Wulu kɔ nuhua edwɛkɛ ne azo

Wulu kɔ nuninyɛne ne azo

Ɔlile Suakunlu Sinzavolɛma Daselɛ

Ɔlile Suakunlu Sinzavolɛma Daselɛ

Wɔ ɛvolɛ 59 Y.M., sogyama bie vale pilizama dɔɔnwo luale Porta Capena anlenkɛ kpole ne anu pɛle adenle tendenle hɔle Wulomu. Ɛnee maanle maanle Belemgbunli Nero suakunlu ne wɔ Palatine Boka ne azo. Suakunlu sogyama mɔɔ dadeɛ vea bɛ tɛladeɛ bo la yɛɛ ɛnee sinza ye a. * Sogya kpanyinli Dwuleɛse vale ye pilizama ne luale Wulomu gua bile ne azo hɔvole Viminal Boka ne. Bɛzenle tola bie mɔɔ Wulomu awozonle dɔɔnwo afɔlemokyea wɔ ɛkɛ nee ɛleka bie mɔɔ sogyama ne nyia bɛ ndetelɛ la.

Suakunlu sogyama mɔɔ bɛyɛ bɛ nvoninli wɔ Kolɔdeɛse Ngakyedeɛ ne mɔɔ bɛzile ye ɛvolɛ 51 Y.M. azo la

Ɛnee ɛzoanvolɛ Pɔɔlo boka pilizama ne. Mekɛ bie mɔɔ ɛnee Pɔɔlo wɔ ɛlɛne nu na ahumu kpole bie ɛlɛtu la, Nyamenle luale anwumabɔvolɛ bie anwo zo ɔzele ye kɛ: “Ɔwɔ kɛ ɛgyinla Maanle Maanle belemgbunli ne anyunlu.” (Gyi. 27:24) Asoo ɛnee mekɛ ɛdwu kɛ Pɔɔlo yɛ mɔɔ bɛzele ye la? Mɔɔ ɔdole ɔ nye ɔnleanle Wulomu Maanle ne suakpole ne la, kpolerazulɛ biala ɛnle nwo kɛ ɔhakyele edwɛkɛ mɔɔ Awulae hanle hilele ye wɔ Antonia Tawa ne anwo wɔ Gyɛlusalɛm la. Gyisɛse zele ye kɛ: “Gyinla kpundii! Wɔli me nwo daselɛ bɔkɔɔ wɔ Gyɛlusalɛm ɛke, na ɔwɔ kɛ ɛyɛ ye zɔhane noko wɔ Wulomu.”—Gyi. 23:10, 11.

Ɔbayɛ kɛ Pɔɔlo gyinlanle ekyii nleanle Castra Praetoria ne—aranemgbole bie mɔɔ bɛva belekese kɔkɔlɛ bɛlie nwolɛ bane na tawa gyigyi zo la. Aranemgbole ne anu a Suakunlu Sinzavolɛma ne mɔɔ bɛbɔ  maanle maanle belemgbunli ne anwo bane nee suakpole ne azo kpolisima ne wɔ a. Sua ɛhye kola fa menli apenle dɔɔnwo le kɛ Sinzavolɛma ekpunli 12 mɔɔ ekpunli ko biala le menli 1,000 mɔɔ sogyama mɔɔ bɛtɛnla ɛkpɔnwɔ zo la boka nwo a. Ɛnee Castra Praetoria ne le maanle maanle belemgbunli ne tumi kpole ne sɛkɛlɛneɛ. Kɛmɔ Suakunlu Sinzavolɛma ne a nea pilizama mɔɔ bɛwɔ maanzinli ne mɔ anu anwo zo la ati, suakunlu sinzavolɛ Dwuleɛse vale menli ne luale nlenka mgbole nna ne anu ko anu hɔle Wulomu. Bɛvɛle kpalɛ wɔ bɛ adendulɛ ne anu, akee ɔ nee ye pilizama ne ɛradwu ɛleka mɔɔ bɛkɔ la.—Gyi. 27:1-3, 43, 44.

