Wulu kɔ nuhua edwɛkɛ ne azo

Wulu kɔ nuninyɛne ne azo

Amagɛdɔn—Duzu A Menli Ka Ye Wɔ Nwo a?

Amagɛdɔn—Duzu A Menli Ka Ye Wɔ Nwo a?

 Amagɛdɔn​—Duzu A Menli Ka Ye Wɔ Nwo a?

“[Bɛboɔboale] arelemgbunli ne mɔ anloa wɔ ɛleka bie mɔɔ bɛfɛlɛ ye Hibulu nu ‘Amagɛdɔn’ la.”—YEKILE 16:16.

SAA ɛte edwɛkɛkpɔkɛ “Amagɛdɔn” a duzu a ba wɔ adwenle nu a? Bie a ɔbamaa wɔahakye esiane kpole bie mɔɔ zile la. Edwɛkɛkpɔkɛ ne finde kokye wɔ Baebolo ne anu ɛdeɛ, noko ɛzonlenlɛ nu mgbanyima nee menli mɔɔ dua ninyɛne ngakyile zo bɔ nolo la ka nwolɛ edwɛkɛ dɔɔnwo.

Adwenle mɔɔ menli dɔɔnwo lɛ ye Amagɛdɔn ne anwo la nee mɔɔ Baebolo ne ka la yia ɔ? Ɔfɛta kɛ ɛnwu mualɛ ne. Duzu ati ɔ? Ɔluakɛ nɔhalɛ edwɛkɛ mɔɔ fane Amagɛdɔn ne anwo la ɛnrɛmaa ɛnrɛzulo, ɔbamaa wɔanwu kɛ asetɛnla kpalɛ wɔ ɛkɛ ne kenlebie, na ɔbaha adwenle mɔɔ ɛlɛ ye wɔ Nyamenle anwo la.

Suzu kpuyia nsa ɛhye mɔ mɔɔ doɔdoa zo la anwo, na fa adwenle mɔɔ menli lɛ ye wɔ Amagɛdɔn ne anwo la toto mɔɔ Baebolo ne kilehile la anwo.

  1. ASOO AMAGƐDƆN LE ESIANE MƆƆ VI SONLA?

Adwelie kɛlɛvoma nee menli mɔɔ yɛ neɛnleanu la ta ka kɛ “Amagɛdɔn” le esiane mɔɔ vi menli. Kɛ neazo la, bɛvɛlɛle Ewiade Konle mɔɔ lumua nee mɔɔ tɔ zo nwiɔ la Amagɛdɔn. Mɔɔ bɛhonle konle zɔhane mɔ bɛwiele la, ɛnee menli sulo kɛ wɔannea a United States nee Soviet Union bava nukelea akodeɛ aho atia bɛ nwo. Menli mɔɔ dua ninyɛne ngakyile zo bɔ nolo la hanle kɛ ɛnee konle zɔhane le “nukelea Amagɛdɔn.” Ɛnɛ, menli mɔɔ yɛ neɛnleanu la sulo kɛ evinli bamaa maanle nu ahakyi bɔkɔɔ wɔ azɛlɛ ye azo, yemɔti bɛbɔ kɔkɔ kɛ ɛhye a bava “Amagɛdɔn” ne ara a.

Mɔɔ bɛ edwɛkɛ ne kile la: Menli lɛ tumi wɔ mɔɔ bara azɛlɛ ne azo kenlebie nee ngoane mɔɔ wɔ zo kɔsɔɔti la azo. Saa arane ne mɔ anyɛ bɛ ninyɛne nrɛlɛbɛ nu a, azɛlɛ ne bazɛkye bɔkɔɔ.

Mɔɔ Baebolo ne ka la: Nyamenle ɛnrɛmaa menli adenle bɛnrɛzɛkye azɛlɛ ne. Baebolo ne ka kɛ Gyihova * ambɔ azɛlɛ ne “sesakaa biala yeanzie ɛkɛ.” Emomu, ɔbɔle “amaa sonla adɛnla nu.” (Ayezaya 45:18) Kɛ anrɛɛ Nyamenle bamaa menli adenle bɛazɛkye azɛlɛ ne bɔkɔɔ la, ɔbazɛkye “bɛdabɛ mɔɔ bɛsɛkye azɛlɛ ye la.”—Yekile 11:18.

