Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILE | ARANE MƆƆ NZISI ƐNLE NU

Ngyegyelɛ Mɔɔ Arane Nu Nzisi Fa Ba La

Ngyegyelɛ Mɔɔ Arane Nu Nzisi Fa Ba La

Bɛhile arane nu nzisi abo kɛ tumi mɔɔ bɛfa bɛdi gyima wɔ adenle ɛtane zo bɛfa bɛnyia bɛ nwo la. Zɛhae deɛ ye ɛhɔ zo mekɛ tendenle. Kɛ neazo la, mɛla bie wɔ Baebolo ne anu mɔɔ tua ndoloboa ɛlielɛ wɔ edwɛkɛ ɛlilɛ nu, ɛhye kile kɛ ɛnee nyɛleɛ ɛhye wɔ ɛkɛ ne kɛyɛ ɛvolɛ 3,500 mɔɔ ɛze ɛhɔ la. (Adendulɛ 23:8) Nɔhalɛ nu, nzisi ɛngile ndoloboa ɛlielɛ ala. Ɔyɛ a, arane mgbanyima mɔɔ bɛle nzisi la wua ninyɛne, fa nwolɛ adenle bie mɔɔ ɔnle bɛ ɛdeɛ, anzɛɛ bɛwua ezukoa bɔbɔ. Bie a eza bɛfa bɛ dibilɛ mɔɔ bɛlɛ la bɛboa bɛ gɔnwo mɔ nee bɛ nwo amra mɔɔ ɔnle ye adenle zo.

Bɛkola bɛnwu nzisi wɔ alesama ahyehyɛdeɛ biala anu ɛdeɛ, noko arane nu nzisi ɛbu zo. Buluku bie mɔɔ bɛfɛlɛ ye Global Corruption Barometer 2013, mɔɔ Transparency International yɛle la bɔle amaneɛ kɛ wɔ ewiade amuala menli lɛ adwenle kɛ ahyehyɛdeɛ nnu mɔɔ nzisi wɔ nu kpalɛ la a le maanyɛlɛ fane, kpolisima, arane mgbanyima, mɛlalilɛma yɛɛ ndɛnebuavolɛma. Suzu amaneɛbɔlɛ mɔɔ ka ngyegyelɛ ne bie mɔ anwo edwɛkɛ la anwo nea.

  • AFRICA: Wɔ 2013, bɛbɔle arane mgbanyima kɛyɛ 22,000 mɔɔ wɔ South Africa la somolɛ wɔ nzisi nyɛleɛ nwo.

  • AMERICA NYIAKƐ: Bɛbuale menli 25 fɔlɛ wɔ Brazil 2012 anu, kɛ bɛva maanle ne ezukoa bɛwulowula menli bo kɛ bɛgyinla bɛ maanyɛlɛ fane ne anzi. Bɛ nuhua ko a le dɛba ne maanle kpanyinli ne folɛtuvolɛ, mɔɔ maanle kpanyinli ne ɛnle ɛkɛ a ɔdaye a ɔwɔ ɛkɛ la.

  • ASIA: Wɔ Seoul, mɔɔ wɔ South Korea la, sotɔɔ kpole bie bule hunle menli 502 wɔ 1995. Menli mɔɔ yɛ neɛnleanu la nwunle kɛ mgbanyima ne mɔ liele belaebo yemɔti bɛmanle menli mɔɔ zile sua ne la vale ninyɛne mɔɔ ɛnle kpalɛ la a zile a, yɛɛ bɛbule bɛ nye bɛguale menli banebɔlɛ zo.

  • EUROPE: Cecilia Malmström mɔɔ le Kɔmihyɛna wɔ European Commission Home Affairs la hanle kɛ “ɛleka mɔɔ ngyegyelɛ [nzisi wɔ Europe] ne ɛhɔdwu la yɛ azibɛnwo.” Ɔdoale zo kɛ, “ngyehyɛleɛ mɔɔ maanyɛlɛma ɛyɛ kɛ bɛfa bɛadu nzisi bo la ɛnyɛ boɛ.”

Ɔyɛ se kɛ alesama bahola aye arane nu nzisi avi ɛkɛ. Benleravolɛ Susan Rose-Ackerman, mɔɔ ze kɛzi bɛko bɛtia nzisi anwo edwɛkɛ kpalɛ la, hɛlɛle kɛ ɔwɔ kɛ “arane yɛ nzenzaleɛ mɔɔ hyia wɔ kɛzi ɔyɛ ye gyima la anu.” Ɔzɔho kɛ bɛngola bɛnyɛ nwolɛ ɛhwee ɛdeɛ, noko Baebolo ne kile kɛ nzenzaleɛ kpole bara yɛɛ ɔbayɛ zɔ.