Wulu kɔ nuhua edwɛkɛ ne azo

Wulu kɔ nuninyɛne ne azo

Mmafa ‘Gyihova Anwo Ɛya’ Ɛlɛ

Mmafa ‘Gyihova Anwo Ɛya’ Ɛlɛ

“Sonla bɔ ɛbɛla mgbane na ɔte ɔfa ɔ nwo zo a, ɔfa [Gyihova] anwo ɛya.”MRƐ. 19:3.

1, 2. Duzu ati a ɔnle kɛ yɛfa alesama ngyegyelɛ ne anwo ɛzonle yɛsoa Gyihova ɛ? Maa ndonwo.

FA YE kɛ ɛle agyalɛ nrenya mɔɔ ɛ nye die ɛ nwo kpalɛ. Kenle ko ɛkara sua nu a, wɔ debie biala ɛyɛ basaa. Wɔ mbia ɛbubu, wɔ ahyɛnze ɛzɛkye, wɔ kapɛte ɛtete. Wɔ awuke kɛnlɛma ne ɛzɛkye bɔkɔɔ. Ɔba ye zɔ a, asoo ɛbaha kɛ, “Duzu ati a me ye yɛle ɛhye a?” Anzɛɛ bie a ɛbaha kɛ, Ɛnee nwane a lile gyima ɛhye a? Ɔda ali kɛ kpuyia mɔɔ tɔ zo nwiɔ la yɛɛ ɛbabiza a, ɔluakɛ ɛze kɛ ɛ ye mɔɔ ɛkulo ye kɛ debie la ɛnrɛli gyima ɛhye.

2 Ɛnɛ, yɛnwu kɛ evinli, basabasayɛlɛ, nee ɛbɛlatane ɛzɛkye alesama awuke ne. Kɛ Baebolo sukoavoma la, yɛze kɛ tɛ Gyihova a fa ngyegyelɛ ɛhye mɔ amuala ba a. Ɔbɔle azɛlɛ ne kɛ ɔyɛ paladaese. (Mɔl. 2:8, 15) Gyihova le ɛlɔlɛ Nyamenle. (1 Dwɔn 4:8) Ngɛlɛlera ne mɔɔ yɛzukoa la, ɛboa yɛ ɛmaa yɛnwu deɛmɔti ngyegyelɛ dɔɔnwo wɔ ewiade ye la. Ɔvi Seetan Abɔnsam “mɔɔ sie ɛtane ewiade ɛhye la.”Dwɔn 14:30; 2 Kɔl. 4:4.

3. Adwenle mɔɔ ɛndenrɛ la boni a yɛbahola yɛanyia a?

3 Noko akee, yɛnrɛhola yɛnrɛva ngyegyelɛ mɔɔ yɛyia ye la amuala anwo ɛzonle yɛnrɛzoa Seetan. Kɛmɔti ɛ? Ɔluakɛ yɛ ngyegyelɛ ne bie mɔ vi yɛ nvonleɛ. (Bɛgenga Mɛla ne 32:4-6.) Ɔnva nwo kɛ yɛze ɛhye la, yɛ sinlidɔlɛ kola maa yɛnyia adwenle mɔɔ ɛndenrɛ na yɛyɛ ninyɛne mɔɔ awieleɛ bɔkɔɔ ne ɔbava ngyegyelɛ yeara la. (Mrɛ. 14:12) Adenle boni azo? Kɛ anrɛɛ yɛbavu yɛ nwo anzɛɛ Seetan wɔ ngyegyelɛ bie anwo la, yɛfu Gyihova emomu. Yɛbahola yɛava ‘Gyihova anwo ɛya’ bɔbɔ.Mrɛ. 19:3.

4, 5. Kɛzi Keleseɛnenli bahola ‘ava Gyihova anwo ɛya ɛ’?

