Wulu kɔ nuhua edwɛkɛ ne azo

Wulu kɔ nuninyɛne ne azo

Fa Ɛ Rɛle Wula Gyihova, “Arɛlekyekyelɛ Nyamenle Ne” Nu

Fa Ɛ Rɛle Wula Gyihova, “Arɛlekyekyelɛ Nyamenle Ne” Nu

 Fa Ɛ Rɛle Wula Gyihova, “Arɛlekyekyelɛ Nyamenle Ne” Nu

“Bɛmaa yɛyɛ Nyamenle, yɛ Awulae Kelaese Gyisɛse ɔ Ze ne, anwunvɔnezelɛ Selɛ ne nee arɛlekyekyelɛ Nyamenle ne mo.”—2 KƆL. 1:3.

1. Duzu a awie ko biala hyia nwo a?

YƐHYIA arɛlekyekyelɛ nwo ɔvi yɛ awolɛ nu. Saa adɔma hyia arɛlekyekyelɛ a ɔsu. Bie a ɛnee ɔkpondɛ kɛ bɛdwu ye anzɛɛ ɛhɔne ɛlɛku ye. Mekɛ mɔɔ yɛyɛ mgbanyinli bɔbɔ la, ɔyɛ a yɛhyia awie mɔɔ ɔbakyekye yɛ rɛle la. Titile, wɔ ngyegyelɛ mekɛ nu.

2. Ɛwɔkɛ boni a Gyihova bɔ menli mɔɔ fa bɛ rɛle wula ye nu la ɛ?

2 Yɛ mbusuafoɔ nee yɛ gɔnwo mɔ bɛahola akyekye yɛ rɛle. Noko bɛnrɛhola bɛnrɛboa yɛ wɔ yɛ ngyegyelɛ kɔsɔɔti anu. Ɔdwu mekɛ ne bie a, Nyamenle ala a bahola akyekye yɛ rɛle a. Ye Edwɛkɛ ne bɔ yɛ ɛwɔkɛ kɛ: Gyihova “bikye bɛdabɛ mɔɔ bɛfɛlɛ ye la amuala, . . . eza ɔte bɛ ɛzunlɛ.” (Edw. 145:18, 19) Baebolo ne eza ka kɛ Gyihova “anye wɔ tenlenema anwo zo, yɛɛ ɔte bɛ ɛzunlɛ.” (Edw. 34:15) Na saa yɛkpondɛ kɛ Nyamenle kyekye yɛ rɛle a, ɛnee ɔwɔ kɛ yɛfa yɛ rɛle yɛwula ye nu. Devidi hanle kɛ: Gyihova “le ɛvealeka maa mɔɔ bɛsisi ye la, ɔle ɛvealeka wɔ ngyegyelɛ mekɛ nu. Menli mɔɔ ze wɔ la fa bɛ rɛle wula wɔ nu, ɔluakɛ, O [Gyihova], ɛtɛkpole menli mɔɔ sonle wɔ la.”—Edw. 9:9, 10.

3. Gyisɛse edwɛkɛ boni a maa yɛnwu kɛzi Gyihova kulo yɛ la ɛ?

3 Gyihova azonvolɛ sonle bolɛ maa ye. Gyisɛse hanle kɛ: “Bɛtɔne nyamenleakatiba nnu ɛkpɔsɛba nwiɔ! Noko Nyamenle anye ɛnvo nuhua ko bɔbɔ ɛlɛ. Na bɛmɛ, bɛ ti enrinli bɔbɔ bɛdia ɔ muala. Yemɔti bɛmmasulo, ɔluakɛ bɛmɛ, bɛsonle bolɛ kpole bɛtɛla nyamenleakatiba kpolane!” (Luku 12:6, 7) Gyihova zele Yizilayɛma kɛ: “Mehulo bɛ ɛhulolɛ mɔɔ ɛnlɛ awieleɛ la, yemɔti metɛdi nɔhalɛ metɛmaa bɛ.”—Gyɛ. 31:3.

