Wulu kɔ nuhua edwɛkɛ ne azo

Wulu kɔ nuninyɛne ne azo

Bɛmia Bɛ Nwo Bɛnriandi

Bɛmia Bɛ Nwo Bɛnriandi

 Bɛmia Bɛ Nwo Bɛnriandi

“Na yɛmia yɛ nwo kpalɛ yɛnlea ɛnriandilɛ ne mɔɔ gyi yɛ nyunlu la.”—HIB. 12:1.

1, 2. Baebolo ne fa nɔhalɛ Keleseɛnema ɛbɛlabɔlɛ to duzu anwo?

ƐVOLƐ biala menli dɔɔnwo mɔɔ wɔ ewiade la nriandi pɛ adenle tendenle. Bɛdabɛ mɔɔ bɛsu ɛnriandilɛ ɛhye la bie mɔ bɔ mɔdenle kpalɛ, yɛɛ bɛkpondɛ kɛ bɛdi konim. Noko bɛ nuhua dɔɔnwo ze kɛ bɛnrɛhola bɛnrɛli konim. Mɔɔ hyia bɛ la a le kɛ bɛbazu ɛnriandilɛ ne bɛahɔ awieleɛ.

2 Baebolo ne noko ka ɛnriandilɛ bie anwo edwɛkɛ. Ɔkilehile nu kɛ nɔhalɛ Keleseɛnenli ɛbɛlabɔlɛ le kɛ ɛnriandilɛ mɔɔ ahyɛlɛdeɛ wɔ nwo la. Bɛdabɛ mɔɔ bɛbɔ mɔdenle bɛbɔ bɛ ɛbɛla kɛ Keleseɛnema na bɛkɔ zo bɛdi nɔhalɛ bɛmaa Gyihova la le kɛ menli mɔɔ kpondɛ kɛ su ɛnriandilɛ ne kɔ awieleɛ la. Ɛzoanvolɛ Pɔɔlo hɛlɛle zɛhae ɛnriandilɛ ne anwo edwɛkɛ wɔ ye kɛlata ne mɔɔ ɔlumuale ɔhɛlɛle ɔhɔmanle Keleseɛnema mɔɔ ɛnee wɔ tete Kɔlente la anu. Ɔhɛlɛle kɛ: “Bɛze ye wienyi kɛ menli dɔɔnwo a su ɛnriandilɛ a, noko bɛ nuhua ko ala yɛɛ asa ka nwolɛ ahyɛlɛdeɛ ne a. Ɛhye ati bɛnriandi kpalɛ kɛ bɛkɛnyia nwolɛ ahyɛlɛdeɛ ne.”—1 Kɔl. 9:24.

3. Mekɛ mɔɔ Pɔɔlo hanle kɛ bɛ nuhua ko ala yɛɛ asa ka ahyɛlɛdeɛ ne la, duzu a ɛnee ɔlɛkile a?

3 Yemɔti, mekɛ mɔɔ Pɔɔlo hanle kɛ bɛ nuhua ko ala a asa ka ahyɛlɛdeɛ ne la asoo ɛnee ɔlɛkile kɛ Keleseɛnenli ko ala a banyia ngoane ahyɛlɛdeɛ ne ɔ? Kyɛkyɛ. Emomu, ɛnee ɔlɛkile deɛmɔti menli dɔɔnwo su ɛnriandilɛ la anu. Ɛnee Keleseɛnema mɔɔ wɔ Kɔlente la ze kɛ bɛdabɛ mɔɔ bɛsu ɛnriandilɛ la kɔsɔɔti fa yɛ bɛ adwenle kɛ bɛbawie, ɔnva nwo kɛ bɛ nuhua ko ala a asa baha ahyɛlɛdeɛ ne la. Ɛhye ati a ɛnriandilɛma ne kɔsɔɔti tete bɛ nwo kpalɛ na bɛmia bɛ nwo bɛnriandi la. Bɛ nuhua ko biala bɔ mɔdenle kpalɛ kɛ ɔbali konim. Ɛnee Pɔɔlo kpondɛ kɛ ɔ mediema ne mɔ bɔ mɔdenle di nɔhalɛ maa Gyihova na bɛwie ɛnriandilɛ ne. Keleseɛnema mɔɔ yɛ ɛhye la kɔsɔɔti asa bahola aha dahuu ngoane ahyɛlɛdeɛ ne.

