Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILI | BƐVA ABƆDEƐ NWO NRƐLƐBƐ BƐZIE BAEBOLO NE AGYAKƐ ANU Ɔ?

Abɔdeɛ Nwo Nrɛlɛbɛ Tɔ Sinli

Abɔdeɛ Nwo Nrɛlɛbɛ Tɔ Sinli

Kenlensa ye ala, bɛlɛyɛ mbuluku dɔɔnwo mɔɔ kilehile adwenle mɔɔ menli mɔɔ bɛnlie Nyamenle bɛnli la lɛ ye la anu. Menli dɔɔnwo anye ɛlie mbuluku ɛhye mɔ anwo na bɛlɛka nwolɛ edwɛkɛ dɔɔnwo. David Eagleman mɔɔ sukoa adwenle nee sonlabaka ne anwo debie la hanle nwolɛ edwɛkɛ kɛ: “Kengavolɛma bie mɔ dwenle kɛ abɔdeɛ nwo nrɛlɛbɛvolɛma ze debie biala.” Ɔvale ɔzɔle zo kɛ, “Abɔdeɛ nwo nrɛlɛbɛvolɛma adwenle nu ɛbuke na bɛ gyima ne maa bɛyɛ neɛnleanu na bɛnwu ninyɛne mɔɔ bɛ nye ɛnla la.”

Ɛvolɛ dɔɔnwo mɔɔ ɛpɛ nu la, abɔdeɛ nwo nrɛlɛbɛvolɛma mɔɔ bɔ mɔdenle kpalɛ la ɛnyia anyuhɔlɛ. Bɛyɛ neɛnleanu bɛnyia abɔdeɛ nwo kpuya mɔɔ kye adwenle la anwo mualɛ. Noko akee, bie mɔ noko ɛyɛ nvonleɛ dɔɔnwo wɔ bɛ gyima ne anwo. Isaac Newton boka abɔdeɛ nwo nrɛlɛbɛvolɛma mɔɔ yɛ deɛ kpalɛ la anwo. Ɔhilele kɛzi tumi bie mɔɔ twe ninyɛne ba aze la ka azɛlɛ ne, nwɔlɔra, nee nwɔlɔra ekpunli ne mɔ bɔ nu wɔ ewiade amuala la anu. Ɔyɛle calculus mɔɔ le mgbondabulɛ bie mɔɔ bɛfa bɛyɛ kɔmpita ngakyile, bɛtu adenle bɛkɔ anwuma, yɛɛ bɛfa bɛsukoa abɔdeɛ mɔɔ ɛnyelɛ nwu bɛ la anwo debie. Noko akee, Newton vale adenle mɔɔ ɛnle nɔhalɛ la azo luale nwɔlɔra ɛgengalɛ nee ngonyia ɛyelɛ zo amaa yeahola yeahakyi sumi nee mbulalɛ gyɛne yeamaa yeayɛ nvutuke.

Ɛvolɛ mɔɔ bo 1,500 kolaa na bɛawo Newton la, Ptolemy mɔɔ le Gilikinli mɔɔ sukoa nwɔlɔra nwo debie la vale ɔ nye nleanle na ɔzukoale anwomanyunlu nwo debie. Ɛnee ɔkola ɔnwu pelanet ne wɔ nɔɔzo na eza ɔze map dɔlɔ kpalɛ. Noko ɛnee ɔdie ɔdi kɛ debie biala bɔ azɛlɛ ne anwo mgbɔlɔka. Abɔdeɛ mɔɔ wɔ anwomanyunlu anwo sukoavo, Carl Sagan hanle Ptolemy anwo edwɛkɛ kɛ: “Adalɛ edwɛkɛ mɔɔ bɛlie bɛdo nu wɔ 1,500 anu la di daselɛ kɛ ɔnva nwo kɛ awie ze nrɛlɛbɛ kpalɛ la, ɔbahola yeaha edwɛkɛ mɔɔ ɛnle nɔhalɛ la.”

Ɛnɛ, abɔdeɛ nwo nrɛlɛbɛvolɛma yia ngyegyelɛ ko ne ala bie. Asoo bɛbahola bɛahilehile debie biala mɔɔ wɔ ewiade ye la anu? Yɛdie yɛto nu kɛ bɛnyia anyuhɔlɛ na bɛboa yɛ kpalɛ ɛdeɛ, noko ɔwɔ kɛ yɛnwu ye kɛ tɛ debie biala a bɛte ɔ bo a. Paul Davies mɔɔ sukoa abɔdeɛ nwo ninyɛne la hanle kɛ: “Tɛ ewiade ne anu debie biala yɛɛ bɛbahola bɛahilehile nu kpalɛ bɛamaa nuhua ala ɛkɛ a.” Zɔhane edwɛkɛ ne mɔ le nɔhalɛ bɔkɔɔ: Alesama ɛnrɛhola ɛnrɛde ninyɛne mɔɔ wɔ ewiade ye anu la abo bɔkɔɔ. Saa bɛngola bɛngilehile debie biala mɔɔ wɔ ɛkɛ ne la anu ɛdeɛ a, ɛnee ɔwɔ kɛ yɛnea boɛ wɔ edwɛkɛ zɛhae mɔ anwo.

Baebolo ne ka kɛzi abɔdeɛ yɛ nwanwane la anwo edwɛkɛ kɛ: “Nea, ɛhye mɔ bɔbɔ le [Nyamenle] tumi ne anu ekyi bie; ɔ ne ekyi bie a yɛte a.” (Dwobu 26:14) Edwɛkɛ dɔɔnwo wɔ ɛkɛ mɔɔ bo sonla nrɛlɛbɛ nee ye ndelebɛbo zo a. Ɛzoanvolɛ Pɔɔlo edwɛkɛ mɔɔ ɔhanle kɛyɛ 2,000 mɔɔ ɛpɛ nu la tɛde nɔhalɛ: “Nyamenle anwonyia le kpole. Ye nrɛlɛbɛ nee ye adwenle le kpole bo zolɛ. Nwane a kɛhola kɛde ye kpɔkɛ mɔɔ ɔkɛbɔ la abo a?”Wulomuma 11:33.

Ɔda ali kɛ Baebolo ne di yɛ ngyianlɛ nwo gyima wɔ ndenle mɔɔ abɔdeɛ nwo nrɛlɛbɛ ɛngola ye yɛ a.