Wulu kɔ nuhua edwɛkɛ ne azo

Wulu kɔ nuninyɛne ne azo

‘Bɛdie Na Bɛde Ɔ Bo’

‘Bɛdie Na Bɛde Ɔ Bo’

“Bɛ muala bɛdie mɔɔ meka la na bɛde ɔ bo.”MAAKE 7:14.

1, 2. Duzu ati a menli dɔɔnwo ande Gyisɛse edwɛkɛ ne abo ɛ?

SAA awie ɛlɛtendɛ ahile yɛ a, yɛkola yɛte ɔ ne na bɔbɔ yɛnwu kɛzi ɔte nganeɛ la. Noko saa yɛbade mɔɔ ɔlɛka la abo a, kyesɛ yɛte edwɛkɛ agbɔkɛ mɔɔ ɔlɛfa yeali gyima la abo. (1 Kɔlentema 14:9) Gyisɛse dendɛle hilele menli dɔɔnwo wɔ bɛ aneɛ nu. Noko tɛ bɛ muala a bɛdele ye edwɛkɛ ne abo a. Yemɔti, Gyisɛse zele bɛ kɛ: “Bɛ muala bɛdie mɔɔ meka la na bɛde ɔ bo.”Maake 7:14.

2 Duzu ati a menli ɛhye mɔ anu dɔɔnwo ande Gyisɛse edwɛkɛ ne abo ɛ? Ɛnee bie mɔ lɛ adwenle mɔɔ ɛndenrɛ la. Gyisɛse hanle ye wɔ menli ɛhye mɔ anwo kɛ: “Bɛbɔ nrɛlɛbɛ adenle mɔɔ bɛfa zolɛ bɛtulu Nyamenle mɛla ne mɔ na bɛdi bɛdabɛ bɛ ngilehilelɛ zo a.” (Maake 7:9) Bɛambɔ mɔdenle kɛ bɛbade Gyisɛse edwɛkɛ ne abo. Ɛnee bɛngulo kɛ bɛbahakyi bɛ amaamuo nee bɛ adwenle. Menli ɛhye mɔ diele ye noko bɛande mɔɔ ɔhanle la abo. (Bɛgenga Mateyu 13:13-15.) Kɛ ɔkɛyɛ na yɛahɔ zo yɛazukoa debie yɛavi Gyisɛse ngilehilelɛ ne anu ɛ?

 KƐZI GYISƐSE NGILEHILELƐ NE BAHOLA ABOA YƐ LA

3. Duzu ati a ɛdoavolɛ ne mɔ holale dele Gyisɛse edwɛkɛ ne abo ɛ?

3 Ɔwɔ kɛ yɛdi Gyisɛse ɛdoavolɛ ne mɔ mɔɔ bɛbɛlɛ bɛ nwo aze la neazo ne anzi. Ɔzele bɛ kɛ: “Bɛmɛ, bɛ ti ɛyɛ boɛ kpole! Bɛ nye nwu debie, yɛɛ bɛ nzo te edwɛkɛ.” (Mateyu 13:16) Duzu ati a bɛdele Gyisɛse edwɛkɛ ne mɔɔ bie mɔ ande ɔ bo la abo ɛ? Ninyɛne nsa a boale bɛ a. Mɔɔ lumua, ɛnee bɛlɛ ɛhulolɛ kɛ bɛbabiza kpuyia na bɛabɔ mɔdenle bɛanwu mɔɔ Gyisɛse kpondɛ kɛ ɔkile la. (Mateyu 13:36; Maake 7:17) Mɔɔ tɔ zo nwiɔ, ɛnee bɛlɛ ɛhulolɛ kɛ bɛbazukoa ninyɛne fofolɛ bɛaboka mɔɔ bɛlie bɛli la anwo. (Bɛgenga Mateyu 13:11, 12.) Mɔɔ tɔ zo nsa, ɛnee bɛlɛ ɛhulolɛ kɛ bɛbava mɔɔ bɛzukoa la bɛaboa bɛ nwo nee awie mɔ.Mateyu 13:51, 52.

