Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILI | KƐZI BƐGYINLA ADWENLEADWENLE NLOA LA

Ezukoa Nwo Adwenleadwenle

Ezukoa Nwo Adwenleadwenle

Paul, kunli bie mɔɔ lɛ ngakula nwiɔ la se, “Mekɛ mɔɔ ninyɛne awolɛ yɛle se wɔ yɛ maanle ne anu la ɔmaanle aleɛ nwo hyianle na ye bolɛ vole. Yɛgyinla dedee, noko ɔkadwu yɛ nwo zo la ɛnee aleɛ ne ɛwie. Ɛhɔne ti, menli nwanle, na bie mɔ anye zo bulule bɛ wɔ gua ne azo. Ninyɛne mɔɔ yɛhyia nwo la awolɛ vole. Awieleɛ ne, ɛnee ezukoa ne ɛnza ɛhwee yɛ. Me ezukoa mɔɔ la bange, insurance nee me pɛnhyɛn ezukoa ne azo dele mɔɔ ɔnza ɛhwee yɛ a.”

Paul

Ɛnee Paul ze kɛ amaa ye abusua ne asa ahɔ bɛ nloa la, ɛnee ɔwɔ kɛ ɔfa “nrɛlɛbɛ” ɔdi gyima. (Mrɛlɛbulɛ 3:21) Ɔka kɛ, “Ɛnee meyɛ ngɛnlaneɛ nwo gyima, noko menyɛle gyima biala mɔɔ me sa kɛzɔ nu la. Ɛnee ezukoa ne ɛndwu mɔɔ medie ye dɛba ne la. Bie mɔ vale aleɛ anzɛɛ ninyɛne duale me kakɛ. Saa bɛfa saminla nna bɛtua me kakɛ a, mefa nwiɔ na metɔne nwiɔ. Awieleɛ kolaa ne, menyianle ngɔkɔlɛ mralɛ 40. Bɛyɛle mgbole la, mendɔnenle bɛ na mendɔle 300 bieko. Nzinlii, menvale ngɔkɔlɛ 50 menliele abɛlɛ mɔɔ bɛdi la kodoku nwiɔ mɔɔ ye ɛnlomboɛ le kilo 50. Menvale meneanle me abusua ne nee mbusua gyɛne mekɛ tendenle.”

Eza Paul nwunle kɛ debie kpalɛ mɔɔ awie biala bahola ayɛ la a le kɛ ɔbanyia Nyamenle anu diedi. Saa yɛyɛ mɔɔ Nyamenle kulo la a, ɔboa yɛ. Mɔɔ fane nwonane afoa nu ninyɛne nwo la, Gyisɛse hanle kɛ: ‘Bɛmmamaa bɛ adwenle sɛkye. Ɔluakɛ bɛ Ze mɔɔ wɔ anwuma la ze kɛ bɛhyia ɛhye mɔ anwo.’Luku 12:29-31.

Ɔyɛ alɔbɔlɛ kɛ, Nyamenle kpɔvolɛ kpole, Seetan, ɛbɛlabɛla menli dɔɔnwo ɛmaa bɛva bɛ nwo bɛdo nwonane afoa nu ninyɛne zo. Menli dwenle ninyɛne mɔɔ bɛhyia nwo la anwo kpalɛ, na bɛbɔ mɔdenle kɛ bɛbanyia ninyɛne mɔɔ bɛngyia nwolɛ bɔbɔ la. Menli dɔɔnwo twe kakɛ, mɔɔ bɛnze kɛ  “mɔɔ biza bosea la le sonla mɔɔ bɔ ye bosea la kanranli” a.Mrɛlɛbulɛ 22:7.

Menli bie mɔ zile kpɔkɛ ɛtane. Paul se, “Menli dɔɔnwo gyakyile bɛ abusua nee bɛ gɔnwo mɔ kɛ bɛkakpondɛ ‘asetɛnla kpalɛ’ wɔ abolokyi. Bie mɔ hɔle mɔɔ ɛnee bɛnlɛ adendulɛ nwo ngɛlata kpalɛ a, yemɔti bɛanyia gyima bɛanyɛ. Bie mɔ nriandi fea kpolisima na bɛda gua zo. Bɛammaa Nyamenle adenle bɛammaa yeamboa bɛ. Noko kɛ abusua la, yɛzile kpɔkɛ kɛ yɛbalua Nyamenle moalɛ zo yɛagyinla ezukoa nwo ngyegyelɛ nloa.”

