Wulu kɔ nuhua edwɛkɛ ne azo

Wulu kɔ nuninyɛne ne azo

 DASEVOLƐ BIE NEE AWIE ADWELIELILƐ

Ɔwɔ Kɛ Yɛsukoa Baebolo Ne Ɔ?

Ɔwɔ Kɛ Yɛsukoa Baebolo Ne Ɔ?

Edwɛkɛ mɔɔ wɔ ɛke la le adwelie mɔɔ Gyihova Dasevolɛ bie nee awie bahola ali. Yɛva ye kɛ Dasevolɛ bie mɔɔ bɛfɛlɛ ye Joel nee nrenya ko mɔɔ bɛfɛlɛ ye Eric la ɛyia.

BAEBOLO NE​—TETEDWƐKƐ MƆƆ LE PƐPƐƐPƐ

Eric: Memaa wɔade kɛ menda mengɔ asɔne. Yemɔti menlie menli kɛ yɛlɛ edwɛkɛ dɔɔnwo yɛka.

Joel: Ɔyɛ me fɛ kɛ wɔha ɛhye wɔhile me a. Bɛfɛlɛ me Joel. Na ɛdawɔ ɛ?

Eric: Eric.

Joel: Eric, ɔyɛ me fɛ kɛ yɛyia a.

Eric: Medame noko zɔhane ala.

Joel: Maa membiza wɔ, bɛtetele wɔ wɔ asɔne nu ɔ?

Eric: Ɛhɛe. Noko mengɔle kɔlegyi la yɛɛ mengyakyile asɔnehɔlɛ a.

Joel: Mede. Duzu a ɛzukoale wɔ kɔlegyi a?

Eric: Menzukoale social studies nee tetedwɛkɛ. Ɛnee dahuu me nye die tetedwɛkɛ nwo, ɛze ɔ, ɔka kɛzi sonla ɛbɔ ye ɛbɛla wɔ azɛlɛ ye azo la anwo edwɛkɛ.

Joel: Tetedwɛkɛ yɛ anyelielɛ kpalɛ. Kɛmɔ bie a ɛze ye la, Baebolo ne noko le tetedwɛkɛ buluku. Wɔva Baebolo ne wɔyɛ neɛnleanu ɛlɛ ɔ?

Eric: Kyɛkyɛ. Meze kɛ ɔle buluku kpalɛ noko metɛdwenlenle nwolɛ ɛlɛ kɛ Baebolo ne le tetedwɛkɛ buluku.

Joel: Wɔ adwenle nu ɛbuke. Saa ɛlɛ mekɛ ekyi a, anrɛɛ mebahile wɔ Baebolo ne anu tetedwɛkɛ mɔɔ le nɔhalɛ la anwo neazo ekyi.

Eric: Yoo. Noko menlɛ Baebolo.

Joel: Ɔnyɛ ɛhwee. Ɛbahola wɔanlea me ɛdeɛ ne bie. Neazo mɔɔ lumua la wɔ 1 Edwɛkɛsisilɛ tile 29, ngyɛnu 26 yɛɛ 27. Ɔse: “Gyɛsi ara Devidi ziele Yizilayɛma kɔsɔɔti ɛvolɛ abulanla. Ɔdɛnlanle Hibulɔn ɔlile ebia ne ɛvolɛ nsuu yɛɛ ɔdɛnlanle Gyɛlusalɛm ɔlile ebia ne ɛvolɛ abulasa nee nsa.”

Eric: Kɛzi ɛhye kola yɛ tetedwɛkɛ mɔɔ le pɛpɛɛpɛ la anwo neazo ɛ?

Joel: Tendɛtiama hanle ye mekɛ bie anu kɛ Belemgbunli Devidi andɛnla aze ɛlɛ.

Eric: Amgba ɔ? Kɛmɔti a bɛhanle kɛ yeandɛnla aze ɛ?

Joel: Daselɛ mɔɔ ɔnle Baebolo ne anu mɔɔ kile kɛ ɛnee ɔwɔ ɛkɛ la le ekyi. Noko akee, menli mɔɔ tudu azɛlɛ nwo la nwunle tete bolɛ bie mɔɔ bɛhɛlɛ zolɛ “Devidi Sua Nu” la wɔ 1993.

