Wulu kɔ nuhua edwɛkɛ ne azo

Wulu kɔ nuninyɛne ne azo

Gyisɛse—Ɔkile Yɛ Asetɛnla Kpalɛ

Gyisɛse—Ɔkile Yɛ Asetɛnla Kpalɛ

ASOO Gyisɛse nyianle asetɛnla kpalɛ? Ɔda ali kɛ menli mɔɔ ɛnlɛ bie la a tetele ye a, na wɔ ye asetɛnla kɔsɔɔti anu, ɛnee ɔnlɛ ewiade ɛhye anu ninyɛne dɔɔnwo. Nɔhalɛ nu, ɛnee ɔnlɛ ‘ɛleka mɔɔ ɔto ɔ ti a.’ (Luku 9:57, 58) Bieko, bɛkpɔle ye, bɛsokpale ye, na awieleɛ kolaa ne ye agbɔvolɛ hunle ye.

Bie a ɛbaha kɛ, ‘Tɛ asetɛnla zɛhae a mebu ye kɛ ɔle kpalɛ a!’ Noko Gyisɛse asetɛnla ne anwo ninyɛne dɔɔnwo wɔ ɛkɛ mɔɔ ɔwɔ kɛ yɛsukoa a. Bɛmaa yɛzuzu ninyɛne nna mɔɔ ɔyɛle wɔ ye asetɛnla nu la anwo.

1. ƐNEE GYISƐSE BODANE A LE KƐ—ƆYƐ NYAMENLE ƐHULOLƐDEƐ.

“Me aleɛ a le kɛ menwɔli mɔɔ zoanle me la ɛhulolɛdeɛ zo.”—Dwɔn 4:34.

Gyisɛse luale ye edwɛkɛ nee ye nyɛleɛ zo hilele kɛ ɔkulo kɛ ɔyɛ ye anwuma Selɛ, Gyihova, * ɛhulolɛdeɛ. Gyisɛse anye liele kpole wɔ Nyamenle ɛhulolɛdeɛyɛlɛ nwo. Nɔhalɛ nu, ɔvale Nyamenle ɛhulolɛdeɛyɛlɛ ɔtotole aleɛ nwo, kɛmɔ bɛhile ye wɔ ngɛlɛlera ne mɔɔ bɛha nuhua edwɛkɛ anu la. Suzu mekɛ mɔɔ nuhua a ɔhanle edwɛkɛ ɛhye la anwo nea.

Gyisɛse hanle zɔhane edwɛkɛ ne wɔ sɛnzɛngyinla. (Dwɔn 4:6) Ɛnee yekpɔsa wɔ Samɛlea awoka ne mɔ azo wɔ alehyenlɛ ne amuala, yemɔti ɛnee ɛhɔne ɛlɛku ye. Nɔhalɛ nu, ɛnee ye ɛdoavolɛma ne ɛkpa ye kyɛlɛ kɛ: “Kilehilevolɛ, bakpula ɛ sa!” (Dwɔn 4:31) Gyisɛse mualɛ ne kile kɛ saa ɔyɛ Nyamenle gyima a ɔte nganeɛ kɛ yeli aleɛ na yenyia anwosesebɛ. Asoo ɛhye ɛngile kɛ ɔle awie mɔɔ nyianle asetɛnla kpalɛ ɔ?

2. GYISƐSE NYIANLE ƐLƆLƐ KPOLE MANLE Ɔ ZE.

“Mekulo Selɛ ne.”—Dwɔn 14:31.

Gyisɛse nee ɔ Ze nyianle agɔnwolɛvalɛ kpalɛ wɔ anwuma. Ɛlɔlɛ kpole mɔɔ Gyisɛse nyianle wɔ Nyamenle anwo la hanle ye manle ɔlale ɔ Ze ali—Ye duma, ye bodane nee ye subane. Gyisɛse luale ye edwɛkɛ, ye nyɛleɛ nee ye subane zo zukoale ɔ Ze—ɔzukoale ye kpalɛ mɔɔ maa yɛnwu Gyisɛse kɛ ɔ Ze la. Yemɔti, mekɛ mɔɔ Felepe bizale Gyisɛse kɛ: “Kile yɛ Selɛ ne” la, Gyisɛse buale ye kɛ: “Awie mɔɔ ɛnwu me la ɛnwu Selɛ ne [noko].”—Dwɔn 14:8, 9.

Ɛnee Gyisɛse kulo ɔ Ze kpole la ati, ɔnyianle ɛhulolɛ kɛ ɔbadie ye toonwo yeahɔ ewule nu. (Felepaema 2:7, 8; 1 Dwɔn 5:3) Nyamenle anwo ɛhulolɛ kpole zɛhae manle Gyisɛse nyianle asetɛnla kpalɛ.

