Wulu kɔ nuhua edwɛkɛ ne azo

Wulu kɔ nuninyɛne ne azo

Bɛkpa Mɔɔ Sie Ewiade Ne La Anwo Ɛdanlɛ

Bɛkpa Mɔɔ Sie Ewiade Ne La Anwo Ɛdanlɛ

 Bɛkpa Mɔɔ Sie Ewiade Ne La Anwo Ɛdanlɛ

KENLE ko bie Gyisɛse hanle kɛ: “Bɛbadu . . . mɔɔ sie ɛtane ewiade ɛhye la bɛavi ɛkɛ.” Nzinlii, ɔhanle ɔdole zo kɛ: “Mɔɔ sie ɛtane ewiade ɛhye la” ɔnlɛ ɔ nwo zo tumi, “Mɔɔ sie ɛtane ewiade ɛhye la bɛbua ye ndɛne dɛbadɛba.” (Dwɔn 12:31; 14:30; 16:11) Nwane anwo edwɛkɛ a ɛnee Gyisɛse ɛlɛka a?

Suzu edwɛkɛ mɔɔ Gyisɛse hanle ye wɔ “mɔɔ sie ɛtane ewiade ɛhye” anwo la anwo nea. Ɔda ali kɛ tɛ ɔ Ze, Gyihova Nyamenle anwo edwɛkɛ a ɛnee ɔlɛka a. Nwane a “sie ɛtane ewiade” ne a? Kɛzi “bɛbadu” ye bavi ɛkɛ ɛ, na kɛzi “bɛbua ye ndɛne dɛbadɛba” ɛ?

“Mɔɔ Sie Ɛtane Ewiade Ɛhye La” Ɛla Ɔ Nwo Ali

Kɛmɔ amumuyɛnli mɔɔ ɛbe fa ye tumi memaa ɔ nwo zo na ɔtu ɔ nloa anu la zɔhane ala a Abɔnsam yɛle wɔ mekɛ mɔɔ ɛnee ɔlɛsɔ Gyisɛse, Nyamenle Ara ne yeanlea la a. Mekɛ mɔɔ Seetan vale ewiade “arelemgbunli maanle maanle kɔsɔɔti” hilele Gyisɛse wiele la, ɔbɔle ɛwɔkɛ kɛ: “Mebava tumi ɛhye nee anwonyia ɛhye mɔ amuala meamaa wɔ. Bɛva bɛ muala bɛwula me sa nu, na mekola mefa memaa awie biala mɔɔ mekulo la. Zɔhane ati saa ɛbɔ ɛ ti aze ɛmaa me, ɛsonle me a, ye kɔsɔɔti bayɛ wɔ ɛdeɛ.”—Luku 4:5-7.

Saa Abɔnsam a le adwenle ɛtane mɔɔ ba sonla ti anu kɛmɔ bie mɔ ka la a, ɛnee kɛzi yɛbahilehile sɔnea ɛhye anu ɛ? Asoo adwenle ɛtane bie mɔɔ ɛnee wɔ Gyisɛse ati anu la a zɔle ye nleanle a? Anzɛɛ ninyɛne bie mɔɔ gyegyele ye adwenle wɔ ye ɛzɔnenlɛ ne anzi la ɔ? Saa ɔle zɔ a, ɛnee duzu ati a bɛhanle kɛ “yemɔ, ɛtane biala ɛnle ye nu” ɛ? (1 Dwɔn 3:5) Gyisɛse anzu kpolera kɛ Abɔnsam ɛnlɛ alesama anwo zo tumi, emomu, ɔhanle kɛ ɔsie “ɛtane ewiade ɛhye” yɛɛ “ɔle kɔdiawu nee “alane.”—Dwɔn 14:30; 8:44.

Mɔɔ Gyisɛse nee Abɔnsam yiale la anzi ɛvolɛ kɛyɛ 60, ɛzoanvolɛ Dwɔn hakyele Keleseɛnema tumi kpole ne mɔɔ Abɔnsam lɛ la na ɔhanle kɛ, “Abɔnsam di ɛtane ewiade ye azo belemgbunli.” Dwɔn eza hanle ahenle zɔhane anwo edwɛkɛ kɛ “mɔɔ ɛbɛlɛbɛla ewiade amra amuala la.” (1 Dwɔn 5:19; Yekile 12:9) Ɔda ali kɛ, Baebolo ne ka sunsum nu abɔdeɛ bie mɔɔ ɛnyelɛ ɛnnwu ye la anwo edwɛkɛ kɛ ɔsie “ɛtane ewiade ɛhye.” Noko tumi boni a ɔlɛ ye wɔ alesama anwo zo a?

