Wulu kɔ nuhua edwɛkɛ ne azo

Wulu kɔ nuninyɛne ne azo

Fa Ɛ Rɛle Wula Gyihova Anu Dahuu!

Fa Ɛ Rɛle Wula Gyihova Anu Dahuu!

“O adɛsa, bɛva bɛ rɛle bɛwula Nyamenle anu dahuu.”EDWƐNDOLƐ 62:8.

1-3. Nzɔne ati a Pɔɔlo nyianle anwodozo kɛ ɔbahola yeava ɔ rɛle yeawula Gyihova anu a? (Nea mɔlebɛbo nvoninli ne.)

SAA ɛnee ɛle Keleseɛnenli wɔ Wulomu wɔ ɛvoya mɔɔ limoa la anu a, anrɛɛ ɛnee ɛde mekɛ mɔɔ anu yɛ ɛzulolɛ la anu. Wulomuma yɛle Keleseɛnema ne atisesebɛ kpalɛ. Wulomuma dole bɛ ɛzonle kɛ bɛlɛfa ɛkpɔlɛ bɛara menli nwo zo wɔ Wulomu. Bɛhyele ɛ mediema Keleseɛne mrenyia nee mraalɛ bie mɔ bɛguale efiade. Nane tetele bie mɔ anu. Bɛhendale bie mɔ wɔ baka zo na bɛyelale bɛ anyewɔzo wɔ nɔsolɛ nu. Aleɛ kye biala a, ɛze kɛ wɔannea a ninyɛne ɛhye mɔ bie bahola ado wɔ.

2 Wɔ anwongyelelɛ mekɛ ɛhye anu, ɛnee ɛzoanvolɛ Pɔɔlo la efiade. Kɛmɔ ɛnee edwɛkɛ ɛhye bie ɛdo ye ɛlɛ na awie biala amboa ye la ati, ɛnee ɔngola ɔnnwu ye saa ɔ mediema Keleseɛnema ne mɔ bie baboa ye a. Noko Gyihova luale Awulae Gyisɛse anwo zo boale Pɔɔlo. Ɔhɛlɛle kɛ: “Awulae gyinlanle me nzi, na ɔmanle me anwosesebɛ.” Gyisɛse vale anwosesebɛ mɔɔ ɛnee Pɔɔlo hyia la maanle  ye. Pɔɔlo hɛlɛle bɔbɔ kɛ, “Nyamenle yele me vile awenade ne anloa anu.”2 Temɔte 4:16, 17. *

3 Pɔɔlo hakyele kɛzi Gyihova boale ye la. Yemɔti ɛnee ɔlɛ anwodozo kɛ Gyihova bamaa ye anwosesebɛ mɔɔ ɔhyia la amaa yeagyinla tɛnlabelɛ mɔɔ ɔwɔ nu la nee sɔnea mɔɔ ɔbayia ye kenle bie la anloa. Ɛnee ɔdie ɛhye ɔdi kpalɛ yemɔti ɔhɛlɛle kɛ: “Awulae balie me gyɛlɛɛnye avi munzule muala anu.” (2 Temɔte 4:18) Pɔɔlo nwunle kɛ wɔ tɛnlabelɛ mɔɔ ɔ mediema ɛngola ɛmboa ye wɔ nu la anu, Gyihova nee Gyisɛse baboa ye dahuu. Ɛnee ye adwenle nu ɛnyɛ ye kesee.

TƐNLABELƐ BIE MƆ MƆƆ MAA YƐFA YƐ RƐLE YƐWULA GYIHOVA ANU

4, 5. (a) Nwane a bahola aboa wɔ dahuu a? (b) Kɛzi ɛbahola wɔamaa agɔnwolɛvalɛ mɔɔ ɛ nee Gyihova lɛ la anu amia ɛ?

