Wulu kɔ nuhua edwɛkɛ ne azo

Wulu kɔ nuninyɛne ne azo

2 Nyamenle Ɛndwenle Yɛ Nwo—Asoo Ɔle Nɔhalɛ?

2 Nyamenle Ɛndwenle Yɛ Nwo—Asoo Ɔle Nɔhalɛ?

 2 Nyamenle Ɛndwenle Yɛ Nwo—Asoo Ɔle Nɔhalɛ?

Bie mɔ ka kɛ: “Saa Nyamenle dwenle alesama anwo amgba a, anrɛɛ ɔbaye ɛtane nee amaneɛnwunlɛ yeavi ewiade. Na saa ɔdwenle menli nwo kɛ ekpunli bɔbɔ a, ɔndwenle bɛ nwo ngoko.”

Mɔɔ Baebolo ne kilehile: Gyihova Nyamenle ɛmmaa munzule ɛndo menli. (Gyemise 1:13) Ɔkola ɔye ninyɛndane ɛhye mɔ ɛkɛ noko yemaa ɛtanevolɛma adenle amaa yeabua mɔɔ le kpalɛ nee ɛtane la anwo edwɛkɛ ne. Awieleɛ bɔkɔɔ ne, ɔbalie alesama na yeali ngyegyelɛ mɔɔ menli mɔɔ kpo ye tumililɛ ɛmaa yera la kɔsɔɔti anwo gyima.—Mɔlebɛbo 3:1-6; Ayezaya 65:17. *

Nyamenle dwenle alesama anwo kɛ ekpunli na eza ɔdwenle sonla ko biala anwo. Mateyu 10:29-31 maa ɔda ali kɛ ɔze yɛ nwo debie biala mɔɔ yɛdayɛ mumua ne bɔbɔ yɛnze a: “Bɛtɔ nyamenleakatiba nwiɔ ɛkpɔsɛba ko, noko akee ko bɔbɔ ɛndɔ aze wɔ mekɛ mɔɔ bɛ Ze mɔɔ wɔ anwuma la ɛnze nu a. Na bɛmɛ, bɛ ti zo enrinli bɔbɔ bɛdia. Zɔhane ati bɛmmasulo, ɔluakɛ bɛsonle bolɛ kpole bɛtɛla nyamenleakatiba dɔɔnwo.”

Yɛnwu nɔhalɛ ne a kɛzi ɔboa yɛ la: Yɛ nye ɛnlie menli mɔɔ ati yɛ se anzɛɛ ɛndwenle yɛ nwo la anwo. Yemɔti, ɔnyɛ azibɛnwo kɛ, adalɛ mɔɔ menli ɛbɔ kɛ Nyamenle ɛndwenle yɛ nwo la maa menli dɔɔnwo twe bɛ nwo fi ɔ nwo anzɛɛ kpondɛ ye wɔ mekɛ mɔɔ bɛkɛhyia ɔ nwo ala anu a. Saa ɛnwu kɛ Gyihova Nyamenle dwenle yɛ nwo a ɔbahola yeamaa wɔazukoa ɔ nwo debie na ɛ nee ye ava agɔnwolɛ.

Kɛ neazo la, bie a wɔzɛlɛ Nyamenle debie noko ɛngola ɛnwu ye saa ɔdiele anzɛɛ ɔbabua wɔ a. Baebolo ne ka kɛ ahenle mɔɔ tie “yɛ nzɛlɛlɛ la” buke ɔ nzo tie menli mɔɔ fi ahonle nu bikye ye la.—Edwɛndolɛ 65:2.

Nyamenle se: “Bɛva bɛ adwenleadwenle muala bɛgua ɔ nwo zo, ɔboalekɛ ɔdwenle bɛ nwo.” (1 Pita 5:7) Wɔ amaneɛnwunlɛ mekɛ nu bɔbɔ yɛbahola yɛava yɛ nwo yɛado ɔ nwo zo ɔluakɛ ye Edwɛkɛ ne ka kɛ: “[Gyihova] bikye mɔɔ nyane ɛha ye la, na ɔdie mɔɔ ye anyelazo ɛwie la.”—Edwɛndolɛ 34:18.

[Ɔ bo ɛkɛ ne edwɛkɛ]

^ ɛden. 3 Saa ɛkpondɛ deɛmɔti Nyamenle ɛmaa amaneɛnwunlɛ nwo adenle la anwo edwɛkɛ dɔɔnwo a, nea Duzu A Baebolo ne Kilehile Amgba A? buluku ne tile 11.

[Edwɛkɛ mɔɔ bɛkpa wɔ mukelɛ 5]

Saa Nyamenle ɛndwenle yɛ nwo a, ɛnee duzu ati a ɔse yɛrɛla ye ɛkɛ wɔ asɔneyɛlɛ nu ɛ?