Wulu kɔ nuhua edwɛkɛ ne azo

Wulu kɔ nuninyɛne ne azo

Bɛnlea Boɛ Wɔ Abɔnsam Ngane Ne Mɔ Anwo!

Bɛnlea Boɛ Wɔ Abɔnsam Ngane Ne Mɔ Anwo!

 Bɛnlea Boɛ Wɔ Abɔnsam Ngane Ne Mɔ Anwo!

‘Bɛnriandi bɛvi Abɔnsam mɔɔ hyele bɛ la ɛhane ne anu.’—2 TEM. 2:26.

KƐZI ƐBAYE Ɔ NLOA Ɛ?

Neɛnleanu boni a ɔwɔ kɛ yɛyɛ na yɛandendɛ yɛantia awie mɔ ɛ?

Duzu a yɛsukoa yɛfi Paelɛte nee Pita ɛkɛ wɔ sonla nwo ɛzulolɛ nee ɛpiepianlɛ nwo a?

Duzu a baboa wɔ na wɔammu ɛ nwo fɔlɛ wɔ adenle mɔɔ ɛnfɛta la azo a?

1, 2. Abɔnsam ngane ne boni a yɛbazuzu nwo wɔ edwɛkɛ ɛhye anu a?

ABƆNSAM doa Gyihova azonvolɛ nanamogya. Tɛ ye bodane a le kɛ ɔku yɛ kɛmɔ ɛbɔlɛdivo yɛ nane mɔɔ ɔkɛnyia ye la. Emomu, Abɔnsam bodane titile a le kɛ ɔkye yɛ anyewɔzo yeamaa yɛayɛ ye ɛhulolɛdeɛ.—Bɛgenga 2 Temɔte 2:24-26.

2 Saa awie kpondɛ kɛ ɔkye nane bie anyewɔzo a ɔsua nwolɛ ɛhane. Bie a ɔbaheha nane ne na saa ɔfinde a yeava nyɛma mɔɔ yebɔ ye kotosalɛ la yeahye ye. Anzɛɛ ɔsua ɛhane wɔ fealera nu na saa nane ne tia ye telafa ne azo a, yeahye ye arɛlevilɛ nu. Abɔnsam dua ngane mɔɔ le kɛ ɛhye mɔ la azo ɔkye Nyamenle azonvolɛ anyewɔzo. Saa yɛmkpondɛ kɛ ɔkye a, ɛnee ɔwɔ kɛ yɛmaa yɛ nye da ɛkɛ na yɛtie Seetan ngane ne mɔ anwo kɔkɔbɔlɛ ne. Yɛbazuzu kɛzi yɛbanlea yɛ nwo boɛ wɔ Abɔnsam ngane ne mɔ mɔɔ bɛkye kpalɛ la anu nsa anwo wɔ edwɛkɛ ɛhye anu. Bɛmɛ a le (1) ɛdendɛlɛ mɔɔ bɛnnea ye boɛ, (2) ɛzulolɛ nee ɛpiepianlɛ, yɛɛ (3) bɛ nwo fɔlɛbualɛ mɔɔ ɛnfɛta. Edwɛkɛ mɔɔ doa zo la noko baha Seetan ngane ne mɔ nwiɔ anwo edwɛkɛ.

KOATI ƐDENDƐLƐ MƆƆ BƐNNEA YE BOƐ

3, 4. Saa yɛannea yɛ tafinlima boɛ a, duzu a bahola azi a? Maa neazo.

3 Saa ɛbɔlɛdivo kpondɛ nane ahye a, ɔkola ɔto senle wɔ kpɔkɛ bie anu na saa bɛka kɛ bɛfinde bɛanriandi a yeahye bɛ. Abɔnsam noko kpondɛ kɛ ɔto senle wɔ asafo ne anu wɔ sɛkɛlɛneɛ adenle zo. Saa ɔba ye zɛhae a, ɔbamaa asafo ne anu amra avi ɛleka mɔɔ banebɔlɛ wɔ la abɔ asande na yeahye bɛ. Adenle boni azo a yɛbahola yɛaboa Abɔnsam mɔɔ yɛnrɛnwu nu a?