ƐZOANVOLƐ NE LILE DASELƐ “NA AWIE BIALA ANDENDA Ɔ GYAKƐ ANU”

Wɔ adendulɛ ne anu, Nyamenle yele hilele Pɔɔlo kɛ saa ɛlɛne ne bɔ a, awie biala ɛnrɛwu. Mekɛ mɔɔ ɛwɔlɛ bie hale ye bɔbɔ la ɛhwee anyɛ ye. Mɔɔ ɔyɛle wuleravolɛma ayile wɔ Mɔleta bɔra ne azo la, ɛkɛ ne amra zuzule kɔ ɔle nyamenle. Ɔbayɛ kɛ edwɛkɛ ɛhye dɛlɛle na Suakunlu Sinzavolɛma ne mɔɔ bɛnlɛ nɔhalɛ diedi la dele.

Ɛnee Pɔɔlo ɛlumua ɛyia Wulomu mediema wɔ “Apeɛse Gua nu nee Dabelɛ Nsa.” (Gyi. 28:15) Kɛ ɔkɛyɛ na yeala ɛhulolɛ mɔɔ ɔlɛ kɛ ɔka edwɛkpa ne wɔ Wulomu la ali wɔ mekɛ mɔɔ ɔle pilizanli la ɛ? (Wulo. 1:14, 15) Bie mɔ suzu kɛ bɛfa pilizama ne bɛwula sinzavolɛma kpanyinli ne asa. Saa zɔhane a ɔde a, ɛnee bɛvale Pɔɔlo bɛwulale Sinzavolɛ Kpanyinli Afranius Burrus mɔɔ ɔbayɛ kɛ maanle maanle kpanyinli ne ɛnle ɛkɛ a ɔdaye a ɔwɔ ɛkɛ la asa nu. * Kɛzi ɛnee ɔde ye biala la, kɛ anrɛɛ sogya mgbanyima dɔɔnwo a bɛazinza Pɔɔlo la, kɛkala Suakunlu sogya ko ala a ɛlɛsinza ye a. Bɛmanle Pɔɔlo adenle ɔhayele ye sua na ɔliele nyɛvolɛ ɔhanle edwɛkɛ ne ɔhilele bɛ mɔɔ “awie biala andenda ɔ gyakɛ anu.”—Gyi. 28:16, 30, 31.

PƆƆLO LILE NGAKULA NEE MGBANYINLI KƆSƆƆTI DASELƐ

Kɛzi Castra Praetoria ne bane ne de ɛnɛ la

Wɔ edwɛkɛlilɛ ne anu, ɔbayɛ kɛ Burrus bizebizale Pɔɔlo edwɛkɛ wɔ suakunlu ɛkɛ anzɛɛ wɔ Praetoria azokoɛleɛ ne kolaa na yeava ye yeahɔ Nero anyunlu. Pɔɔlo vale nwolɛ adenle ne lile ‘mgbanyinli nee ngakula’ daselɛ. (Gyi. 26:19-23) Ɔnva nwo mɔɔ Burrus yɛle la, bɛanva Pɔɔlo bɛando efiade wɔ Praetoria azokoɛleɛ ne. *

 Pɔɔlo hayele sua kpole mɔɔ ɔbamaa yeahola yealie “Dwuu mgbanyima” nee “menli dɔɔnwo” ɛyɛvolɛ na yeali bɛ daselɛ la. Eza ɔlile menli mɔɔ Suakunlu sogyama ne hyele bɛ la daselɛ na “ɔdendɛle ɛhye anwo ɔvi nwonlomɔ mangyee ne toonwo aledwolɛ.”—Gyi. 28:17, 23.

