Wulu kɔ nuhua edwɛkɛ ne azo

Wulu kɔ nuninyɛne ne azo

 ƐBƐLABƆLƐ NU EDWƐKƐ

Jairo Anye Boale Ye Manle Ɔzonlenle Nyamenle

Jairo Anye Boale Ye Manle Ɔzonlenle Nyamenle

Asoo wɔdwenle nwolɛ ɛlɛ kɛ ɛ nye ala a nwu debie mɔɔ ɛngola ɛ nwo ɛhwee yɛ la ɔ? Me diema Jairo wɔ ngyegyelɛ ɛhye bie anu. Noko, ɔ nye die wɔ ɛbɛlabɔlɛ nu. Kolaa na meahilehile deɛmɔti ɔ nye die wɔ ɛbɛlabɔlɛ nu anu la, maa menga ɔ nwo edwɛkɛ mengile wɔ.

Bɛwole Jairo la ɔnyianle ewule bie mɔɔ maa bɛdwidwe mɔɔ bɛfɛlɛ ye spastic quadriplegia la. * Ɛhye ati, ɛnee ɔngola ɔnyɛ ɛhwee. Ye amelɛ ne ɛmmaa ɔnde nganeɛ wɔ ye ndinli ne mɔ anu, yemɔti ɔ sa nee ɔ gyakɛ to bɛka nu anzɛɛ wozo mɔɔ ɔngola ɔnyɛ ɔ nwo ɛhwee a. Ɔyɛ a, Jairo anwo mɔɔ wozowozo ye la maa ɔboda ɔ nwo. Saa menli mɔɔ bikye ye la annea boɛ a, bie a bɛbaboda. Ɔyɛ alɔbɔlɛ kɛ, bɛta bɛfa ɔ sa nee ɔ gyakɛ bɛkyekye ye ehwili ne amaa yeamboda.

ƐNYINLƐ NU NYANEDELƐ

Jairo dele nyane kpole wɔ mekɛ mɔɔ ɛnee ɔlɛnyi la. Mekɛ mɔɔ ɔnyianle siane nsa la yɛɛ ye mgbutike ne bɔle ɔ bo a na ɔmaa ɔ nye zo bulu ye. Fane dɔɔnwo ne ala, yɛ Mame fa ye kɔ asopiti ndɛndɛ, ɔluakɛ ɛnee ɔte nganeɛ kɛ yewu.

Kɛmɔ ɛnee bɛkyekye Jairo asa nee ɔ gyakɛ dahuu la ati, ye mbowule ne mɔ annyia anwosesebɛ. Ɔnyianle ɛvolɛ 16 la, ɔ nze hyeale na ɛnee ɔwɔ kɛ bɛyɛ ye ɛzɔlɛ nee ɔ nze apelehyɛne. Metɛkakye kɛzi ɛnee nyanedelɛ maa Jairo su nɔɔzo biala wɔ mekɛ mɔɔ ɛnee ɔ nwo ɛlɛsa la.

Jairo anwodolɛ ne maa ɔkyia awie mɔ moalɛ dahuu wɔ ye aleɛlilɛ nu, ye tɛladeɛwulalɛ nu, nee ye nla nu. Yɛ awovolɛ a ta yɛ gyima ɛhye mɔ a. Ɛnee Jairo hyia moalɛ ɛdeɛ, noko yɛ awovolɛ hakyele ye dahuu kɛ ye ɛbɛlabɔlɛ ne ɛngyi menli nwo zo ala emomu Nyamenle anwo zo.

ADWELIELILƐ NWO ADENLE BUKELE

Yɛ awovolɛ le Gyihova Alasevolɛ, na mekɛ mɔɔ Jairo le adɔma la ɛnee bɛkenga Baebolo nu edwɛkɛ bɛkile ye. Ɛnee bɛze kɛ saa awie nee Nyamenle lɛ agɔnwolɛvalɛ a yɛɛ ye ɛbɛlabɔlɛ ne bawie ye boɛ a. Jairo ɛnlɛ anwosesebɛ, ɛnee ɔ nwo ta wozo ye, noko ɔbahola yeanyia kenlebie anyelazo kpalɛ. Noko akee, ɛnee bɛnnwu ye kɛ saa Jairo kola te Baebolo nu edwɛkɛ ne abo a.