4. Duzu a ɔhyia kɛ yɛnwu ye wɔ Keleseɛnema ɛnriandilɛ ne anwo a?

4 Zɔhane edwɛkɛ ne maa yɛ anwosesebɛ, noko eza ɔmaa yɛdwenle yɛ ɛbɛlabɔlɛ nwo kpalɛ. Saa yɛ ɛbɛlabɔlɛ sɔ Gyihova anye a, yɛbanyia anyelazo kɛ yɛbadɛnla aze dahuu wɔ anwuma anzɛɛ Paladaese wɔ azɛlɛ ye azo. Noko Keleseɛnenli ɛbɛlabɔlɛ le kɛ ɔlɛnriandi yeapɛ adenle tendenle bie mɔɔ esiane dɔɔnwo wɔ zo la. Ninyɛne dɔɔnwo kola maa yɛto yɛ ɛzonlenlɛ nu, anzɛɛ yɛgyakyi Gyihova ɛzonlenlɛ bɔbɔ. (Mat. 7:13, 14) Ɛhye ɛdo Gyihova azonvolɛ bie mɔ ɛlɛ. Ɛhane nee esiane boni mɔ a wɔ ngoane ɛnriandilɛ ne anwo a? Kɛzi ɛbahola wɔahwe ɛ nwo wɔavi nwo ɛ? Kɛ ɔkɛyɛ na wɔawie ɛnriandilɛ ne wɔ konimlilɛ nu ɛ?

Ɔwɔ Kɛ Yɛmia Yɛ Nwo Na Yɛali Konim

5. Duzu a Pɔɔlo hilehilele nu wɔ Hibuluma 12:1 ne a?

5 Pɔɔlo hɛlɛle kɛlata hɔmanle Hibulu Keleseɛnema mɔɔ ɛnee wɔ Gyɛlusalɛm nee Dwuda la. Ɔhanle menli mɔɔ ɛlɛnriandi la anwo edwɛkɛ bieko. (Bɛgenga Hibuluma 12:1.) Ɔhilehilele deɛmɔti ɔwɔ kɛ Keleseɛnema kɔ zo nriandi nee mɔɔ ɔwɔ kɛ bɛyɛ na bɛawie la noko anu. Mɔɔ lumua, yɛbaha deɛmɔti Pɔɔlo hɛlɛle kɛlata ɛhye hɔmanle Hibuluma ne nee mɔɔ ɛnee ɔkpondɛ kɛ bɛyɛ la. Na akee yɛaha mɔɔ yɛbahola yɛazukoa yɛavi mɔɔ ɔhɛlɛle bɛ la anu la.

6. Duzu a ɛzonlenlɛ nu mgbanyima ne mɔ bɔle mɔdenle kɛ bɛyɛ Keleseɛnema ne a?

6 Ɛvoya ne mɔɔ lumua la anu Keleseɛnema ne dɛnlanle aze wɔ mekɛ mɔɔ ɛnee nuhua yɛ se kpalɛ la anu. Hibulu Keleseɛnema mɔɔ ɛnee wɔ Gyɛlusalɛm nee Dwuda la anwo hyelele bɛ kpalɛ ɔluakɛ Dwuuma ɛzonlenlɛ ne anu mgbanyima bɔle mɔdenle kɛ bɛmaa awie biala ali bɛ edwɛkɛ zo. Ɛnee bɛlumua bɛmaa menli ɛlie ɛli kɛ Gyisɛse Kelaese tendɛ tia arane yɛɛ ɔle maamɔvo mɔɔ  ɔfɛta ewule. Ɛzonlenlɛ nu mgbanyima ɛhye mɔ hunle Gyisɛse Kelaese na ɛnee bɛkpondɛ kɛ bɛsi bɛdabɛ mɔɔ bɛlɛka ɔ nwo edwɛkɛ la adenle. Yɛbahola yɛagenga mɔɔ zile wɔ ɛvolɛ 33 Pɛntekɔso ne anzi la wɔ Ɛzoanvolɛma Gyima buluku ne anu. Ɛzonlenlɛ nu mgbanyima ɛhye mɔ dwazole tiale Keleseɛnema fane dɔɔnwo na bɛbɔle mɔdenle kɛ bɛsi bɛ edwɛkɛhanlɛ ne adenle. Yemɔti asetɛnla yɛle se kpalɛ manle nɔhalɛ Keleseɛnema.—Gyi. 4:1-3; 5:17, 18; 6:8-12; 7:59; 8:1, 3.

