Wulu kɔ nuhua edwɛkɛ ne azo

Wulu kɔ nuninyɛne ne azo

Asoo Ɔle Kɛ Mbuluku Mɔɔ Ɛha La?

Asoo Ɔle Kɛ Mbuluku Mɔɔ Ɛha La?

 Asoo Ɔle Kɛ Mbuluku Mɔɔ Ɛha La?

“Bɛfa Nyamenle Sunsum a bɛkɛlɛ Nyamenle Edwɛkɛ ne a, na ɔle kpalɛ . . . amaa sonla ne mɔɔ sonle Nyamenle la ali munli na bɛaziezie ye bɛamaa yeayɛ gyima kpalɛ.”​—2 TEMƆTE 3:16, 17.

TƐ MENLI ne amuala a die edwɛkɛ ɛhye mɔɔ Baebolo ne ka la di a. Na ɛdawɔ noko ɛ? Kɛzi ɛbu Baebolo ne ɛ?

• Buluku kɛnlɛma bie

• Ɛzonlenlɛ nu buluku

• Nwɔra buluku mɔɔ ɛbɛlabɔlɛ nwo edwɛkɛ wɔ nu

• Nyamenle Edwɛkɛ

Kpuyia bieko mɔɔ boka nwo la a le kɛ, Asoo mɔɔ ɛdie ɛdi la anwo hyia? Suzu mɔɔ Baebolo mumua ne ka la anwo: “Debie biala mɔɔ bɛhɛlɛ ye wɔ Nyamenle Edwɛkɛ ne anu la wɔ ɛkɛ ne kilehile yɛ, amaa [yɛanyia arɛlekyekyelɛ], yɛazi yɛ ahonle yɛalua mɔɔ Nyamenle Edwɛkɛ ne fa maa yɛ la azo yɛanyia anyelazo.” (Wulomuma 15:4) Yemɔti Baebolo ne bodane a le kɛ bɛbava bɛahilehile yɛ, bɛbava bɛakyekye yɛ rɛle na yɛanyia anyelazo.

Noko akee, saa Baebolo ne le kɛ mbuluku mɔɔ ɛha mɔɔ ɛzonlenlɛ nu mbuluku boka nwo la a, asoo anrɛɛ ɛ nee wɔ abusua ne bɛava bɛ nwo ado ye ngilehilelɛ nee ye adehilelɛ zo, titile saa mɔɔ ɔka la nee wɔ adwenle ɛnnyia a? Saa nwɔra a wɔ Baebolo ne anu a, asoo anrɛɛ ɛbanyia arɛlekyekyelɛ nee anyelazo wɔavi ye ɛwɔkɛ ne mɔ anu?

Noko, menli dɔɔnwo mɔɔ ɛzukoa Baebolo ne la ɛnwu kɛ ɔle Nyamenle Edwɛkɛ. Kɛzi? Duzu a maa Baebolo ne yɛ ngakyile fi mbuluku mɔɔ ɛha la kɔsɔɔti anwo a? Yɛsɛlɛ wɔ maa yɛzuzu ninyɛne nnu mɔɔ maa Baebolo ne yɛ ngakyile fi mbuluku mɔɔ ɛha la anwo, wɔ edwɛkɛ mɔɔ ɔdoɔdoa zo la anu.