4 Asoo ɔwɔ kɛ yɛfa ‘Gyihova anwo ɛya’? Nɔhalɛ nu, nwolɛ ɛngyia. (Aye. 41:11) Duzu a yɛ nye la kɛ yɛbanyia a? Edwɛkɛdwɛndolɛ kɛlɛvolɛ bie hanle  ye mekɛ bie kɛ: “Ɛ sa le ezinra somaa yemɔti ɛnrɛhola ɛ nee Nyamenle ɛnrɛho.” Bie bɔbɔ a ɔnrɛra ye ɛlɛ kɛ yɛbadendɛ yɛatia Gyihova. Noko Mrɛlɛbulɛ 19:3 ka kɛ “sonla bɔ ɛbɛla mgbane na ɔte ɔfa ɔ nwo zo a, ɔfa [Gyihova] anwo ɛya.” Ɛhɛe, sonla bahola ava Gyihova anwo ɛya wɔ ye ahonle nu. Nyɛleɛ ɛhye kola da ali wɔ adenle mɔɔ bɛnnwu ye kpalɛ la azo. Nyɛleɛ dɔɔnwo mɔɔ bie a le kɛ yɛlɛ edwɛkɛ yɛtia Gyihova, yɛtwehwe yɛ nwo yɛfi mediema nwo, yɛmboa asafo gyima la bahola ahile kɛ yɛva ɛya.

5 Duzu a kola maa ‘yɛfa Gyihova anwo ɛya a’? Kɛ ɔkɛyɛ na yɛahoati ɛhane ɛhye ɛ? Ɔhyia kɛ yɛnyia kpuyia ɛhye mɔ anwo mualɛ. Ɔluakɛ, ɔfane yɛ nee Gyihova Nyamenle agɔnwolɛvalɛ ne anwo!

DUZU A KOLA MAA ‘YƐFA GYIHOVA ANWO ƐYA A’?

6, 7. Duzu ati a Mosisi mekɛ zo Yizilayɛma bɔle ɔ bo dendɛle bɛ nzo abo tiale Gyihova ɛ?

6 Duzu a bahola amaa Gyihova nɔhalɛ sonvolɛ bie abɔ ɔ bo adendɛ atia Nyamenle wɔ ye ahonle nu a? Bɛmaa yɛzuzu ninyɛne nnu mɔɔ Baebolo ne ka kɛ ɔmanle menli bie mɔ dɔle ɛhane ɛhye anu la anwo.1 Kɔl. 10:11, 12.

Saa ɛtie ɛdendɛlɛ ɛtane a ɔbahola yeagyegye wɔ (Nea ɛdendɛkpunli 7)

7 Awie mɔ ɛdendɛlɛ ɛtane kola gyegye yɛ. (Bɛgenga Mɛla ne 1:26-28.) Bɛliele Yizilayɛma bɛvile Yigyibiti akɛlɛzonlenlɛ nu la ɔtɛkyɛle. Gyihova ɛlua nwanwane adenle zo ɛva ngyegyelɛ bulu ɛra maanle atisesebɛ zɔhane azo, na yezɛkye Falo nee ye ɛlɔnema wɔ nyevile kɔkɔlɛ ne anu. (Ade. 12:29-32, 51; 14:29-31; Edw. 136:15) Ɛnee Nyamenle menli ne ɛziezie bɛ nwo kɛ bɛkɔ Ɛwɔkɛ Azɛlɛ ne azo. Noko, wɔ mekɛ titile ɛhye anu, Yizilayɛma dendɛle bɛ nzo abo tiale Gyihova. Duzu ati a bɛannyia diedi ɛ? Amaneɛbɔlɛ ɛtane ne mɔɔ busiama ne bie mɔ vale rale la manle bɛ ahonle dule. (Ɛdi. 14: 1-4) Duzu a vi nu rale a? Awolɛndoazo mumua ko angola angɔ “azɛlɛ kpalɛ” ne azo. (Mɛla 1:34, 35) Saa ɔdwu mekɛ ne bie a, asoo yɛbamaa awie mɔ ɛdendɛlɛ ɛtane azɛkye yɛ diedi na yɛadendɛ yɛ nzo abo wɔ kɛzi Gyihova nee yɛ lua la anwo ɔ?

8. Duzu a manle Nyamenle menli ne dole Gyihova ɛzonle wɔ Ayezaya mekɛ zo a?

8 Anwongyelelɛ nee ngyegyelɛ kola maa yɛ sa nu to. (Bɛgenga Ayezaya 8:21, 22.) Wɔ Ayezaya mekɛ zo, Dwuda maanle ne hɔle anwongyelelɛ nu. Ɛnee bɛ kpɔvolɛma ɛbɔ bɛ ɛyia. Aleɛ nwo hyianle. Ɛhɔne hunle bɛ nuhua dɔɔnwo. Noko, ɛnee sunsum nu ɛhɔne a wɔ ɛkɛ ne titile a. (Emɔ. 8:11) Kɛ anrɛɛ bɛbamaa Gyihova aboa bɛ wɔ bɛ anwongyelelɛ ne anu la bɛanyɛ, emomu, bɛwale bɛ belemgbunli ne nee bɛ Nyamenle ne “amonle.” Bɛvale bɛ ngyegyelɛ ne anwo ɛzonle bɛzoale Gyihova. Saa esiane bie to yɛ anzɛɛ yɛkɔ ngyegyelɛ nu a, asoo yɛdayɛ noko yɛbaha ye wɔ yɛ ahonle nu kɛ, ‘Mekɛ mɔɔ mengyianle Gyihova anwo la ɛnee ɔwɔ nienwu?’