Eric: Ɔyɛ anyelielɛ.

Joel: Awie bieko mɔɔ wɔ Baebolo ne anu mɔɔ bɛhanle kɛ yeandɛnla aze la a le Pɔnteɛse Paelɛte, mɔɔ le amɛnlado mɔɔ lile tumi wɔ Gyisɛse mekɛ zo la. Bɛha ɔ nwo edwɛkɛ wɔ Luku tile 3, ngyɛnu 1​—bɛboka arane mgbanyima dɔɔnwo mɔɔ ɛnee wɔ ɛkɛ ne la anwo.

Eric: Ɛhɛe, menwu ye. Ɔka kɛ “ɛnee Pɔnteɛse Paelɛte a le amɛnlado wɔ Dwudiya a, yɛɛ Hɛlɔdo  noko a ɛnee nea Galeli maanzinli ne azo a.”

Joel: Mo. Wɔ ɛvolɛ dɔɔnwo anu, ɛnee nwomama bie mɔ ɛnlie ɛnli kɛ Pɔnteɛse Paelɛte dɛnlanle aze. Akee kɛyɛ ɛvolɛ 50 mɔɔ ɛze la anu, bɛnwunle bolɛ bie wɔ Mɛdetɛlenia Aduduleɛ mɔɔ bɛhɛlɛ ye duma wɔ zolɛ a.

Eric: Hmm. Metɛtele edwɛkɛ ɛhye ɛlɛ.

Joel: Ɔyɛ me fɛ kɛ meha mehile wɔ a.

Eric: Nɔhalɛ nu, mebu Baebolo ne kpalɛ kɛ mbuluku mɔɔ ɛha la, noko metɛtele nganeɛ ɛlɛ kɛ nwolɛ hyia maa yɛ ɛnɛ. Bie a nuhua tetedwɛkɛ ne le pɛpɛɛpɛ, noko menea a nvasoɛ biala ɛnle zo.

BAEBOLO NE​—YEHYƐ KPALƐ NOKO ƆLE ADWULESO BULUKU

Joel: Menli dɔɔnwo die edwɛkɛ ɛhye di. Noko menlie menli. Edwɛkɛ ɛhye ati ɔ: Ɔvi mɔlebɛbo ne mɔɔ ba la, ninyɛne mɔɔ sonla hyia nwolɛ la ɛtɛkakyile. Kɛ neazo la, dahuu yɛhyia aleɛ, tɛladeɛ, nee sua. Dahuu yɛte nganeɛ kɛ yɛ nee awie mɔ bali adwelie na yɛanyia abusua mɔɔ yɛ anyelielɛ. Asoo ɔnle nɔhalɛ kɛ yɛ muala yɛhyia ninyɛne ɛhye mɔ anwo ɔ?

Eric: Ɔle zɔ.

Joel: Baebolo ne kola boa yɛ wɔ ɛhye mɔ kɔsɔɔti anu. Yɛbavɛlɛ ye debie mɔɔ yehyɛ noko ɔle adwuleso buluku.

Eric: Boni a ɛkile a?

Joel: Maa menga ye wɔ adenle fofolɛ zo: Ngyinlazo kpalɛ wɔ Baebolo ne anu mɔɔ nwolɛ hyia ɛnɛ kɛmɔ ɛnee ɔde wɔ mekɛ mɔɔ bɛhɛlɛle ye wɔ ɛvoya dɔɔnwo mɔɔ ɛze la anu.

Ngyinlazo kpalɛ wɔ Baebolo ne anu mɔɔ nwolɛ hyia ɛnɛ kɛmɔ ɛnee ɔde wɔ mekɛ mɔɔ bɛhɛlɛle wɔ ɛvoya dɔɔnwo mɔɔ ɛze la anu

Eric: Mede. Ɛleka boni zɛhae mɔ?