Mɔɔ Sie Ewiade Ne La Maa Ɔ Gɔnwo Mɔ Tumi

Mɔɔ ɛzoanvolɛ Pɔɔlo kɛlɛ Keleseɛnema diedi nwo konle ne anwo edwɛkɛ la, ɔlale yɛ agbɔvolɛ titile ne mɔ ali wienyi. Ɔhanle kɛ: “Tɛ menli a yɛ nee bɛ ɛlɛko a; sunsum nu tumivolɛma, ewiade arelemgbunli anzɛɛ maanlebuvolɛma, ewiade amra mɔɔ sie ɛnɛ mekɛ ye awozinli nu amra, yɛɛ sunsum nu anwuma ɛlɔnema amumuyɛ yɛɛ yɛ nee bɛ ɛlɛko a.” (Ɛfɛsɛsema 6:12) Zɔhane ati, konle ɛhye ɛnle ewiade ɛhye anu ɛdeɛ ɔluakɛ “tɛ menli a yɛ nee bɛ ɛlɛko a,” emomu, yɛ nee “sunsum nu anwuma ɛlɔnema amumuyɛ.”

Edwɛkɛ “sunsum nu anwuma ɛlɔnema amumuyɛ” mɔɔ bɛha ye wɔ ɛke la ɛnvane adwenle ɛtane mɔɔ wɔ sonla ti anu la anwo, emomu, ɔfane sunsum nu menli bie mɔɔ bɛlɛ tumi na bɛ ti yɛ se la anwo. Yemɔti, Abɔnsam ɛlɛdi ye tumi ne wɔ anwumabɔvolɛma gyɛne mɔɔ ɛde atua na bɛkpole “bɛ gyinlabelɛ kpalɛ ne” wɔ anwuma la anwo zo.—Dwuudu 6.

Baebolo buluku Daneɛle mɔɔ ngapezo dɔɔnwo wɔ nu la ka kɛzi “ewiade arelemgbunli”  ɛhye mɔ ɛli tumi ɔvi tete ne la anwo edwɛkɛ. Mekɛ mɔɔ ngapezonli Daneɛle agɔnwo mɔ Dwuuma mɔɔ vile akɛlɛzonlenlɛ nu wɔ Babelɔn ziale rale Gyɛlusalɛm wɔ ɛvolɛ 537 K.Y.M. anwo edwɛkɛ gyegye ye la, ɔvale dapɛne nsa ɔzɛlɛle ɔmanle bɛ. Anwumabɔvolɛ bie mɔɔ Nyamenle zoanle ye kɛ ɔrakyekye ngapezonli ne arɛle la hanle deɛmɔti ɔhyɛle adenle nu la ɔhilele ye. Ɔhanle kɛ: “Pɛhyea maanle ne awozinli nu soanvolɛ ne nee me dwudwule toonwo kenle abulanwiɔ nee ko.”—Daneɛle 10:2, 13.

Nwane a le “Pɛhyea maanle ne awozinli nu soanvolɛ” ɛhye. Tɛ Pɛhyea Belemgbunli Saelɛse mɔɔ ɛnee kulo Daneɛle nee ye menli ne edwɛkɛ wɔ zɔhane mekɛ ne la ɔ. Bieko, kɛ ɔkɛyɛ na dasanli belemgbunli ahola azi sunsum nu abɔdeɛ adenle dapɛne nsa wɔ mekɛ mɔɔ anwumabɔvolɛ ko kola ku sogyama 185,000 wɔ nɔɔzo ko pɛ anu la ɛ? (Ayezaya 37:36) “Pɛhyea maanle ne awozinli nu soanvolɛ” ɛhye bayɛ Abɔnsam agyakɛ anu gyinlavolɛ, sunsum ɛtane mɔɔ bɛmaa ye tumi kɛ ɔnlea Pɛhyea Belemgbunli Maanle ne azo la. Nzinlii, Nyamenle soanvolɛ ne hanle kɛ “ɔwɔ kɛ mesia mekɔ me nee Pɛhyea maanle ne awozinli nu soanvolɛ ne” yɛɛ “Gilisi awozinli nu soanvolɛ ne” kɔko.—Daneɛle 10:20.