4. Ninyɛne nsa boni mɔ a ɔwɔ kɛ yɛyɛ na yɛade Gyisɛse mrɛlɛ ne mɔ abo a?

4 Saa yɛkulo kɛ yɛte Gyisɛse mrɛlɛ ne mɔ abo a, ɔwɔ kɛ yɛdayɛ noko yɛyɛ ninyɛne nsa ne mɔɔ ɛdoavolɛ ne mɔ yɛle la. Mɔɔ lumua, ɔwɔ kɛ yɛnyia mekɛ yɛsukoa Gyisɛse edwɛkɛ ne yɛdwenledwenle nwo, yɛyɛ nwolɛ neɛnleanu, na yɛbiza kpuyia mɔɔ fɛta la. Yemɔ le adwenlenubukelɛ. (Mrɛlɛbulɛ 2:4, 5) Mɔɔ tɔ zo nwiɔ, ɔwɔ kɛ yɛnwu kɛzi adwenlenubukelɛ ɛhye nee mɔɔ yɛze ye dɛba la, bahola aboa yɛdayɛ mumua ne la. Yemɔ le ndelebɛbo. (Mrɛlɛbulɛ 2:2, 3) Mɔɔ tɔ zo nsa, ɔwɔ kɛ yɛfa mɔɔ yɛkɛzukoa la yɛbɔ yɛ ɛbɛla. Yemɔ le nrɛlɛbɛ.Mrɛlɛbulɛ 2:6, 7.

Nrɛlɛbɛ kola die yɛ ngoane!

5. Yɛ ndonwo fa kile ngakyile mɔɔ wɔ adwenlenubukelɛ, ndelebɛbo, nee nrɛlɛbɛ avinli la anu.

5 Ngakyile boni a wɔ adwenlenubukelɛ, ndelebɛbo, nee nrɛlɛbɛ avinli a? Yɛbahola yɛava ndonwo ɛhye yɛahile nu: Fa ye kɛ ɛgyi kale adenle nu na kale ɛlɛba. Mɔɔ lumua, ɛbanwu kale ne—yemɔ le adwenlenubukelɛ. Bieko, ɛnwu kɛ saa ɛgyinla ɛkɛ a kale ne babɔ wɔ—yemɔ le ndelebɛbo! Yemɔti, ɛwulu ɛfi adenle ne mɔɔ kale ne lua nu la azo—yemɔ le nrɛlɛbɛ! Baebolo ne ka kɛ ‘yɛzɔ nrɛlɛbɛ nu boɛ,’ ɔluakɛ ɔkola ɔdie yɛ ngoane!Mrɛlɛbulɛ 3:21, 22; 1 Temɔte 4:16.

6. Saa yɛlɛsuzu Gyisɛse mrɛlɛ ne anu nsuu anwo a, kpuyia nna boni mɔ a yɛbabiza a? (Nea ɛlɛka ne  box.)

6 Yɛbazuzu Gyisɛse mrɛlɛ ne nsuu anwo wɔ edwɛkɛ ɛhye nee mɔɔ ɔdoa ye la anu. Yɛbabiza kpuyia ɛhye mɔ: Duzu a ɛrɛlɛ ne kile a? (Adwenlenubukelɛ.) Duzu ati a Gyisɛse bule ɛrɛlɛ ɛhye ɛ? (Ndelebɛbo.) Kɛzi yɛbahola yɛava edwɛkɛ ɛhye yɛaboa yɛ nwo nee awie mɔ ɛ? (Nrɛlɛbɛ.) Na duzu a ɛhye maa yɛnwu ye wɔ Gyihova nee Gyisɛse anwo a?

MA EKYI NE

7. Duzu a Gyisɛse ma ekyi ne anwo ɛrɛlɛ ne kile a?

7 Bɛgenga Mateyu 13:31, 32. Duzu a Gyisɛse ɛrɛlɛ ne mɔɔ fane ma  ekyi ne anwo la kile a? Ma ekyi ne gyi ɛkɛ maa Belemgbunlililɛ edwɛkɛ ne mɔɔ yɛbɔ ye nolo la nee Keleseɛne asafo ne. Mekɛ mɔɔ Keleseɛne asafo ne bɔle ɔ bo wɔ 33 Y.M. la, ɛnee ɔle kɛ “ma nretee kpalɛ kpalɛ” la. Wɔ mekɛ ekyi bie anu, ɔnyianle anyuhɔlɛ ndɛndɛ ɔlua edwɛkɛhanlɛ ne ati. Ɛnee menli dɔɔnwo anye ɛnla kɛ ɔbanyia anyuhɔlɛ zɔhane. (Kɔlɔsaema 1:23) Gyisɛse hanle kɛ anwomanyunlu “nloma” rayɛle “bɛ sane wɔ ye ngane ne mɔ anu.” Ɛhye kile kɛ mekɛ mɔɔ Keleseɛne asafo ne ɛlɛyɛ kpole la, menli mɔɔ lɛ ahonle kpalɛ la nyia sunsum nu aleɛ, alubo, nee feabelɛ wɔ ɛkɛ.—Fa toto Yizikeɛle 17:23 anwo.

