Wulu kɔ nuhua edwɛkɛ ne azo

Wulu kɔ nuninyɛne ne azo

Ebileham—Sonla Mɔɔ Lɛ Akɛnrasesebɛ

Ebileham—Sonla Mɔɔ Lɛ Akɛnrasesebɛ

 Ebileham​—Sonla Mɔɔ Lɛ Akɛnrasesebɛ

Ebileham ɛlɛnea ye abusua ne nee ye azonvolɛ wɔ mekɛ mɔɔ bɛlɛsiezie bɛ nwo bɛahɔ Keena la. (Mɔlebɛbo 12:1-5) Mɔɔ Ebileham anye gyi menli ekpunli kpole ɛhye mɔɔ ɔwɔ kɛ ɔmaa bɛ aleɛ anwo la, ɔnwunle ɛzonlelilɛ mɔɔ la ɔ nwo zo la. Kɛ ɔkɛyɛ na yeanyia bɛ nwonane nu ngyianlɛdeɛ yeamaa bɛ wɔ maanle mɔɔ bɛnze ye wɔ nu la anu ɛ? Asoo anrɛɛ gyima ɛhye bayɛ se amaa ye wɔ Yule, ɛleka mɔɔ anwonyia, nyɛmoa aleɛ, azɛlɛ kpalɛ, nee nzule dɔɔnwo wɔ la ɔ? Na saa ɔ nwo to ye na ɔwu wɔ maanle fofolɛ ɛhye anu ɛ? Nwane a banlea ye abusua ne a? Ninyɛne ɛhye mɔ anwo adwenleadwenle nee ɛzulolɛ angola ando Ebileham asa nu. Ɛnee yesika ɔ bo kɛ ɔbali Nyamenle mɛla ne mɔ azo ɔnva nwo mɔɔ ɔbazi biala la—akɛnrasesebɛ nwo neazo kpalɛ boni ɛne.

AKƐNRASESEBƐ A LE DUZU? Ɔle subane mɔɔ ɔmaa awie nyia anwosesebɛ, akɛnrazilɛ, mɔɔ ɔnzulo debie a—ɔle ɛzulolɛ nee foanvoanle angɔbɛnzi. Saa yɛlɛ akɛnrasesebɛ a ɛnee ɔngile kɛ ɛzulolɛ ɛtɛkanle yɛ ɛlɛ. Emomu, awie mɔɔ Nyamenle kɛmaa ye akɛnrasesebɛ la tu debie nwo agyakɛ ɔnva nwo kɛ ɔsulo la.

KƐZI EBILEHAM LALE AKƐNRASESEBƐ ALI Ɛ? Ebileham anli menli dɔɔnwo ne anzi. Ebileham nyinle wɔ ɛleka mɔɔ ɛnee awozonle ɛzonlenlɛ ɛbu la. Noko akee, yeammaa awie mɔ adwenle mɔɔ bɛbanyia ye wɔ ɔ nwo la anga ye ɛzulolɛ wɔ mɔɔ ɔle kpalɛ mɔɔ ɔwɔ kɛ ɔyɛ la anwo. Emomu, Ebileham nyianle akɛnrasesebɛ kpale asetɛnla adenle fofolɛ, eza ɔkpale kɛ ɔbazonle nɔhalɛ Nyamenle kokye ne—“Anwuma Anwuma Nyamenle” Gyihova.—Mɔlebɛbo 14:21, 22.

Ebileham manle nɔhalɛ Nyamenle ne mɔɔ ɔbazonle ye la lile nwonane afoa nu ninyɛne ɛkpondɛlɛ nyunlu. Ɛnee ɔlɛ ɛhulolɛ kɛ ɔbagyakyi asetɛnla kpalɛ mɔɔ ɔlɛ ye wɔ Yule la na yeali ye abusua ne anyunlu bɛahɔ fienemgbole ne anu. Na ɛnee ɔlɛ anwodozo bɔkɔɔ kɛ Gyihova bali ye ngyianlɛ nwo gyima. Ɔbahola yeara ye kɛ, mekɛ ɛlɛkɔ la, Ebileham anwo lɔle ninyɛne kpalɛ mɔɔ ɛnee ɔnyia ye wɔ Yule la bie mɔ. Noko ɛnee Ebileham die di kɛ Gyihova bamaa ɔ nee ye abusua ne asa aha mɔɔ bɛhyia nwo la. Gyihova mɔɔ Ebileham dudule hisale ye kɛ awie mɔɔ ɔ nwo hyia ye wɔ ye asetɛnla nu la, manle ɔnyianle akɛnrasesebɛ ɔlile Nyamenle mɛla zo.