4 Ɛdoavolɛ Gyemise vale ɛtafinlimalɛ dole senle nwo. (Bɛgenga Gyemise 3:6-8.) Saa yɛannea yɛ  tafinlima ne boɛ a, yɛbahola yɛado senle wɔ asafo ne anu wɔ sɛkɛlɛneɛ adenle zo. Wɔ adenle boni azo? Suzu edwɛkɛ ɛhye anwo nea: Bɛbɔ nolo wɔ debiezukoalɛ bo kɛ bɛkpa adiema raalɛ bie kɛ dahuu adekpakyelɛnli. Mekɛ mɔɔ bɛkpɔnenle debiezukoalɛ ne la nolobɔlɛma nwiɔ bɔle ɔ bo kɛ bɛdi nolobɔlɛ ne anwo adwelie. Ko anye ɛlie ɛmaa adekpakyelɛnli fofolɛ ne. Noko ko ne ka kɛ tɛ adwenle kpalɛ a ɔlɛfa yeayɛ adekpakyelɛ gyima ne a, ɔkpondɛ duma. Nolobɔlɛma nwiɔ ɛhye mɔ anu boni a ɛbava ye agɔnwolɛ a? Ɔnyɛ se kɛ ɛbanwu nuhua ne mɔɔ ɔbahola yealua ye ɛdendɛlɛ zo yeado senle wɔ asafo ne anu la.

5. Amaa yɛanlua yɛ ɛdendɛlɛ zo yɛando senle la, neɛnleanu boni a ɔwɔ kɛ yɛyɛ a?

5 Kɛ ɔkɛyɛ na yɛanlua yɛ ɛdendɛlɛ zo yɛando senle ɛ? Gyisɛse hanle kɛ: “Mɔɔ ɛyi ɛbulu zo wɔ bɛ ahonle ne mɔ anu la a finde bɛ nloa a.” (Mat. 12:34) Yemɔti, mɔɔ ɔlumua la ɔwɔ kɛ yɛneɛnlea yɛdayɛ mumua ne yɛ ahonle nu. Asoo yɛkoati ninyɛne mɔɔ maa yɛkeha yɛ gɔnwo mɔ anwo edwɛkɛ ɛtane la? Kɛ neazo la, saa yɛte kɛ adiema bie ɛlɛbɔ mɔdenle wɔ asafo ne anu a, asoo yɛnyia adwenle kɛ ɔlɛyɛ zɔ ɔluakɛ ɔkpondɛ kɛ Gyihova anye die ɔ, anzɛɛ yɛnyia adwenle kɛ angomedi nvasoɛ ti ɔ? Saa yɛta yɛnyia adwenle kɛ nvasoɛ bie mɔɔ yɛ mediema ne mɔ bɛanyia la ati a bɛsonle a, ɛnee ɔwɔ kɛ yɛkakye kɛ Abɔnsam hanle edwɛkɛ ko ne ala bie vanenle Nyamenle sonvolɛ nɔhavo Dwobu anwo. (Dwo. 1:9-11) Kɛ anrɛɛ yɛbanyia yɛ diema ne anwo adwenle mɔɔ ɛnfɛta la, ɔbayɛ kpalɛ kɛ yɛbazuzu deɛmɔti yɛtendɛ yɛtia ye la anwo. Asoo mɔɔ yɛlɛyɛ la le ye adenle zo? Anzɛɛ ewiade sunsum ɛtane ne mɔɔ ɛbu wɔ awieleɛ mekɛ ɛhye anu la ɛzɛkye yɛ ahonle?—2 Tem. 3:1-4.

6, 7. (a) Ninyɛne mɔɔ maa bɛtendɛ bɛtia awie mɔ la bie a le boni? (b) Saa bɛtendɛ bɛtia yɛ a, duzu a ɔwɔ kɛ yɛyɛ a?

6 Suzu ninyɛne bieko mɔɔ bɛbahola bamaa yɛadendɛ yɛatia awie mɔ la anwo. Nuhua ko a le kɛ bie a yɛkpondɛ kɛ menli nwu mɔɔ yɛyɛ la. Saa yɛtendɛ yɛtia awie mɔ a, ɛnee yɛlɛkile kɛ yɛle kpalɛ yɛtɛla awie biala. Anzɛɛ ɛnee yɛlɛbu yɛ nye yɛagua yɛ nvonleɛ zo. Saa anwomemaazo, anyebolo, anzɛɛ yɛ nwo mɔɔ yɛnlie ye yɛnli la yɛɛ ɛlɛmaa yɛayɛ zɔ a, ɔbahola yeava ngyegyelɛ yeara.

