Nwane Mɔ A Wɔ Sunsum Nu Ɛleka Ne A?
Nwane Mɔ A Wɔ Sunsum Nu Ɛleka Ne A?
Wɔ Europe, raalɛ bie mɔɔ lɛ rosary ɔ sa nu la wolo asɔne sua bie anu na ɔfa ɛbulɛ ɔkoto Mɛle ananze. Abusua bie mɔɔ wɔ Abibile maanle nu la kɔ busuanli bie mɔɔ bɛbu ye mɔɔ ɛwu la nla zo kɔgua nza. Wɔ Ameleka, kpavolɛ bie kye ɛhɔne na ɔdwenledwenle ninyɛne nwo mɔɔ ye diedi a le kɛ ɔ nee ye anwumabɔvolɛ mɔɔ bɔ ɔ nwo bane la di ngitanwo. Wɔ Ehyea, ɛsɔfo bie yela ngɛlata ngakyile maa ye mgbanyima mɔɔ ɛwu la sunsum.
DUZU a menli ɛhye mɔ kɔsɔɔti die di a? Bɛ kɔsɔɔti bɛdie bɛdi kɛ teasema mɔɔ ze nrɛlɛbɛ la wɔ sunsum nu ɛleka ne mɔɔ menli kola nee bɛ di ngitanwo na bɛkola bɛpiepia menli bɛmaa bɛyɛ ninyɛne bie mɔ a. Nɔhalɛ nu, diedi ɛhye ɛnle fofolɛ yɛɛ ɔnyɛ nwanwane. Mɔɔ yɛ azibɛnwo la a le kɛ, menli lɛ adwenle mɔɔ ɛnnyia la wɔ bɛdabɛ mɔɔ bɛwɔ sunsum nu ɛleka ne la anwo.
Ngɛnlamoma sonle Nyamenle ko—Allah. * Menli mɔɔ wɔ Keleseɛnemaanle ne anu la die di kɛ Nyamenle le Nsa-Ko—Selɛ ne, Ralɛ ne, nee Sunsum Nwuanzanwuanza ne. Hinduma lɛ diedi kɛ nyamenle mrenya nee mraalɛ mɔɔ bo apenle ko la wɔ ɛkɛ. Bie mɔ noko kile kɛ sunsum bie mɔ de nane, mbaka, awolɛ, nee azule nu. Bie mɔ noko die edwɛkɛ mɔɔ mbuluku, sini, nee tɛlevihyɛne zo gyimalilɛ ka fane anwumabɔvolɛma nee sunsum ɛtane, nwomenle nee sunsum ɛtane nyɛleɛ, awozonle mrenya nee mraalɛ nwo la di.
Kɛmɔ menli lɛ adwenle ngakyile mɔɔ ɛnnyia wɔ ninyɛne mɔɔ bɛsonle bɛ anwo la, zɔhane ala a bɛlɛ adwenle ngakyile mɔɔ ɛnnyia la wɔ kɛzi bɛ nee bɛ di ngitanwo la anwo a. Ndelebɛbo wɔ nu kɛ yɛbaha kɛ tɛ ndenle mɔɔ bɛdua zo bɛdi ngitanwo la kɔsɔɔti a le kpalɛ a. Suzu ɛhye anwo nea: Kolaa na yɛavɛlɛ awie wɔ telefuu zo la, ɔwɔ kɛ yɛdie yɛdi kɛ ɔwɔ ɛkɛ na ɔbalie zo. Yɛnrɛhola yɛ nee awie mɔɔ ɛnle ɛkɛ la ɛnrɛli ngitanwo. Yɛɛ ɔbayɛ esiane kɛ yɛ nee awie mɔɔ ɛnli nɔhalɛ la kɛli ngitanwo.
Ɛhye ati, nwane mɔ a amgba wɔ sunsum nu ɛleka ne a? Tɛ kpuyia ɛhye anwo nyelebɛnloa angome a Baebolo ne fa maa a, emomu, ɔkile bɛdabɛ mɔɔ ɔwɔ kɛ yɛ nee bɛ di ngitanwo nee mɔɔ yɛbanyia yɛavi nu la noko. Yɛsɛlɛ wɔ toa zo kenga. Mɔɔ Baebolo ne kilehile la bayɛ wɔ azibɛnwo.
[Ɔ bo ɛkɛ ne edwɛkɛ]
^ ɛden. 4 “Allah” ɛnle duma, mɔɔ ɔkile la ala a le “Nyamenle.”