9. Duzu ati a Yizilayɛma nyianle adwenle mɔɔ ɛndenrɛ la wɔ Yizikeɛle mekɛ zo ɛ?

9 Yɛnze edwɛkɛ ne amuala. Wɔ Yizikeɛle mekɛ zo, Yizilayɛma dele nganeɛ kɛ Gyihova “ɛnli pɛlepɛle ɔboalekɛ ɛnee bɛnze edwɛkɛ ne amuala!” (Yiz. 18:29) Ɛnee ɔle kɛ bɛyɛ bɛ nwo menli mɔɔ bua Nyamenle ndɛne a, bɛkpogyale bɛ pɛlepɛlelilɛ nwo ngyinlazo zo bɛdɛlale Gyihova ɛdeɛ ne na bɛgyinlanle bɛ ndelebɛbo ne mɔɔ ɛnli munli la azo bɛbuale ndɛne. Saa ɔdwu mekɛ ne bie na yɛnde Baebolo kɛlɛtokɛ, anzɛɛ ninyɛne bie mɔ mɔɔ sisi yɛ ɛbɛlabɔlɛ nu la abo kpalɛ a, asoo yɛbahola yɛade nganeɛ wɔ yɛ ahonle nu kɛ Gyihova “ɛnli pɛlepɛle” ɔ?Dwobu 35:2.

10. Kɛzi awie bahola ali Adam neazo ɛtane ne anzi ɛ?

 10 Yɛbɔ awie mɔ somolɛ wɔ yɛ ɛtane nwo. Adam bɔle Nyamenle somolɛ wɔ ye ɛtane nwo, ɔvi alesama mɔlebɛbo ne ala. (Mɔl. 3:12) Ɔwɔ nuhua kɛ ɛnee Adam ze Nyamenle Mɛla ne yɛɛ ɔ nye fuu ɔbule zo a, noko ɔbɔle Gyihova somolɛ. Nɔhalɛ nu, ɔzele Gyihova kɛ yeammaa ye yelɛ kpalɛ. Ɔvi zɔhane mekɛ ne, awie mɔ noko ɛli Adam neazo ne anzi, ɛbɔ Nyamenle somolɛ wɔ bɛ nvonleɛ nwo. Ɔfɛta kɛ yɛbiza kɛ, ‘Asoo me nvonleɛ nwo arɛlebɔlɛ nee anyezota bamaa meadendɛ meatia Gyihova ngyinlazo ne mɔ ɔ?’

11. Duzu a yɛkola yɛsukoa yɛfi Dwona ɛkɛ a?

11 Yɛyɛle angomedi. Ngapezonli Dwona vale ɛya wɔ Nenɛvɛ amra mɔɔ Gyihova zele bɛ anwunvɔne la anwo. (Dwona 4:1-3) Duzu ati ɔ? Bie a ɛnee ɔgyegye ye kɛ saa ɛzɛkyelɛ ne amba a, ɔ nyunlu bagua aze. Dwona manle kɛzi menli bɛabu ye la anwo hyianle ye dɛlale anwunvɔnezelɛ mɔɔ ɔbanyia yeamaa Nenɛvɛ amra mɔɔ nlunle bɛ nwo la. Asoo yɛdayɛ noko yɛbayɛ angomedi ‘yɛava Gyihova anwo ɛya’ kɛ yemaa awieleɛ ne ɛhyɛ somaa ɔ? Saa yɛva ɛvolɛ dɔɔnwo yɛha kɛ Gyihova kenle ne ɛbikye a, asoo ‘yɛbava Gyihova anwo ɛya’ ɔluakɛ menli tendɛ tia Baebolo ne anu edwɛkɛ ne mɔɔ yɛka la ati?2 Pita 3:3, 4, 9.