DUZU A YƐSUKOA YƐFI NU A? Yɛbahola yɛazukoa Ebileham yɛava akɛnrasesebɛ yɛadie Gyihova, saa menli mɔɔ wɔ ɛleka mɔɔ yɛwɔ la ɛnyɛ zɔ bɔbɔ a. Kɛ neazo la, Baebolo ne ka kɛ bɛdabɛ mɔɔ bɛfa diedi bɛgyinla Gyihova Nyamenle afoa la bɛayia ɛkpɔlɛ, ɔbahola yeavi bɛ gɔnwo mɔ anzɛɛ bɛ mbusuafoɔ. (Dwɔn 15:20) Noko akee,  saa yɛdie mɔɔ yɛsukoa ye wɔ Gyihova anwo la yɛdi amgba a, yɛbalua ɛbulɛ adenle zo yɛahilehile yɛ diedi ne anu.—1 Pita 3:15.

Eza yɛbahola yɛanyia anwodozo wɔ Nyamenle ɛwɔkɛ ne mɔɔ yebɔ bɛdabɛ mɔɔ bɛnyia diedi wɔ ye nu la anu. Anwodozo zɛhae maa yɛnyia akɛnrasesebɛ yɛfa yɛ asetɛnla yɛsie sunsum nu ninyɛne zo yɛtɛla nwonane afoa nu ninyɛne. (Mateyu 6:33) Maa yɛzuzu kɛzi abusua bie yɛle ɛhye anwo neazo la anwo.

Ɔnva nwo kɛ ɛnee Doug nee Becky lɛ ngakula nwiɔ la, ɛnee bɛkpondɛ kɛ bɛtu bɛkɔ ɛleka mɔɔ moalɛ nwo hyia la na bɛkɔbɔ Baebolo nu edwɛkpa ne nolo. Mekɛ mɔɔ bɛyɛle neɛnleanu mɔɔ fɛta na bɛyɛle asɔne la, bɛzile kpɔkɛ kɛ bɛbayɛ mɔɔ gyi bɛ nye zo la. Doug ka kɛ: “Ɛnee ɔhyia akɛnrasesebɛ na yɛ nee ngakula ne mɔ adu mɔɔ ɛnee yɛnze kɛzi ninyɛne bayɛ a. Noko kolaa na yɛazi yɛ kpɔkɛ ne la, yɛzuzule Ebileham nee Sɛla neazo ne anwo. Yɛdwenledwenlenle kɛzi bɛvale bɛ nwo bɛdole Gyihova anwo zo—nee kɛzi ɔnleanle bɛ la anwo—na ɔboale yɛ kpalɛ.”

Doug ka ye wɔ bɛ gyima ne mɔɔ bɛhɔyɛle ye wɔ maanle fofolɛ zo la anwo kɛ: “Yɛnyia nyilalɛ dɔɔnwo.” Ɔkilehile nu kɛ: “Kɛmɔ yɛdele yɛ asetɛnla ne azo kpalɛ la ati, yemaa yɛhola yɛbɔ nu kɛ abusua yɛbɔ nolo. Yɛlile adwelie, na yɛ nee ngakula ne mɔ bɔle nu lile nwɔhoa. Yɛnyia fanwodi mɔɔ yɛnrɛhola yɛnrɛhilehile nu a.”

Nɔhalɛ nu, tɛ menli ne kɔsɔɔti a bɛahola ayɛ nzenzaleɛ kpole ɛhye a. Noko, yɛ muala yɛbahola yɛazukoa Ebileham neazo ne yɛava yɛ Nyamenle ɛzonlenlɛ yɛalumua debie biala anyunlu, mɔɔ yɛlɛ anwodozo kɛ ɔbaboa yɛ a. Saa yɛyɛ ɛhye a, ɛnee yɛlɛdi Baebolo folɛdulɛ ɛhye azo: “Yɛkola yɛsi yɛ kɛnra yɛka kɛ, ‘Awulae le me boavolɛ, menrɛzulo ɛhwee. Duzu yɛɛ sonla kola yɛ me a?’”—Hibuluma 13:5, 6.