YƐLILE GYISƐSE FOLƐDULƐ ZO

Paul toa zo kɛ: “Gyisɛse se: ‘Bɛmmadwenle ɛhyema anwo; ɛhyema ɔdaye ɔ nee ɔ ti anwo adwenleadwenle ɛdeɛ lua.’ Yemɔti asɔne mɔɔ meyɛ ye dahuu la a le kɛ Nyamenle ‘ɛmaa yɛ ɛnɛ yɛ dahuu aleɛ’ amaa yɛadɛnla ngoane nu. Ɔboale yɛ kɛmɔ Gyisɛse hanle la. Tɛ mekɛ ne kɔsɔɔti a yɛnyianle mɔɔ yɛkulo la a. Kenle ko bie, mengɔle kɛ mekadɔ aleɛ mɔɔ ɛnee menze aleɛ holɛ ko a. Mɔɔ ɔdwule me nwo zo la, menwunle kɛ yogurt ɔ. Me nye ɛnlie yogurt nwo. Noko ɔle aleɛ, yemɔti nɔsolɛ zɔhane yɛnlonle yogurt. Meyɛ Nyamenle mo kɛ wɔ mekɛ zɔhane anu, me abusua ne anva ɛhɔne anla la.” *

Nyamenle ɛbɔ ɛwɔkɛ kɛ: “Menrɛgyakyi bɛ ɛlɛ, yɛɛ me rɛle ɛnrɛvi bɛ fee.”Hibuluma 13:5

“Kɛkala, yɛ ezukoa gyinlabelɛ ɛyɛ kpalɛ ekyi. Noko yɛ anwubielɛ ne ɛmaa yɛnwu kɛ adwenleadwenle anloa sɔbelɛ a le kɛ yɛbanyia Nyamenle anu diedi. Suzuamgba ala mɔɔ yɛlɛyɛ Gyihova * ɛhulolɛdeɛ la, ɔbaboa yɛ dahuu. Yɛnwu nɔhalɛ edwɛkɛ mɔɔ wɔ Edwɛndolɛ 34:8 la: ‘Bɛzɔ Gyihova bɛnlea na bɛkɛnwu kɛ ɔle kpalɛ! Nyilalɛ ɛha sonla ne mɔɔ nriandi kɔtane ye la.’ Ɔlua ɛhye ati, yɛnzulo kɛ yɛbayia ezukoa nwo ngyegyelɛ bieko.

Nyamenle boa nɔhavoma maa bɛnyia bɛ “dahuu aleɛ”

“Kɛkala yɛrade ɔ bo kɛ tɛ gyima anzɛɛ ezukoa yɛɛ alesama hyia na bɛadɛnla aze a, emomu aleɛ. Yɛ nye la mekɛ mɔɔ Nyamenle ɛwɔkɛ ne bara nu la ade: ‘Aleɛ babu azɛlɛ ne azo.’ Kɔkpula mekɛ zɔhane, ‘saa yɛlɛ mɔɔ yɛdi nee mɔɔ yɛkeda la a, yɛbamaa yɛ nye azɔ yɛ nwo.’ Yɛnyia anwosesebɛ yɛfi Baebolo edwɛkɛ ɛhye anu: ‘Bɛye ezukoa nwo anyebolo bɛvi bɛ ɛbɛla nu, na bɛmaa bɛ kunlu ɛdwo mɔɔ bɛlɛ ye la anwo. Ɔluakɛ Nyamenle ɛha ye kɛ, “Menrɛgyakyi bɛ ɛlɛ, yɛɛ me rɛle ɛnrɛvi bɛ fee.” Zɔhane ati, yɛkola yɛsi yɛ kɛnra yɛka kɛ, “[Gyihova] le me boavolɛ, menrɛzulo ɛhwee.”’” *

Ɔhyia diedi kpalɛ na wɔahola ‘ɛ nee Nyamenle alua’ kɛmɔ Paul nee ye abusua ne ɛlɛyɛ la. (Mɔlebɛbo 6:9) Saa yɛlɛ ezukoa nwo ngyegyelɛ kɛkala anzɛɛ bie a yɛbahɔ bie anu kenle bie a, yɛbanyia ɛzukoalɛdeɛ yɛavi Paul diedi nee ye nrɛlɛbɛ nwo neazo ne anu.

Saa abusua nu ngyegyelɛ ɛlɛmaa yɛadwenle ɛ?

^ ɛden. 10 Baebolo ne maa yɛnwu kɛ Nyamenle duma a le Gyihova.