4. Kɛmɔti a yɛbahola yɛava yɛ rɛle yɛawula Gyihova ɛwɔkɛ ne mɔ anu ɛ?

4 Saa yɛfa yɛ rɛle yɛwula Gyihova nee ye ɛwɔkɛ ne mɔ anu a, yɛ rɛle bahola akyekye wɔ amaneɛnwunlɛ mekɛ nu. Ɔwɔ kɛ yɛfa yɛ rɛle yɛwula Nyamenle anu kɛ Dwɔhyua la. Ɔhanle kɛ: Gyihova “bɛ Nyamenle ne ɛva ninyɛne kpalɛ ne mɔɔ ɔvale ɔbɔle bɛ ɛwɔkɛ la ɛmaa bɛ. Ɛwɔkɛ biala mɔɔ ɔbɔle la yeli zolɛ; kokye anga nu.” (Dwɔ. 23:14) Bieko, yɛbahola yɛanyia anwodozo kɛ saa yɛkɔ ngyegyelɛ nu bɔbɔ a, “Nyamenle le nɔhalɛ,” ɔnrɛgyakyi ye nɔhalɛ azonvolɛ ɛlɛ.—Bɛgenga 1 Kɔlentema 10:13.

5. Adenle boni a yɛdua zo yɛkyekye awie mɔ arɛle a?

5 Ɛzoanvolɛ Pɔɔlo vɛlɛle Gyihova “arɛlekyekyelɛ Nyamenle.” “Arɛlekyekyelɛ” kile kɛ ɛmaa awie mɔɔ ɛlɛnwu amaneɛ la anyia anzondwolɛ anzɛɛ anwo adɔ ye. Ɔkile kɛ yɛmaa awie agyakyi alɔbɔlɛ ɛlilɛ. Nɔhalɛ nu, Gyihova yɛ ɛhye. (Bɛgenga 2 Kɔlentema 1:3, 4.) Yɛ anwuma Selɛ ne kola yɛ debie biala. Ɔbahola yeayɛ debie biala mɔɔ hyia la yeava yeakyekye bɛdabɛ mɔɔ bɛkulo ye la arɛle. Nyamenle ɛkyekye yɛ rɛle yemɔti yɛkola yɛkyekye yɛ mediema noko arɛle “wɔ  amaneɛnwunlɛ kɔsɔɔti anu.” Gyihova kola kyekye yɛ rɛle kpalɛ tɛla awie biala!

Mɔɔ Fa Amaneɛnwunlɛ Ba

6. Ninyɛne mɔɔ maa menli di nyane la bie a le boni?

6 Yɛhyia arɛlekyekyelɛ wɔ tɛnlabelɛ dɔɔnwo anu. Ninyɛne mɔɔ maa yɛdi nyane la anu ko a le kulovolɛ bie ewule, titile kunli, yelɛ anzɛɛ ralɛ. Bie mɔ noko hyia arɛlekyekyelɛ ɔluakɛ menli ɛmbu bɛ bie. Anwodolɛ, kpanyinliyɛlɛ, ehyia nee ninyɛndane mɔɔ wɔ ewiade la noko maa yɛnwu amaneɛ.

7. (a) Duzu a yɛhyia nwo wɔ ngyegyelɛ mekɛ nu a? (b) Duzu a Gyihova yɛ maa “ahonle mɔɔ yebubu na yebɛtɛ la” anwo sa a?

7 Yɛhyia arɛlekyekyelɛ ɔluakɛ ɔdwu mekɛ ne bie a yɛ ahonle, adwenle, nganeɛdelɛ, kpɔkɛdelɛ, bɔbɔ yɛ diedi kola maa yɛnwu amaneɛ. Kɛ neazo la, bɛmaa yɛzuzu ahonle ne anwo. Nyamenle Edwɛkɛ ne ka “ahonle mɔɔ yebubu na yebɛtɛ la” anwo edwɛkɛ. (Edw. 51:17, NW) Ɛhɛe, Gyihova bahola aboa yɛ wɔ tɛnlabelɛ zɛhae anu. “Bɛdabɛ mɔɔ bɛ ahonle ɛbubu la ɔyɛ bɛ ayile, na ɔkyekye bɛ nganlɛ ne mɔ.” (Edw. 147:3NW) Wɔ tɛnlabelɛ mɔɔ anu yɛ se bɔbɔ la anu, Nyamenle bahola amaa yɛ ahonle adɔ yɛ azule nu, saa yɛsɛlɛ ye, yɛnyia diedi wɔ ye nu, na yɛdi ye mɛla ne mɔ azo a.—Bɛgenga 1 Dwɔn 3:19-22; * 5:14, 15.

