EDWƐKƐ TITILE | DUZU A BAEBOLO NE KA A?
“Yɛnwu Mɛzaya Ne”!
Kɛyɛ ɛvoya nna mɔɔ bɛhɛlɛle Hibulu Baebolo buluku mɔɔ li awieleɛ bɛwiele la anzi, Maeka ngapezo ne mɔɔ fane Mɛzaya ne anwo la rale nu: Bɛwole Gyisɛse wɔ Bɛtelɛhɛm. Ɛvolɛ 30 anzi wɔ 29 Y.M., Daneɛle ngapezo ne mɔɔ lumua mɔɔ fane Mɛzaya ne ɛralɛ nwo la rale nu. Bɛzɔnenle Gyisɛse, na Nyamenle vale sunsum nwuanzanwuanza ne kpokpale ye. Kɛmɔ mekɛ ne kile pɛpɛɛpɛ la, Mɛzaya ne mɔɔ ɛnee bɛlɛkendɛ ye mekɛ tendenle, Abozonli ne ɛra!
Ndɛndɛ ne ala Gyisɛse bɔle ye ɛzonlenlɛ gyima ne abo, “na ɔbɔle Edwɛkpa ne mɔɔ fane Nyamenle Belemgbunlililɛ ne” anwo la nolo. (Luku 8:1) Kɛmɔ bɛha bɛdo ɛkɛ la, Gyisɛse lale ye ali kɛ ɔle atiakunlukɛnlɛma, bɛtɛɛ na ɔdwenlenle awie mɔ ngyianlɛ nwo. Ɛnee ɔda ɛlɔlɛ ali wɔ ye ngilehilelɛ ne anu na ɔboa, yɛɛ ɔmanle menli mɔɔ “ewule nee anwodolɛ ngakyile” ɛha bɛ la anwo zale ɔvale ɔhilele kɛ Nyamenle nee ye lua. (Mateyu 4:23) Menli mɔɔ asolo bɛ ɛvolɛ kɔsɔɔti la hɔle Gyisɛse ɛkɛ na bɛhanle kɛ: “Yɛnwu Mɛzaya ne”!—Dwɔn 1:41.
Gyisɛse hanle kɛ kolaa na ye Belemgbunlililɛ ne ali ninyɛne zo tumi bɔkɔɔ la, konle, azɛlɛkpusulɛ nee ngyegyelɛ dɔɔnwo bahɔ zo wɔ ewiade ne anu. Ɔdule menli kɔsɔɔti folɛ kɛ “bɛzinza!”—Maake 13:37.
Ɛnee Gyisɛse le sonla mɔɔ di munli mɔɔ hɔle zo diele Nyamenle a, noko ɛnee ɔlɛ ye kpɔvolɛma na awieleɛ bɔkɔɔ ne bɛmanle bɛhunle ye. Yemɔti ye ewule ne yɛle afɔlebɔlɛ mɔɔ di munli mɔɔ kola tɔ debie mɔɔ Adam nee Yive minlinle ye la bieko—dahuu ngoane wɔ Paladaese nwo anyelazo.
Gyisɛse ewule ne manle ngapezo ne rale nu, ɔluakɛ Nyamenle dwazole Gyisɛse kɛ sunsum nu abɔdeɛ mɔɔ lɛ tumi la wɔ kenle nsa anzi. Akee Gyisɛse yele ɔ nwo hilele ye ɛdoavolɛma mɔɔ bo 500 la. Kolaa na yeahɔ anwuma la, Gyisɛse hanle hilele ye ɛdoavolɛma kɛ bɛha edwɛkpa ne mɔɔ fane Belemgbunlililɛ ne anwo la bɛhile menli wɔ “maanle ti nee maanle bo.” (Mateyu 28:19) Kɛzi bɛyɛle gyima ɛhye bɔkɔɔ ɛ?