Keleseɛne asafo ne ɛnyia anyuhɔlɛ mɔɔ yɛ azibɛnwo

8. Duzu ati a Gyisɛse bule ma ekyi ne anwo ɛrɛlɛ ne ɛ?

8 Duzu ati a Gyisɛse bule ɛrɛlɛ ɛhye ɛ? Gyisɛse vale kɛzi ma ekyi ne ɛnyilɛ ne yɛ azibɛnwo la dole kɛzi Nyamenle Belemgbunlililɛ ne nyia anyuhɔlɛ, kɛzi ɔbɔ yɛ nwo bane, yɛɛ kɛzi ɔdi ngyegyelɛ zo la anwo. Sumunli 1914, Keleseɛne asafo ne ɛnyia anyuhɔlɛ mɔɔ yɛ azibɛnwo. (Ayezaya 60:22) Bɛboa bɛdabɛ mɔɔ bɛwɔ asafo ɛhye anu la bɛmaa bɛbeta Gyihova anwo. (Mrɛlɛbulɛ 2:7; Ayezaya 32:1, 2) Kpɔdekpɔdeyɛlɛ biala ɛngola ɛnzi asafo ne anyuhɔlɛ adenle.Ayezaya 54:17.

9. (a) Duzu a yɛkola yɛsukoa ye wɔ ma ekyi ne anwo ɛrɛlɛ ne anu a? (b) Duzu a ɛhye maa yɛnwu ye wɔ Gyihova nee Gyisɛse anwo a?

 9 Duzu a yɛsukoa ye wɔ ma ekyi ne anwo ɛrɛlɛ ne anu a? Bie a yɛwɔ ɛleka mɔɔ Alasevolɛ ne mɔ anwo anzo na bɛnnyia anyuhɔlɛ la. Noko, ɔwɔ kɛ yɛkakye kɛ Belemgbunlililɛ ne bahola ali ngyegyelɛ biala azo. Saa yɛyɛ zɔ a, yɛbahola yɛagyinla ngyegyelɛ biala anloa. Kɛ neazo la, mekɛ mɔɔ Adiema Edwin Skinner hɔle India wɔ 1926 la, ɛnee gyima ne “yɛ se na ɛvɛlɛ wɔ nu,” ɔluakɛ ɛnee Alasevolɛ dɔɔnwo ɛnle ɛkɛ yɛɛ anyuhɔlɛ ɛmba ndɛndɛ. Noko ɔhɔle zo ɔhanle edwɛkɛ ne yemɔti ɔnwunle kɛ Belemgbunlililɛ edwɛkɛ ne ɛlɛdi ngyegyelɛ mgbole zo konim. Ɛnɛ, Alasevolɛ mɔɔ wɔ India la bo 37,000, yɛɛ bɛdabɛ mɔɔ bɛrale Ngakyelɛlilɛ ne wɔ 2013 la bo 108,000. Ɛvolɛ ne mɔɔ Adiema Skinner hɔle India la anu a bɛbɔle daselɛlilɛ gyima ne abo wɔ Zambia a. Kɛkala, Alasevolɛ mɔɔ wɔ Zambia la bo 170,000 yɛɛ bɛdabɛ mɔɔ bɛrale Ngakyelɛlilɛ ne wɔ 2013 la bayɛ 763,915. Ɛhye kile kɛ saa ɛye menli mɔɔ bɛwɔ Zambia la anu 18 biala ɛsie ahane a, nuhua 1 hɔle Ngakyelɛlilɛ ne. Nea kɛzi anyuhɔlɛ ɛhye yɛ azibɛnwo a!