8. Saa yɛ adwenle hyia arɛlekyekyelɛ a, kɛzi Gyihova boa yɛ ɛ?

8 Kɛmɔ yɛkɔ sɔnea ngakyile nu la ati, ɔdwu mekɛ ne bie a ɛnee yɛ adwenle hyia arɛlekyekyelɛ. Yɛhyia moalɛ wɔ sɔnea ɛhye mɔ anu. Edwɛndolɛ 94:19 kɛlɛvolɛ ne hanle kɛ: “Saa adwenleadwenle bo me nwo zo a, ɛkyekye me rɛle ɛmaa medi fɛlɛko.” Pɔɔlo noko hɛlɛle kɛ: “Bɛmmadwenle debie biala anwo. Wɔ debie biala anu bɛyɛ moyɛlɛ nzɛlɛlɛ na bɛva mɔɔ bɛhyia nwolɛ la bɛdo Nyamenle anyunlu. Na Nyamenle [anzondwolɛ] ne mɔɔ bo sonla ndelebɛbo muala azo la bazie bɛ ahonle nee bɛ adwenle gyɛlɛɛnye wɔ Kelaese ati.” (Fel. 4:6, 7) Saa yɛ adwenle hyia arɛlekyekyelɛ a, ɔwɔ kɛ yɛkenga Baebolo ne na yɛdwenledwenle nwo kpalɛ. Ɛhye bamaa yɛ rɛle akyekye kpalɛ.—2 Tem. 3:15-17.

9. Saa yɛte nganeɛ kɛ yɛnfɛta a, duzu a bahola aboa yɛ a?

9 Ɔdwu mekɛ ne bie a, yɛ sa nu bahola ado yeamaa yɛade nganeɛ kɛ yɛnfɛta. Bie a yɛbanyia adwenle kɛ yɛnrɛhola yɛnrɛyɛ debie bie mɔɔ Baebolo ne ka kɛ ɔle yɛ gyima la. Anzɛɛ yɛnrɛhola yɛnrɛyɛ asafo ne anu gyimalilɛ bie. Wɔ tɛnlabelɛ zɛhae noko anu, Gyihova kola kyekye yɛ rɛle na ɔboa yɛ. Kɛ neazo la: Mekɛ mɔɔ bɛkpale Dwɔhyua kɛ ɔli Yizilayɛma anyunlu la, Mosisi zele menli ne kɛ: “Bɛgyinla kpundii na bɛmia bɛ nwo. Bɛmmasulo yɛɛ bɛmmamaa bɛ nwo mɔra tu. Ɔluakɛ [Gyihova] bɛ Nyamenle ne a nee bɛ ɛlɛkɔ a. Ɔnrɛgyakyi bɛ yɛɛ ɔ rɛle ɛnrɛye bɛ ɛlɛ.” (Mɛla 31:6) Ɔlua Gyihova moalɛ zo, Dwɔhyua holale lile Nyamenle menli ne anyunlu hɔle Ɛwɔkɛ Azɛlɛ ne azo na bɛlile bɛ agbɔvolɛ kɔsɔɔti anwo zo konim. Ɛnee Gyihova ɛboa Mosisi wɔ Nyevile Kɔkɔlɛ ne anwo.—Ade. 14:13, 14, 29-31.