4 Asoo ɛyiale ngyegyelɛ kpole bie na ɛdele nganeɛ kɛ ɛnlɛ boavolɛ biala ɔ? Bie a wɔ gyima vile ɛ sa anzɛɛ ɛnee ɛlɛyia ngyegyelɛ wɔ sukulu. Bie a ɛ nwo dole wɔ kpole anzɛɛ ɛyiale sɔnea gyɛne mɔɔ anu yɛ se. Bie a ɛhanle ɛhilele awie mɔ kɛ bɛboa wɔ, noko bɛanva moalɛ mɔɔ ɛhyia la bɛammaa wɔ. Nɔhalɛ nu, alesama ɛnrɛhola ɛnrɛli ngyegyelɛ bie mɔ anwo gyima. Ɔba ye zɛhae a, duzu a ɛbayɛ a? Baebolo ne ka kile yɛ kɛ ‘yɛva yɛ rɛle yɛwula Gyihova anu.’ (Mrɛlɛbulɛ 3:5, 6) Noko asoo ɛdie ɛdi kɛ ɔbaboa wɔ ɔ? Ɛhɛe! Yɛkenga Baebolo ne anu edwɛkɛ dɔɔnwo mɔɔ maa yɛnwu kɛ amgba Gyihova boa ye menli la.

Sɔnea maa yɛnyia adenle yɛfa yɛ rɛle yɛwula Gyihova anu bɔkɔɔ

5 Saa menli anva moalɛ mɔɔ ɛhyia la ammaa wɔ a, mmafa ɛya. Kɛmɔ Pɔɔlo yɛle la, nwu sɔnea ne kɛ ɔle nwolɛ adenle mɔɔ ɔbamaa wɔava ɛ rɛle wɔawula Gyihova anu bɔkɔɔ a. Eza ɔle nwolɛ adenle mɔɔ bamaa wɔanwu kɛ ɔdwenle ɛ nwo a. Anwodozo mɔɔ ɛlɛ ye wɔ Gyihova anu nee agɔnwolɛvalɛ mɔɔ ɛ nee ye lɛ la anu bamia.

ƆWƆ KƐ YƐFA YƐ RƐLE YƐWULA GYIHOVA ANU

6. Saa yɛlɛyia ngyegyelɛ bie mɔɔ anu yɛ se la a, nzɔne ati a ɔbayɛ se kɛ yɛbava yɛ rɛle yɛawula Gyihova anu a?

6 Bie a ɛlɛyia ngyegyelɛ bie mɔɔ ɛnnwu mɔɔ ɛyɛ ye wɔ nwolɛ bɔbɔ a. Wɔyɛ mɔɔ ɛbahola biala la wɔ nwolɛ yɛɛ wɔzɛlɛ Gyihova kɛ ɔboa wɔ. Kɛmɔ ɛdie ɛdi kɛ ɔbaboa wɔ la ati, ɛbamaa wɔ ahonle adɔ wɔ azule nu ɔ? Ɛhɛe! (Kenga Edwɛndolɛ 62:8; 1 Pita 5:7.) Saa ɛkpondɛ kɛ ɛ nee Gyihova nyia agɔnwolɛvalɛ kpalɛ a, ɛnee ɔwɔ kɛ ɛfa ɛ rɛle ɛwula ye nu. Noko tɛ dahuu biala a ɛhye ɛyɛlɛ la aze a. Nzɔne ati ɔ? Debie ko a le kɛ bie a Gyihova ɛnrɛbua wɔ asɔneyɛlɛ ne ɛkɛ ne ala.Edwɛndolɛ 13:1, 2; 74:10; 89:46; 90:13; Habakɛke 1:2.