7 Wɔannea a yɛbade nganeɛ kɛ ɛdendɛlɛ mɔɔ yɛdendɛle yɛtiale awie la le ye adenle zo. Bie a ahenle annea ye ɛdendɛlɛ boɛ yemɔti ɔ nloa dole yɛ. Saa zɔhane a ɔde bɔbɔ a, ɔnrɛyɛ kpalɛ kɛ yɛbayɛ bie yɛadua ye kakɛ. Saa yɛyɛ zɔ a edwɛkɛ ne bayɛ kpole na ɛhye le Abɔnsam ɛhulolɛdeɛ, ɔnle Nyamenle ɛhulolɛdeɛ. (2 Tem. 2:26) Ɔwɔ kɛ yɛsukoa Gyisɛse wɔ edwɛkɛ  ɛhye anu. Mekɛ mɔɔ bɛbɔ ye aholoba la, “yeambɔ bɛ bie.” Emomu, “ɔvale ye anyelazo kɔsɔɔti ɔdole . . . pɛlepɛle Ndɛnebuavolɛ ne” anwo zo. (1 Pita 2:21-23) Ɛnee Gyisɛse lɛ anwodozo kɛ Gyihova bali ninyɛne nwo gyima wɔ Ye adenle zo nee ye mekɛ nloa. Ɔwɔ kɛ yɛnyia anwodozo ko ne ala bie wɔ Nyamenle anu. Saa yɛka edwɛkɛ kpalɛ mɔɔ maa anwosesebɛ la yɛkile awie mɔ wɔ asafo ne anu a, yɛbamaa ‘anzondwolɛ nee koyɛlɛ’ mɔɔ wɔ asafo ne anu la adɛnla ɛkɛ.—Bɛgenga Ɛfɛsɛsema 4:1-3.

MMAMAA ƐZULOLƐ NEE ƐPIEPIANLƐ SUA WƆ ƐHANE

8, 9. Duzu ati a Paelɛte buale Gyisɛse ewule fɔlɛ a?

8 Nane mɔɔ kɛdo ɛhane la ɛngola ɛnyɛ mɔɔ ɔkulo la. Zɔhane ala a awie mɔɔ ɛzulolɛ ɛha ye anzɛɛ ɔmaa bɛpiepia ye la ɛngola ɛnyɛ mɔɔ ɔdaye mumua ne ɔkulo la a. (Bɛgenga Mrɛlɛbulɛ 29:25.) Bɛmaa yɛzuzu menli nwiɔ mɔɔ ɛzulolɛ hanle bɛ anzɛɛ bɛmanle awie mɔ piepianle bɛ la neazo nwo na yɛzukoa debie yɛvi nu.

9 Ɛnee Wulomu Amɛnlado Pɔnteɛse Paelɛte ze kɛ edwɛkɛ ɛnle Gyisɛse anwo yemɔti ɛnee ɔkulo kɛ ɔgyakyi ye. Paelɛte hanle kɛ Gyisɛse ɛtɛyɛle “debie biala mɔɔ fɛta ewule a.” Noko akee, Paelɛte buale ye ewule fɔlɛ. Kɛmɔti ɛ? Ɔluakɛ Paelɛte manle awie mɔ piepianle ye. (Luku 23:15, 21-25) Ɛnee dwazotiama kpondɛ kɛ bɛpiepia ye bɛmaa ɔyɛ mɔɔ bɛkulo la, yemɔti bɛdeɛdeanle nu kɛ: “Saa ɛgyakyi ye a ɛnee ɛnle Wulomu Maanle Maanle Belemgbunli ne agɔnwo!” (Dwɔn 19:12) Bie a Paelɛte zulole kɛ saa ɔka bie ɔmaa Kelaese a ye dibilɛ ne bavi ɔ sa anzɛɛ bɛbahu ye. Yemɔti, ɔmanle Abɔnsam vale ye yɛle mɔɔ ɔkulo la.