Mekɛ mɔɔ Jairo le kakula la, yɛ Papa bizale ye kenle ko bie kɛ, “Jairo, ɛbahola ɛ nee me adendɛ ɔ?” Akee ɔdoale zo kɛ, “Saa ɛkulo me a, ɛbayɛ ye zɔ!” Kɛmɔ yɛ Papa bodole ye kɛ ɔha edwɛkɛ kpɔkɛ ko bɔbɔ la ati, ɔmanle monle guale Jairo. Ɔbɔle mɔdenle kɛ ɔbaha edwɛkɛ ɛdeɛ, noko ɛnee ɔtendɛ ɔ kɔmeza abo ala. Ɔyɛle Egya nyane kɛ ɔmanle Jairo zunle la. Noko mɔɔ Jairo yɛle la manle yɛ Papa nwunle kɛ yede mɔɔ ɔhanle la abo. Ɛnee ye ngyegyelɛ ne a le kɛ ɔngola tendɛ.

 Yeangyɛ biala, yɛ awovolɛ ne mɔ nwunle kɛ ɔyɛ a Jairo toto ɔ nye na ɔbɔ mɔdenle kɛ ɔda ye nzuzulɛ nee ye nganeɛdelɛ ali. Ɔyɛ a Jairo asa nu to kɛ dahuu bɛnde ye edwɛkɛ bo la. Noko saa yɛ awovolɛ kola nwu debie mɔɔ Jairo ɛlɛfa ɔ nye yeahile bɛ na bɛfa mɔɔ ɔhyia nwo la bɛmaa ye a, ɔmaa ɔ nye die kpalɛ. Ɛnee ɔle adenle mɔɔ ɔdua zo ɔka kɛ meda wɔ ase.

Awie mɔɔ kile menli ɛdendɛlɛ la zuzule kɛ amaa yɛali adwelie la, ɔwɔ kɛ yɛmaa yɛ sa nwiɔ ne zo wɔ mekɛ mɔɔ yɛlɛbiza ye edwɛkɛ mɔɔ le kɛ ɛhɛe anzɛɛ kyɛkyɛ la. Ɛsalɛ fema ne kile ɛhɛe, bɛne ne kile kyɛkyɛ. Yemɔti, ɔkola ɔkile mɔɔ ɔkulo la ɔlua ɔ nye mɔɔ ɔfa ɔsie ɛsalɛ ne mɔɔ ɔkulo la azo.

MEKƐ MƆƆ JAIRO ANYE LIELƐ DƐLALE BIALA LA

Gyihova Alasevolɛ yɛ maanzinli nee maangyebakyi nyianu fane nsa ɛvolɛ biala, na bɛmaa Baebolo nu ɛdendɛlɛ bɛkile menli dɔɔnwo. Jairo anye die kpalɛ wɔ mekɛ biala mɔɔ bɛlɛmaa ɛzɔnenlɛ nwo ɛdendɛlɛ la. Mekɛ mɔɔ Jairo nyianle 16 la, yɛ Papa bizale ye kenle ko bie kɛ, “Jairo, ɛkulo kɛ bɛsɔne wɔ ɔ?” Ɛkɛ ne ala, ɔnleanle yɛ Papa asa fema ne ɔvale ɔhilele kɛ ɔlɛ ɛhulolɛ kɛ ɔbayɛ zɔ. Akee yɛ Papa doale zo kɛ, “Wɔlua asɔneyɛlɛ zo wɔbɔ Nyamenle ɛwɔkɛ kɛ ɛbazonle ye dahuu ɔ?” Jairo nleanle yɛ Papa asa fema ne bieko. Ɛnee ɔda ali kɛ Jairo ɛlumua ɛyila ɔ nwo zo ɛmaa Gyihova.