10. Saa tɛnlabelɛ ɛtane ka yɛ kpɔkɛdelɛ a, duzu a bahola aboa yɛ a?

10 Tɛnlabelɛ ɛtane kola sɛkye yɛ kpɔkɛdelɛ. Saa yɛdi aleɛ kpalɛ, yɛdie yɛ menle, yɛkpundikpundi yɛ agbɔkɛ nu dahuu, na yɛmaa yɛ sua nu nee yɛ sonla baka ne yɛ bɔkɔbɔkɔ a ɔboa yɛ. Saa yɛdwenle mɔɔ Baebolo ne ka kɛ ɔbara kenlebie la anwo a, ɔkola ɔboa yɛ kpɔkɛdelɛ. Zɔhane ati saa yɛlɛnwu amaneɛ ɔlua sɔnea anzɛɛ ngyegyelɛ ti a, ɔwɔ kɛ  yɛkakye kɛ Pɔɔlo noko nwunle amaneɛ na yɛdwenledwenle ye edwɛkɛ ɛhye mɔɔ maa anwosesebɛ la anwo: “Ndenle dɔɔnwo anu bɛgyegye yɛ, na bɛngola bɛnzɛkye yɛ; bɛmaa yɛ adwenle nu yɛ kpomgbondee, noko yɛ agbɔkɛ nu ɛntuto; bɛyɛ yɛ kpɔdekpɔde, noko yɛtɛkyianle agɔnwolɛ nwo ɛlɛ; yɛɛ ɔdwu mekɛ ne bie bɔbɔ a bɛbobɔ yɛ, noko yɛtɛwule.”—2 Kɔl. 4:8, 9.

11. Saa yɛte nganeɛ kɛ yɛ diedi ɛlɛyɛ bɛtɛɛ a, duzu a yɛbahola yɛayɛ a?

11 Sɔnea ne bie bahola aha yɛ diedi. Ɛke noko, Gyihova bahola aboa yɛ. Ye Edwɛkɛ ne bɔ yɛ ɛwɔkɛ kɛ: Gyihova “sɔ bɛdabɛ mɔɔ bɛlɛgua aze la nu, na ɔkpogya bɛdabɛ mɔɔ bɛgua aze la zo.” (Edw. 145:14) Saa yɛte nganeɛ kɛ yɛ diedi ɛlɛyɛ bɛtɛɛ a, ɔwɔ kɛ yɛmaa mgbanyima ne mɔ boa yɛ. (Gye. 5:14, 15) Na saa yɛkɔ zo yɛdwenledwenle dahuu ngoane anyelazo ne anwo a, yɛbanyia anwosesebɛ yɛagyinla yɛ diedi nwo sɔnea nloa.—Dwɔn 17:3.

Arɛlekyekyelɛ Nwo Neazo Ngakyile

12. Kɛzi Gyihova kyekyele Ebileham arɛle ɛ?

12 Edwɛndolɛ 119 kɛlɛvolɛ ne zele Gyihova kɛ: “Kakye wɔ ɛwɔkɛ ne mɔɔ wɔbɔ wɔ sonvolɛ, mɔɔ ɔlua zo wɔmaa menyia anyelazo la. Ɛhye le me arɛlekyekyelɛ wɔ me amaneɛnwunlɛ nu, ɔluakɛ wɔ ɛwɔkɛ ne maa me ngoane.” (Edw. 119:49, 50) Kɛzi Nyamenle kyekyele ye azonvolɛ arɛle la anwo neazo dɔɔnwo wɔ Gyihova Edwɛkɛ, Baebolo ne anu. Kɛ neazo la, mekɛ mɔɔ Ebileham dele kɛ Gyihova bazɛkye Sodɔm nee Gomɔla la, ɔgyegyele ye kpalɛ. Ɔbizale Nyamenle kɛ: “Asoo amgba ala ɛbazɛkye tenlenema wɔaboka amumuyɛma ne anwo?” Gyihova bɔle Ebileham ɛwɔkɛ kɛ saa ɔnyia tenlenema 50 a, ɔnrɛzɛkye Sodɔm, na ɛhye kyekyele ɔ rɛle. Noko Ebileham bizale Gyihova fane nnu kɛ: Na saa tenlenema 45? 40? 30? 20? 10 ala a wɔ ɛkɛ ɛ? Gyihova nyianle abotane na ɔbɔle Ebileham ɛwɔkɛ kɛ saa ɔnyia tenlenema bulu pɛ bɔbɔ wɔ ɛkɛ a, ɔnrɛzɛkye Sodɔm. Gyihova annyia tenlenema bulu bɔbɔ wɔ ɛkɛ, noko ɔliele Lɔɔto nee ɔ mra mraalɛ ne mɔ.—Mɔl. 18:22-32; 19:15, 16, 26.

