Wulu kɔ nuhua edwɛkɛ ne azo

Wulu kɔ nuninyɛne ne azo

Keleseɛne Mbusua—“Bɛziezie Bɛ Nwo”

Keleseɛne Mbusua—“Bɛziezie Bɛ Nwo”

 Keleseɛne Mbusua—“Bɛziezie Bɛ Nwo”

‘Bɛziezie bɛ nwo, ɔboalekɛ medame Sonla Ra, mebara bieko wɔ mekɛ mɔɔ bɛ nye ɛnla la.’—LUKU 12:40.

1, 2. Duzu ati a ɔwɔ kɛ yɛfa Gyisɛse folɛ mɔɔ se “Bɛziezie bɛ nwo” la yɛkɔ adwenle nu kpalɛ a?

‘MEKƐ mɔɔ Sonla Ra ne kɛra ye anyunlunyia nu’ mɔɔ ɔbahyɛ ‘aleɛabo amra anu nwiɔ la,’ duzu a bado ɛ nee wɔ abusua ne a? (Mat. 25:31, 32) Kɛmɔ ɛhye bazi wɔ mekɛ mɔɔ yɛ nye ɛnla la ati, nea kɛzi nwolɛ hyia kɛ yɛbava Gyisɛse folɛ mɔɔ se: “Bɛziezie bɛ nwo” la yɛahɔ adwenle nu kpalɛ a!—Luku 12:40.

2 Edwɛkɛ mɔɔ li ɛhye anyunlu la hilehilele kɛzi ɔwɔ kɛ abusua ne anu amra kɔsɔɔti boa maa abusua ne sinza wɔ sunsum nu ɔlua bɛ ɛzonlelilɛ mɔɔ bɛbamaa bɛ nye abolo nwo azo la anu. Bɛmaa yɛzuzu ndenle gyɛne mɔɔ yɛbahola yɛalua zo yɛaboa yɛ abusua ne wɔ sunsum nu la anwo.

Nyia Ɛnyelɛ “Kpalɛ”

3, 4. (a) Ɔwɔ kɛ Keleseɛne mbusua nea boɛ wɔ duzu anwo? (b) Duzu a ɛnyelɛ “kpalɛ” mɔɔ yɛbanyia la kile a?

3 Amaa mbusua aziezie bɛ nwo amaa Kelaese ɛralɛ ne la, ɔnle kɛ bɛmmaa debie twehwe bɛ adwenle fi ninyɛne mɔɔ fane nɔhalɛ ɛzonlenlɛ nwo la anwo. Ɔwɔ kɛ bɛnea boɛ wɔ ninyɛne ɛhye mɔ anwo. Ɔluakɛ anwonyia ɛhulolɛ le ɛhane mɔɔ ɛhye mbusua dɔɔnwo la ati, bɛmaa yɛzuzu mɔɔ Gyisɛse hanle vanenle ɛnyelɛ “kpalɛ” ɛnyianlɛ nwo la anwo. (Bɛgenga Mateyu 6:22, 23.) Kɛmɔ kɛnlaneɛ maa yɛ adenle zo yɛ wienyi mɔɔ saa yɛlua a yɛndɔ aze la, zɔhane ala a ninyɛne mɔɔ yɛfa yɛ sɛkɛlɛneɛ adenle zo ‘ahonle ne anye’ yɛnea la kola maa yɛnyia ndelebɛbo mɔɔ bamaa yɛabɔ ɛbɛla mɔɔ yɛnrɛdu koti a.—Ɛfɛ. 1:18.