Mekɛ mɔɔ bɛ nee ye zuzule Baebolo nu edwɛkɛ dɔɔnwo anwo la, ɔlale ali kɛ Jairo te kɛzi Keleseɛnema ɛzɔnenlɛ nwo hyia la abo. Yemɔti, wɔ 2004 anu, ɔbuale kpuyia mɔɔ anwo hyia mɔɔ bɛbizale ye la kɛ, “Asoo wɔyila ɛ nwo zo wɔmaa Nyamenle kɛ ɛbayɛ ye ɛhulolɛdeɛ ɔ?” Jairo dole ɔ nye anwuma ɔvale ɔbuale kpuyia ɛhye. Ɛnee ɔle adenle mɔɔ bɛ nee ye ɛha mɔɔ ɔlɛdua zo yeaha kɛ ɛhɛe a. Yemɔti, ɔnyianle ɛvolɛ 17 la, bɛzɔnenle ye kɛ Gyihova Dasevolɛ.

ƆVALE Ɔ NYE ƆDOLE NYAMENLE ANWO ZO

Wɔ 2011, Jairo nyianle adenle fofolɛ mɔɔ bɛdua zo bɛtendɛ la. Kɔmputa mɔɔ bɛfa bɛ nye bɛtendɛ wɔ zolɛ la. Ɔfa ɔ nye ɔsie sɛkɛlɛneɛ mɔɔ wɔ ye milahyinli ne azo la a ɔboa ye ɔmaa ɔnwu debie mɔɔ ɔkpondɛ la wɔ zo. Saa ɔbɔ ɔ nye anzɛɛ ɔnea debie wɔ zolɛ a ɔle kɛ ɔlɛtinli debie wɔ kɔmputa ne azo la. Debie mɔɔ nvoninli wɔ zo la wɔ ye milahyinli ne azo mɔɔ boa Jairo maa ɔkola ɔdi adwelie. Saa ɔfa ɔ nye ɔsie nvoninli ɛhye mɔ ko azo a, debie mɔɔ bɛyɛ wɔ ye milahyinli ne azo la maa bɛte edwɛkɛ mɔɔ bɛhɛlɛ wɔ zo la.

 Kɛmɔ Jairo nyianle Baebolo ne anu ndelebɛbo dɔɔnwo la ati, ɔnyianle ɛhulolɛ kɛ ɔbaboa awie mɔ yeamaa bɛade Baebolo ne abo. Saa yɛlɛyɛ yɛ dapɛne abusua Baebolo ɛzukoalɛ ne a, ɔta ɔnea ɔ nzi nee ɔ nyunlu na ɔnea me nee ye kɔmputa ne. Ɔdua adenle ɛhye azo ɔkakye me kɛ mengɛlɛ mualɛ mɔɔ ɔbahola yeamaa wɔ debiezukoalɛ mɔɔ bɛyɛ ye wɔ yɛ Keleseɛnema asafo ne anu la memaa ye.

Wɔ debiezukoalɛ ne abo, ɔtɔ ɔ rɛle aze ɔnea ye milahyinli ne azo na ɔtinli sɛkɛlɛneɛ mɔɔ ɔkpondɛ la azo na akee milahyinli ne tendɛ maa awie biala te. Mekɛ biala mɔɔ ɔbamaa asafo ne anu amra anwosesebɛ wɔ adenle ɛhye azo la, ɔsele. Alex, mɔɔ le Jairo agɔnwo mɔ anu ko la ka kɛ, “Saa mete Jairo mualɛ mɔɔ gyi Baebolo ne azo la a, ɔmaa me nye die dahuu.”