13. Kɛzi Hana vale ɔ nwo dole Gyihova anwo zo ɛ?

13 Ɛnee Ɛlekana aye Hana ɛlɛkpondɛ awolɛ. Noko ɛnee ɔnnyia ɛkolɛ ɔnwo ralɛ, na ɛhye gyegyele ye. Ɔzɛlɛle Gyihova wɔ ɛhye anwo na Ɛsɔfo Kpanyinli Yilae zele ye kɛ: “Wɔ nzɛlɛlɛ ne mɔɔ wɔva wɔdo Yizilayɛ Nyamenle ne anyunlu la, ɔyɛ ye zɔhane ɔmaa  wɔ.” Ɛhye kyekyele Hana arɛle, “na ɔgyakyile ɔ nwo alɔbɔlɛ ɛyɛlɛ.” (1 Sam. 1:8, 17, 18) Hana nyianle anwodozo kɛ Gyihova bali ye ngyegyelɛ ne anwo gyima. Ɔnva nwo kɛ ɛnee ɔnze mɔɔ bazi la, ɔ nzo nu dwole ye. Nzinlii, Gyihova buale ye asɔneyɛlɛ ne. Ɔvale ɛkolɛ na ɔwole ralɛ nrenya. Ɔdonle ye duma Samoɛle.—1 Sam. 1:20.

14. Kɛmɔti a ɛnee Devidi hyia arɛlekyekyelɛ ɛ? Nwane a ɔzɛlɛle ye kɛ ɔkyekye ɔ rɛle a?

14 Awie bieko mɔɔ Nyamenle kyekyele ɔ rɛle la a le Belemgbunli Devidi. Gyihova nwu “sonla ahonle nu.” Yemɔti mekɛ mɔɔ ɔkpale Devidi kɛ Yizilayɛ belemgbunli la, ɛnee ɔze kɛ Devidi kpondɛ kɛ ɔyɛ mɔɔ tenrɛ la yɛɛ ɔkulo nɔhalɛ ɛzonlenlɛ. (1 Sam. 16:7; 2 Sam. 5:10) Noko nzinlii, Devidi nee Batehyɛba zɛkyele agyalɛ na ɔbɔle mɔdenle kɛ ɔkeda zo. Mɔɔ bɛmanle ɔnwunle anyebolo mɔɔ wɔ ye ɛtane ne anu la, ɔzɛlɛle Gyihova kɛ: “Wɔ anwunvɔnezelɛ kpole ne ati, nunu me mɛladonlɛ ne mɔ. Nrinzi me ninyɛndane ne mɔ amuala bɔkɔɔ, na te me nwo fi me ɛtane ne anwo. Ɔluakɛ meze me mɛladonlɛ ne mɔ, yɛɛ me ɛtane gyi me nyunlu dahuu.” (Edw. 51:1-3) Devidi lunle ɔ nwo nɔhalɛ nu, na Gyihova vale hyɛle ye. Noko ɛnee ɔwɔ kɛ Devidi nwu amaneɛ wɔ ye nyɛleɛ ne anwo. (2 Sam. 12:9-12) Noko akee, Gyihova anwunvɔnezelɛ ne kyekyele Devidi arɛle.

15. Ɔka ekyii na Gyisɛse awu la, moalɛ boni a Gyihova vale manle ye a?