 4 Saa yɛ nye banwu debie kpalɛ a, ɔwɔ kɛ ɔyɛ gyima kpalɛ na yɛfa yɛsie deɛ ne mɔɔ yɛkulo kɛ yɛnea la azo. Zɔhane ala a ahonle ne anye ne noko de a. Sɛkɛlɛneɛ adenle zo ɛnyelɛ kpalɛ mɔɔ yɛbanyia la kile kɛ yɛfa yɛ adwenle yɛazie bodane ko ala azo. Kɛ anrɛɛ yɛbava yɛ ɛbɛlabɔlɛ yɛazie nwonane afoa nu ninyɛne zo na yɛamaa yɛ abusua ne nwonane nu boɛyɛlɛ ala anwo ahyia yɛ la, yɛkɔ zo yɛfa yɛ nye yɛsie sunsum nu ninyɛne zo. (Mat. 6:33) Ɛhye kile kɛ yɛbamaa yɛ nye azɔ nwonane afoa nu ninyɛne mɔɔ yɛlɛ la, na yɛamaa Nyamenle ɛzonlenlɛ alumua wɔ yɛ ɛbɛlabɔlɛ nu.—Hib. 13:5.

5. Kɛzi bɛlɛra bie lale ye ali kɛ yeva ɔ ‘nye’ yezie Nyamenle ɛzonlenlɛ zo ɛ?

5 Saa bɛtete ngakula bɛmaa bɛnyia ɛnyelɛ kpalɛ a, nea nyilalɛ mɔɔ ɔbavi nu yeara a! Fa kakula raalɛ bie mɔɔ ɛtɛnyianle ɛvolɛ 20 mɔɔ wɔ Ethiopia maanle nu la kɛ neazo. Ɔbɔle mɔdenle kpalɛ wɔ ye nwomazukoalɛ nu, yemɔti mekɛ mɔɔ ɔwiele mɔlebɛbo sukulu la, ɔnyianle adenle mɔɔ ɔbamaa yeadoa ye nwomazukoalɛ zo mɔɔ ɔnrɛdua nwolɛ kakɛ biala a. Noko akee, ɔluakɛ ɔvale ɔ nye ɔziele Gyihova ɛzonlenlɛ zo la ati, ɔkpole nwolɛ adenle ne. Yeangyɛ, ɔnyianle gyima mɔɔ ɛnee bɛbadua ye euro 3,000 siane biala la. Saa ɛfa ɛto maanle ne anu ahatualɛ mɔɔ menli dɔɔnwo die la anwo a, ɛnee ɔle ezukoa kpole kpalɛ. Noko, ɛnee kakula raalɛ ne ɛva ɔ ‘nye’ ɛzie adekpakyelɛ gyima ne azo. Ɛnee ɔngyia kɛ ɔbabiza ye awovolɛ adwenle kola na yeakpo gyima ne. Mɔɔ ye awovolɛ dele mɔɔ bɛ ra raalɛ ne ɛyɛ la, kɛzi bɛdele nganeɛ ɛ? Nɔhalɛ nu, bɛ nye liele na bɛhanle bɛhilele ye kɛ bɛ nye die ɔ nwo.

6, 7. Esiane boni a ɔwɔ kɛ ‘yɛmaa yɛ nye da ɛkɛ’ wɔ nwo a?

6 Gyisɛse edwɛkɛ mɔɔ wɔ Mateyu 6:22, 23 la bɔ anyebolo nwo kɔkɔ. Baebolo ne ka ‘ɛnyelɛ kpalɛ’ nee ‘ɛnyelɛ ɛtane’ nwo edwɛkɛ. Wɔ Baebolo ngilebɛbo bie mɔ anu, ‘ɛnyelɛ ɛtane’ kile anyebolo. (Mat. 6:23; NW ftn.) Kɛzi Gyihova bu anyebolo ɛ? Baebolo ne ka kɛ: “Bɛye adwɔmanebɔlɛ anzɛɛ nyɛleɛ ɛtane ɛtane anzɛɛ anyebolo wɔ bɛ nu bɔkɔɔ.”—Ɛfɛ. 5:3.

