Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILE | DUZU A GYISƐSE—BALUA ZO ALIE NGOANE A?

Deɛmɔti Yɛhyia Ngoanelielɛ Nwo La

Deɛmɔti Yɛhyia Ngoanelielɛ Nwo La

“Sonla dasanli mɔɔ raalɛ ɛwo ye la mekɛ le ezinraa, yɛɛ nuhua le amaneɛ ngome. Ɔkpakye kɛ ndotolo, na ɔnwoso; ɔpɛ nu kɛ ɛlawolɛ, na ɔminliminli.”Dwobu 14:1, 2.

Ɔvi tete ne, menli ɛdwenle kɛzi ɔbayɛ anyelielɛ kɛ bɛbadɛnla aze kɛ mgbavolɛ mɔɔ bɛlɛ kpɔkɛdelɛ kpalɛ dahuu la anwo. Mɔɔ yɛ alɔbɔlɛ la a le kɛ: Yɛwu. Dwobu edwɛkɛ ne mɔɔ wɔ anwuma ɛke mɔɔ ɔhanle ye ɛvolɛ apenle nsa mɔɔ ɛze la, tɛde nɔhalɛ.

Awie biala kulo kɛ ɔtɛnla aze dahuu. Baebolo ne ka kile yɛ kɛ Nyamenle ɛva dahuu ngoane ɛwula yɛ ahonle nu na yɛdwenle mɔɔ dahuu ngoane kile la anwo. (Nolobɔvo ne 3:11) Saa ɔle zɔ a, asoo ndelebɛbo wɔ nu kɛ ɛlɔlɛ Nyamenle ne bava ɛhulolɛ ɛhye awula yɛ nu wɔ mekɛ mɔɔ yɛ sa ɛnrɛha ye la ɔ? Saa ɛbua kɛ kyɛkyɛ a, ɛnee wɔpɛ. Nyamenle Edwɛkɛ ne fɛlɛ ewule kɛ kpɔvolɛ na yebɔ ɛwɔkɛ kɛ ‘ɔbazɛkye ye’ bɔkɔɔ.1 Kɔlentema 15:26.

Ɔle nɔhalɛ bɔkɔɔ kɛ ewule le kpɔvolɛ. Awie biala mɔɔ ye adwenle nu la ɛkɛ la ɛngulo. Saa esiane ɛlɛba yɛ nwo zo a yɛtwe yɛ nwo, yɛfea anzɛɛ yɛnriandi. Saa yɛ nwo to yɛ a, yɛkpondɛ ndenle mɔɔ yɛdua zolɛ a yɛbayɛ yɛ nwo ayile la. Yɛbɔ mɔdenle yɛyɛ mɔɔ yɛbahola biala la kɛ yɛbahoati debie mɔɔ bamaa yɛawu la.

Asoo yɛlɛ debie mɔɔ ɔti yɛdie yɛdi kɛ kpɔvolɛ ɛhye mɔɔ ɛhyɛ la bavi ɛkɛ bɔkɔɔ? Ɛhɛe. Gyihova Nyamenle mɔɔ le Bɔvolɛ ne la, ambɔ alesama kɛ bɛdɛnla aze mekɛ ekyi bie na bɛwu. Ɛnee ewule ɛmboka ye mɔlebɛbo bodane ne anwo. Ɛnee ɔkpondɛ kɛ alesama tɛnla azɛlɛ ye azo dahuu, na mɔɔ yeha la bara nu.Ayezaya 55:11.

Kɛ ɔkɛyɛ na bɛaye ewule bɛavi ɛkɛ ɛ? Ɔvi tete ne, menli ɛbɔ mɔdenle kɛ bɛbali ewule zo konim, noko bɛngola. Yɛ mekɛ ye noko bɛtɛkɔ zo bɛtɛyɛ neɛnleanu. Abɔdeɛ nwo nrɛlɛbɛvolɛma ɛyɛ nyile ngakyile mɔɔ bɛva bɛzɔ ewule bie mɔ anloa. Bɛnleɛnlea kɛzi ninyɛne mɔɔ ngoane wɔ nu subane de la anu. Wɔ maanle dɔɔnwo anu, saa bɛkyehyɛ nu a, ɛnɛ menli tɛnla aze kyɛ tɛla ɛvoya mɔɔ ɛze ɛhɔ la. Noko, bɛngola bɛnli ewule zo konim. Kɛmɔ Baebolo ne ka la, “bɛ muala bɛsia bɛkɔ ndɛtɛlɛ nu bieko.”Nolobɔvo ne 3:20.

Anyelielɛ edwɛkɛ ne a le kɛ ɔngyia kɛ yɛbava yɛ nwo yɛado sonla nrɛlɛbɛ mɔɔ yenyia ye la azo kɛ yemɔ yɛɛ ɔbali ngyegyelɛ ɛhye anwo gyima a. Gyihova Nyamenle ɛyɛ nziezielɛ mɔɔ ɔlua zo ɔbalie yɛ yɛavi ewule nu a, na sonla titile mɔɔ ngyehyɛleɛ ɛhye gyi ɔ nwo zo la a le Gyisɛse Kelaese.