Wulu kɔ nuhua edwɛkɛ ne azo

Wulu kɔ nuninyɛne ne azo

Asoo Ɛze?

Asoo Ɛze?

Duzu ati a ɛnee bɛfɛlɛ tete Nenɛvɛ kɛ “ahɔdiawu ɛyi ye tɔ” a?

Konimlilɛma mɔɔ zo agbɔvolɛ adile na bɛlɛkuohua ɔ nloa la anwo nvoninli

Ɛnee Nenɛvɛ le Aselea Maanle ne suakpole. Ɛnee ɔle sua bedevinli mɔɔ belemgbunli nee asɔne sua ngɛnlɛma yɛɛ adenle nee bane mgbole wɔ zo a. Hibulu ngapezonli Nahum hanle nwolɛ edwɛkɛ kɛ “ahɔdiawu ɛyi ye tɔ.”—Nahum 3:1.

Mɔɔ ɔhanle la le zɔ, ɔluakɛ nvoninli mɔɔ wɔ Sɛnakɛlebe sua nu ɛkɛ wɔ Nenɛvɛ la di Aseleama amumuyɛ ne anwo daselɛ. Nvoninli ne ko kile awie mɔɔ bɛdo ye aze na bɛlɛtu ɔ tafinlima la. Bɛhɛlɛ edwɛkɛ mɔɔ kile kɛ ɛnee bɛfa koba bɛsosɔ menli mɔɔ bɛkɛhye bɛ la abonyi anzɛɛ bɛ nloa na bɛfa nyɛma bɛsɔ ye bɛtwe bɛmaa ɔwowɔ bɛ. Ɛnee bɛfa arelemgbunli mɔɔ bɛkɛhu bɛ la ati bɛyɛ ndweabane na bɛfa bɛto bɛ menli titile mɔɔ bɛkɛhye bɛ la akɔme.

Archibald Henry Sayce, mɔɔ kɛlɛ Aselea anwo edwɛkɛ la ka kɛzi bɛko bɛfa sua bie a bɛyɛ zolɛ menli la anwo edwɛkɛ kɛ: “Ɛleka biala mɔɔ bɛkɛli konim la bɛkuohua menli adile kɛ edukue la; bɛyela ngakula mrenya nee mraalɛ anyewɔzo anzɛɛ bɛyɛ bɛ amumuyɛ bɛmaa ɔ bo zo; bɛkenda mrenya baka zo, na bɛye bɛ nwo nwoma anyewɔzo, bɛsi bɛ nye anzɛɛ bɛpepɛ bɛ sa nee bɛ gyakɛ, bɛ nzo nee bɛ bonyi.”

Bodane boni ati a ɛnee Dwuuma si sua a bɛdie bane wɔ ɔ ti zo a?

Nyamenle hanle hilele Dwuuma kɛ: “Saa ɛsi wɔ sua a, bɔ mɔdenle die bane wɔ ɔ ti zo, amaa saa awie vi zolɛ tɔ aze na ɔwu a, wɔanli fɔlɛ kɛ ɛdawɔ a ɛhunle ye a.” (Mɛla ne 22:8) Ɛnee bane ɛhye hyia, ɔluakɛ ɛnee Baebolo mekɛ zo Dwuuma yɛ ninyɛne dɔɔnwo wɔ bɛ sua ti zo.

Ɛnee Yizilayɛma dɔɔnwo ɛnlie bɛ sua ti zo bane. Ɛnee menli dɔɔnwo sɔ ewia, die anwoma anzɛɛ yɛ bɛ sua nu gyima wɔ bɛ sua ti zo. Ɔdwu wawaa mekɛ a, bɛda ɛkɛ. (1 Samoɛle 9:26) Ɛnee ɛyazonlɛnli fa ye sua ti zo rɛlɛ ye ma kolaa na yeadi anzɛɛ ɔfa ɔrɛlɛ ye feege nee ma ngakyile.—Dwɔhyua 2:6.

Ɛnee sua ti zo noko a adalɛ nee nɔhalɛ ɛzonlenlɛ kɔ zo a. (Nihɛmaya 8:16-18; Gyɛlɛmaya 19:13) Ɛzoanvolɛ Pita vole hɔle sua ne ati zo kɛ ɔkayɛ ewiazo nzɛlɛlɛ. (Gyima ne 10:9-16) Saa vanye mbaka anzɛɛ arɛlɛ mrɛlakɛ maa alubo wɔ ɛkɛ a, sua bie ati zo bayɛ ɛleka kɛnlɛma mɔɔ bɛdie bɛ menle a.

Buluku bie mɔɔ bɛfɛlɛ ye kɛ The Land and the Book la ka kɛ ɛnee Yizilayɛma dua debie anzɛɛ kpolike zo kɔ bɛ sua ti zo, “wɔ sua nu ɛkɛ mɔɔ bɛnwolo sua ne anu a.” Yemɔti ɛnee suamenle ne kola dwu aze mɔɔ ɔnwolo sua ne anu a. Ɔbayɛ kɛ ɛhye ati a Gyisɛse ɛlɛbɔ bɛ kɔkɔ wɔ sua mɔɔ bɛlɛsɛkye ye anwo la ɔhanle kɛ: “Mɔɔ wɔ ye sua ti zo anwuma la mmaka kɛ ɔdwu aze yearava ye ninyɛne wɔ ye sua ne anu” la.—Mateyu 24:17.