Jairo dua ye kɔmputa ne mɔɔ ɔfa ɔ nye ɔtendɛ wɔ zolɛ la nee ye milahyinli mɔɔ ɔtendɛ la azo ɔmaa mualɛ wɔ debiezukoalɛ bo na ɔka ye diedi ne anwo edwɛkɛ ɔkile awie mɔ

Eza Jairo fa ɔ nye ka ye diedi ne anwo edwɛkɛ kile awie mɔ. Adenle mɔɔ ɔdua zo ɔyɛ ɛhye la a le kɛ ɔtinli nvoninli mɔɔ kile tola mɔɔ nane nee menli ekpunli kɔsɔɔti de anzondwolɛ nu la azo. Saa ɔyɛ ɛhye a, ye kɔmputa ne ka kɛ, “Anyelazo mɔɔ wɔ Baebolo ne anu la a le kɛ azɛlɛ ye bayɛ paladaese mɔɔ anwodolɛ nee ewule ɛnle ɛkɛ bieko a, Yekile 21:4.” Saa tievolɛ ne kile nwolɛ anyelielɛ a, ɔtinli kɔmputa ne azo bieko ɔmaa ɔka kɛ, “Ɛbahulo kɛ me nee wɔ bazukoa Baebolo ne ɔ?” Ɔzinle yɛ nwo kɛ yɛ nenya liele ɛsalɛdolɛ ɛhye azo la. Ɔyɛ anyelielɛ kɛ ɛbanwu Jairo mɔɔ ɔ gɔnwo Dasevolɛ bie ɛlɛboa ye yeamaa bɛahilehile ye Nenya Baebolo ne a! Yɛ nye liele kɛ bɛzɔnenle yɛ Nenya wɔ maanzinli nyianu mɔɔ bɛyɛle wɔ Madrid wɔ August 2014 abo la.

Jairo sukulu kilehilevolɛma nwunle kɛ Nyamenle ɛzonlenlɛ wɔ ye nu kpalɛ. Rosario mɔɔ boka menli mɔɔ bɛkile ye ɛdendɛlɛ anwo la hanle ye mekɛ bie kɛ: “Saa medwenle nwo ɛlɛ kɛ mebahɔ asɔne bie a, anrɛɛ mebayɛ Gyihova Dasevolɛ. Menwu kɛzi Jairo diedi ne ɛmaa ye ɛbɛlabɔlɛ ɛgyinla bodane zo ɔnva nwo tɛnlabelɛ ɛsesebɛ mɔɔ ɔwɔ nu la.”

Mekɛ biala mɔɔ mebagenga Baebolo ne anu ɛwɔkɛ ɛhye meahile Jairo la ɛnee ɔ nye ɛlie: “Abuburama bawuluwulu kɛ ahɛtɛboɛ, yɛɛ mumulema bava anyelielɛ ado edwɛne.” (Ayezaya 35:6) Ɔyɛ a ye abɛ nu bu ɛdeɛ, noko ɔ nye ta die. Ɛhye ɛyɛ boɛ ɔboalekɛ ye ɛbɛlabɔlɛ ne gyi Nyamenle nee ɔ gɔnwo mɔ Keleseɛnema moalɛ zo. Anyelielɛ nee diedi kpole mɔɔ ɔlɛ la di daselɛ kɛ Gyihova ɛzonlenlɛ maa bɛkola bɛgyinla ɛbɛlabɔlɛ nu ngyegyelɛ nloa.

^ ɛden. 5 Ɔle ewule mɔɔ ka amelɛ ne na ɔmaa bɛbubu bɛgua ɛleka ko mɔɔ bɛngola tia a. Eza ɔkola ɔmaa bɛpɛ mgbutike, ɔmmaa bɛngola aleɛ di, yɛɛ ɔmmaa bɛngola tendɛ. Ewule ɛhye maa bɛdwidwe; ɔmaa bɛ gyakɛ nee bɛ sa yɛ ketee na ɔkyea bɛ kɔme.