se menyɛ daselɛlilɛ mɔɔ bɛyɛ ye fonu zo la anwo ngyehyɛleɛ. Ɛhye mɔ boa mediema mɔɔ bɛwɔ asafo ne anu mɔɔ bɛha sua nu la.

Melɛyɛ Baebolo debiezukoalɛ

 Noko tɛ ninyɛne ɛhye mɔ a dahuu meyɛ a. Kenle ko biala, me gɔnwo mɔ bakpɔla me. Bɛ nee bɛ mbusuafoɔ nee bɛ gɔnwo mɔ mɔɔ bɛ nye die Baebolo ne anwo la a ba a. Fane dɔɔnwo ne ala, bɛmaa me nee bɛ di adwelie. Ɔyɛ a, mbusua bie mɔ bakpɔla me na yɛ muala yɛbɔ nu yɛyɛ abusua ɛzonlenlɛ. Saa ngakula tɛnla me ɛkpa ne azo na bɛka deɛmɔti bɛkulo Gyihova la bɛkile me a, ɔmaa me nye die kpalɛ.

Me nee me gɔnwo mɔ ɛlɛyɛ nɔsolɛ abusua ɛzonlenlɛ

Me nye die kɛ menli dɔɔnwo bakpɔla me la. Dahuu menli yi me sua nu ɛkɛ, agɔnwolɛma mɔɔ wɔ me kpalɛzo nee mɔɔ bɛvi moa la boka nwo. Ɛkola ɛnwu ye kɛ ɛlɔlɛ mɔɔ bɛda ye ali bɛkile me la si bɛdabɛ mɔɔ bɛlɛnea me la anwo. Meyɛ Gyihova mo dahuu kɛ yemaa meboka mediemayɛlɛ ɛhye mɔɔ yɛ nwanwane la anwo.

MEGUA ZO METƐKO

Mekɛ biala mɔɔ bɛkɛbiza me ahye nee me akpɔkɛ nu la, meka ye sikalɛ kɛ, “Me nwo le kpalɛ na megua zo metɛko!” Nɔhalɛ, meze kɛ tɛ me ngome a melɛko konle ɛhye a. Kɛzi yɛ tɛnlabelɛ anzɛɛ yɛ ngyegyelɛ ne de biala la, Kilisienema kɔsɔɔti ɛlɛko “diedi nu konle kpalɛ ne.” (1 Temɔte 6:12) Duzu a ɛboa me ɛmaa meho wɔ ɛvolɛ dɔɔnwo ɛhye anu a? Mesɛlɛ Gyihova dahuu na meyɛ ye mo kɛ yemaa menyia bodane kpalɛ wɔ ɛbɛlabɔlɛ nu la. Mebɔ mɔdenle kɛ mebayɛ dɔɔnwo wɔ Nyamenle ɛzonlenlɛ nu, mefa me nye mesie kenle bie anyelazo ne azo.

José María

Meta medwenle ewiade fofolɛ ne nee kɛzi mebanriandi na meawuluwulu bieko la anwo. Ɔyɛ a, me nee me gɔnwo kpalɛ José María mɔɔ ɔ gyakɛ ɛyɛ wuliravolɛ la bɔ ngoayɛ kɛ me nee ye bazu ɛnriandilɛ tendenle. Mebiza ye kɛ, “Nwane a bali konim a?” Ɔbua kɛ, “Ɔngyia kɛ yɛbanwu mɔɔ bali konim la. Mɔɔ hyia la a le kɛ yɛbahɔ Paladaese na yɛazu ɛnriandilɛ ne.”

Ɔnla aze ɔmmaa me kɛ mebagyinla me ewule ne anloa. Meze kɛ, kɛ kpavolɛ la, menyɛle ngoaseade na ɛhye ɛha me kpalɛ. Noko, meyɛ Gyihova mo kɛ yeamkpo me la. Yeyɛ dɔɔnwo yemaa me​—sunsum nu abusua kpole, ngoane nu mɔɔ mede, anyelielɛ mɔɔ mefa meboa awie mɔ, nee kenle bie anyelazo mɔɔ yɛ anyelielɛ la. Saa mebaha kɛzi mete nganeɛ la sikalɛ a, anrɛɛ mebaha kɛ mɔɔ Gyihova ɛyɛ ɛmaa me la zonle somaa.