10. Duzu a manle Pita kpole Kelaese a?

10 Ɛnee ɛzoanvolɛ Pita le Gyisɛse agɔnwo kpalɛ kpalɛ. Ɔhanle ye bagua nu kɛ Gyisɛse a le Mɛzaya ne a. (Mat. 16:16) Pita hɔle zo lile nɔhalɛ ɔnva nwo kɛ ɛdoavolɛ ne bie mɔ ande edwɛkɛ bie mɔɔ Gyisɛse hanle la abo kpalɛ na bɛkpole Ye la. (Dwɔn 6:66-69) Yɛɛ mekɛ bie mɔɔ Gyisɛse agbɔvolɛ rale ye ɛhyelɛ la, Pita hwenle dadeɛ kɛ ɔfa yeabɔ ɔ Menle ne anwo bane. (Dwɔn 18:10, 11) Noko nzinlii, ɛzulolɛ manle Pita hanle kɛ ɔnze Gyisɛse Kelaese. Wɔ mekɛ ekyi bie anu, sonla nwo ɛzulolɛ ɛhane ne hyele ɛzoanvolɛ ne yemɔti yeangola yeanyia akɛnrasesebɛ yeanyɛ debie.—Mat. 26:74, 75.

11. Ɛpiepianlɛ boni a ɔwɔ kɛ yɛgyinla ɔ nloa a?

11 Kɛ Keleseɛnema la, ɔnle kɛ yɛmaa awie mɔ piepia yɛ yɛyɛ ninyɛne mɔɔ ɛnzɔ Nyamenle anye la. Gyimamenlema nee yɛ gɔnwo mɔ babɔ mɔdenle kɛ bɛpiepia yɛ bɛamaa yɛabɔ adalɛ anzɛɛ ɛbɛla ɛtane. Bie a mediema mɔɔ kɔ sukulu la agɔnwo mɔ bɛapiepia bɛ kɛ bɛwua sukulu sɔnea nu, bɛnlea nlanwonvoninli, bɛnlo sigalɛte, nyile ɛtane, nza dɔɔnwo, anzɛɛ bɛbɔ ɛbɛla ɛtane noko ɔnle kɛ bɛyɛ. Ɛhye ati, duzu a baboa yɛ na yɛahola yɛagyinla ɛzulolɛ nee ɛpiepianlɛ mɔɔ maa bɛyɛ ninyɛne mɔɔ Gyihova ɛngulo la anloa a?

12. Duzu a yɛkola yɛsukoa yɛfi Paelɛte nee Pita ɛkɛ a?

12 Bɛmaa yɛnlea mɔɔ yɛbahola yɛazukoa yɛavi Paelɛte nee Pita ɛkɛ la. Ɛnee Paelɛte ze Kelaese anwo debie ekyi. Ɛnee ɔze kɛ edwɛkɛ biala ɛnle Gyisɛse anwo yɛɛ ɔnle kɛ menli mɔɔ ɛha la. Noko ɛnee Paelɛte ɛmbɛlɛ ɔ nwo aze yɛɛ ɛnee ɔnlɛ nɔhalɛ Nyamenle ne anwo ɛlɔlɛ. Abɔnsam hyele ye anyewɔzo. Ɛnee Pita lɛ ndelebɛbo mɔɔ di munli nee Nyamenle anwo ɛlɔlɛ. Noko akee, ɛnee ɔdwu mekɛ ne bie a, ɔmbɛlɛ ɔ nwo aze, ɛzulolɛ ka ye, na ɔmaa awie mɔ piepia ye. Kolaa na bɛahye Gyisɛse la Pita dule ɔ nloa anu kɛ: “Saa bɛ muala bɛnriandi wɔ a, me ngome ɛdeɛ, menrɛnriandi wɔ ɛlɛ.” (Mak. 14:29) Saa ɛzoanvolɛ ne yɛle mɔɔ edwɛndolɛnli  ne mɔɔ vale ɔ rɛle wulale Nyamenle anu na ɔdole edwɛne ɛhye yɛle la bie a, anrɛɛ ɔbahola yeaziezie ɔ nwo yeamaa sɔnea mɔɔ ɛnee la ɔ nyunlu la: “[Gyihova] wɔ me afoa, menzulo. Duzu a sonla kɛhola kɛyɛ me a?” (Edw. 118:6) Nɔe ne mɔɔ aleɛ kye a Gyisɛse bawu la, ɔvale Pita nee ye ɛzoanvolɛ ne mɔ anu nwiɔ ɔhɔle Gɛtesɛmani tola ne akunlu lɔ. Noko Pita nee ɔ gɔnwo mɔ lafele, bɛammaa bɛ nye angyinla zo. Gyisɛse dunwuele bɛ na ɔzele bɛ kɛ: “Bɛzinza, bɛzɛlɛ na bɛangɔndɔ munzule nu.” (Mak. 14:38) Noko Pita lafele bieko na nzinlii ɔmanle ɛzulolɛ nee ɛpiepianlɛ vole ɔ nwo zo.