15 Mekɛ mɔɔ Gyisɛse wɔ azɛlɛ ye azo la, ɔnwunle amaneɛ dɔɔnwo. Nyamenle manle nwolɛ adenle, noko Gyisɛse lile nɔhalɛ. Ɛnee ɔdi munli, noko ɔvale ɔ nwo ɔdole Gyihova anwo zo na ɔdiele ye kɛ Belemgbunli. Ɔka ekyii bɛye Gyisɛse bɛmaa bɛku ye la, ɔzɛlɛle Gyihova kɛ: “Tɛ me ɛhulolɛdeɛ ɔ, na wɔ ɛhulolɛdeɛ ɛyɛ ɛkɛ.” Anwumabɔvolɛ bie yele ɔ nwo hilele Gyisɛse na ɔmanle ye anwosesebɛ. (Luku 22:42, 43) Nyamenle kyekyele Gyisɛse arɛle, na ɔmanle ye anwosesebɛ nee moalɛ mɔɔ ɛnee ɔhyia nwo la.

16. Saa yɛ diedi ne ati ɔka yɛ nee ewule a, kɛzi Gyihova bahola aboa yɛ ɛ?

16 Saa yɛ diedi ne ati yɛkɔ ewule nee ngoane avinli bɔbɔ a, Gyihova kola boa yɛ maa yɛdi nɔhalɛ. Ewudwazo anyelazo ne noko kyekye yɛ rɛle. Eza yɛ nye la kɛ “bɛbazɛkye . . . ewule,” kpɔvolɛ mɔɔ li amozi la. (1 Kɔl. 15:26) Gyihova kakye ye nɔhalɛ azonvolɛ nee menli gyɛne mɔɔ bɛwu la. Gyihova arɛle ɛnvi debie. Ɔbadwazo bɛ. (Dwɔn 5:28, 29; Gyi. 24:15) Ewudwazo ɛwɔkɛ ne anu diedi kyekye yɛ rɛle na ɔmaa yɛnyia anyelazo wɔ ɛkpɔlɛ mekɛ nu.

17. Kɛzi Gyihova kyekye yɛ rɛle wɔ mekɛ mɔɔ yɛ kulovolɛ bie kɛwu la ɛ?

17 Yɛ alɔvolɛ mɔɔ bɛbadwazo bɛ bara ewiade fofolɛ ne anu la kyekye yɛ rɛle. Amaneɛnwunlɛ kɔsɔɔti bavi ɛkɛ. Gyihova azonvolɛ anu “menli pemgbenleamgbe” ne mɔɔ bɛbanyia bɛ ti wɔ awieleɛ ne anu la bɛalie menli mɔɔ bɛbadwazo bɛ la na bɛahilehile bɛ. Nea kɛzi ɛhye bayɛ enililɛ kpole yeamaa bɛ a!—Yek. 7:9, 10.

Yɛvea Nyamenle Asa Abo

18, 19. Kɛzi Nyamenle ɛkyekye ye azonvolɛ arɛle wɔ sɔnea mekɛ nu ɛ?

18 Ngapezonli Mosisi hɛlɛle arɛlekyekyelɛ edwɛkɛ bie ɔmanle Yizilayɛma. Ɔhanle ye wɔ edwɛne ɛhye anu kɛ: “Damɛnlangoate Nyamenle ne anwo ɛkɛ le bɛ tɛnlabelɛ; bɛvea  ɔ sa abo.” (Mɛla 33:27) Nzinlii ngapezonli Samoɛle zele Yizilayɛma kɛ: “Bɛmmakpo kɛ bɛnrɛdoa [Gyihova] abo zo. Bɛva bɛ ahonle kɔsɔɔti bɛzonle ye. . . . Ɔlua ye duma kpole ne ati, [Gyihova] ɛnrɛkpo ye menli.” (1 Sam. 12:20-22) Saa yɛsonle Gyihova nɔhalɛ nu a, ɔnrɛkpo yɛ ɛlɛ. Ɔbaboa yɛ dahuu.