 3. GYISƐSE HULOLE MENLI.

“Ɛhulolɛ kpalɛ mɔɔ sonla kɛnyia ye wɔ ɔ gɔnwo mɔ anwo la a le kɛ ɔkɛva ye ngoane ɔkɛdo aze ɔkɛmaa bɛ.”—Dwɔn 15:13.

Yɛze kɛ alesama mɔɔ ɛnli munli la ɛnlɛ anyelazo kpalɛ. Baebolo ne kilehile nu kɛ: “Kɛmɔ ɛtane luale sonla ko [Adam] anwo zo a rale ewiade, na sonla ko ne ɛtane ne vale ewule rale la, yɛɛ ewule dele kpondenle aleɛabo amra anwo zo a, ɔluakɛ menli kɔsɔɔti ɛyɛ ɛtane.” (Wulomuma 5:12) Yɛnriandi yɛfi mɔɔ ɛtane ɛva ɛra mɔɔ le ewule la anwo a ɔnyɛ boɛ.—Wulomuma 6:23.

Yɛlɛ anyezɔlɛ kpalɛ kɛ Gyihova ɛvi ɛlɔlɛ nu ɛmaa yɛnyia alesama gyinlabelɛ ne anloa sɔbelɛ la. Ɔmanle ɔ Ra ne mɔɔ di munli na ɛtane biala ɛnle ɔ nwo, mɔɔ ɛnee bɛfɛlɛ ye Gyisɛse la, nwunle amaneɛ na ɔwule amaa yeava ɛkpɔnedeɛ mɔɔ hyia, na bɛalie alesama bɛavi ɛtane nee ewule akɛlɛzonlenlɛ nu la ɔmanle. Gyisɛse manle ɔ Ze nee alesama anwo ɛlɔlɛ hanle ye na ɔvile ye ɛhulolɛ nu ɔliele ɔdole nu kɛ ɔbava ye dasanli ngoane mɔɔ di munli la yeabɔ afɔle. (Wulomuma 5:6-8) Anwofamaa ɛlɔlɛ zɛhae manle ɔnyianle asetɛnla kpalɛ. *

4. ƐNEE GYISƐSE ZE KƐ Ɔ ZE KULO YE YƐƐ Ɔ NYE DIE Ɔ NWO.

“Ɛhye a le me Ra mɔɔ mekulo ye la. Me nye die ɔ nwo kpole.”—Mateyu 3:17.

Gyihova hanle edwɛkɛ ɛhye wɔ anwuma wɔ Gyisɛse ɛzɔnenlɛ mekɛ ne anu. Gyihova luale ɛhye azo hilele kɛzi ɔkulo na ɔ nye die ɔ Ra, Gyisɛse anwo la wɔ bagua nu. Ɔnyɛ ɛzulolɛ kɛ Gyisɛse hanle ye penyi kɛ: “Selɛ ne kulo me” la! (Dwɔn 10:17) Kɛmɔ ɛnee Gyisɛse ze kɛ ɔ Ze kulo ye na ɔ nye die ɔ nwo la ati, ɔholale ɔvale akɛnrasesebɛ ɔgyinlanle dwazotia nee tendɛtia nloa. Ɔholale ɔgyinlanle kpundii bɔbɔ ɔhɔle ewule nu. (Dwɔn 10:18) Ɔda ali kɛ kɛmɔ ɛnee Gyisɛse ze kɛ ɔ Ze kulo ye na ɔ nye die ɔ nwo la ati, ɔmanle ɔnyianle asetɛnla kpalɛ.

Gyisɛse nyianle asetɛnla kpalɛ bɔkɔɔ. Ɔda ali wienyi kɛ, yɛbahola yɛazukoa dɔɔnwo yɛavi ye ɛkɛ wɔ kɛzi yɛbahola yɛanyia asetɛnla kpalɛ la. Edwɛkɛ mɔɔ doa zo la bazuzu folɛdulɛ wienyi bie mɔ mɔɔ Gyisɛse vale manle ye ɛdoavolɛma wɔ kɛzi bɛbanyia asetɛnla kpalɛ la anwo.

^ ɛden. 6 Baebolo ne kile kɛ Nyamenle duma a le Gyihova.

^ ɛden. 15 Saa ɛkulo kɛ ɛnwu kɛzi Gyisɛse ɛkpɔnedeɛ ne sonle bolɛ la anwo ninyɛne dɔɔnwo a, nea Duzu A Baebolo ne Kilehile Amgba A? buluku ne mɔɔ Gyihova Alasevolɛ ɛyɛ la tile 5.