7 Anyebolo le subane mɔɔ saa ɔwɔ awie anwo a ɔnnwu ye, noko saa ɔwɔ ɔ gɔnwo anwo a ɔnwu ye ndɛndɛ. Yemɔti, ɔle kpalɛ kɛ yɛbadie Gyisɛse folɛdulɛ ɛhye: “Bɛmmayɛ anyebolo wɔ adenle biala anu.” (Luku 12:15) Ɛhye mɔɔ yɛbayɛ la kile kɛ yɛbanleɛnlea yɛ nwo nu yɛanwu mɔɔ yɛva yɛ ahonle yɛzie zo la. Ɔwɔ kɛ Keleseɛne mbusua dwenle mekɛ nee ezukoa mɔɔ bɛsɛkye ye wɔ anyelielɛ, ɛnwomenlelielɛ, nee nwonane afoa nu ninyɛne ɛkpondɛlɛ nwo la anu kpalɛ.

8. Kɛ ɔkɛyɛ na yɛamaa ‘yɛ nye ala ɛkɛ’ wɔ ninyɛne ɛtotɔlɛ nwo ɛ?

8 Kolaa na wɔadɔ debie bie la, ɔwɔ kɛ ɛdwenle nwolɛ kpalɛ ɛtɛla ezukoa mɔɔ ɛbanyia ye wɔadɔ la. Ɔwɔ kɛ ɛsuzu ninyɛne ɛhye mɔ anwo kpalɛ: ‘Asoo mebanyia mekɛ meava meali gyima dahuu na meanlea zolɛ boɛ? Mekɛ tendenle nyɛ a mebava meazukoa kɛzi bɛfa bɛdi gyima la ɛ?’ Menli mɔɔ bɔ ninyɛne nolo la maa ngakula die di kɛ bɛhyia adɛladeɛ nee ninyɛne gyɛne mɔɔ ɛdwu zo la. Noko akee, fane dɔɔnwo ne ala ninyɛne ɛhye mɔ bolɛ yɛ se ɔluakɛ bɛle adwuleso ninyɛne. Ɔnle ninyɛne mɔɔ bɛhyia nwo. Sɔ ɛ nwo. Bieko, suzu nwo saa ɛtɔ deɛ ne a, ɔbaboa wɔ abusua ne yeamaa bɛaziezie bɛ nwo bɛamaa sonla Ra ne ɛralɛ ne a. Die Gyihova ɛwɔkɛ ne di: “Menrɛgyakyi bɛ ɛlɛ, yɛɛ me rɛle ɛnrɛvi bɛ fee.”—Hib. 13:5.

Pele Dwu Sunsum Nu Bodane Nwo

9. Duzu a sunsum nu bodane bahola ayɛ amaa abusua bie a?

9 Adenle bieko mɔɔ mbusua bahola alua zo amia bɛ diedi nu na bɛaboa bɛ nwo wɔ sunsum nu la a le kɛ, bɛbava sunsum nu bodane bɛazie bɛ nyunlu na bɛapele bɛadwu nwo. Saa bɛyɛ zɔ a ɔbaboa mbusua yeamaa bɛanwu mɔdenle mɔɔ bɛlɛbɔ wɔ Gyihova ɛzonlenlɛ  nu la, na bɛazi kpɔkɛ wɔ gyima mɔɔ anwo hyia wɔ bɛ ɛbɛlabɔlɛ nu la anwo.—Bɛgenga Felepaema 1:10.

10, 11. Kɛ abusua la, sunsum nu bodane boni mɔ a gyi bɛ nye zo a, na bodane boni mɔ a bɛkulo kɛ bɛdwu nwo kenlebie a?