7. Duzu a manle Keleseɛnema ne mɔɔ Pɔɔlo hɛlɛle bɛ la mekɛ ne anu yɛle se a?

7 Debie bieko mɔɔ manle zɔhane Keleseɛnema ne mekɛ ne anu yɛle se la a le kɛ ɛnee Gyɛlusalɛm ɛzɛkyelɛ ne ɛbikye. Ɛnee Gyisɛse ɛbɔ bɛ kɔkɔ kɛ Nyamenle ɛlɛba arazɛkye Gyɛlusalɛm. Ɔhanle mɔɔ ɔbazi kolaa na ɛzɛkyelɛ ne ara la nee mɔɔ ɔwɔ kɛ bɛyɛ na bɛanyia ngoane la ɔhilele bɛ. (Bɛgenga Luku 21:20-22.) Gyisɛse bɔle bɛ kɔkɔ kɛ: “Bɛnlea bɛ nwo boɛ! Bɛmmamaa anyelielɛ dɔɔnwo, nza ɛbolɛ nee ɛbɛla ye anu ɛvɛlɛvɛlɛ di bɛ adwenle somaa, anrɛɛ Ndɛnebualɛ Kenle ne ɛralɛ kɛli bɛ nvunu kɛhye bɛ kɛ ɛhane.”—Luku 21:34.

8. Duzu a manle Keleseɛnema bie mɔ dole bɛ ɛzonlenlɛ nu anzɛɛ gyakyile Gyihova ɛzonlenlɛ bɔbɔ ɛ?

8 Gyisɛse hanle zɔhane edwɛkɛ ne la asɛɛ ye ɛvolɛ 30 anzi yɛɛ Pɔɔlo hɛlɛle Hibulu Keleseɛnema ne a. Duzu a zile Keleseɛnema ne anwo zo wɔ ɛvolɛ 30 zɔhane anu a? Ɔlua ngyegyelɛ mɔɔ bɛyiale anzɛɛ bɛ ngyianlɛ nwo adwenledwenle ti, bie mɔ gyakyile Gyihova anwo debiezukoalɛ nee agɔnwolɛvalɛ mɔɔ bɛ nee ye lɛ la. (Hib. 5:11-14) Ɔbahola yeara ye kɛ Keleseɛnema bie mɔ nyianle adwenle kɛ saa bɛbɔ bɛ ɛbɛla kɛ Dwuuma mɔɔ ɛha la a bɛ nwo badɔ bɛ. Bie a bɛdwenlenle kɛ ɛhye ɛnle nvonleɛ ɔboalekɛ Dwuuma tɛdie Nyamenle tɛdi yɛɛ bɛdi Mosisi Mɛla ne anu dɔɔnwo azo. Bieko, ɛnee menli wɔ asafo ne mɔ anu mɔɔ ɛnee bɛlɛbɔ mɔdenle kɛ bɛmaa awie mɔ ali Mosisi Mɛla ne nee Dwuuma amaamuo ne azo a. Keleseɛnema bie mɔ liele bɛ lile, yɛɛ bie mɔ noko diele bɛ ɔluakɛ ɛnee bɛsulo. Edwɛkɛ boni a Pɔɔlo hanle amaa ɔ mediema anyia anwosesebɛ abɔ bɛ ɛbɛla kɛ Keleseɛnema na bɛali nɔhalɛ bɛamaa Gyihova ɛ?