Gyihova, yɛ Ze mɔɔ wɔ anwuma la kulo yɛ na ɔze mɔɔ yɛhyia nwo la

7. Nzɔne ati a tɛ dahuu biala a Gyihova bua yɛ asɔneyɛlɛ ɛkɛ ne ala ɛ?

 7 Nzɔne ati a tɛ dahuu biala a Gyihova bua yɛ asɔneyɛlɛ ɛkɛ ne ala ɛ? Baebolo ne se Gyihova le yɛ Ze yɛɛ yɛle ɔ mra. (Edwɛndolɛ 103:13) Selɛ ɛnva debie biala mɔɔ ɔ ra kɛbiza la ɔmmaa ye anzɛɛ ɔnva ɔmmaa ye ɛkɛ ne ala. Selɛ ze kɛ kakula anye bahola alie debie nwo ɛkɛ ne ala noko ɔngyɛ ɛnee ɔngulo ye bieko. Eza selɛ ze mɔɔ le kpalɛ maa ɔ ra la, yɛɛ ɔze kɛ bie a ɔbaha awie mɔ. Ɔze mɔɔ kakula ne hyia nwo nee mekɛ mɔɔ ɔwɔ kɛ ɔfa ɔmaa ye a. Saa kakula biza debie na ɔ ze fa maa ye ɛkɛ ne ala a, selɛ ne bayɛ akɛlɛ amaa kakula ne. Gyihova, yɛ Ze ne mɔɔ wɔ anwuma la kulo yɛ. Kɛ yɛ Bɔvolɛ mɔɔ ze nrɛlɛbɛ la, ɔze mɔɔ yɛhyia nwo nee mekɛ kpalɛ mɔɔ ɔwɔ kɛ ɔfa mɔɔ yɛkɛbiza la ɔmaa yɛ a. Ɔle kpalɛ kɛ yɛbahendɛ na yɛanlea kɛzi Gyihova babua yɛ asɔneyɛlɛ ne la.—Fa to Ayezaya 29:16; 45:9 anwo.

8. Ɛwɔkɛ boni a Gyihova ɛbɔ yɛ wɔ mɔɔ yɛbahola ɔ nloa gyinla la anwo a?

8 Eza kakye kɛ Gyihova ze mɔɔ sonla ko biala bahola agyinla ɔ nloa nee mɔɔ ɔnrɛhola ɔ nloa gyinla la. (Edwɛndolɛ 103:14) Yemɔti ɔmaa yɛ anwosesebɛ mɔɔ yɛhyia la. Nɔhalɛ nu, ɔdwu mekɛ ne bie a yɛbade nganeɛ kɛ ɔnrɛyɛ boɛ. Noko Gyihova ɛbɔ yɛ ɛwɔkɛ kɛ saa ngyegyelɛ ne bo yɛ nwo zo a, ‘ɔbahile yɛ adenle yeamaa yɛavi nu.’ (Kenga 1 Kɔlentema 10:13.) Saa yɛnwu kɛ Gyihova ze ninyɛne mɔɔ yɛbahola ɔ nloa gyinla la a, ɔkyekye yɛ rɛle.

9. Saa yɛsɛlɛ Gyihova moalɛ na yeambua yɛ ɛkɛ ne ala a, nzɔne a ɔwɔ kɛ yɛyɛ a?

9 Saa yɛsɛlɛ Gyihova moalɛ na yeambua yɛ ɛkɛ ne ala a, bɛmaa yɛnyia abotane. Kakye kɛ Gyihova kulo kɛ ɔboa yɛ, noko ɔkendɛ mekɛ kpalɛ mɔɔ ɔwɔ kɛ ɔfa mɔɔ yɛhyia nwolɛ la ɔmaa yɛ la. Baebolo ne ka kile yɛ kɛ: “Yemɔti [Gyihova] ɛlɛkendɛ bɛ aze bɛ anwunvɔne. Yemɔti yeboɔboa ɔ nwo kɛ ɔnwu bɛ anwunvɔne. Nyilalɛ ɛha bɛdabɛ mɔɔ bɛfa bɛ rɛle bɛwula ye nu la.”Ayezaya 30:18.

“AWENADE NE ANLOA ANU”

10-12. (a) Nzɔne a bahola amaa busuanli mɔɔ ɛnde kpɔkɛ la ɛnleanlɛ ayɛ se a? (b) Saa ɛfa ɛ rɛle ɛwula Gyihova anu wɔ mekɛ ɛsesebɛ nu a, kɛzi ɛhye baha ɛ nee ye agɔnwolɛvalɛ ne ɛ? Maa neazo.