[Ɛlɛka/Nvoninli wɔ mukelɛ 7]

Yelɛ Kpalɛ Mɔɔ Sulo Nyamenle

Sɛla gyale nrenya mɔɔ ɛnee ɔlɛ diedi kpole la. Raalɛ ɛhye mɔɔ sulo Nyamenle la yɛle neazo kɛnlɛma manle yɛ. Nɔhalɛ nu, Baebolo ne bɔ ye duma fane nsa kɛ ɔle awie mɔɔ mraalɛ mɔɔ sulo Nyamenle la bahola azukoa ye neazo ne a. (Ayezaya 51:1, 2; Hibuluma 11:11; 1 Pita 3:3-6) Ɔwɔ nuhua kɛ Baebolo ne ɛnga raalɛ kpalɛ ɛhye anwo edwɛkɛ dɔɔnwo ɛdeɛ, noko yɛze kɛ ɔyɛle neazo kɛnlɛma.

Kɛ neazo la, dwenle Sɛla nyɛleɛ mɔɔ ɔlale ye ali wɔ mekɛ mɔɔ Ebileham bɔle ye amaneɛ kɛ Nyamenle se bɛdu bɛvi Yule suakpole ne azo la anwo. Asoo ɔmanle ɛleka mɔɔ bɛlɛkɔ nee deɛmɔti bɛlɛkɔ la yɛle ye adwenleadwenle? Na bɛ nwonane afoa nu ngyianlɛdeɛ noko ɛ? Asoo ɔlile nyane kɛ ɔlɛgyakyi ɔ gɔnwo mɔ nee ye abusua ne ɛkɛ mɔɔ bie a ɔmmanwu bɛ bieko la ɔ? Kpolerazulɛ biala ɛnle nwo kɛ ɔbadwenledwenle ninyɛne ɛhye mɔ anwo. Noko akee, ɔvile ye ɛhulolɛ nu ɔlile adehilelɛ ne azo ɔdule, na ɛnee ɔlɛ diedi wɔ Gyihova anu kɛ ɔbayila ye wɔ ye tieyɛ ne anwo.—Gyima ne 7:2, 3.

Ɛnee Sɛla sulo Nyamenle na eza ɔle yelɛ kpalɛ. Sɛla nee ɔ hu ampele tileyɛlɛ nwo, ɔvile ye ahonle nu ɔvale ɛbule kpalɛ ɔmanle ɔ hu, na ɔlile adehilelɛ biala mɔɔ ɔvale ɔmanle ye la azo. Ɔluale ɛhye azo ɔlale ye nyamenlezo anwofɛlɛko ne mɔɔ vea ye ahonle nu la ali.—1 Pita 3:1-6.

Yelɛma mɔɔ bɛwɔ ɛkɛ ɛnɛ la bahola azukoa neazo kɛnlɛma ɛhye ɔ? Raalɛ ko mɔɔ bɛfɛlɛ ye Jill, mɔɔ yegya ɛvolɛ 30 la ka kɛ: “Sɛla neazo ne ɛboa me ɛmaa menwu kɛ ɔwɔ kɛ mefi me ahonle nu mekile me adwenle wɔ ninyɛne nwo. Noko, ɛnee ɔwɔ kɛ mekakye kɛ me hu a le abusua tile ne a, yemɔti ɔle ye gyima kɛ ɔbazi kpɔkɛ mɔɔ li awieleɛ la. Saa ɔsi kpɔkɛ ne a, ɔwɔ kɛ mebɔ mɔdenle memaa ɔgyinla.”

Neazo mɔɔ tɛla biala mɔɔ yɛsukoa yɛfi Sɛla ɛkɛ la a le ɛhye: Ɔnva nwo kɛ ɛnee ɔ nwo yɛ fɛ kpalɛ la, Sɛla anli ye kɛnlɛma nzi yeanyɛ anwomemaazo. (Mɔlebɛbo 12:10-13) Emomu, ɔbɛlɛle ɔ nwo aze ɔboale Ebileham wɔ tɛnlabelɛ kɔsɔɔti anu. Nɔhalɛ nu, ɛnee Ebileham nee Sɛla le agyalɛma mɔɔ di nɔhalɛ, bɛbɛlɛ bɛ nwo aze, na bɛlɛ ɛlɔlɛ, yemɔti bɛnyianle nyilalɛ dɔɔnwo.