MGBƆVONLE NE

10. Duzu a mgbɔvonle ne anwo ɛrɛlɛ ne kile a?

10 Bɛgenga Mateyu 13:33. Duzu a yɛsukoa ye wɔ mgbɔvonle ne anwo ɛrɛlɛ ne anu a? Ɛrɛlɛ ɛhye fane Belemgbunlililɛ ne anwo edwɛkɛ ne nee kɛzi ɔkola ɔkakyi menli ɛbɛlabɔlɛ la anwo. “Ɛdɔkɛ ne amuala” gyi ɛkɛ maa maanle maanle kɔsɔɔti. Kɛzi mgbɔvonle maa ɛdɔkɛ tu la gyi ɛkɛ maa kɛzi daselɛlilɛ gyima ne maa Belemgbunlililɛ ne anwo edwɛkɛ ne tɛlɛ ndɛndɛ la. Bɛkola bɛnwu kɛzi ma ekyi ne nyi la noko bɛngola bɛnnwu kɛzi mgbɔvonle ne fonla ɛdɔkɛ ne la. Mekɛ gua nu na bɛanwu mɔɔ kɛvi nu kɛra la.

11. Duzu ati a Gyisɛse bule mgbɔvonle ne anwo ɛrɛlɛ ne ɛ?

11 Duzu ati a Gyisɛse bule ɛrɛlɛ ɛhye ɛ? Gyisɛse manle ɔlale ali kɛ Belemgbunlililɛ edwɛkɛ ne bahola adwu “aleɛabo ɛleka biala” yɛɛ ɔkola ɔkakyi menli subane. (Gyima ne 1:8) Bie a yɛnrɛnwu nzenzaleɛ ɛhye wɔ mɔlebɛbo ne, noko ɔkɔ zo. Menli dɔɔnwo ɛlɛdie Belemgbunlililɛ ne anwo edwɛkɛ ne ali yɛɛ bɛlɛmaa edwɛkɛ ɛhye mɔɔ tumi wɔ nu la ahakyi bɛ subane.Wulomuma 12:2; Ɛfɛsɛsema 4:22, 23.

12, 13. Maa neazo fa kile kɛzi edwɛkɛhanlɛ gyima ne ɛnyia anyuhɔlɛ kɛmɔ bɛhilehile nu wɔ mgbɔvonle ne anwo ɛrɛlɛ ne anu la anu.

 12 Fane dɔɔnwo ne ala, saa yɛdi awie daselɛ a, mekɛ gua nu kolaa na edwɛkɛ ne aha ye. Kɛ neazo la, wɔ 1982, Franz nee Margit, agyalɛma bie mɔɔ ɛnee bɛlɛsonle wɔ Brazil Bɛtɛle la, hɔlile daselɛ wɔ sua ekyi bie azo. Bɛ nee menli dɔɔnwo zukoale Baebolo ne na ɛnee raalɛ bie nee ɔ mra nna boka nwo. Ɛnee ɔ ra nrenya kpanyinli ne ɛnyia ɛvolɛ 12 pɛ. Ɛnee ɔse nyiane yemɔti ɛnee ɔndɛnla debiezukoalɛ ne anu. Franz nee Margit nyianle gyimalilɛ fofolɛ yemɔti bɛ nee bɛ anzukoa bieko. Ɛvolɛ abulanwiɔ nee nnu anzi, bɛziale bɛhɔkpɔlale bɛ. Mekɛ mɔɔ bɛnwunle kɛ asafo mɔɔ nolobɔlɛma 69, mɔɔ nuhua 13 le adekpakyelɛma na bɛyɛ debiezukoalɛ wɔ Belemgbunlililɛ Asalo fofolɛ bie anu ɛra ɛkɛ la, bɛ nye liele kpalɛ! Kakula nrenya ne mɔɔ ɛnee se nyiane kɛ debie la ɛnyi na kɛkala ɔlɛsonle kɛ mgbanyima avinli ngitanwodivolɛ! Belemgbunlililɛ ne anwo edwɛkɛ ne ɛdɛlɛ yɛɛ yehakyi menli dɔɔnwo ɛbɛlabɔlɛ kɛ mgbɔvonle ne mɔɔ Gyisɛse bule nwolɛ ɛrɛlɛ la.