10 Bodane ngyikyi bɔbɔ mɔɔ awie biala mɔɔ wɔ abusua ne anu bava azie ɔ nyunlu na yeadwu nwo la bamaa bɛanyia nvasoɛ dɔɔnwo. Fa alehyenlɛ ne anu tɛkese ne mɔɔ bɛfa bɛazie bɛ nyunlu kɛ bɛbayɛ ye alehyenlɛ biala la kɛ ndonwo. Mualɛ mɔɔ abusua ne anu amra bava amaa la baboa abusua tile ne yeamaa yeanwu bɛ sunsum nu gyinlabelɛ. Saa bɛfa bɛyɛ bɛ bodane kɛ bɛbagenga Baebolo ne bɛabɔ nu kɛ abusua a, ɔbamaa ngakula ne mɔ azukoa ɛgengalɛ kpalɛ na bɛade Baebolo ne abo. (Edw. 1:1, 2) Eza ɔwɔ kɛ yɛfa yɛyɛ yɛ bodane kɛ yɛbamaa yɛ asɔneyɛlɛ anyia anyuhɔlɛ? Sunsum ne ma ne foa ne mɔ mɔɔ yɛbala bɛ ali kpalɛ la noko le bodane kpalɛ mɔɔ yɛbahola yɛava yɛazie yɛ nyunlu a. (Gal. 5:22, 23) Anzɛɛ ndenle mɔɔ yɛbakpondɛ yɛala ɛlɔlɛ ali yɛahile menli mɔɔ yɛyia bɛ wɔ daselɛlilɛ nu la noko ɛ? Saa abusua ne bɔ mɔdenle yɛ ɛhye a, ɔbaboa ngakula ne mɔ yeamaa bɛazukoa anwunvɔnezelɛ, na ɔda ali kɛ bɛbanyia ɛhulolɛ kɛ bɛbayɛ dahuu adekpakyelɛ anzɛɛ edwɛkpatɛlɛvolɛ gyima ne.

11 Duzu ati a ɛ nee wɔ abusua ne ɛnzuzu bodane bie mɔ mɔɔ bɛbahola bɛava bɛazie bɛ nyunlu la anwo a? Asoo wɔ abusua ne bahola ava azie ɔ nyunlu kɛ ɔbava mekɛ dɔɔnwo yeayɛ daselɛlilɛ gyima ne? Asoo bɛbɔ mɔdenle kɛ bɛbali ɛzulolɛ mɔɔ ka bɛ wɔ telefuu, gua zo, anzɛɛ gyima nu daselɛlilɛ nwo la azo? Na ɛleka mɔɔ bɛhyia Belemgbunlililɛ ne anwo nolobɔlɛma dɔɔnwo la noko ɛ? Asoo abusua ne anu sonla ko bahola azukoa aneɛ gyɛne amaa yeahola yeaha edwɛkɛ ne yeahile maanle gyɛne zo menli?

12. Duzu a mbusua tile bahola ayɛ aboa bɛ mbusua amaa bɛanyi wɔ sunsum nu a?

12 Ɔwɔ kɛ mbusua tile nwu ninyɛne mɔɔ ɔhyia kɛ bɛ mbusua nyi wɔ nu wɔ sunsum nu la. Akee bɛva bodane fɔɔnwo bie mɔ bɛzie bɛ nyunlu amaa bɛadwu nwo. Ɔwɔ kɛ bodane mɔɔ abusua ne fa sie ɔ nye zo la yɛ mɔɔ bɛ tɛnlabelɛ nee bɛ anwosesebɛ bɛahola amaa bɛadwu nwo a. (Mrɛ. 13:12) Nɔhalɛ nu, ɔdie mekɛ na awie ahola adwu bodane kpalɛ nwo. Yemɔti tɔ mekɛ mɔɔ ɛfa ɛnea tɛlevihyɛne la bie fa di sunsum nu ninyɛne nwo gyima. (Ɛfɛ. 5:15, 16) Yɛ gyima ɛsesebɛ na wɔadwu bodane mɔɔ ɛfa ɛsie wɔ abusua ne anyunlu la anwo. (Gal. 6:9) Abusua mɔɔ pele dwu sunsum nu bodane nwo la bamaa ye anyuhɔlɛ “ala ali wɔ menli kɔsɔɔti anyunlu.”—1 Tem. 4:15.

Bɛhɔ Zo Bɛyɛ Nɔsolɛ Abusua Ɛzonlenlɛ

13. Nzenzaleɛ boni a bɛyɛle ye wɔ asafo dapɛne biala debiezukoalɛ ngyehyɛleɛ ne anu a, na kpuyia boni mɔ a ɔwɔ kɛ yɛsuzu nwo a?