9, 10. (a) Wɔ Hibuluma tile 10 ne awieleɛ, duzu a Pɔɔlo hanle kɛ ɔwɔ kɛ Hibulu Keleseɛnema ne yɛ a? (b) Kɛmɔti a Pɔɔlo hɛlɛle Gyihova tete azonvolɛ diedi nwo edwɛkɛ ɛ?

9 Gyihova luale ye sunsum ne azo ɔmanle Pɔɔlo hɛlɛle kɛlata ɛhye mɔɔ maa anwosesebɛ la hɔmanle Hibulu Keleseɛnema ne. Wɔ tile 10 ne anu, ɔlumuale ɔhilehilele nu kɛ Mosisi Mɛla ne le “ninyɛne kpalɛ mɔɔ bara la sɔhovolɛ ekyi bie,” na ɔlua Gyisɛse afɔle ne angome azo a bɛkola bɛfa bɛ ɛtane bɛkyɛ bɛ a. Wɔ tile 10 ne awieleɛ, Pɔɔlo hanle kɛ saa bɛbanyia afɔlebɔlɛ ne azo nvasoɛ a, ɛnee ɔwɔ kɛ bɛtɔ bɛ rɛle aze. Ɔhanle kɛ: “Ɔwɔ kɛ bɛnyia abotane, amaa bɛahola bɛayɛ Nyamenle ɛhulolɛdeɛ na bɛanyia ye ɛwɔkɛ ne. Nyamenle Edwɛkɛ ne se, ‘Ɔnrɛhyɛ biala na sonla ne mɔɔ ba la ara, ɔnrɛzi aze fee.’”—Hib. 10:1, 36, 37.

10 Pɔɔlo luale edwɛkɛ ɛhye azo ɔmanle Hibulu Keleseɛnema ne anwosesebɛ kɛ bɛgyinla kpundii. Eza ɔhanle ye wɔ tile 12 ne anu kɛ, “Yɛmia yɛ nwo kpalɛ yɛnlea ɛnriandilɛ ne mɔɔ gyi yɛ nyunlu la.” Noko kolaa na yeaha ɛhye la, ɛnee Nyamenle sunsum ne ɛmaa yehɛlɛ bɛ wɔ debie gyɛne nwo, na yɛkenga nwolɛ edwɛkɛ wɔ tile 11 ne anu. Wɔ tile zɔhane anu, ɔluale ninyɛne mɔɔ menli mɔɔ lɛ nɔhalɛ diedi yɛle la azo ɔhilehilele mɔɔ nɔhalɛ diedi mɔɔ yɛnyia ye wɔ Nyamenle anu kile la anu. Duzu ati a ɔhanle diedi nwo edwɛkɛ kolaa na yeaha kɛ yɛmia yɛ nwo ɛ? Ɔluakɛ ɛnee ɔkpondɛ kɛ zɔhane Keleseɛnema ne nwu ye kɛ saa bɛbala nɔhalɛ diedi wɔ Gyihova anu ali a, ɛnee ɔwɔ kɛ bɛmia bɛ nwo na bɛnyia akɛnrasesebɛ. Ɔbobɔle mrenya nee mraalɛ mɔɔ lile nɔhalɛ manle Gyihova bɔbɔ wɔ tɛnlabelɛ mɔɔ anu yɛ se anu la dɔɔnwo aluma. Ɛnee bɛ neazo ne baboa Hibulu Keleseɛnema yeamaa bɛagyinla kpundii. Pɔɔlo hanle Gyihova azonvolɛ ɛhye mɔ kɔsɔɔti diedi nwo edwɛkɛ wiele la, ɔhanle ɔhilele Hibulu Keleseɛnema ne kɛ: “Kɛmɔ yɛlɛ dasevolɛma pemgbenleamgbe ɛhye mɔ mɔɔ ɛbɔ yɛ nwo mgbɔlɔka ɛyia la, bɛmaa yɛye debie biala mɔɔ si yɛ aze, nee ɛtane mɔɔ ɛgya yɛ la ali, na yɛmia yɛ nwo kpalɛ yɛnlea ɛnriandilɛ ne mɔɔ gyi yɛ nyunlu la.”—Hib. 12:1.