19 Nyamenle ɛlɛmaa ye menli mɔɔ de aze wɔ anwongyelelɛ mekɛ ɛhye anu la moalɛ nee arɛlekyekyelɛ. Ɛnɛ, bɛva ɛkpɔlɛ bɛra yɛ mediema dɔɔnwo anwo zo na bɛgua bɛ efiade ɔlua Gyihova mɔɔ bɛsonle ye la ati. Bɛ anwubielɛ ne maa ɔda ali kɛ Gyihova kyekye ye azonvolɛ rɛle wɔ sɔnea mekɛ nu amgba. Kɛ neazo la, bɛdole yɛ diema nrenya ko mɔɔ ɛnee wɔ dɛba ne Soviet Union la efiade ɛvolɛ 23 ɔlua ye diedi ti. Noko wɔ efiade ɛkɛ ne bɔbɔ, ɔnyianle Baebolo nwo mbuluku mɔɔ manle ye anwosesebɛ nee arɛlekyekyelɛ a. Ɔhanle kɛ: “Wɔ ɛvolɛ ɛhye mɔ kɔsɔɔti anu menvale me nwo mendole Gyihova anwo zo na ɔmanle me anwosesebɛ.”—Bɛgenga 1 Pita 5:6, 7.

20. Kɛmɔti a yɛbahola yɛalie yɛali kɛ Gyihova ɛnrɛkpo yɛ ɛ?

20 Ɔnva nwo mɔɔ bado yɛ biala la, ɔle kpalɛ kɛ yɛbahakye arɛlekyekyelɛ edwɛkɛ ɛhye: Gyihova ɛnrɛkpo “menli ne mɔɔ le ɔdaye ye ɛdeɛ la.” (Edw. 94:14) Ɔwɔ nuhua kɛ yɛhyia arɛlekyekyelɛ ɛdeɛ, noko yɛbahola yɛakyekye awie mɔ arɛle. Yɛbazukoa kɛzi yɛbakyekye menli mɔɔ ɛlɛnwu amaneɛ wɔ ewiade ɛhye anu arɛle la anwo debie wɔ edwɛkɛ mɔɔ doa zo la anu.

[Ɔ bo ɛkɛ ne edwɛkɛ]

^ ɛden. 7 1 Dwɔn 3:19-22, (NW) kenga kɛ: “Ɛhye a bamaa yɛanwu kɛ yɛvi nɔhalɛ ne anu, na yɛazi yɛ ahonle pi wɔ ɔ nyunlu wɔ debie biala mɔɔ yɛ ahonle kɛbu yɛ fɔlɛ wɔ nu la anu a, ɔluakɛ Nyamenle le kpole tɛla yɛ ahonle yɛɛ ɔze debie biala. Ayi mɔ, saa yɛ ahonle ɛmbu yɛ fɔlɛ a, ɛnee yɛkola yɛfa anwodozo yɛtendɛ wɔ Nyamenle anyunlu; na debie biala mɔɔ yɛkɛbiza ye la, yɛ sa ka ye, ɔluakɛ yɛdi ye mɛla ne mɔ azo na yɛyɛ mɔɔ sɔ ɔ nye la.”

Kɛzi Ɛbabua Ɛ?

• Ninyɛne mɔɔ maa yɛdi nyane la bie a le boni?

• Kɛzi Gyihova kyekye ye azonvolɛ rɛle ɛ?

• Saa ɔka yɛ nee ewule a, duzu a bahola akyekye yɛ rɛle a?

[Debiezukoalɛ kpuyia ne mɔ]

[Ɛlɛka/Nvoninli ne mɔ wɔ mukelɛ 23]

KƐZI ƐBALI NINYƐNE ƐHYE MƆ ANWO GYIMA LA . . .

ahonle Edw. 147:3; 1 Dwɔn 3:19-22; 5:14, 15, NW

adwenle Edw. 94:19; Fel. 4:6, 7

nganeɛdelɛ Ade. 14:13, 14; Mɛla 31:6

nwonane nu kpɔkɛdelɛ 2 Kɔl. 4:8, 9

sunsum nu kpɔkɛdelɛ Edw. 145:14; Gye. 5:14, 15