13 Wɔ maanle mɔɔ bɛmmaa bɛnga edwɛkɛ ne wɔ nu la bɔbɔ anu, Belemgbunlililɛ edwɛkɛ ne ɛlɛkakyi menli ɛbɛlabɔlɛ. Saa yɛnwu ɛleka mɔɔ edwɛkɛ ne ɛhɔdwu wɔ maanle zɛhae mɔ anu a, ɔsi yɛ nwo. Kɛ neazo la, wɔ 1910, Belemgbunlililɛ edwɛkɛ ne dwule Cuba na Adiema Russell hɔle bɔra ɛhye azo wɔ 1913. Mɔlebɛbo ne, ɛnee anyuhɔlɛ ɛmba kpalɛ. Noko boni a yɛnwu ye wɔ Cuba ɛnɛ a? Nolobɔlɛma mɔɔ bɛbo 96,000 la ɛlɛbɔ edwɛkpa ne nolo wɔ ɛkɛ yɛɛ menli 229,726 hɔle 2013 Ngakyelɛlilɛ ne. Ɛhye kile kɛ ɛye menli 48 ɛsie ahane a, nuhua 1 hɔle Ngakyelɛlilɛ ne. Wɔ maanle mɔɔ bɛtɛfale bɛ sa bɛtɛtole yɛ gyima ne azo la anu, Belemgbunlililɛ edwɛkpa ne ɛdwu ɛleka bɔbɔ mɔɔ Alasevolɛ ne mɔ andwenle kɛ edwɛkɛ ne badwu ɛkɛ la. *Nolobɔvo ne 8:7; 11:5.

Ɔle Gyihova edwɛkɛ

14, 15. (a) Kɛ ɔkɛyɛ na yɛanyia mgbɔvonle ne anwo ɛrɛlɛ ne azo nvasoɛ ɛ? (b) Duzu a ɛhye maa yɛnwu ye wɔ Gyihova nee Gyisɛse anwo a?

14 Kɛ ɔkɛyɛ na yɛanyia mgbɔvonle ne anwo ɛrɛlɛ ne mɔɔ Gyisɛse bule la azo nvasoɛ ɛ? Saa yɛdwenledwenle mɔɔ Gyisɛse ɛrɛlɛ ne kile la anwo a, yɛbanwu kɛ ɔnle kɛ yɛmaa kɛzi Belemgbunlililɛ edwɛkɛ ne badwu menli dɔɔnwo mɔɔ ɛtɛtele ɛkɛ la gyegye yɛ. Ɔle Gyihova edwɛkɛ. Noko yɛ gyima a le boni? Nyamenle Edwɛkɛ ne bua kɛ: “Dua wɔ ma ne nwonlomɔ, na eza dua bie nɔsolɛ nu. Ɔluakɛ ɛnze mɔɔ kɛyɛ kpalɛ a, saa bɛ mu nwiɔ bɛkɛyɛ kpalɛ anzɛɛ ko kɛyɛ kpalɛ kɛdɛla ko a, ɛnze.” (Nolobɔvo ne 11:6) Nɔhalɛ nu, ɔwɔ kɛ yɛsɛlɛ Gyihova kɛ ɔyila edwɛkɛhanlɛ gyima ne azo, titile wɔ maanle mɔɔ  bɛva bɛ sa bɛdo gyima ne azo la anu.Ɛfɛsɛsema 6:18-20.

15 Bieko, saa yɛannwu ye ɛkɛ ne ala kɛ yɛ edwɛkɛhanlɛ gyima ne ɛlɛnyia anyuhɔlɛ a, ɔnle kɛ yɛmaa yɛ sa nu to. Ɔnle kɛ yɛbu anyuhɔlɛ “ngyikyi” mɔɔ yɛnyia la debie ekyi. (Zɛkalaya 4:10) Mɔɔ vi nu bara la, bahola adɛla mɔɔ yɛkɛzuzu la!Edwɛndolɛ 40:5; Zɛkalaya 4:7.