 “Dasevolɛma Pemgbenleamgbe”

11. Saa yɛlɛsuzu “dasevolɛma pemgbenleamgbe” ne neazo ne anwo a, duzu a ɔwɔ kɛ yɛkakye a?

11 Pɔɔlo hanle Gyihova azonvolɛ mɔɔ dɛnlanle aze kolaa na Keleseɛnema mekɛ ne ara la anwo edwɛkɛ kɛ: “Dasevolɛma pemgbenleamgbe ɛhye mɔ mɔɔ ɛbɔ yɛ nwo mgbɔlɔka ɛyia la.” Bɛlile nɔhalɛ bɛmanle Gyihova bɛhɔle ewule nu, na bɛ neazo ne kile kɛ Keleseɛnema bahola ali nɔhalɛ amaa Gyihova wɔ tɛnlabelɛ mɔɔ anu yɛ se kpalɛ bɔbɔ la anu. “Dasevolɛma pemgbenleamgbe” ɛhye mɔ le kɛ menli mɔɔ ɛwie bɛ ɛnriandilɛ la. Bɛ neazo ne bahola aboa awie mɔ yeamaa bɛahɔ zo bɛazu ɛnriandilɛ ne. Saa yɛlɛnriandi na yɛnwu kɛ menli mɔɔ ze nriandi kpalɛ la ɛlɛnea yɛ na bɛlɛsi yɛ adua a, ɔmaa yɛyele yɛ nwo yɛwie ɛnriandilɛ ne. Yemɔti ɛnee ɔwɔ kɛ Hibulu Keleseɛnema ne suzu Gyihova tete azonvolɛ zɔhane mɔ neazo ne anwo. Ɛnee bɛ neazo ne bahola azi bɛ ahonle na yɛahakye bɛ kɛ bɛbahola bɛamia bɛ nwo kpalɛ na bɛawie bɛ ɛnriandilɛ ne. Na yɛdayɛ noko yɛbahola yɛayɛ zɔ.

12. Duzu a yɛbahola yɛazukoa yɛavi menli mɔɔ Pɔɔlo hanle bɛ nwo edwɛkɛ la diedi ne anu a?

12 Yɛbahola yɛazukoa bɛdabɛ mɔɔ Pɔɔlo hanle bɛ nwo edwɛkɛ la diedi ne, ɔluakɛ ɛnee bɛ nuhua dɔɔnwo tɛnlabelɛ ne le kɛ yɛ ɛdeɛ ne la. Kɛ neazo la, Nowa dɛnlanle aze wɔ mekɛ mɔɔ ɛnee Gyihova ɛlɛba arazɛkye ewiade ne mɔɔ li Azuyilɛ ne anyunlu la. Yɛɛ yɛde mekɛ mɔɔ ɔnrɛhyɛ fee Gyihova bazɛkye Seetan ewiade ne la anu. Gyihova zele Ebileham nee Sɛla kɛ bɛvi bɛ sua zo. Ɔbɔle bɛ ɛwɔkɛ kɛ ɔbamaa maanle mɔɔ bɛbazonle ye la avi bɛ nuhua ara, na bɛhendɛle kɛ ɔbamaa zɔhane ɛwɔkɛ ne ara nu. Gyihova se yɛmmatɛnla aze yɛmaa yɛ nwo bieko yɛdɛnla aze yɛmaa ye. Yebɔ yɛ ɛwɔkɛ kɛ saa yɛyɛ zɔ a, ɔbayɛ yɛ gɔnwo na yeamaa yɛ ahatualɛ. Mosisi diale adenle tendenle mɔɔ esiane wɔ zo la anu kɛ ɔkɔ Ɛwɔkɛ Azɛlɛ ne azo. Yɛde amumuyɛma ewiade nu na yɛlɛkendɛ ewiade fofolɛ ne mɔɔ Gyihova ɛva ɛbɔ yɛ ɛwɔkɛ la. Ɔwɔ kɛ yɛdwenle nɔhalɛma ɛhye mɔ ɛbɛlabɔlɛ nwo. Yɛbahola yɛazukoa ninyɛne mɔɔ Gyihova anye die nwo mɔɔ bɛyɛle la na yɛazukoa debie yɛavi ninyɛne mɔɔ Gyihova anye ɛnlie nwo mɔɔ bɛyɛle la noko anu.—Wulo. 15:4; 1 Kɔl. 10:11.