Joel: Baebolo ngyinlazo kola boa yɛ maa yɛnyia ezukoa nwo adwenle kpalɛ anzɛɛ abusua asetɛnla mɔɔ yɛ anyelielɛ anzɛɛ agɔnwolɛ kpalɛ. Buluku ɛhye le kɛ azɛkɛlata mɔɔ kile yɛ adenle la. Kɛ neazo la, asoo ɛnlie ɛnli kɛ ɔnla aze kɛ awie bahola ayɛ kunli nee abusua tile kpalɛ ɛnɛ ɔ?

Eric: Ɛhɛe, me nee wɔ yɛ adwenle. Me nee me ye gyale la kɛyɛ ɛvolɛ ɛne, na ɔnla aze kɛ yɛ adwenle bayia.

Joel: Ɔle nɔhalɛ. Noko ngyinlazo sikalɛ wɔ Baebolo ne anu mɔɔ boa a. Fa Ɛfesɛsema tile 5 kɛ neazo. Maa yɛgenga ngyɛnu 22, 23, nee 28. Saa ɛkulo a, ɛbahola wɔagenga ngyɛnu ɛhye mɔ.

Eric: Yoo. Ɔse: ‘Yelɛma, bɛha bɛ nwo aze bɛmaa bɛ hu mɔ, kɛmɔ bɛyɛ bɛmaa Awulae la. Ɔluakɛ kunli ne a lɛ tumi wɔ ɔ ye anwo zo a, kɛmɔ Kelaese lɛ Asafo ne azo tumi la; asafo ne a le Kelaese sonlabaka ne yɛɛ Kelaese a le asafo ne Ngoanedievolɛ a.’ Ngyɛnu 28 noko se: “Zɔhane ala yɛɛ ɔwɔ kɛ kunlima kulo bɛ ye mɔ kɛ bɛ nwo la. Nrenya mɔɔ kulo ɔ ye la kulo ɔdaye mumua ne ɔ nwo.”

Joel: Mo somaa. Asoo ɔnle nɔhalɛ kɛ saa bokavolɛma nwiɔ ne bɔ mɔdenle fa folɛdulɛ ɛhye yɛ gyima a, abusua asetɛnla bayɛ kpalɛ ɔ?

Eric: Ɛhɛe, kɛ mesuzu la ɛne. Noko ye ɛhanlɛ ɛnyɛ se kɛ ye ɛyɛlɛ la.

Joel: Ɔle nɔhalɛ; awie biala ɛnli munli. Nɔhalɛ nu, wɔ Baebolo ne tile zɔhane anu, ngyɛnu bie wɔ ɛkɛ mɔɔ ɔka kɛ yɛnyia ndelebɛbo a. * Wɔ agɔnwolɛvalɛ biala anu, ɔhyia kɛ bɛyɛ debie biala pɛpɛɛpɛ na nuhua ko gyakyi edwɛkɛ nu. Me nee me ye ɛnwu kɛ Baebolo ne kola boa yɛ maa yɛyɛ debie biala pɛpɛɛpɛ.

Eric: Ndelebɛbo wɔ nu.

Joel: Gyihova Alasevolɛ lɛ Intanɛte gyimalilɛleka mɔɔ agyalɛ nee abusua asetɛnla nwo edwɛkɛ kpalɛ wɔ zo a. Saa ɛlɛ mekɛ ekyi a, anrɛɛ mebahile wɔ debie mɔɔ wɔ ɛkɛ la.

Eric: Yoo. Mebamaa wɔ mekɛ ekyi.

Joel: Wɔyɛ deɛ. Intanɛte gyimalilɛleka ne a le www.jw.org. Mɔlebɛbo ne ɛne.

Eric: Me nye die nvoninli ne mɔ anwo.

Joel: Ɛhye le ɛzonlenlɛ gyima ne mɔɔ yɛyɛ ye  wɔ ewiade amuala la foa bie mɔ. Ah, yemɔ ɛne. Foa ɛhye ati se “Help for Couples and Parents.” Edwɛkɛtile ngyikyi wɔ ɔ bo mɔɔ ɔdi tɛnlabelɛ ngakyile nwo gyima a. Bie wɔ ɛkɛ mɔɔ ɛ nye die nwolɛ ɔ?