13. Saa bɛpiepia yɛ kɛ yɛyɛ debie bie mɔɔ ɛnle kpalɛ la a, duzu a baboa yɛ na yɛagyinla ɔ nloa a?

13 Yɛkola yɛsukoa debie bieko mɔɔ anwo hyia la yɛfi Paelɛte nee Pita neazo ne anu: Saa yɛbahola yɛali ɛpiepianlɛ zo a, ɔwɔ kɛ yɛnyia ndelebɛbo mɔɔ di munli, yɛbɛlɛ yɛ nwo aze, yɛkulo Nyamenle, yɛsulo Gyihova, yɛɛ ɔnle kɛ yɛsulo sonla. Yɛlɛ diedi mɔɔ gyi ndelebɛbo mɔɔ di munli la azo a, ɔmaa yɛfa akɛnrasesebɛ yɛbɔ edwɛkɛ ne nolo. Ɛhye boa maa yɛgyinla ɛpiepianlɛ nloa na yɛdi sonla nwo ɛzulolɛ zo konim. Nɔhalɛ nu, ɔnle kɛ yɛtu yɛ nloa anu. Emomu, ɔwɔ kɛ yɛbɛlɛ yɛ nwo aze yɛdie yɛto nu kɛ yɛhyia Nyamenle moalɛ na yɛahola yɛagyinla ɛpiepianlɛ nloa. Ɔwɔ kɛ yɛsɛlɛ Gyihova sunsum ne moalɛ na yɛmaa ɔ nwo ɛlɔlɛ ka yɛ maa yɛkpogya ye duma ne na yɛdi ye ngyinlazo ne mɔ azo. Bieko, ɔwɔ kɛ yɛsiezie yɛ nwo yɛmaa ɛpiepianlɛ. Kɛ neazo la, saa yɛ ngakula ne mɔ fa asɔneyɛlɛ dumua siezie bɛ nwo na bɛ gɔnwo mɔ piepia bɛ kɛ bɛyɛ debie bie mɔɔ ɛnle kpalɛ la a, bɛbahola bɛagyinla ɔ nloa.—2 Kɔl. 13:7. *

KOATI BƐ NWO FƆLƐBUALƐ MƆƆ ƐNFƐTA

14. Adwenle boni a Abɔnsam kulo kɛ yɛnyia ye wɔ nvonleɛ mɔɔ yɛyɛ ye dɛba la anwo a?

14 Ɔdwu mekɛ ne bie a, bɛkola bɛfa baka anzɛɛ bolɛ kpole bie bɛkenda adenle mɔɔ nane bie fa nu la anwuma bɛfa bɛsua ye ɛhane. Saa nane ne anwo ka nyɛma ne mɔɔ lɛ baka ne anzɛɛ bolɛ ne la a, ɔye ɔbɛtɛ ye. Yɛbahola yɛava bɛ nwo fɔlɛbualɛ mɔɔ ɛnfɛta la yɛado adesoa ɛlomboɛ ɛhye mɔɔ kola bɛtɛ la anwo. Saa yɛdwenle ɛtane bie mɔɔ yɛyɛle ye dɛba ne la anwo somaa a, ɔbahola yeamaa yɛ ‘ɛnwomenle awie.’ (Bɛgenga Edwɛndolɛ 38:3-5, 8.) Seetan kulo kɛ yɛnyia adwenle kɛ Gyihova ɛnrɛze yɛ anwunvɔne yɛɛ yɛnrɛhola yɛnrɛli Ye ngyinlazo ne mɔ azo.