Duzu A Manle Bɛwiele Ɛnriandilɛ Ne A?

13. Duzu ati a ɛnee Nowa tɛnlabelɛ ne anu yɛ se ɛ? Kɛmɔti a ɔyɛle debie biala mɔɔ Gyihova zele ye la ɛ?

13 Duzu a manle Gyihova azonvolɛ ɛhye mɔ mianle bɛ nwo wɔ ɛnriandilɛ ne anu na bɛwiele a? Yɛ mɔɔ Pɔɔlo hɛlɛle ye wɔ Nowa anwo la nzonlɛ. (Hibuluma 11:7.) Ɛnee Nowa ɛtɛnwunle azuyilɛ mɔɔ ɛzɛkye menli nee nane kɔsɔɔti la ɛlɛ. (Mɔl. 6:17) Ɛnee azuyilɛ ɛtɛsile ɛlɛ. Noko akee, Nowa annyia adwenle kɛ azuyilɛ ne ɛnrɛhola ɛnrɛra. Kɛmɔti ɛ? Ɔluakɛ ɛnee ɔdie ɔdi kɛ mɔɔ Gyihova ɛha biala la ɔbayɛ. Ɛhye ati, Nowa annyia adwenle kɛ ɔyɛ se somaa kɛ ɔbadie Gyihova. Ɔyɛle mɔɔ Gyihova hanle hile ye la amuala. Baebolo ne ka kɛ: “Ɔyɛle debie biala mɔɔ Nyamenle zele ye la.” (Mɔl. 6:22) Ɛnee Nowa lɛ ninyɛne dɔɔnwo yɛ. Ɛnee ɔwɔ kɛ ɔbobɔ ɛlɛne, ɔboɔboa nane ne mɔ anloa, ɔkpondɛ aleɛ ɔmaa ye abusua ne nee nane ne mɔ, ɔbɔ menli ne kɔkɔ wɔ Azuyilɛ ne anwo, na ɔboa ye abusua ne ɔmaa bɛnyia diedi kpole wɔ Gyihova anu. Tɛ mekɛ ne amuala a ɛnee ɔla aze kɛ Nowa bayɛ debie biala mɔɔ Gyihova zele ye la a. Noko ɛnee ɔlɛ diedi wɔ Gyihova anu, yemɔti ɔhɔle zo wɔ gyima ne mɔɔ ɛnee ɔwɔ kɛ ɔyɛ la anu. Gyihova liele ye nee ye abusua ne ngoane na ɔyilale bɛ.