Duzu a yɛbahola yɛaha a? Ye sikalɛ a le kɛ, sunsum nu abɔdeɛ mɔɔ ɛnyelɛ ɛnnwu bɛ, sunsum ɛtane mɔɔ bɛ kpanyinli Seetan Abɔnsam ɛmaa bɛ tumi la wɔ ɛkɛ mɔɔ bɛle “ewiade arelemgbunli” a. Noko toonwo mɔɔ badwu ɛnɛ la, duzu a bɛkpondɛ kɛ bɛyɛ a?

Mɔɔ Sie Ewiade Ne La Ye Ɔ Nyunlu

Ɛzoanvolɛ Dwɔn hanle kɛzi Gyisɛse, anwumabɔvolɛ kpanyinli Maekeɛle lile Abɔnsam nee ye sunsum ɛtane ne mɔ anwo zo konim nee ngyegyelɛ mɔɔ bɛdule ye bɛvile anwuma la yeva yera la anwo edwɛkɛ wɔ Yekile, Baebolo buluku ne mɔɔ li amozi la anu. Yɛkenga kɛ: “Azɛlɛ . . . bɛ gyakɔ! Ɔluakɛ Abɔnsam ɛdwu ɛra bɛ nwo lɔ, na ɛya kpole wɔ ye nuhua, ɔboalekɛ ɔze kɛ ye mekɛ ɛha ekyi bie ala.”—Yekile 12:9, 12.

Kɛzi Abɔnsam ɛmaa yela ali kɛ yeva ɛya kpole ɛ? Kɛmɔ amumuyɛma dɔɔnwo ka kɛ ‘saa awie kɛva a ɛnee ɔha’ la, zɔhane ala a Abɔnsam nee ye sunsum ɛtane ne mɔ noko ɛvua kɛ bɛ nee azɛlɛ ne nee menli mɔɔ de zo la kɔsɔɔti kɔ ɛzɛkyelɛ nu a. Ɔluakɛ Abɔnsam ze kɛ ye mekɛ ɛha ekyi bie la ati, ɔlɛdua gualilɛ zo yeamaa menli dɔɔnwo anye abolo ninyɛne ɛtotɔlɛ mɔɔ maa bɛsɛkye anwonyia mɔɔ wɔ azɛlɛ ye azo na ɔfa alesama ngoane ɔto esiane nu la.—Yekile 11:18; 18:11-17.

Ɔvi alesama tetedwɛkɛ mɔlebɛbo, menli ɛla kɛzi Abɔnsam anye bolo tumi la bie ali wɔ maanyɛlɛ nee ɛzonlenlɛ nu. Baebolo buluku Yekile fa nane bie mɔ yɛ maanyɛlɛ tumima mɔɔ Abɔnsam ɛmaa bɛ tumi “kpole” la anwo nvoninli. Eza ɔka kɛ ɔyɛ nyiane kɛ ɛzonlenlɛma fa bɛ nwo wulowula maanyɛlɛ nu la, ɔluakɛ ɔfɛlɛ zɛhae ngitanwolilɛ ne agyalɛzɛkyelɛ. (Yekile 13:2; 17:1, 2) Suzu nzisi, akɛlɛzonlenlɛ, konle, nee mbusua nu akɛsakɛsa mɔɔ ɛhɔ zo wɔ ɛvolɛ dɔɔnwo anu na yemaa menli dɔɔnwo ɛminli bɛ ngoane la anwo. Asoo awie bahola aha ye nɔhalɛ nu kɛ ninyɛne mɔɔ yɛ azibɛnwo nee nwanwane mɔɔ ɛhɔ zo wɔ alesama tetedwɛkɛ nu la le sonla adwenle? Anzɛɛ sunsum ɛtane mɔɔ ɛnyelɛ ɛnnwu bɛ la a piepia bɛ a?

Baebolo ne ka ahenle mɔɔ fa ewiade arelemgbunli anzɛɛ maanlebuvoma yɛ gyima la anwo edwɛkɛ wienyi. Saa bɛze o, saa bɛnze o, alesama abusua ne da ahenle mɔɔ sie ewiade ne la subane ɛhye bie ali, ‘saa awie kɛva a ɛnee ɔha.’ Noko alesama banwu nyane wɔ Abɔnsam tumililɛ bo bɛahɔdwu kenlenzu?