13 Moalɛ kɛnlɛma mɔɔ baboa mbusua yeamaa ‘bɛaziezie bɛ nwo’ bamaa sonla Ra ne ɛralɛ ne la a le nzenzaleɛ titile mɔɔ bɛyɛle ye dapɛne biala debiezukoalɛ ngyehyɛleɛ ne anu ɔvi January 1, 2009 la. Bɛpɛle kenle mɔɔ ɛnee yɛyia nu yɛyɛ Asafo Buluku Ɛzukoalɛ ne la anu na bɛvale bɛbokale Teokelase Ɛzonlenlɛ Sukulu nee Ɛzonlenlɛ Nyianu ne anwo. Bɛyɛle nzenzaleɛ ɛhye amaa Keleseɛne mbusua anyia mekɛ aboa bɛ nwo sunsum nu ɔlua nɔsolɛ ko mɔɔ bɛbaye bɛazie ɛkɛ dapɛne biala bɛayɛ abusua ɛzonlenlɛ la azo. Kɛkala mɔɔ mekɛ ekyi ɛgua nu la, yɛbahola yɛabiza yɛ nwo kɛ: ‘Asoo melɛfa mekɛ ne mɔɔ bɛvale bɛmanle la meayɛ nɔsolɛ Abusua Ɛzonlenlɛ anzɛɛ bɛtianwo debiezukoalɛ ɔ? Asoo mehola medwu zɔhane ngyehyɛleɛ ne bodane ne anwo ɔ?’

14. (a) Duzu a le nɔsolɛ Abusua Ɛzonlenlɛ ne anzɛɛ bɛtianwo debiezukoalɛ bodane titile a? (b) Duzu ati a nɔsolɛ ko mɔɔ yɛbava yɛazie ɛkɛ yɛazukoa la anwo hyia a?

14 Nɔsolɛ Abusua Ɛzonlenlɛ anzɛɛ bɛtianwo debiezukoalɛ bodane titile a le kɛ ɔbamaa  yɛahwe yɛabikye Nyamenle. (Gye. 4:8) Saa yɛfa mekɛ yɛsukoa Baebolo ne dahuu na yɛnwu Bɔvolɛ ne anwo edwɛkɛ dɔɔnwo a, ɔmaa agɔnwolɛ mɔɔ yɛ nee ye lɛ la anu mia. Saa yɛtwe yɛbikye Gyihova kpalɛ a, ɔbamaa yɛava yɛ ‘ahonle muala, yɛ ɛkɛla muala, yɛ adwenle muala, nee yɛ anwosesebɛ muala yɛahulo ye.’ (Mak. 12:30) Nɔhalɛ nu, yɛ nye die nwo kɛ yɛbadie Nyamenle na yɛayɛ kɛ ɔdaye la. (Ɛfɛ. 5:1) Ɛhye ati, mekɛ mɔɔ yɛlɛkendɛ “anwongyelelɛ” kpole ne mɔɔ bɛhanle nwolɛ edwɛkɛ la, nɔsolɛ Abusua Ɛzonlenlɛ mɔɔ yɛbahɔ zo yɛayɛ la le debie titile mɔɔ baboa yɛ abusua ne anu amra kɔsɔɔti amaa ‘yɛaziezie yɛ nwo’ a. (Mat. 24:21) Nwolɛ hyia maa ngoanelielɛ.

15. Kɛzi nɔsolɛ Abusua Ɛzonlenlɛ ne bahola aha nganeɛ mɔɔ abusua ne anu amra te maa bɛ nwo ngoko ngoko la ɛ?

15 Abusua Ɛzonlenlɛ ngyehyɛleɛ ne eza lɛ bodane gyɛne—ɔmaa abusua ne anu amra bikye bɛ nwo. Dapɛne biala mɔɔ bɛyia nu bɛsuzu sunsum nu ninyɛne nwo la, maa abusua ne anu amra nwu adwenle mɔɔ bɛlɛ bɛmaa bɛ nwo bɛ nwo la. Saa agyalɛma fa anyelielɛ bɔ nu sukoa Baebolo ne a, ɔmaa bɛbikye bɛ nwo kpalɛ. (Bɛgenga Nolobɔvo ne 4:12.) Ɔda ali kɛ awovolɛ nee bɛ mra mɔɔ bɛbɔ nu bɛsonle la bamaa bayɛ ko wɔ ɛlɔlɛ ‘mɔɔ maa bɛdi munli’ la anu.—Kɔl. 3:14.