15, 16. Kɛ ɔkɛyɛ na yɛahoati bɛ nwo fɔlɛbualɛ mɔɔ ɛnfɛta la anwo ɛhane ne ɛ?

15 Kɛ ɔkɛyɛ na wɔahoati ɛhane ɛhye mɔɔ ɔbɛtɛ la ɛ? Saa wɔyɛ ɛtane kpole bie a, ɛnee siezie ɛ nee Gyihova bɛ avinli. Kɔ mgbanyima ne mɔ ɛkɛ maa bɛboa wɔ. (Gye. 5:14-16) Yɛ mɔɔ ɛbahola ye yɛ la kɔsɔɔti fa di ngyegyelɛ ne anwo gyima. (2 Kɔl. 7:11) Saa bɛtwe ɛ nzo a, mmamaa ɛ sa nu to. Ndeanlɛ le ɛlɔlɛ mɔɔ Gyihova lɛ maa wɔ la anwo sɛkɛlɛneɛ. (Hib. 12:6) Sika ɛ bo kɛ ɛnrɛyɛ ɛtane ne bieko, na bɔ mɔdenle twe ɛ nwo fi ninyɛne mɔɔ maa ɛyɛ zɔhane ɛtane ne la anwo. Mekɛ mɔɔ wɔnlu ɛ nwo na wɔhakyi wɔ adwenle la, nyia diedi kɛ Gyisɛse Kelaese ɛkpɔnenlɛ afɔle ne bahola akpɔda wɔ ɛtane ne bɔkɔɔ.—1 Dwɔn 4:9, 14.

16 Menli bie mɔ kɔ zo bua bɛ nwo fɔlɛ wɔ ɛtane bie mɔɔ bɛva bɛhyɛ bɛ la anwo. Saa zɔhane a ɛte nganeɛ a, ɛnee kakye kɛ Gyihova vale Pita nee ɛzoanvolɛ gyɛne mɔɔ kpole Ɔ Ra Gyisɛse mɔɔ ɔkulo ye wɔ ye amaneɛnwunlɛ mekɛ ne anu la, ɛtane hyɛle bɛ. Gyihova vale nrenya bie mɔɔ bɛdule ye bɛvile Kɔlente asafo ne anu ɔlua munzule ɛbɛla bie mɔɔ ɔbɔle na nzinlii  ɔnlunle ɔ nwo la ɛtane ɔhyɛle ye. (1 Kɔl. 5:1-5; 2 Kɔl. 2:6-8) Menli mɔɔ yɛle ɛtane kpole na Nyamenle vale bɛ ɛtane hyɛle bɛ la anwo edwɛkɛ dɔɔnwo wɔ Nyamenle Edwɛkɛ ne anu.—2 Edk. 33:2, 10-13; 1 Kɔl. 6:9-11.

17. Duzu a ɛkpɔnedeɛ ne bahola ayɛ amaa yɛ a?

17 Saa ɛnlu ɛ nwo nɔhalɛ nu na ɛdie ɛdi kɛ Gyihova baze wɔ anwunvɔne a, ɔbava wɔ ɛtane yeahyɛ wɔ na ɔnrɛhakye ye bieko. Mmate nganeɛ kɛ Gyisɛse ɛkpɔnenlɛ afɔle ne ɛnrɛhola ɛnrɛkpɔda wɔ ɛtane ne ɛlɛ. Saa ɛyɛ zɔ a ɛbadɔ Seetan ngane ne mɔ ko anu. Ɔnva nwo adwenle biala mɔɔ Abɔnsam kpondɛ kɛ ɛnyia la, ɛkpɔnedeɛ ne bahola akpɔda ɛtane mɔɔ menli ɛyɛ na bɛnlu bɛ nwo la kɔsɔɔti. (Mrɛ. 24:16) Ɛkpɔnedeɛ ne anu diedi kola ye adesoa biala mɔɔ la menli mɔɔ bɛbu bɛ nwo fɔlɛ mɔɔ ɛnfɛta akɔme zo la na ɔmaa bɛnyia anwosesebɛ bɛfa bɛ ahonle, adwenle nee bɛ ɛkɛla muala bɛsonle Nyamenle.—Mat. 22:37.