KƐ ƆKƐYƐ NA ‘YƐANVA GYIHOVA ANWO ƐYA LA’

12, 13. Saa yɛbɔ ɔ bo kɛ yɛsu Gyihova gyimalilɛ bie anwo kpolera wɔ yɛ ahonle nu a, duzu a ɔnle kɛ yɛbu yɛ nye yɛgua zo a?

12 Saa yɛ ahonle ne mɔɔ tɔ kɔ ɛtane zo la bɔ ɔ bo kɛ ɔsu Gyihova gyimalilɛ bie mɔ anwo kpolera a, duzu a yɛbahola yɛayɛ a? Kakye kɛ nrɛlɛbɛ ɛnle nu kɛ yɛkɛyɛ zɔ. Mrɛlɛbulɛ 19:3 ka kɛ: “Sonla bɔ ɛbɛla mgbane na ɔte ɔfa ɔ nwo zo a, ɔfa [Gyihova] anwo ɛya.” Mekɛ mɔɔ ɛhye wɔ yɛ adwenle nu la, akee bɛmaa yɛzuzu ninyɛne nnu mɔɔ baboa yɛ na bɛsanudolɛ ammaa yɛambɔ Gyihova somolɛ ɛlɛ la anwo.

 13 Mmabu ɛ nye ɛgua ɛ nee Gyihova bɛ agɔnwolɛvalɛ ne azo. Saa yɛ nee Nyamenle nyia agɔnwolɛvalɛ kpalɛ a, yɛnrɛva ɔ nwo ɛya. (Bɛgenga Mrɛlɛbulɛ 3:5, 6.) Ɔhyia kɛ yɛnyia anwodozo wɔ Gyihova anu. Eza ɔnle kɛ yɛbu yɛ nwo kɛ yɛze nrɛlɛbɛ, anzɛɛ yɛyɛ angomedi. (Mrɛ. 3:7; Nolo. 7:16) Saa ngyegyelɛ bie ba a ɔnrɛmaa yɛnrɛbɔ Gyihova somolɛ.

14, 15. Duzu a baboa yɛ na awie mɔ ɛdendɛlɛ ɛtane angyegye yɛ ɛ?

14 Mmamaa ɛdendɛlɛ ɛtane gyegye wɔ. Ɛnee Mosisi mekɛ zo Yizilayɛma lɛ ninyɛne dɔɔnwo mɔɔ bɛkola bɛgyinla zo bɛdie bɛdi kɛ Gyihova nee bɛ bɛahɔ Ɛwɔkɛ Azɛlɛ ne azo a. (Edw. 78:43-53) Noko mekɛ mɔɔ busiama ne mɔɔ ɛnlɛ diedi la vale amaneɛbɔlɛ ɛtane ne rale la, “bɛanva ye tumi ne . . . bɛangɔ adwenle nu.” (Edw. 78:42) Saa yɛdwenledwenle Gyihova gyimalilɛ nwo, na yɛkakye ninyɛne kpalɛ mɔɔ yeyɛ yemaa yɛ la a, agɔnwolɛvalɛ mɔɔ yɛ nee ye lɛ la anu bamia. Yemɔti, yɛnrɛmaa awie mɔ edwɛkɛ ɛtane ɛnrɛzɛkye yɛ nee Gyihova avinli.Edw. 77:11, 12.

15 Na saa yɛnyia adwenle ɛtane wɔ yɛ mediema nwo noko ɛ? Saa ɔba ye zɔ a, ɔbaha agɔnwolɛvalɛ mɔɔ yɛ nee Gyihova lɛ la. (1 Dwɔn 4:20) Mekɛ mɔɔ Yizilayɛma dendɛle tiale Aalɔn gyinlabelɛ ne la, Gyihova bule ye kɛ bɛlɛtendɛ bɛ nzo abo bɛatia Ɔdaye mumua ne. (Ɛdi. 17:10) Zɔhane ala a, saa yɛbɔ ɔ bo kɛ yɛtendɛ yɛ nzo abo yɛatia bɛdabɛ mɔɔ Gyihova ɛlɛdua bɛ nwo zo ahile ye ahyehyɛdeɛ ne foa mɔɔ wɔ azɛlɛ ye azo la adenle a, ɔbahile kɛ yɛlɛtendɛ yɛ nzo abo yɛatia Gyihova a.Hib. 13:7, 17.

16, 17. Saa yɛlɛyia ngyegyelɛ a, duzu a ɔwɔ kɛ yɛkakye a?

