Wulu kɔ nuhua edwɛkɛ ne azo

Wulu kɔ nuninyɛne ne azo

Nienwu A Baebolo Nu Paladaese Ne Wɔ A?

Nienwu A Baebolo Nu Paladaese Ne Wɔ A?

 Yɛ Kengavoma Biza Kɛ . . .

Nienwu A Baebolo Nu Paladaese Ne Wɔ A?

▪ Gyisɛse bɔle nrenya bie mɔɔ ɛnee ɔlɛwu na ɔvale akɛnrazilɛ ɔlale diedi mɔɔ ɔlɛ ye Gyisɛse anu ali la ɛwɔkɛ kɛ: “Me nee wɔ bahɔ Paladaese.” (Luku 23:43) Nienwu a ɛnee nrenya ne bahɔ a? Asoo Paladaese ne bayɛ anwuma, azɛlɛ ye azo, anzɛɛ avinli ɛleka bie mɔɔ alesama tɛnla kendɛ ndɛnebualɛ ɔ?

Ɛnee yɛ awovolɛ mɔɔ lumua la de Paladaese. Baebolo ne bɔ yɛ amaneɛ kɛ: “Nyamenle hyele tola wɔ Yidɛn, wɔ aduduleɛ nehane, na ɔmanle sonla ne mɔɔ yebɔ la dɛnlanle ɛkɛ. . . . Nyamenle manle sonla hɔdɛnlanle Yidɛn tola ne anu kɛ ɔyɛ nu egyinli na ɔziezie ɛkɛ.” (Mɔlebɛbo 2:8, 15) Bɛhile edwɛkɛkpɔkɛ “tola” abo wɔ Giliki aneɛ nu kɛ pa·raʹdei·sos na nuhua a edwɛkɛkpɔkɛ “paladaese” vi a.

Kɛmɔ agyalɛma bie wo mralɛ na bɛ nwo so a bɛtɛlɛ bɛ awuke nu la, zɔhane ala a ɛnee ɔwɔ kɛ yɛ awovolɛ mɔɔ lumua la tɛlɛ Paladaese ne anu wɔ Yidɛn wɔ mekɛ mɔɔ bɛ nwo ɛlɛso la a. Nyamenle hanle hilele bɛ kɛ: “Bɛyi azɛlɛ ye na bɛzie azɛlɛ ye.”—Mɔlebɛbo 1:28.

Yemɔti ɛnee yɛ Bɔvolɛ ne bodane a le kɛ alesama badɛnla Paladaese wɔ azɛlɛ ye azo na bɛawo mralɛ. Anrɛɛ bɛbadɛnla azɛlɛ ye azo tola ne anu dahuu mɔɔ azie nwo ɛnrɛhyia a. Ɛnee ɔwɔ kɛ azɛlɛ ne yɛ alesama kɔsɔɔti awuke mɔɔ bɛbadɛnla nu dahuu a. Ɛhye ati a ninyɛne mɔɔ wɔ azɛlɛ ye azo la maa yɛ nye die kpalɛ la! Bɛbɔle yɛ kɛ yɛdɛnla azɛlɛ mɔɔ le kɛnlɛma la azo.

Asoo Nyamenle bodane ne ɛhakyi? Kyɛkyɛ. Ɔluakɛ Gyihova ka kile yɛ kɛ: “Zɔhane ala yɛɛ edwɛkɛ mɔɔ vi me nloa anu kɛvinde la ɛnrɛzia ɛnrɛra me nwo ɛke mgbane a. Ɔbayɛ mɔɔ medwenle nwo kɛ ɔrayɛ la.” (Ayezaya 55:11) Bɛbɔle sonla la ye ɛvolɛ 3,000 anzi, Baebolo ne hanle Nyamenle “mɔɔ ɔhyehyɛle na ɔbɔle azɛlɛ ye la” anwo edwɛkɛ kɛ “yeambɔ ye sesakaa” emomu “ɔbɔle ewiade [azɛlɛ], amaa sonla adɛnla nu.” (Ayezaya 45:18) Nyamenle ɛhulolɛdeɛ ɛtɛkakyile. Azɛlɛ ne bayɛ paladaese.

Ɔyɛ anyelielɛ kɛ, Baebolo nu edwɛkɛ dɔɔnwo mɔɔ fane Paladaese nwo la le ninyɛne mɔɔ kɔ zo wɔ azɛlɛ ye azo. Kɛ neazo la, ngapezo bie mɔɔ wɔ Ayezaya buluku ne anu la ka kɛ: “Bɛbasisi azua bɛadɛnla nu, bɛbayɛ vanye egyinli na bɛali nuhua ma ne bie.” (Ayezaya 65:21) Nienwu a bɛsisi azua na bɛyɛ vanye egyinli a? Nienwu a bɛdi baka ma a? Azɛlɛ ye azo ɔ. Mrɛlɛbulɛ 2:21 ka ye wienyi kɛ: “Menli mɔɔ di boɛ la badɛnla azɛlɛ ne azo.”

Gyisɛse noko hanle paladaese mɔɔ bara azɛlɛ ye azo la anwo edwɛkɛ. Ɔle nɔhalɛ kɛ eza ɔbɔle paladaese mɔɔ bara anwuma la anwo ɛwɔkɛ, noko ɛnee menli ekpunli ekyi bie a banyia ye a. (Luku 12:32) Saa menli ɛhye mɔ wu a, bɛdwazo bɛ bɛmaa bɛkɔ anwuma Paladaese ne anu bɛkɔboka Kelaese anwo bɛdi azɛlɛ ye azo Paladaese ne azo belemgbunli. (Yekile 5:10; 14:1-3) Menli ɛhye mɔ mɔɔ bali belemgbunli wɔ anwuma la banlea azɛlɛ ye azo Paladaese ne azo boɛ na bɛamaa ɔ nee Nyamenle ɛhulolɛdeɛ ayɛ ko.

Ɛnee Gyisɛse ze kɛ zɛhae a Nyamenle kulo kɛ azɛlɛ ne yɛ a. Ɛnee ɔ nee ɔ Ze wɔ anwuma, wɔ mekɛ mɔɔ Nyamenle bɔle Yidɛn tola ne la. Menli mɔɔ lɛ diedi ɛnɛ la kɔsɔɔti banyia paladaese ne mɔɔ bara azɛlɛ ye azo kenlebie la anu adɛnla. (Dwɔn 3:16) Gyisɛse ɛbɔ menli ɛhye mɔ anu ko biala ɛwɔkɛ kɛ: “Me nee wɔ bahɔ Paladaese.”—Luku 23:43.

[Nvoninli Ɛvileka wɔ mukelɛ 10]

© FORGET Patrick/SAGAPHOTO.COM/Alamy