14. Tɛnlabelɛ boni mɔ anu a Ebileham nee Sɛla lale Nyamenle anu diedi ali a? Duzu a yɛsukoa yɛfi bɛ neazo ne anu a?

14 Pɔɔlo hanle Ebileham nee Sɛla anwo edwɛkɛ kɛ bɛboka “dasevolɛma pemgbenleamgbe ɛhye mɔ mɔɔ ɛbɔ yɛ nwo mgbɔlɔka ɛyia la” anwo. Mekɛ mɔɔ Nyamenle zele bɛ kɛ bɛvi bɛ sua nu wɔ Yule la bɛ asetɛnla hakyile. Ɛnee bɛnze mɔɔ ɔbazi bɛ nwo zo a. Noko ɛnee bɛlɛ diedi kpole wɔ Gyihova anu na bɛdiele ye wɔ tɛnlabelɛ mɔɔ anu yɛ se bɔbɔ la anu. Baebolo ne ka kɛ: “Ebileham le bɛdabɛ mɔɔ bɛdie Nyamenle bɛdi . . . la bɛ ze.” (Wulo. 4:11) Ɛnee Hibulu Keleseɛnema ne ze Ebileham nee ye abusua ne asetɛnla nwo edwɛkɛ dɛba, yemɔti Pɔɔlo hanle bɛ diedi ne anwo edwɛkɛ ekyi bie ala. Noko ɛnee bɛbahola bɛagyinla yemɔ ala azo bɛala diedi ali. Pɔɔlo hanle bɛ nwo edwɛkɛ kɛ: “Diedi nu yɛɛ menli ɛhye mɔ amuala wule a. Bɛ sa anga ɛwɔkɛ ne mɔ mɔɔ Nyamenle bɔle bɛ la, noko bɛnwunle ye  bɛ adwenle nu wɔ moa moa na bɛliele bɛdole nu kɛ bɛle nyɛvolɛ mɔɔ ɛra nlɔnu wɔ azɛlɛ ɛhye azo a.” (Hib. 11:13) Bɛ diedi wɔ Nyamenle anu nee agɔnwolɛ mɔɔ bɛ nee ye lɛ la manle bɛdɔle bɛ rɛle aze wɔ ɛnriandilɛ ne anu.

15. Duzu ati a Mosisi kpale kɛ ɔbabɔ ye ɛbɛla kɛmɔ yɛha nwolɛ edwɛkɛ la ɛ?

15 Mosisi le Gyihova sonvolɛ fofolɛ mɔɔ boka “dasevolɛma pemgbenleamgbe” ne anwo a. Mosisi vile ye sua nu kɛmɔ Ebileham yɛle la. Mosisi kpole anyunlunyia nee anwonyia ne mɔɔ ɛnee wɔ belemgbunli sua nu ɛkɛ la. “Ɔhulole kɛ ɔ nee Nyamenle menli ne kɛli nyane.” Duzu ati a ɔyɛle ɛhye a? Pɔɔlo buale kɛ: “Ɛnee ɔ nye la ahyɛlɛdeɛ mɔɔ kenle bie Nyamenle bava amaa ye la azo.” Pɔɔlo eza hanle ye wɔ Mosisi anwo kɛ: “Ɔgyinlanle kpundii kɛ sonla mɔɔ ɛnwu Nyamenle ne mɔɔ bɛnnwu ye la.” (Bɛgenga Hibuluma 11:24-27.) Ɛnee Mosisi ze kɛ debie kpalɛ bie wɔ ɛkɛ tɛla kɛ “ɔ nye kɛlie ɛtane nwo mekɛ ekyi bie a.” Ɛnee ɔdie ɔdi kɛ Nyamenle wɔ ɛkɛ, yɛɛ ɛnee ɔze kɛ Nyamenle ɛwɔkɛ ne amuala bara nu. Yemɔ a boale ye manle ɔvale akɛnrasesebɛ ɔgyinlanle tɛnlabelɛ mɔɔ anu yɛ se la anloa a. Na ɔmanle ɔyɛle gyima ɛsesebɛ ɔlile Yizilayɛma anyunlu ɔvile Yigyibiti ɔhɔle Ɛwɔkɛ Azɛlɛ ne azo.