GUALILƐNLI NE NEE KPƆBA NE MƆƆ VEA LA

16. Duzu a mrɛlɛ ne mɔɔ fane gualilɛnli ne nee kpɔba ne mɔɔ vea anwo la kile a?

16 Bɛgenga Mateyu 13:44-46. Duzu a gualilɛnli ne nee kpɔba ne mɔɔ vea la anwo mrɛlɛ ne kile a? Wɔ Gyisɛse mekɛ zo, ɛnee gualilɛma tu adenle kɔkpondɛ ezukoa bolɛ kpalɛ tɔ. ‘Ezukoa bolɛ mɔɔ sonle bolɛ kpalɛ’ mɔɔ wɔ Gyisɛse ɛrɛlɛ ne anu la gyi ɛkɛ maa Belemgbunlililɛ ne anwo nɔhalɛ ne mɔɔ sonle bolɛ la, yɛɛ gualilɛnli ne gyi ɛkɛ maa ahonlekpalɛma mɔɔ bɛlɛkpondɛ nɔhalɛ ne la. Ɛnee gualilɛnli ne lɛ ɛhulolɛ kɛ ɔbadɔne ye ninyɛne kɔsɔɔti ndɛndɛ amaa yeahola yeadɔ ezukoa bolɛ ne. Gyisɛse eza bule ɛrɛlɛ kɛ ɛyazonlɛnli bie mɔɔ ɛlɛyɛ gyima la, nwunle “kpɔba bie mɔɔ vea” la. Nrenya ɛhye ɛnle kɛ gualilɛnli ne la, ɛnee ɔmkpondɛ agudeɛ. Noko mekɛ mɔɔ ɔnwunle bolɛ mɔɔ kpɔba ne sonle la, ɔdaye noko ɔvi ye ɛhulolɛ nu ɔdɔnenle “ɔ nwo ninyɛne kpokpoti” amaa yeahola yeadɔ.

17. Duzu ati a Gyisɛse bule gualilɛnli ne nee kpɔba ne mɔɔ vea la anwo mrɛlɛ ne ɛ?

17 Duzu ati a Gyisɛse bule mrɛlɛ nwiɔ ɛhye mɔ ɛ? Ɔmaa yɛnwu kɛ bɛkola bɛdua ndenle ngakyile zo bɛnwu nɔhalɛ ne. Bie mɔ kpondɛ nɔhalɛ ne a bɛfa ninyɛne bɛbɔ afɔle kolaa na bɛanwu ye. Bie mɔ noko ɛmkpondɛ nɔhalɛ ne noko awie di bɛ daselɛ maa bɛnwu ye. Mrenya nwiɔ ne mɔɔ bɛwɔ mrɛlɛ ne mɔ anu la nwunle kɛ nvasoɛ wɔ mɔɔ bɛnwu ye la azo, yemɔti bɛvale ninyɛne dɔɔnwo bɛbɔle afɔle amaa bɛ sa aha ye.

Bɔ mɔdenle fa nɔhalɛ ne dumua wɔ wɔ ɛbɛlabɔlɛ nu

18. (a) Kɛ ɔkɛyɛ na yɛanyia mrɛlɛ nwiɔ ɛhye mɔ azo nvasoɛ ɛ? (b) Duzu a bɛmaa yɛnwu ye wɔ Gyihova nee Gyisɛse anwo a?

18 Kɛ ɔkɛyɛ na yɛanyia mrɛlɛ nwiɔ ɛhye mɔ azo nvasoɛ ɛ? (Mateyu 6:19-21) Biza ɛ nwo kɛ: ‘Asoo subane mɔɔ melɛ ye wɔ nɔhalɛ ne anwo la le kɛ mrenya ɛhye mɔ ɛdeɛ ne ɔ? Asoo mebu nɔhalɛ ne kɛ agudeɛ? Melɛ ɛhulolɛ kɛ mebava ninyɛne meabɔ afɔle wɔ nwo ɔ, anzɛɛ memaa ninyɛne twehwe me adwenle?’ (Mateyu 6:22-24, 33; Luku 5:27, 28; Felepaema 3:8) Saa yɛkulo nɔhalɛ ne amgba a, yɛbabɔ mɔdenle yɛava yɛalumua yɛ ɛbɛlabɔlɛ nu.

19. Duzu a yɛbazuzu nwo wɔ edwɛkɛ mɔɔ doa zo la anu a?

19 Bɛmaa yɛhile kɛ yɛdie na yɛde mrɛlɛ ɛhye mɔ abo amgba. Ɔwɔ kɛ yɛkakye kɛ saa yɛnwu mɔɔ mrɛlɛ ne kile la a ɛnee yɛtɛwiele. Ɔwɔ kɛ yɛfa mɔɔ yɛzukoa ye wɔ nu la yɛyɛ gyima. Yɛbazuzu mrɛlɛ nsa bieko nee mɔɔ yɛsukoa yɛfi nu la anwo wɔ edwɛkɛ mɔɔ doa zo la anu.

^ ɛden. 13 Ɛbahola wɔagenga anwubielɛ ɛhye mɔ bie wɔ ɛvolɛ mbuluku ɛhye mɔ anu, Argentina (2001 Yearbook, mukelɛ 186); East Germany (1999 Yearbook, mukelɛ 83); Papua New Guinea (2005 Yearbook, mukelɛ 63); yɛɛ Robinson Crusoe Island (The Watchtower, June 15, 2000, mukelɛ 9).