10 Wɔannea a wɔ tɛnlabelɛ ne anu bayɛ se kpalɛ yeamaa wɔade nganeɛ kɛ Pɔɔlo la na ɔwɔ kɛ bɛdie wɔ bɛfi “awenade ne anloa anu.” (2 Temɔte 4:17) Wɔ mekɛ ɛhye mɔ anu bɔbɔ a ɔwɔ kɛ ɛfa ɛ rɛle ɛwula Gyihova anu kpalɛ a. Kɛ neazo la, bie a ɛlɛnea busuanli bie mɔɔ ɛnde kpɔkɛ la. Wɔzɛlɛ Gyihova kɛ ɔboa wɔ ɔmaa ɛzi kpɔkɛ kpalɛ na ɛgyinla kpundii. * Saa ɛkakye kɛ Gyihova nwu wɔ tɛnlabelɛ ne yɛɛ ɔte ɔ bo a, akee ɔbamaa wɔ ahonle adɔ wɔ  azule nu. Ɔbaboa wɔ yeamaa wɔagyinla na wɔali nɔhalɛ wɔamaa ye.Edwɛndolɛ 32:8.

Nyia anwodozo kɛ wɔ anwuma Selɛ ne bamaa wɔava nɔhalɛlilɛ wɔadie ye

11 Ɔdwu mekɛ ne bie a wɔannea a ɔbahola yeayɛ kɛ Gyihova ɛmboa wɔ. Bie a dɔketama ɛnlie mɔɔ ɛkpondɛ kɛ bɛyɛ la ɛndo nu. Anzɛɛ ɛ nye la kɛ wɔ mbusuafoɔ bakyekye ɛ rɛle, noko bɛmɛ bɔbɔ a akee bɛsɛkye edwɛkɛ ne a. Fa ɛ rɛle wula Gyihova anu dahuu maa ɔmaa wɔ anwosesebɛ. Kɔ zo bikye ye. (Kenga 1 Samoɛle 30:3, 6.) Saa nzinlii ɛnwu kɛzi Gyihova ɛboa wɔ la a, ɛ nee ye bɛ agɔnwolɛvalɛ ne anu bamia.

12 Kɛ Linda dele nganeɛ la ɛne. * Ɔnleanle ye awovolɛ mɔɔ ɛnee bɛnde kpɔkɛ la ɔhyɛle kpalɛ na bɛawu. Ɔka kɛ: “Mekɛ mɔɔ ɛnee bɛde aze la, ɔyɛ a me nee me hu nee me diema nrenyia ne ɛnnwu mɔɔ yɛyɛ a. Ɔdwu mekɛ ne bie a yɛte nganeɛ kɛ yɛnlɛ boavolɛ. Noko saa yɛto yɛ nye yɛ nzi a, yɛnwu kɛzi ɛnee Gyihova wɔ yɛ afoa la. Ɔmaanle yɛ anwosesebɛ nee mɔɔ yɛhyia nwolɛ la, saa ɔba ye kɛ yɛnnwu mɔɔ yɛyɛ bɔbɔ la a.”

13. Kɛzi Gyihova mɔɔ Rhonda vale ɔ rɛle wulale ye nu la boale ye ɔmaanle ɔgyinlanle esiane ngakyile nloa ɛ?

13 Yɛ rɛle mɔɔ yɛbava yɛawula Gyihova anu bɔkɔɔ la baboa yɛ yeamaa yɛagyinla esiane nloa. Ɛhye bie a dole Rhonda la. Ɛnee ɔ hu mɔɔ ɔnle Gyihova Dasevolɛ la kpondɛ kɛ ɔbɔ ye ewole. Wɔ mekɛ ko ne ala anu, ɔ diema nrenyia ko nyianle ewule bie mɔɔ sɛkye nwonane ne la. Akee yeangye biala ɔ diema ne aye wule. Mɔɔ Rhonda adwenle bɔle ɔ bo kɛ ɔfi ninyɛne ɛhye mɔ azo la, ɔbɔle dahuu adekpakyelɛ gyima ne abo. Ɔwɔ zolɛ ɔlɛyɛ la, ye mame noko wule. Kɛzi Rhonda holale gyinlanle esiane ɛhye mɔ anloa ɛ? Ɔhanle kɛ: “Me nee Gyihova lile adwelie dahuu wɔ ninyɛne ngyikyi ngyikyi mɔɔ ɔwɔ kɛ mesi nwolɛ kpɔkɛ bɔbɔ la anu. Zɔhane mɔɔ menyɛle la maanle menwunle Gyihova kpalɛ. Ɔmaanle menwunle kɛ ɔwɔ kɛ mefa me nwo meto ɔ nwo zo metɛla medame mumua ne anzɛɛ awie gyɛne biala bɔbɔ anwo zo. Ɔboale me kpalɛ na ɔlile me ngyianlɛ kɔsɔɔti anwo gyima. Ɛhye ɛmaa menwu kɛ me nee Gyihova ɛlɛbɔ nu ayɛ gyima.”