16. Duzu a ma yɛnwu kɛ ɔnva nwo kɛ ɛnee Mosisi ɛnrɛhɔ Ɛwɔkɛ Azɛlɛ ne azo bie la, ɔ sa nu ando ɛ?

16 Ebileham nee Mosisi wule kolaa na ɛwɔkɛ mɔɔ Nyamenle bɔle bɛ la ara nu. Ɔka ekyii na Yizilayɛma adwu Ɛwɔkɛ Azɛlɛ ne azo la, Nyamenle zele Mosisi kɛ: “Ɛbanwu azɛlɛ ne kɛ ɔla ɛ nyunlu lɔ, na ɛ gyakɛ ba ɛnrɛtia azɛlɛ ne mɔɔ melɛfa meamaa Yizilayɛma la azo.” Ɔluakɛ Mosisi nee Aalɔn yɛle Nyamenle anwo anzosesebɛ wɔ Mɛleba nzule ne mɔ anwo la ati, bɛangɔ Ɛwɔkɛ Azɛlɛ ne azo bie. Atuadelɛma ne manle bɛvale ɛya kpole yemɔti bɛyɛle debie mɔɔ Nyamenle anye anlie nwo la. (Mɛla 32:51, 52) Ɔnva nwo kɛ ɛnee Mosisi ɛnrɛhɔ Ɛwɔkɛ Azɛlɛ ne azo la yeamaa ɔ sa nu ando. Yeanyia adwenle kɛ kpɔkɛ mɔɔ Nyamenle zile la ɛndenrɛ. Yɛkola yɛnwu ɛhye ɔboalekɛ ɔzɛlɛle Gyihova kɛ ɔyila menli ne. Edwɛkɛ mɔɔ ɔli amozi mɔɔ ɔhanle  la ɛne: “Yizilayɛma, nyilalɛ ɛha bɛ! Nwane mɔ a le kɛ bɛdabɛ a? Bɛmɛ mɔɔ [Gyihova] ɛlie bɛ, yebɔ bɛ nwo bane, na ɔle bɛ dadeɛ bɛfa bɛdi konim a.”—Mɛla 33:29.

Mɔɔ Yɛsukoa Yɛfi Nu

17, 18. (a) Duzu a yɛbahola yɛazukoa yɛavi “dasevolɛma pemgbenleamgbe” ne ɛkɛ a? (b) Yɛbaha duzu anwo edwɛkɛ wɔ edwɛkɛ mɔɔ doa zo la anu?

17 Yɛzukoa yɛvi bɛdabɛ mɔɔ bɛboka “dasevolɛma pemgbenleamgbe ɛhye mɔ mɔɔ ɛbɔ yɛ nwo mgbɔlɔka ɛyia la” ɛkɛ ne kɛ saa yɛbahola yɛawie ɛnriandilɛ ne a, ɛnee ɔwɔ kɛ yɛnyia diedi kpole wɔ Nyamenle ɛwɔkɛ ne mɔ anu. (Hib. 11:6) Diedi ɛhye ɔwɔ kɛ ka kɛzi yɛbɔ yɛ ɛbɛla ɛnɛ la. Yɛze kɛ Nyamenle ɛva asetɛnla kpalɛ ɛbɔ yɛ ɛwɔkɛ. Yɛkola yɛnwu “Nyamenle ne mɔɔ bɛnnwu ye la.” Yɛze kɛ Nyamenle wɔ ɛkɛ yemɔti yɛmia yɛ nwo yɛsu ɛnriandilɛ ne.—2 Kɔl. 5:7.

18 Keleseɛnema ɛnriandilɛ ne ɛnla aze. Ɔnla aze kɛ yɛbabɔ yɛ ɛbɛla kɛ Keleseɛnema na yɛala Nyamenle anu diedi ali. Noko yɛbahola yɛawie ɛnriandilɛ ne. Yɛbaha ninyɛne gyɛne mɔɔ baboa yɛ amaa yɛawie ɛnriandilɛ ne la wɔ edwɛkɛ mɔɔ doa zo la anu.

Ɛbahola Wɔahilehile Nu Ɔ?

• Kɛmɔti a Pɔɔlo hɛlɛle tete “dasevolɛma” diedi nwo edwɛkɛ ɛ?

• Kɛzi “dasevolɛma pemgbenleamgbe ɛhye mɔ mɔɔ ɛbɔ yɛ nwo mgbɔlɔka ɛyia la” neazo ne maa yɛmia yɛ nwo yɛnriandi ɛ?

• Duzu a wɔzukoa wɔvi neazo mɔɔ Nowa, Ebileham, Sɛla, nee Mosisi yɛle la anu a?

[Debiezukoalɛ kpuyia ne mɔ]

[Nvoninli wɔ mukelɛ 22]

Ebileham nee Sɛla gyakyile asetɛnla kpalɛ mɔɔ ɛnee bɛlɛ ye wɔ Yule la