16 Kakye kɛ tɛ Gyihova a fa ngyegyelɛ ba yɛ nwo zo a. Wɔ Ayezaya mekɛ zo ɛnee Yizilayɛma ɛhwe bɛ nwo ɛvi Gyihova anwo ɛdeɛ, noko ɛnee ɔkulo kɛ ɔboa bɛ. (Aye. 1:16-19) Ɔnva nwo ngyegyelɛ biala mɔɔ yɛbahɔ nu la, yɛ rɛle bahola akyekye na yɛanwu kɛ Gyihova dwenle yɛ nwo na ɔkulo kɛ ɔboa yɛ. (1 Pita 5:7) Yebɔ yɛ ɛwɔkɛ kɛ ɔbamaa yɛ anwosesebɛ mɔɔ ɔbamaa yɛahɔ zo yɛagyinla yɛ munlililɛ nu la.1 Kɔl. 10:13.

17 Saa bɛbua yɛ mgbɔvodɛne wɔ adenle bie azo kɛmɔ bɛyɛle nɔhavo Dwobu bɔbɔ la a, ɔwɔ kɛ yɛkakye kɛ tɛ Gyihova a yɛle a. Gyihova kyi nzisi; ɔkulo tenleneyɛlɛ. (Edw. 33:5) Ɔrɛla ye kɛ yɛbayɛ kɛ Dwobu agɔnwo Ɛlaehu mɔɔ hanle ɛhye la: “Ɔle bɛkyi kɛ Nyamenle kɛyɛ amumuyɛ, anzɛɛ Tumivolɛ ne kɛyɛ ɛtane.” (Dwobu 34:10) Gyihova ɛmmaa yɛ nwo ɛngyele yɛ, emomu, ɔmaa yɛ “ɛlolɛdeɛ kpalɛ biala nee ahyɛlɛdeɛ biala mɔɔ di munli la.”Gye. 1:13, 17.

18, 19. Duzu ati a ɔnle kɛ yɛmaa yɛ adwenle nu yɛ yɛ kesee wɔ Gyihova anwo ɛlɛ ɛ? Maa ndonwo.

18 Mmamaa wɔ adwenle nu yɛ wɔ kesee wɔ Gyihova anwo ɛlɛ. Nyamenle di munli, yɛɛ ye adwenle le kpole tɛla yɛ ɛdeɛ ne. (Aye. 55:8, 9) Yemɔti ɔwɔ kɛ mɛlɛbɛnwoaze maa yɛdie yɛto nu kɛ tɛ ninyɛne ne amuala a yɛte ɔ bo a. (Wulo. 9:20) Ɔnla aze kɛ yɛbanwu edwɛkɛ bie anu nɔhalɛ ne kɔsɔɔti. Ɔda ali kɛ, wɔnwu nɔhalɛ mɔɔ wɔ ɛrɛlɛ ɛhye anu la: “Sonla mɔɔ dumua ka ye tendile la, ɛnea a ɛnee ɔdi benle, kyesɛ ko ne ɔdaye ɔka ye tendile na ɔbizebiza ye kpuyia.”Mrɛ. 18:17.

19 Saa yɛ gɔnwo bie mɔɔ yɛdie ye yɛdi la yɛ debie mɔɔ bie a yɛande ɔ bo ɛkɛ ne ala anzɛɛ yɛte nganeɛ kɛ tɛ ye adenle zo a, asoo yɛbabɔ ye somolɛ ɛkɛ ne ala kɛ yeyɛ ɛtane ɔ? Anzɛɛ yɛbagyakyi yɛamaa yɛaha, titile saa yɛ nee ye ɛlua ɛhyɛ a? Saa yɛfi ɛlɔlɛ nu yɛ nee  yɛ gɔnwo mɔ mɔɔ bɛtɔ sinli la dua wɔ adenle zɛhae azo a, ɔbamaa yɛava yɛ rɛle yɛawula yɛ anwuma Selɛ ne mɔɔ ye ndenle nee ye adwenle le kpole tɛla yɛ la anu bɔkɔɔ!

20, 21. Duzu ati a ɔnle kɛ yɛbɔ awie somolɛ a?