Eric: Ɛhɛe. “Solving Problems in Your Marriage.” Menea a mebahola meava ɛhye meali gyima!

Joel: Edwɛkɛ ɛhye ka ndenle nna mɔɔ bɛdua zo bɛsiezie edwɛkɛ la. Yɛ ɛdendɛkpunli ɛhye nzonlɛ. Eric, ɛkulo kɛ ɛkenga ɔ?

Eric: Ɛhɛe. Ɔse: “Saa adwelielilɛ a le mogya wɔ agyalɛ nu a, ɛnee ɛlɔlɛ nee ɛbulɛ a le ahonle nee ɛvovoa mɔɔ maa agɔnwolɛvalɛ kɔ zo la.” Hmm, me nye ɛlie kɛzi bɛhilehile nuhua la anwo.

Joel: Mo kɛ wɔgenga la. Bɛha Baebolo tɛkese bie anwo edwɛkɛ wɔ ɛke. Ɛbahola wɔamia zo wɔamaa yeabuke.

Eric: Yoo, menwu ye. Ɛfɛsɛsema 5:33. Ɔka kɛ: “Noko ɔwɔ kɛ kunli biala kulo ɔ ye kɛ ɔdaye ɔ nwo, na yelɛ biala noko di ɔ hu eni.”

Joel: Ɛyɛle ye nzonlɛ kɛ ɔsi zolɛ kɛ ɔwɔ kɛ awie biala fa mɔɔ ɔ nye la kɛ ɔbanyia la maa ɔ?

Eric: Mende mɔɔ ɛlɛka la abo.

Joel: Asoo ɔnle nɔhalɛ kɛ nrenya ne kulo kɛ ɔ ye bu ye yɛɛ yelɛ ne noko te nganeɛ kɛ ɔwɔ kɛ ɔ hu kulo ye ɔ?

Eric: Ɛhɛe. Me nee wɔ yɛ adwenle.

Joel: Saa kunli ne dahuu kpondɛ ndenle dua zo da ɛlɔlɛ ali kile ɔ ye a, ɛnnwu ye kɛ ɔnrɛyɛ se ɔnrɛmaa yelɛ ne kɛ ɔbabu ye ɔ?

Eric: Ɔyɛ me kɛ ɔbaboa.

Joel: Yemɔti bɛhɛlɛle ngyɛnu ɛhye mɔɔ wɔ Baebolo ne anu la asɛɛ ɛvolɛ 2,000 mɔɔ ɛze la ɛdeɛ, noko ɔka mɔɔ agyalɛma hyia nwo na ɔfa folɛdulɛ kpalɛ ɔmaa, mɔɔ saa bɛfa bɛyɛ gyima a ɔboa a. Kɛmɔ ndonwo ne mɔɔ yɛlumua yɛgengale la kile la, agyalɛ nu “ahonle nee ɛvovoa” ne anu bamia dahuu.

Eric: Nɔhalɛ nu, edwɛkɛ dɔɔnwo wɔ Baebolo ne anu mɔɔ menze ye a.

Joel: Me nye ɛlie kɛ mede ɛhye la. Mekulo kɛ yɛyia ɛke bieko na menwu adwenle mɔɔ ɛlɛ ye wɔ edwɛkɛtile mɔɔ se “Four Steps to Solving Problems” mɔɔ wɔ Intanɛte gyimalilɛleka ne azo la. *

Eric: Yoo. Me nee me ye banlea.

Baebolo nu edwɛkɛtile bie wɔ ɛkɛ mɔɔ kye wɔ adwenle ɔ? Ɛkulo kɛ ɛnwu Gyihova Alasevolɛ diedi anzɛɛ nyɛleɛ bie anwo edwɛkɛ dɔɔnwo ɔ? Saa ye zɔhane a, yɛ ye ndɛndɛ ka kile Gyihova Alasevolɛ ne mɔ anu ko. Ɔ nye balie kɛ ɔ nee wɔ bazuzu zɔhane edwɛkɛ ne anwo.