YƐZE SEETAN NGANE NE MƆ

18. Kɛ ɔkɛyɛ na yɛahoati Abɔnsam ngane ne mɔ ɛ?

18 Tɛ ɛhane mɔɔ Seetan fa ahye yɛ la a nwolɛ hyia ye a, mɔɔ ɔkpondɛ ala a le kɛ ɔ sa baha yɛ. Ɔluakɛ yɛze Seetan ndenle ne mɔ amuala la ati, yɛbahola yeali ɔ nwo zo konim. (2 Kɔl. 2:10, 11) Saa yɛkɔ sɔnea nu na yɛyɛ asɔne yɛkpondɛ nrɛlɛbɛ a, yɛnrɛdɔ ye ɛhane nu. Gyemise hɛlɛle kɛ: “Saa bɛ nuhua bie hyia nrɛlɛbɛ a, ɔzɛlɛ Nyamenle na ɔkɛva ɔkɛmaa ye; ɔboalekɛ Nyamenle ati akunlu le kɛnlɛma na ɔyila bɛdabɛ mɔɔ bɛbiza ye debie la.” (Gye. 1:5) Ɔwɔ kɛ yɛyɛ yɛ asɔneyɛlɛ ne anwo gyima ɔlua bɛtianwo debiezukoalɛ nee Nyamenle Edwɛkɛ ne mɔɔ yɛbava yɛabɔ yɛ ɛbɛla dahuu la azo. Mbuluku mɔɔ yɛfa yɛsukoa Baebolo ne mɔɔ akɛlɛ nɔhavo nee nrɛlɛbɛvolɛ eku ne ɛyɛ la maa yɛnwu Abɔnsam ngane ne mɔ na yɛkoati.

19, 20. Duzu ati a ɔwɔ kɛ yɛkyi ɛtane a?

19 Asɔneyɛlɛ nee Baebolo ɛzukoalɛ maa yɛkulo mɔɔ ɔle kpalɛ la. Noko eza ɔhyia kɛ yɛkyi ɛtane. (Edw. 97:10) Saa yɛdwenledwenle ngyegyelɛ mɔɔ atiakunluwɔzo ɛtane fa ba la anwo a, ɔmaa yɛtwe yɛ nwo yɛfi nwo. (Gye. 1:14, 15) Yɛsukoa kɛ yɛbahyi ɛtane na yɛahulo kpalɛ a, Seetan ngane ne mɔ ɛnrɛnyia yɛ ɔluakɛ yɛ nye ɛnrɛlie ye kɔleɛ mɔɔ ɔfa ɔgua ye ngane ne mɔ anu la anwo.

20 Yɛyɛ Nyamenle mo kɛ ɔboa yɛ dahuu mɔɔ Seetan ɛnli yɛ nwo zo konim a! Gyihova dua Ye sunsum ne, ye Edwɛkɛ ne, nee ye ahyehyɛdeɛ ne azo ɔdie yɛ ‘ɔfi munzuvolɛ ne’ asa nu. (Mat. 6:13) Yɛbazuzu kɛzi yɛbahola yɛahoati Abɔnsam ngane nwiɔ bieko mɔɔ ɛhye Nyamenle azonvolɛ dɔɔnwo anyewɔzo la anwo wɔ edwɛkɛ mɔɔ doa zo la anu.

[Ɔ bo ɛkɛ ne edwɛkɛ]

^ ɛden. 13 Ɔwɔ kɛ awovolɛ nee bɛ mra suzu “Peer-Pressure Planner” mɔɔ wɔ Questions Young People Ask—Answers That Work, Foa 2 ne mukelɛ 132-133 la anwo. Bɛbahola bɛazuzu edwɛkɛ ɛhye anwo wɔ bɛ nɔsolɛ Abusua Ɛzonlenlɛ ne abo.

[Debiezukoalɛ kpuyia ne mɔ]

[Nvoninli wɔ mukelɛ 24]

Saa yɛannea yɛ ɛdendɛlɛ boɛ a ɔbamaa ngyegyelɛ dɔɔnwo ara asafo ne anu

[Nvoninli wɔ mukelɛ 27]

Ɛbahola wɔahoati fɔlɛbualɛ mɔɔ ɛnfɛta nwo adesoa ne