Wulu kɔ nuhua edwɛkɛ ne azo

Wulu kɔ nuninyɛne ne azo

Ɔle Tetedwɛkɛ, Ɔnle Nwɔra

Ɔle Tetedwɛkɛ, Ɔnle Nwɔra

 Ɔle Tetedwɛkɛ, Ɔnle Nwɔra

“Menleɛnlea ninyɛne ɛhye mɔ anu boɛ, ɔvi bɛ mɔlebɛbo.”​—LUKU 1:3.

KƐZI BAEBOLO NE LE NGAKYILE Ɛ? Menli mɔɔ to nwɔra la bɔ bɛ ti anu ka edwɛkɛ. Bɛngile ɛleka nee kenle mɔɔ ɔzile la, yɛɛ bɛmbɔ menli mɔɔ wɔ nu la aluma. Noko tetedwɛkɛ dɔɔnwo wɔ Baebolo ne anu mɔɔ maa menli mɔɔ kenga la nwu kɛ ye edwɛkɛ “le nɔhalɛ bɔkɔɔ” a.​—Edwɛndolɛ 119:160, The Psalms for Today, mɔɔ R. K. Harrison hɛlɛle la.

NEAZO: Baebolo ne ka kɛ ‘Nɛbukadenɛza mɔɔ ɛnee ɛlɛdi Babelonia ebia ne la hyele Dwuda Belemgbunli Gyɛhɔyakɛn nuokɛ.’ Nzinlii, “Babelonia Belemgbunli Yivelemɛlodake nwunle Gyɛhɔyakɛn anwunvɔne na ɔmanle bɛyele ye bɛvile efiade.” Na “alehyenlɛ biala mɔɔ [Gyɛhɔyakɛn kɛkpusu] ɔ ti na ɔdua zolɛ la, bɛmanle ye ninyɛne mɔɔ ɔkɛhyia nwolɛ la anwo ezukoa.”​—2 Arelemgbunli 24:12, 15; 25:27-30.

MƆƆ AZETUDUVOMA ƐNWU YE LA: Azetuduvoma ɛnwu arane kɛlɛtokɛ bie mɔɔ bɛyɛle ye wɔ Nɛbukadenɛza II mekɛ zo la wɔ ɛleka mɔɔ ɛnee tete Babelɔn wɔ la. Bɛhɛlɛ aleɛ mɔɔ ɛnee bɛfa bɛmaa pilizama nee menli mɔɔ ɛnee wɔ belemgbunli sua nu ɛkɛ ne la aluma wɔ zo. “Yaukin [Gyɛhɔyakɛn],” mɔɔ ɛnee le “belemgbunli wɔ Yahud (Dwuda) maanle nu la,” nee ye sua nu amra aluma boka nwo. Na Yivelemɛlodake mɔɔ lile Nɛbukadenɛza agya la anwo edwɛkɛ noko ɛ? Edwɛkɛ bie mɔɔ wɔ buakɛ bie mɔɔ bɛnwunle ye wɔ suakpole bie mɔɔ bikye Susa azo la kenga kɛ: “Babelɔn Belemgbunli Nɛbukadenɛza ara Amil-Marduk, [Yivelemɛlodake], Babelɔn Belemgbunli ne, belemgbunli sua nu.”

KƐ WƆ ADWENLE SE WƆ Ɛ? Asoo tete ɛzonlenlɛ nu mbuluku gyɛne kola ka tetedwɛkɛ mɔɔ le nɔhalɛ? Anzɛɛ Baebolo ne ala?

[Edwɛkɛ mɔɔ bɛkpa wɔ mukelɛ 5]

“Edwɛkɛ mɔɔ Baebolo ne ka ye wɔ mekɛ nee ɛleka mɔɔ ninyɛne bie mɔ sisile anwo la le nɔhalɛ yɛɛ bɛkola bɛfa bɛ nwo bɛto zo bɛtɛla mɔɔ tete buluku gyɛne biala ka la.”​—A SCIENTIFIC INVESTIGATION OF THE OLD TESTAMENT, MƆƆ ROBERT D. WILSON HƐLƐLE LA

[Nvoninli wɔ mukelɛ 5]

Babelɔn Kɛlɛtokɛ Mɔɔ Dwuda Belemgbunli Gyɛhɔyakɛn Duma Wɔ Zo

[Edwɛkɛ Ɛvileka]

© bpk, Berlin/​Vorderasiatisches Museum, SMB/​Olaf M. Tessmer/Art Resource, NY