2. ASOO AMAGƐDƆN LE ABƆDEƐ NU ESIANE?

Ɔyɛ a adwelie kɛlɛvoma fa edwɛkɛkpɔkɛ “Amagɛdɔn” ka esiane mgbole mɔɔ sisi la anwo edwɛkɛ. Kɛ neazo la, amaneɛbɔlɛ bie ka kɛ mɔɔ zile Haiti wɔ 2010 la le “Amagɛdɔn.” Ɛnee ɔlɛka amaneɛnwunlɛ, ninyɛne mɔɔ zɛkyele, nee azɛlɛkpusulɛ kpole ne mɔɔ zile maanle ne anu la anwo edwɛkɛ. Tɛ ninyɛne mɔɔ ɛzi la angome a adwelie kɛlɛvoma nee siniyɛvoma ka nwolɛ edwɛkɛ kɛ ɔle Amagɛdɔn a, emomu, ninyɛne mɔɔ bɛsulo kɛ ɔbazi kenlebie la noko. Kɛ neazo la, bɛka kɛ “Amagɛdɔn” le debie bie mɔɔ bɛsuzu kɛ ɔvi anwuma na ɔbarabɔ azɛlɛ ne yeazɛkye ye a.

Mɔɔ bɛ edwɛkɛ ne kile la: Amagɛdɔn le debie mɔɔ si arɛlevilɛ nu na ɔku kpalɛma nee ɛtanema kɔsɔɔti. Debie ekyi bie ala a ɛbahola wɔayɛ ye wɔ nwo a.

Mɔɔ Baebolo ne ka la: Amagɛdɔn ɛnle esiane mɔɔ si arɛlevilɛ nu mɔɔ ku awie biala a. Emomu, ɛtanevolɛma ala a bɛbazɛkye bɛ wɔ Amagɛdɔn a. Baebolo ne bɔ ɛwɔkɛ kɛ ɔnrɛhyɛ biala: “Ɛnee amumuyɛnli ne abo zo ɛminli, ɛbahɔnlea ɛleka mɔɔ ɔwɔ la, na ɛnrɛnwu ye.”—Edwɛndolɛ 37:10.

3. ASOO NYAMENLE BAZƐKYE AZƐLƐ NE WƆ AMAGƐDƆN?

Menli dɔɔnwo mɔɔ bɛkɔ asɔne la die di kɛ konle mɔɔ li amozi la badɔ kpalɛma nee ɛtanema avinli na yemɔ a bava yɛ ewiade awieleɛ ne ara a. Neɛnleanu mɔɔ Princeton Survey Research Associates ne yɛle ye wɔ United States la manle ɔlale ali kɛ menli mɔɔ bɛbizebizale bɛ edwɛkɛ la anu ɛya ko ngyɛnu 40 die di kɛ “Amagɛdɔn konle” ne a bava ewiade ne ahɔ awieleɛ a.

Mɔɔ bɛ edwɛkɛ ne kile la: Bɛambɔ menli anzɛɛ azɛlɛ ne kɛ bɛdɛnla ɛkɛ ne dahuu.  Mekɛ mɔɔ Nyamenle bɔle sonla la, ɛnee ɔze kɛ ɔdwu mekɛ ne bie a bɛ kɔsɔɔti bɛbawu.

Mɔɔ Baebolo ne ka la: Baebolo ne ka Nyamenle anwo edwɛkɛ kɛ: “Ɛdawɔ yɛɛ ɛwulale azɛlɛ ye adiabo ne mɔ a, amaa bɛangola ye kpusu.” (Edwɛndolɛ 104:5) Mɔɔ fane bɛdabɛ mɔɔ bɛbadɛnla azɛlɛ ne azo anwo la, Baebolo ne ka kɛ: “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.”—Edwɛndolɛ 37:29.

Ɔda ali kɛ, adwenle mɔɔ menli dɔɔnwo lɛ ye wɔ Amagɛdɔn ne anwo la nee mɔɔ Baebolo ne ka la ɛnnyia. Yemɔti, boni a le nɔhalɛ a?

[Ɔ bo ɛkɛ ne edwɛkɛ]

^ ɛden. 9 Baebolo ne ka kɛ Nyamenle duma a le Gyihova.