16. Ka nvasoɛ mɔɔ sunsum nu mediema mraalɛ nsa ɛlɛnyia ye wɔ nɔsolɛ ko mɔɔ bɛfa bɛsukoa Baebolo ne azo la.

16 Fa nvasoɛ mɔɔ sunsum nu mediema mraalɛ nsa bie ɛnyia ɛvi ngyehyɛleɛ mɔɔ bɛyɛ bɛye nɔsolɛ ko bɛsukoa Baebolo ne anu la kɛ neazo. Bɛnvi abusua ko anu, noko ahunlanvolɛ mraalɛ ɛhye mɔ de sua ko azo yɛɛ bɛva bɛ nwo agɔnwolɛ ɛvolɛ dɔɔnwo. Kɛmɔ ɛnee bɛkulo kɛ bɛbikye bɛ nwo kpalɛ na bɛboa bɛ nwo sunsum nu bɛtɛla nwonane nu la ati, bɛzile kpɔkɛ kɛ bɛbaye nɔsolɛ ko bɛazie ɛkɛ bɛazukoa Baebolo ne. Bɛvale “Bearing Thorough Witness” About God’s Kingdom buluku ne bɛbɔle ɔ bo. Bɛ nuhua ko ka kɛ: “Yɛ nye die kpalɛ yemɔti fane dɔɔnwo ne ala yɛ debiezukoalɛ ne bo dɔnehwele ko. Yɛbɔ mɔdenle yɛyɛ tɛnlabelɛ mɔɔ ɛnee yɛ mediema mɔɔ dɛnlanle aze wɔ ɛvoya ne mɔɔ lumua la anu wɔ nu la nvoninli wɔ yɛ adwenle nu, na yɛsuzu mɔɔ saa yɛdayɛ a anrɛɛ yɛbayɛ la anwo. Akee yɛbɔ mɔdenle yɛfa mɔɔ yɛkɛzukoa la yɛdi gyima wɔ daselɛlilɛ nu. Ɛhye ɛmaa yɛ Belemgbunlililɛ edwɛkɛ ɛhanlɛ ne nee ɛzoanvolɛ ɛyɛlɛ gyima ne ɛyɛ anyelielɛ na yezo ma yedɛla alumua ne.” Mɔɔ boka sunsum nu anyuhɔlɛ mɔɔ agɔnwolɛ nsa ɛhye mɔ ɛnyia anwo la a le kɛ bɛbikye bɛ nwo kpalɛ. Bɛka kɛ, “Yɛ nye sɔ ngyehyɛleɛ ɛhye kpole kpalɛ.”

17. Ninyɛne boni mɔ a kola maa nɔsolɛ Abusua Ɛzonlenlɛ ne gyinla a?

17 Na ɛdawɔ noko ɛ? Nvasoɛ boni a ɛlɛnyia wɔavi nɔsolɛ ko mɔɔ bɛye bɛsie ɛkɛ bɛyɛ abusua ɛzonlenlɛ anzɛɛ bɛtianwo debiezukoalɛ la azo a? Saa ɛnda ɛnyɛ a, ɛnrɛnyia ngyehyɛleɛ ne azo nvasoɛ kɛmɔ ɔfɛta la. Ɔwɔ kɛ abusua ne anu amra kɔsɔɔti siezie bɛ nwo kɛ bɛbayia nu wɔ mekɛ mɔɔ bɛye bɛzie ɛkɛ ne la anu bɛazukoa. Ɔnle kɛ bɛmaa edwɛkɛ ngyikyi tenda zɔhane ngyehyɛleɛ ne anu. Bieko, ɔwɔ kɛ bɛsukoa ninyɛne mɔɔ nwolɛ bara abusua ne nvasoɛ la. Kɛ ɔkɛyɛ na wɔamaa debiezukoalɛ mekɛ ɛhye mɔ ayɛ anyelielɛ ɛ? Dua ndenle kpalɛ zo kilehile, maa ɔyɛ anyelielɛ na ɛbulɛ ɛrɛla nu.—Gye. 3:18. *

