Wulu kɔ nuhua edwɛkɛ ne azo

Wulu kɔ nuninyɛne ne azo

‘Mela Wɔ Duma Ne Ali’

‘Mela Wɔ Duma Ne Ali’

 ‘Mela Wɔ Duma Ne Ali’

‘Mela wɔ duma ne ali mehile menli mɔɔ ɛvale bɛ ɛvile ɛtane ewiade ye anu ɛmanle me la. . . . Mela wɔ duma ne ali mehile bɛ na mebahɔ zo meayɛ ye zɔhane.’​—DWƆN 17:6, 26.

Mɔɔ Ɔkile: Gyisɛse vale Nyamenle duma lile gyima wɔ ye daselɛlilɛ nu manle menli nwunle ye. Kɛmɔ ɛnee Gyisɛse ta yɛ la, saa ɔlɛkenga Ngɛlɛlera ne a, ɔbɔ Nyamenle duma ne. (Luku 4:16-21 *) Ɔhilele ye ɛdoavolɛ ne mɔ kɛ bɛyɛ nzɛlɛlɛ kɛ: “Egya, Wɔ duma ne anwo ɛde.”​—Luku 11:2.

Alumua Keleseɛnema Yɛle Nwolɛ Neazo: Ɛzoanvolɛ Pita hanle hilele mgbanyima mɔɔ ɛnee wɔ Gyɛlusalɛm la kɛ Nyamenle yele “menli wɔ bɛ avinli ɔrayɛle ye ɛdeɛ bɔkɔɔ” anzɛɛ ɔmanle ye duma ne. (Gyima ne 15:14) Ɛzoanvolɛ ne mɔ nee awie mɔ bɔle nolo kɛ “awie biala mɔɔ kɛbɔ [Gyihova] duma la bɛkɛlie ye ngoane.” (Gyima ne 2:21; Wulomuma 10:13) Eza bɛvale Nyamenle duma bɛlile gyima wɔ mbuluku mɔɔ bɛhɛlɛle la anu. The Tosefta, Dwuuma mɛla ne mɔɔ bɛha bɛbɔ nu mɔɔ bɛhɛlɛle bɛwiele wɔ kɛyɛ ɛvolɛ 300 Y.M. la, ka ye wɔ Keleseɛnema mbuluku mɔɔ dwazotiama yelale ye la anwo kɛ: “Bɛyelale Edwɛkpakavoma ne mbuluku nee minim ne [mɔɔ ɛnee bɛsuzu kɛ ɔle Dwuuma mɔɔ bɛle Keleseɛnema] mbuluku la. Bɛmanle bɛyelale bɛ wɔ ɛleka mɔɔ ɛnee bɛwɔ la, . . . nee mbuluku mɔɔ ɛnee Nyamenle Duma ne wɔ nu la.”

Nwane Mɔ A Di Bɛ Neazo Ne Anzi Ɛnɛ A? Revised Standard Version mɔɔ National Council of the Churches of Christ in the United States manle bɛhɛlɛle la ka ye wɔ mukenye ne anu kɛ: “Bɛgyakyile kɛ bɛkɛva Nyamenle duma kpalɛ ne, mɔɔ maa bɛnwu kɛ ngakyile wɔ ye nee awozonle ne mɔ avinli la bɛkɛli gyima wɔ Dwuuma ɛzonlenlɛ nu kolaa na Keleseɛnema mekɛ ne ara, na ɔnle kpalɛ fee kɛ bɛkɛva bɛkɛli gyima wɔ Keleseɛne Asɔne ne anu.” Ɛhye ati bɛvale amodinli “AWULAE” bɛziele Nyamenle duma ne agyakɛ anu. Kenlensa ye ala, Vatican hanle hilele ye sɛlɛvolɛ mgbanyima ne mɔ kɛ: “Bɛmmabɔ tetragrammaton YHWH * ne mɔɔ le Nyamenle duma ne la yɛɛ bɛmmafa bɛdi gyima wɔ bɛ edwɛne nee bɛ asɔne ɛyɛlɛ nu.”

Nwane mɔ a maa menli nwu Nyamenle duma ne na bɛfa bɛdi gyima ɛnɛ a? Mekɛ mɔɔ Sergey mɔɔ ɛnee wɔ Kyrgyzstan le kakula la, ɔnleanle sini bie mɔɔ ɛnee kile kɛ Nyamenle duma a le Gyihova la. Yeande Nyamenle duma ne bieko toonwo ɛvolɛ kɛyɛ bulu. Nzinlii mɔɔ Sergey hɔle United States la, Gyihova Alasevolɛ nwiɔ hɔkpɔlale ye wɔ ye sua nu na bɛhilele ye Nyamenle duma ne wɔ Baebolo ne anu. Sergey anye liele kɛ yenwu menli mɔɔ fa duma Gyihova ne di gyima la. Mɔɔ yɛ anyelielɛ la, Webster’s Third New International Dictionary ne kile duma “Gyihova Nyamenle” ne abo kɛ, “nyamenle bedevinli ne mɔɔ Gyihova Alasevolɛ sonle ye la.”

[Ɔ bo ɛkɛ ne edwɛkɛ ne mɔ]

^ ɛden. 3Luku 4:18 Gyisɛse vale edwɛkɛ mɔɔ wɔ Ayezaya 61:1 mɔɔ Nyamenle duma Gyihova ne wɔ ɛkɛ wɔ Hibulu aneɛ nu la hanle.

^ ɛden. 5 Wɔ Nzema nu, bɛbɔ Nyamenle duma ne “Gyihova.”