Wulu kɔ nuhua edwɛkɛ ne azo

Wulu kɔ nuninyɛne ne azo

‘Edwɛkpa Mɔɔ Fane Belemgbunlililɛ Ne Anwo La Nolobɔlɛ’

‘Edwɛkpa Mɔɔ Fane Belemgbunlililɛ Ne Anwo La Nolobɔlɛ’

 ‘Edwɛkpa Mɔɔ Fane Belemgbunlililɛ Ne Anwo La Nolobɔlɛ’

“Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.”​—MATEYU 24:14.

Mɔɔ Ɔkile: Edwɛkpa kɛlɛvolɛ Luku bɔle amaneɛ kɛ Gyisɛse “hɔkpɔsale azua nee namunamu zo na ɔbɔle Edwɛkpa ne mɔɔ fane Nyamenle Belemgbunlililɛ ne [anwo la] nolo.” (Luku 8:1) Gyisɛse mumua ne hanle kɛ: “Ɔwɔ kɛ mebɔ Edwɛkpa ne mɔɔ fane Nyamenle Belemgbunlililɛ ne anwo la nolo wɔ azua mɔɔ ɛha la azo noko, ɔluakɛ ɛhye ati yɛɛ Nyamenle zoanle me a.” (Luku 4:43) Ɔzoanle ye ɛdoavolɛ ne mɔ wɔ namunamu zo na ɔzele bɛ kɛ bɛbali “me nwo daselɛ . . . bɛahɔdwu aleɛabo ɛleka biala.”​—Gyima ne 1:8; Luku 10:1.

Alumua Keleseɛnema Yɛle Nwolɛ Neazo: Gyisɛse ɛdoavolɛ ne mɔ yɛle mɔɔ ɔhanle ɔhilele bɛ la ndɛndɛ. “Dahuu bɛhɔle Ɛzonlenlɛ Sua ne anu nee azua nu bɛhilehilele na bɛbɔle Edwɛkpa ne mɔɔ fane Gyisɛse anwo la nolo kɛ yemɔ a ɔle Mɛzaya ne a.” (Gyima ne 5:42) Tɛ menli ekpunli ekyi bie ala a yɛle daselɛlilɛ gyima ne a, emomu, asafo ne anu amra kɔsɔɔti. Tetedwɛkɛ kɛlɛvolɛ Neander hanle kɛ “Celsus, awie mɔɔ lumuale hɛlɛle edwɛkɛ tiale Keleseɛnema la liele dole nuhua kɛ menli mɔɔ fa mboane enrinli yɛ gyima, bɛyɛ mgbɔlaboa, bɛyɛ nane nwoma nwo gyima, menli mɔɔ ze nwoma kpole nee mɔɔ bɛangɔ sukulu fee la, bɔle edwɛkɛ ne nolo wɔ anyebolo zo.” Jean Bernardi hɛlɛle ye wɔ ye buluku The Early Centuries of the Church, ne anu kɛ: “Ɛnee ɔwɔ kɛ [Keleseɛnema] kɔka edwɛkɛ ne kile menli wɔ ɛleka biala la. Wɔ adenle nu nee azuamgbole zo, gua zo nee azua nu. Saa bɛtie bɛ anzɛɛ bɛandie bɛ a. . . . Bɛhɔ aleɛabo ɛleka biala.”

Nwane Mɔ A Di Bɛ Neazo Ne Anzi Ɛnɛ A? Anglican ɛsɔfo David Watson hɛlɛle kɛ: “Asɔnema mɔɔ ɛkpo kɛ bɛkɛha edwɛkɛ ne na  bɛkɛhilehile menli la a le debie ko mɔɔ ɔti menli anye ɛnlie nyamenle ɛzonlenlɛ nwo ɛnɛ a.” José Luis Pérez Guadalupe hɛlɛle vanenle Evangelicals, Adventists nee awie mɔ anwo wɔ ye buluku Why Are the Catholics Leaving? ne anu kɛ, “bɛngɔ sua nu nee sua nu.” Ɔfane Gyihova Alasevolɛ nwo la, ɔhɛlɛle kɛ: “Bɛkɔ sua nu nee sua nu dahuu.”

Yɛnwu debie kpalɛ ko mɔɔ ɔyɛ anyelielɛ mɔɔ Jonathan Turley nwunle ye la wɔ Cato Supreme Court Review, 2001-2002 ne anu kɛ: “Saa ɛbɔ Gyihova Alasevolɛ duma a, menli dɔɔnwo adwenle ba menli mɔɔ ba yɛ azua nu wɔ mekɛ kpalɛ nu baka edwɛkɛ ne kile yɛ la azo. Tɛ menli mɔɔ bɛmaa bɛahakyi bɛ diedi la angome ati a Gyihova Alasevolɛ vi anlenkɛ nloa bɛkɔ anlenkɛ nloa a, emomu, ɔmaa bɛdabɛ noko bɛ diedi yɛ kpole.”

[Ɛlɛka wɔ mukelɛ 9]

Wɔnwu Nzonlɛyɛlɛ Ne Ɔ?

Ɔlua Ngɛlɛlera ne anu edwɛkɛ mɔɔ yɛzuzu nwo wɔ edwɛkɛ ɛhye mɔ anu la ati, nwane mɔ a ɛsuzu kɛ bɛlɛ nɔhalɛ Keleseɛne Ɛzonlenlɛ nzonlɛyɛlɛ ne ɛnɛ a? Ɔwɔ nuhua kɛ eku anzɛɛ asɔne dɔɔnwo mɔɔ bɛfɛlɛ bɛ nwo Keleseɛnema la wɔ ɛkɛ ɛdeɛ, noko kakye mɔɔ Gyisɛse hanle hilele ye ɛdoavolɛma ne la: “Tɛ awie biala mɔɔ kɛvɛlɛ me kɛ, ‘Awulae, Awulae’ la a banyia Anwuma Belemgbunlililɛ ne a, na bɛdabɛ mɔɔ bɛyɛ mɔɔ Egya mɔɔ wɔ anwuma la kpondɛ kɛ bɛyɛ la a banyia ye a.” (Mateyu 7:21) Menli mɔɔ yɛ Selɛ ne ɛhulolɛdeɛ na bɛlɛ nɔhalɛ Keleseɛne Ɛzonlenlɛ nzonlɛyɛlɛ mɔɔ ɛbanwu bɛ na ɛ nee bɛ abɔ la bahola amaa wɔanyia nyilalɛ mɔɔ ɛnlɛ awieleɛ wɔ Nyamenle Belemgbunlililɛ ne abo. Yɛsɛlɛ wɔ biza Gyihova Dasevolɛ mɔɔ vale magazine ɛhye rɛlɛle wɔ la maa ɔha Nyamenle Belemgbunlililɛ ne nee nyilalɛ mɔɔ ɔbava yeara la anwo edwɛkɛ dɔɔnwo ɔhile wɔ.​—Luku 4:43.