Abɔnsam Awieleɛ

Gyima mɔɔ Kelaese rayɛle ye wɔ azɛlɛ ye azo wɔ ɛvoya ne mɔɔ lumua la anu la hilele kɛ ɔnrɛhyɛ bɛbazɛkye Abɔnsam nee ye sunsum  ɛtane ne mɔ. Mekɛ mɔɔ Gyisɛse ɛdoavolɛ ne mɔ hanle hilele ye kɛ bɛdu sunsum ɛtane la, Gyisɛse zele bɛ kɛ: “Menwunle kɛ Seetan vi anwuma kɛ ɛsɛlɛmanye la ɛrade aze.” (Luku 10:18) Gyisɛse luale edwɛkɛ ɛhye azo ɔmanle ɔlale ali kɛ ɔ nye die nwo kɛ kenlebie ɔbali mɔɔ sie ewiade ne la anwo zo konim wɔ mekɛ mɔɔ ɔbazia yeahɔ anwuma kɛ anwumabɔvolɛ kpanyinli Maekeɛle la. (Yekile 12:7-9) Baebolo nu ngapezo mɔɔ bɛsukoa ye kpalɛ la maa yɛnwu kɛ konim ɛhye zile anwuma wɔ 1914 ne anu anzɛɛ ɔ nzi mekɛ ekyi bie anu. *

Ɔvi mekɛ zɔhane mɔɔ ba la, Abɔnsam ze kɛ mekɛ mɔɔ ɛha na bazɛkye ye la le ekyii bie. Ɔnva nwo kɛ ɔdi “ɛtane ewiade ye azo belemgbunli” la, ɔtɛkolale ɔtɛbɛlɛbɛlale ewiade amra amuala. Baebolo ne ɛmaa bɛnwu ye nee ye ndenle ne mɔ. (2 Kɔlentema 2:11) Bɛfa Pɔɔlo edwɛkɛ ne mɔɔ ɔhanle ɔhilele ɔ mediema Keleseɛnema la bɛkyekye bɛ rɛle: “Na Nyamenle, [anzondwolɛ] maavolɛ ne, ɛnrɛhyɛ biala na yeabɛtɛ Seetan wɔ bɛdabɛ bɛ gyakɛ abo.” *Wulomuma 16:20.

Ɔnrɛhyɛ Abɔnsam mekɛ ne bara ye awieleɛ! Wɔ Kelaese tumililɛ kɛnlɛma ne abo tenlenema bɛahakyi azɛlɛ ne, Nyamenle sɛkɛlɛneɛ adenle zo agyakɛ abo ebia ne, paladaese. Basabasayɛlɛ, ɛkpɔlɛ, nee anyebolo bavi ɛkɛ bɔkɔɔ. Baebolo ne ka kɛ: “Awie ɛnrɛhakye bɛ bieko.” (Ayezaya 65:17) Nea kɛzi menli mɔɔ twe bɛ nwo fi mɔɔ sie ewiade ne tumililɛ bo la anwo badɔ bɛ a!

[Ɔ bo ɛkɛ ne edwɛkɛ ne mɔ]

^ ɛden. 20 Saa ɛkpondɛ ɛhye anwo edwɛkɛ dɔɔnwo a, nea mokanwo ne mɔɔ wɔ Duzu A Baebolo ne Kilehile Amgba A? buluku ne mɔɔ Gyihova Alasevolɛ ɛyɛ la mukelɛ 215 kɔdwu 218.

^ ɛden. 21 Pɔɔlo edwɛkɛ ne le Baebolo nu ngapezo mɔɔ lumua mɔɔ wɔ Mɔlebɛbo 3:15 mɔɔ fane Abɔnsam ɛzɛkyelɛ ne anwo la ndinu. Pɔɔlo ka kɛzi ɔbayɛ anwo edwɛkɛ la, ɔvale Giliki edwɛkɛkpɔkɛ mɔɔ ɔkile “sɛkye, kpusu, tietia zo bubu ye” la a lile gyima a.—Vine’s Complete Expository Dictionary of Old and New Testament Words.

[Edwɛkɛ mɔɔ bɛkpa wɔ mukelɛ 9]

Wɔ Kelaese tumililɛ kɛnlɛma ne abo tenlenema bɛahakyi azɛlɛ ne paladaese