Bɛzinza, “Bɛziezie Bɛ Nwo”

18, 19. Kɛzi sonla Ra ne ɛralɛ ne mɔɔ ɛbikye mɔɔ ɛbanwu ye la baha wɔ nee wɔ abusua ne ɛ?

18 Kpolerazulɛ biala ɛnle nwo kɛ, ɔvi 1914, ewiade ngyehyɛleɛ ne mɔɔ ɛlɛsɛkye la di daselɛ kɛ Seetan ewiade ngyehyɛleɛ ne ɛlɛkɔ ye awieleɛ. Amagɛdɔn anwoma ne ɛnle  moa. Ɔnrɛhyɛ sonla Ra ne bava Gyihova ndɛnebualɛ ara ɛtanevolɛma anwo zo. (Edw. 37:10; Mrɛ. 2:21, 22) Asoo ɔnle kɛ edwɛkɛ ɛhye ka wɔ nee wɔ abusua ne ɔ?

19 Asoo ɛlɛdi Gyisɛse folɛ ne mɔɔ ɔdule kɛ yɛnyia ɛnyelɛ “kpalɛ” la azo? Menli mɔɔ wɔ ewiade la kpondɛ anwonyia, duma anzɛɛ tumi, noko asoo wɔ abusua ne di sunsum nu bodane nzi? Ɛlɛfa nɔsolɛ Abusua Ɛzonlenlɛ anzɛɛ mekɛ mɔɔ bɛfa bɛyɛ bɛtianwo debiezukoalɛ ngyehyɛleɛ ne wɔayɛ gyima ɔ? Asoo ɛlɛnyia deɛmɔti bɛyɛle ngyehyɛleɛ ne la azo nvasoɛ? Kɛmɔ bɛha nwolɛ edwɛkɛ wɔ edwɛkɛ mɔɔ li ɛhye anyunlu anu la, asoo ɛlɛdi Ngɛlɛlera ne anu ɛzonle mɔɔ ɛlɛ kɛ kunli, yelɛ anzɛɛ kakula la anwo gyima, na wɔaboa wɔamaa wɔ abusua ne anu amra kɔsɔɔti ‘anye agyinla zo’ anzɛɛ azinza ɔ? (1 Tɛs. 5:6) Saa bɛyɛ zɔ a, ‘bɛbaziezie bɛ nwo’ bamaa sonla Ra ne ɛralɛ ne.

[Ɔ bo ɛkɛ ne edwɛkɛ]

^ ɛden. 17 Saa ɛkpondɛ ninyɛne mɔɔ ɔwɔ kɛ bɛsukoa ye wɔ Abusua Ɛzonlenlɛ bo amaa yeayɛ anyelielɛ na nvasoɛ ara zo a, nea October 15, 2009, The Watchtower ne mukelɛ 29-31.

Duzu A Wɔzukoa A?

• Ka kɛzi Keleseɛne mbusua bahola ‘aziezie bɛ nwo’ ɔlua . . .

ɛnyelɛ “kpalɛ” mɔɔ bɛbanyia azo la.

sunsum nu bodane mɔɔ bɛbava bɛazie bɛ nyunlu na bɛapele bɛadwu nwo azo la.

nɔsolɛ Abusua Ɛzonlenlɛ mɔɔ bɛbahɔ zo bɛayɛ azo la.

[Debiezukoalɛ kpuyia ne mɔ]