Wulu kɔ nuhua edwɛkɛ ne azo

Wulu kɔ nuninyɛne ne azo

Nɔhalɛ Ne Kola Kakyi Wɔ Ɛbɛlabɔlɛ

Nɔhalɛ Ne Kola Kakyi Wɔ Ɛbɛlabɔlɛ

 Nɔhalɛ Ne Kola Kakyi Wɔ Ɛbɛlabɔlɛ

BIE a wɔde anzɛɛ bɛva Nyamenle anwo adalɛ ɛhye bie bɛhilehile wɔ ɛlɛ. Noko ɔyɛ se kɛ ɛbayɛ nzenzaleɛ wɔ diedi ɛhye mɔ anu ɔluakɛ wɔva wɔli gyima wɔhyɛ.

Ɔnyɛ azibɛnwo. Ɛzonlenlɛ bie mɔ ɛnva bɛ ngilehilelɛ ɛndo mɔɔ Baebolo ne ka la anwo. Bie mɔ noko ka kɛ Baebolo ne abo ɛdelɛ ɛnla aze bɛfa bɛbili menli nye zo. Noko akee, Gyisɛse ɛdoavolɛ ne mɔ dɔɔnwo dele mɔɔ ɔhanle la abo kpalɛ ɔnva nwo kɛ ɛnee bɛtɛsukoale nwoma kpole la.—Gyima ne 4:13.

Bie a ɛbazuzu kɛ saa ɛsi kpɔkɛ kɛ ɛneɛnlea wɔ diedi ne anu a, ɛnee ɔkile kɛ ɛnlɛ diedi. Noko asoo ndelebɛbo wɔ nu kɛ Nyamenle bava ɛ nwo ɛya ɔluakɛ ɛlɛneɛnlea ye edwɛkɛ Baebolo ne mɔɔ yeva yemaa alesama la anu na wɔade ɔ bo la ati? Ye Edwɛkɛ ne si yɛ adua kɛ yɛnleɛnlea Ngɛlɛlera ne anu: “Na bɛahola bɛanwu Nyamenle ɛhulolɛdeɛ kpalɛ ne mɔɔ le kpalɛ, ɔsɔ ɛnyelɛ, na ɔdi munli la.”—Wulomuma 12:2.

Ɔhyia kɛ yɛnwu Nyamenle anwo nɔhalɛ ne, tɛ kɛ yɛsukoa debie fofolɛ bie la ati ɔ, emomu, ɔkola ɔkakyi yɛ ɛbɛlabɔlɛ. (Dwɔn 8:32) Deanne, mɔɔ yɛhanle ɔ nwo edwɛkɛ wɔ edwɛkɛ ne mɔɔ lumua la anu la, ɛmaa ye diedi nu ɛyɛ se wɔ Nyamenle Edwɛkɛ ne anu. Ɔka kɛ: “Meanzuzu kɛ Ngɛlɛlera ne anu la ɛkɛ zɛhae kɔkpula kɛ membɔle ɔ bo kɛ mesukoa Baebolo ne la. Kɛkala meze Gyihova, ɔnle Nyamenle mɔɔ bɛngola bɛmbikye ye a, emomu, kɛ me anwuma Selɛ mɔɔ lɛ ɛlɔlɛ. Menyia bodane kpalɛ wɔ me ɛbɛlabɔlɛ nu.”

Bie a ɛzukoale Baebolo ne noko ɛdele nganeɛ kɛ wɔannyia nvasoɛ biala. Saa ɔle zɔ a ɛnee mmamaa ɛ sa nu to. Baebolo ne mɔɔ ɛlɛbɔ mɔdenle kɛ ɛbade ɔ bo noko bɛbɔ Nyamenle anwo adalɛ bɛhile wɔ la le kɛ ɛkulo kɛ ɛkɔ ɛleka mɔɔ ɛnze ɛkɛ na bɛangile wɔ adenle kpalɛ ne la. Ɛbabɔ ɔ bo kpalɛ ɛdeɛ, noko ɛ sa nu bado ɔluakɛ ɛbaminli fane dɔɔnwo. Yemɔti, saa ɛkpondɛ kɛ ɛdwu ɛleka mɔɔ ɛkulo kɛ ɛkɔ la a, maa bɛhile wɔ adenle kpalɛ ne na fa zo.

Asoo ɛbahulo kɛ ɛkɛzukoa Nyamenle anwo nɔhalɛ ne? Yɛsɛlɛ wɔ kpondɛ Gyihova Alasevolɛ wɔ ɛleka mɔɔ ɛde la anzɛɛ dua address mɔɔ wɔ magazine ɛhye mukelɛ 4 mɔɔ fɛta la azo biza Baebolo ɛzukoalɛ mɔɔ bɛndua ɛhwee la.

[Edwɛkɛ mɔɔ bɛkpa wɔ mukelɛ 9]

“Na bɛahola bɛanwu Nyamenle ɛhulolɛdeɛ kpalɛ ne mɔɔ le kpalɛ, ɔsɔ ɛnyelɛ, na ɔdi munli la.”—WULOMUMA 12:2