20 Mmabɔ awie somolɛ. Duzu ati ɔ? Nɔhalɛ nu, bie a ɛnee yɛdi ɛzonle wɔ yɛ ngyegyelɛ bie mɔ anwo. Saa ɔle zɔ a, ɔwɔ kɛ yɛdie yɛto nu. (Gal. 6:7) Mmabɔ mɔdenle kɛ ɛbɔ Gyihova somolɛ wɔ wɔ ngyegyelɛ nwo. Kɛmɔti a nrɛlɛbɛ ɛnle nu kɛ yɛkɛyɛ zɔ ɛ? Suzu neazo ɛhye anwo: Kale bahola anriandi ndɛndɛ kpalɛ. Fa ye kɛ delava bie ɛva ye kale ɛnriandi ndɛndɛ yemaa yebo zo wɔ amie nu na kale ne ɛhɔzi. Asoo ahenle mɔɔ yɛle kale ne la di esiane ne anwo ɛzonle? Kyɛkyɛ! Zɔhane ala a Gyihova bɔle yɛ mɔɔ yɛkola yɛdi yɛ ti anwo a. Noko yemaa yɛ adehilelɛ mɔɔ yɛgyinla zo yɛsi kpɔkɛ kpalɛ a. Yemɔti duzu ati a yɛbabɔ yɛ Bɔvolɛ ne somolɛ wɔ yɛ nvonleɛ nwo ɛ?

21 Nɔhalɛ nu, yɛ ngyegyelɛ ne amuala ɛnvi yɛ nvonleɛ nee nyɛleɛ ɛtane. Kɛmɔ “tɛ mekɛ ne amuala a bɛdi ye moavolɛ” la ati, ninyɛne dɔɔnwo sisi. (Nolo. 9:11) Noko, ɔnle kɛ yɛ rɛle fi ye ɛlɛ kɛ Seetan Abɔnsam a lumuale vale ɛtane rale a. (1 Dwɔn 5:19; Yek. 12:9) Ɔdaye a ɔle kpɔvolɛ ne a—tɛ Gyihova ɔ!1 Pita 5:8.

MAA Ɛ NYE ƐZƆ AGƆNWOLƐVALƐ MƆƆ Ɛ NEE GYIHOVA LƐ LA

Bɛyilale Dwɔhyua nee Kalɛbe ɔluakɛ bɛvale bɛ rɛle bɛwulale Gyihova anu (Nea ɛdendɛkpunli 22)

22, 23. Saa ngyegyelɛ bie ati yɛ sa nu to a, duzu a ɔwɔ kɛ yɛkakye a?

22 Saa ɛkɔ ngyegyelɛ nu a, kakye Dwɔhyua nee Kalɛbe. Nɔhavoma nwiɔ ɛhye mɔ vale amaneɛbɔlɛ kpalɛ rale, bɛanyɛ kɛ busiama bulu ne la. (Ɛdi. 14:6-9) Bɛhilele kɛ bɛdie Gyihova bɛdi. Yemɔ bɔbɔ anzi, ɛnee ɔwɔ kɛ bɛ nee Yizilayɛma mɔɔ ɛha la, di ahyimango wɔ fienemgbole ne anu ɛvolɛ 40. Asoo Dwɔhyua nee Kalɛbe dendɛle bɛ nzo abo anzɛɛ bɛvale ɛya, ɔluakɛ bɛdele nganeɛ kɛ bɛ nee bɛ anli ye boɛ ɔ? Kyɛkyɛ. Bɛvale bɛ rɛle bɛwulale Gyihova anu. Asoo bɛnyianle nwolɛ nyilalɛ? Ɛhɛe! Bɛ gɔnwo mɔ kɔsɔɔti wule fienemgbole ne anu, noko bɛ mu nwiɔ ɛdeɛ bɛhɔle Ɛwɔkɛ Azɛlɛ ne azo. (Ɛdi. 14:30) Zɔhane ala a, saa “yɛangyakyi” Gyihova ɛhulolɛdeɛ ɛyɛlɛ a ɔbayila yɛ a.Gal. 6:9; Hib. 6:10.

23 Saa ngyegyelɛ, awie mɔ anzɛɛ ɛdawɔ mumua ne wɔ sinlidɔlɛ maa ɛ sa nu to a, duzu a ɔwɔ kɛ ɛyɛ a? Fa wɔ adwenle sie Gyihova subane ngɛnlɛma ne mɔ azo. Maa Gyihova anyelazo ne ɛdɛnla wɔ adwenle nu. Biza ɛ nwo kɛ, ‘Saa tɛ Gyihova a anrɛɛ mewɔ nienwu?’ Twe bikye ye dahuu, mmafa Gyihova anwo ɛya ɛlɛ!