DEƐMƆTI BIE MƆ ƐNLIE ƐNLI: Menli dɔɔnwo mɔɔ die Nyamenle di la te nganeɛ kɛ ɔwɔ moa. Christina, raalɛ bie mɔɔ vi Ireland mɔɔ kɔ asɔne dapɛne biala la hanle kɛ, “Ɛnee mebu ye kɛ ɔle Nyamenle mɔɔ ɔbɔle debie biala a. Noko ɛnee menze ye. Meande nganeɛ ɛlɛ kɛ mebikye ye.”

MƆƆ NYAMENLE EDWƐKƐ NE KILEHILE: Saa yɛyɛ bɛtɛɛ a, Gyihova ɛngyakyi kɛ ɔbaboa yɛ. Gyisɛse hilele kɛzi Nyamenle dwenle yɛ nwo la wɔ adenle ɛhye azo kɛ: “Na duzu a bɛdwenle kɛ awie mɔɔ lɛ mboane 100 na nuhua ko kɛminli la kɛyɛ a? Ɔgyakyi 99 ne wɔ bɛ adidileka ne na ɔkɔkpondɛ ko ne mɔɔ ɛminli la.” Duzu a yɛsukoa yɛfi nu a? “Zɔhane ala noko yɛɛ bɛ Ze mɔɔ wɔ anwuma la ɛmkpondɛ kɛ ngakula ɛhye mɔ anu ko minli a.”​—Mateyu 18:12-14.

“Ɛhye mɔ anu ko ” biala sonle bolɛ maa Nyamenle. Kɛzi Nyamenle ‘kpondɛ ko ne mɔɔ ɛminli la’ ɛ? Kɛmɔ ngɛlɛlera ne kile la, Gyihova maa menli bikye ye.

Suzu kɛzi Nyamenle dumua maa ahonlekpalɛma bikye ye la anwo nea. Wɔ ɛvoya mɔɔ lumua Y.M. la anu, Nyamenle manle Keleseɛne ɛdoavolɛ Felepe hɔyiale Yiteyopea abɔlɔba kpanyinli mɔɔ de ye ehwili nu la, na bɛzuzule Baebolo ngapezo mɔɔ ɔlɛkenga la anwo. (Gyima ne 8:26-39) Nzinlii, Nyamenle hilele ɛzoanvolɛ Pita adenle manle ɔhɔle Wulomu sogya kpanyinli bie mɔɔ bɛfɛlɛ ye Kɔnileɛse, mɔɔ ɔlɛyɛ asɔne na ɔlɛbɔ mɔdenle kɛ ɔsonle Nyamenle la sua nu. (Gyima ne 10:1-48) Nyamenle eza hilele ɛzoanvolɛ Pɔɔlo nee ɔ gɔnwo mɔ adenle manle bɛhɔle azule bie mɔɔ wɔ suakpole Felepae anzi la anloa. Wɔ ɛkɛ ne, bɛyiale “raalɛ mɔɔ Nyamenlezonlenlɛ wɔ ye nu” mɔɔ bɛfɛlɛ ye Ledea la, na “Awulae bukele ye adwenle nu manle ɔdiele.”​—Gyima ne 16:9-15.

Wɔ edwɛkɛ ko biala anu, Gyihova nleanle kɛ menli mɔɔ ɛlɛkpondɛ ye la nyianle adenle kɛ bɛkɛnwu ye. Nwane mɔ a ɛnɛ kɔ menli azua nu yɛɛ bagua nu na bɛka Nyamenle anwo edwɛkɛ mɔɔ wɔ Baebolo ne anu la bɛkile bɛ a? Menli dɔɔnwo babua kɛ, “Gyihova Alasevolɛ” ɔ. Biza ɛ nwo kɛ, ‘Asoo ɔbayɛ kɛ Nyamenle ɛlɛdua bɛ nwo zo amaa meabikye ye ɔ?’ Yɛsi wɔ ahonle kɛ yɛ asɔne kɛ Nyamenle ɛboa wɔ na ɛlie mɔdenle mɔɔ ɔlɛbɔ kɛ ɔboa wɔ la ɛdo nu. *