Wɔ abusua ne anu tɛnlabelɛ bie bɔbɔ bahola azɔ agɔnwolɛvalɛ mɔɔ ɛ nee Gyihova lɛ la anlea (Nea ɛdendɛkpunli 14-16)

14. Saa bɛtu wɔ busuanli bie a, kɛzi Gyihova baboa wɔ ɛ?

14 Nea tɛnlabelɛ ɛsesebɛ bieko. Bie a bɛdu wɔ busuanli bie. Ɛze mɔɔ Baebolo ne ka ye wɔ kɛzi ɔwɔ kɛ ɛ nee menli mɔɔ bɛdu bɛ la di la anwo. (1 Kɔlentema 5:11; 2 Dwɔn 10) Noko kɛmɔ ɛkulo ahenle ne la ati, bie a ɛbade nganeɛ kɛ ɔyɛ se anzɛɛ ɔnrɛyɛ boɛ bɔbɔ kɛ ɛbava Baebolo ne anu mɛla ne wɔali gyima. Ɛdie ɛdi kɛ wɔ anwuma Selɛ ne bamaa wɔ anwosesebɛ yeamaa wɔadie ye nɔhalɛ nu ɔ? Ɛnea a tɛ mekɛ mɔɔ bɛbadu wɔ busuanli bie la a ɔwɔ kɛ ɛbikye Gyihova ɔ?

15. Nzɔne ati a Adam andie Gyihova a?

 15 Kɛzi ɛhye nee nrenyia mɔɔ limoa, Adam tɛnlabelɛ ne le ko ɛ? Asoo ɛnee ɔdie ɔdi kɛ ɔbahola yeayɛ Gyihova anwo anzosesebɛ na yeadɛnla aze dahuu ɔ? Kyɛkyɛ, ‘tɛ Adam a bɛbɛlɛbɛlale ye a.’ (1 Temɔte 2:14) Ɛnee nzɔne ati a yeandie Gyihova a? Kɛmɔ Adam kulo ɔ ye tɛla Gyihova la ati ɔlile baka ma ne mɔɔ ɔ ye vale maanle ye la. Kɛ anrɛɛ ɔbali Gyihova mɛla ne azo la, ɔdiele ɔ ye ane.Mɔlebɛbo 3:6, 17.

16. Nwane a ɔwɔ kɛ yɛkulo ye kpalɛ a, na nzɔne ati ɔ?

16 Adam kpɔkɛzilɛ ne maa yɛnwu ye kɛ ɔwɔ kɛ yɛkulo Gyihova yɛtɛla awie gyɛne biala. (Kenga Mateyu 22:37, 38.) Yɛɛ saa yɛlɛ Gyihova anwo ɛlɔlɛ kpole a, saa yɛ mbusuafoɔ sonle Gyihova anzɛɛ bɛnzonle ye a, yɛbahola yɛaboa bɛ wɔ adenle kpalɛ zo. Yemɔti maa Gyihova anwo ɛlɔlɛ mɔɔ ɛlɛ nee ɛ rɛle mɔɔ wɔva wɔwula ye nu la anu ɛmia dahuu. Saa busuanli bie mɔɔ bɛdu ye la gyegye wɔ a, sɛlɛ Gyihova na ka kɛzi ɛte nganeɛ biala la kile ye. * (Wulomuma 12:12; Felepaema 4:6, 7) Ɔwɔ nuhua kɛ edwɛkɛ ne bayɛ wɔ nyane kpalɛ ɛdeɛ, noko bu tɛnlabelɛ ne kɛ ɔle nwolɛ adenle mɔɔ ɔwɔ kɛ ɛfa ɛ nee Gyihova agɔnwolɛvalɛ ne anu mia a. Yemɔ bamaa wɔava ɛ rɛle wɔawula ye nu na wɔanwu ye kɛ saa ɛtie ye a nvasoɛ kpalɛ bavi nu ara.

