DEƐMƆTI BIE MƆ ƐNLIE ƐNLI: Kɛmɔ kenlensa ye debiezukoalɛ bie kile la, pelanet kɛyɛ mgbe mgbe 100 a wɔ yɛ nwɔlɔra ekpunli ne anu a. Saa bɛnea kɛzi ewiade ne kpole de la a, menli dɔɔnwo biza kɛ, ‘Kɛmɔti a ɔwɔ kɛ Bɔvolɛ tumivolɛ ne nea mɔɔ alesama mɔɔ bɛnle ɛhwee yɛ wɔ pelanet ekyi ɛhye azo la ɛ?’

MƆƆ NYAMENLE EDWƐKƐ NE KILEHILE: Nyamenle ammaa yɛ Baebolo ne ala na akee yeagyakyi yɛ mɔɔ ɔndwenle yɛ nwo a. Emomu, Gyihova ka kile yɛ kɛ: “Mebamaa me nye ara ɛ nwo zo na meadu wɔ folɛ.”​—Edwɛndolɛ 32:8.

Suzu Heega, Yigyibiti raalɛ mɔɔ dɛnlanle aze wɔ ɛvoya 20 K.Y.M. la anwo nea. Ɛnee Heega ɛmbu Sɛleeyae mɔɔ le ye gyimamenle la, yemɔti Sɛleeyae hilele ye abodelɛ, na Heega nriandile hɔle ɛsɛlɛ ne azo. Kɛkala mɔɔ Heega ɛvo la, asoo Nyamenle ɛnrɛdwenle ɔ nwo? Baebolo ne ka kɛ: ‘Gyihova anwumabɔvolɛ hɔdole ye.’ Anwumabɔvolɛ ne manle Heega anwosesebɛ na ɔhanle kɛ: “Nyamenle ɛde wɔ nyane ɛzunlɛ ne.” Akee Heega vɛlɛle Gyihova kɛ: ‘Ɛle Nyamenle mɔɔ nwu debie.’​—Mɔlebɛbo 16:4-13.

‘Nyamenle mɔɔ nwu debie’ la, nea ɛdawɔ noko ɛ nwo zo. Kɛ neazo la: Ɛrɛladane mɔɔ lɛ ɛlɔlɛ la nea ɔ ra kakula boɛ, ɔluakɛ kakula le ekyi a, ɔhyia kɛ awovolɛ nea ye. Zɔhane ala a Nyamenle nea bɛdabɛ mɔɔ bɛyɛ bɛtɛɛ na bɛnlɛ boavolɛ la. Gyihova ka kɛ, “Mede anwuma lɔ nee ɛleka nwuanzanwuanza, yɛɛ eza me nee mɔɔ nu ɔ nwo na ɔle bɛlɛvo la tɛnla, kɛ memaa mɔɔ ɛnlu ɔ nwo la anyia anyelazo.”​—Ayezaya 57:15.

Noko akee, bie a ɛbabiza kɛ: ‘Kɛzi Nyamenle nea me ɛ? Ɔdua kɛzi mede la azo a ɔnwu me a, anzɛɛ ɔnea me ɔkɔ moa na ɔte kɛzi mede la abo?’