 MEKƐ MƆƆ YƐLƐKENDƐ LA

Maa Gyihova ɛnwu ye kɛ ɛ rɛle wɔ ye nu ɔlua edwɛkɛhanlɛ gyima ne mɔɔ ɛbayɛ ye kpalɛ la azo (Nea ɛdendɛkpunli 17)

17. Saa yɛyɛ edwɛkɛhanlɛ gyima ne kpalɛ a, nzɔne a yɛlɛ anwodozo kɛ Gyihova bayɛ a?

17 Nzɔne ati a Gyihova yele Pɔɔlo vile “awenade ne anloa anu” a? Pɔɔlo hanle kɛ: “Zɔhane ati mengolale membɔle Edwɛkpa ne nolo.” (2 Temɔte 4:17) Gyihova ɛmaa yɛdayɛ noko gyima kɛ yɛbɔ “edwɛkpa ne” nolo, na ɔfɛlɛ yɛ ɔ gɔnwo mɔ “gyimayɛvoma.” (1 Tɛsalonaekama 2:4; 1 Kɔlentema 3:9) Saa yɛyɛ gyima ɛhye kpalɛ a, yɛbahola yɛanyia anwodozo kɛ Gyihova bava debie biala mɔɔ yɛhyia nwo la yeamaa yɛ. (Mateyu 6:33) Na ɔnrɛmaa ɔnrɛyɛ se kɛ yɛbahendɛ yɛamaa Gyihova abua yɛ asɔneyɛlɛ.

18. Kɛ ɔkɛyɛ na wɔanyia Gyihova anu anwodozo na wɔamaa bɛ agɔnwolɛvalɛ ne anu amia ɛ?

18 Yemɔti maa ɛ nee Gyihova agɔnwolɛvalɛ ne anu ɛmia kenle ko biala. Saa ɛyia sɔnea bie na ɔyɛ wɔ adwenleadwenle a, fa ye kɛ ɔle nwolɛ adenle mɔɔ ɔbamaa wɔabikye Gyihova a. Kenga na sukoa Nyamenle Edwɛkɛ Baebolo ne, na dwenledwenle nwolɛ. Kɔ zo sɛlɛ Gyihova na maa ɛ nye ɛbolo wɔ ye ɛzonlenlɛ nu. Saa ɛyɛ ɛhye mɔ amuala a, ɛbahola wɔanyia anwodozo kɛ Gyihova baboa wɔ yeamaa wɔagyinla sɔnea mɔɔ ɛbayia ye kɛkala nee kenle bie la anloa.

^ ɛden. 2 Ɔbayɛ kɛ bɛliele Pɔɔlo bɛvile awenade kpalɛ anloa nu anzɛɛ tɛnlabelɛ gyɛne mɔɔ anu yɛ se bɔbɔ la anu.

^ ɛden. 10 Bɛhɛlɛ edwɛkɛ dɔɔnwo mɔɔ baboa Keleseɛnema yeamaa bɛagyinla anwodolɛ nloa na yeaboa menli mɔɔ bɛlɛnea bɛ la. Nea February 8, 1994; February 8, 1997; May 22, 2000; yɛɛ January 22, 2001 Awake! ne mɔ anu.

^ ɛden. 12 Tɛ bɛ aluma kpalɛ ɔ.

^ ɛden. 16 Bɛhɛlɛ edwɛkɛ dɔɔnwo mɔɔ baboa yɛ wɔ mekɛ mɔɔ busuanli bie bahwe ɔ nwo avi Gyihova anwo la. Nea September 1, 2006, The Watchtower ne mukelɛ 17-21, yɛɛ January 15, 2007, mukelɛ 17-20.