Mekɛ mɔɔ Pɔɔlo la efiade la, sogyama dele kɛ ɔlɛka edwɛkɛ yeamaa bɛahɛlɛ

Ɛnee bɛkakyi Suakunlu sinzavolɛma ekpunli mɔɔ kɛra gyima la dɔnehwele mɔtwɛ biala. Na ɛnee bɛkakyi menli mɔɔ sinza Pɔɔlo la noko. Wɔ ɛvolɛ nwiɔ ne mɔɔ Pɔɔlo vale lale efiade la anu, sogyama dele ngɛlata mɔɔ ɔmanle bɛhɛlɛle Ɛfɛsɛsema, Felepaema, Kɔlɔsaema, nee Hibulu Keleseɛnema yɛɛ mɔɔ ɔdaye mumua ne ɔhɛlɛle Keleseɛnenli Faelemɔn la anu edwɛkɛ. Mekɛ mɔɔ ɛnee Pɔɔlo la efiade la, ɔboale Onɛsemɛse mɔɔ ɛnee le akɛlɛ mɔɔ yenriandi na ‘yerayɛ ɔ ra wɔ mekɛ mɔɔ ɔla efiade la,’ ɔmanle ɔziale ɔhɔle ɔ menle anwo lɔ. (Fae. 10) Ɔda ali kɛ Pɔɔlo boale ye sinzavolɛma ne mɔ noko. (1 Kɔl. 9:22) Yɛbahola yeayɛ ye nvoninli wɔ yɛ adwenle nu kɛ ɔlɛbizebiza konle tɛladeɛ afoa ngakyile ne mɔ anwo edwɛkɛ na yeava yeayɛ ndonwo kɛnlɛma.—Ɛfɛ. 6:13-17.

 ‘BƆ EDWƐKPA NE NOLO MƆƆ ƐNZULO ƐHWEE A’

Pɔɔlo efiade nla ne boale manle “Edwɛkpa ne hɔle zo” ɔluakɛ ɔlile Suakunlu Sinzavolɛma ne nee menli mɔɔ ɛha la amuala daselɛ. (Fel. 1:12, 13) Ɛnee menli mɔɔ de Castra Praetoria ne anu la nee menli mɔɔ wɔ Wulomu maanle ne kɔsɔɔti anu, maanle maanle belemgbunli ne nee ye awuke kpole ne anu amra kɔsɔɔti lɛ abusuabɔlɛ. Ɛnee ye sua nu amra ne bie mɔ le ye mbusuafoɔ, ye sonvolɛma nee ye ngɛkɛlɛ, na bie mɔ rayɛle Keleseɛnema. (Fel. 4:22) Akɛnrasesebɛ mɔɔ Pɔɔlo vale lile daselɛ la manle mediema mɔɔ ɛnee wɔ Wulomu la zile pi ‘bɔle edwɛkpa ne nolo mɔɔ bɛanzulo ɛhwee a.’—Fel. 1:14.

Kɛzi yɛ tɛnlabelɛ ne de ye biala la, yɛbanyia menli mɔɔ ba yɛ ɛkɛ bɛaboa yɛ la bie mɔ adie yɛ

Daselɛ mɔɔ Pɔɔlo lile ye wɔ Wulomu la eza maa yɛ anwosesebɛ wɔ mekɛ mɔɔ ‘yɛlɛka edwɛkɛ ne wɔ mekɛ kpalɛ nee mekɛ ɛtane nu la.’ (2 Tem. 4:2) Yɛ nuhua bie mɔ ɛha sua nu, anzɛɛ wɔ ɛleka mɔɔ bɛtete ngakula anzɛɛ asopiti, anzɛɛ bɛdo bɛ efiade bɔbɔ ɔlua bɛ diedi ti. Ɔnva nwo kɛzi yɛ tɛnlabelɛ ne de ye biala la, yɛbanyia menli mɔɔ ba yɛ ɛkɛ bɛaboa yɛ la bie mɔ adie yɛ. Saa yɛdi daselɛ akɛnrasesebɛ zo a, yɛdayɛ noko yɛbanwu ye kɛ “Nyamenle edwɛkɛ ne ɛdeɛ bɛtɛguale ye nwɔnzɔnwɔnzɔ.”—2 Tem. 2:8, 9.

^ ɛden. 2 Nea ɛlɛka “Nero Mekɛ Zo Suakunlu Sinzavolɛma.”

^ ɛden. 7 Nea ɛlɛka “Sextus Afranius Burrus.”

^ ɛden. 9 Kɛmɔ ɛnee Hɛlɔdo Agelepa kulo kɛ Caligula bayɛ maanle maanle belemgbunli la ati, Taebileɛse Siza vale ye dole efiade wɔ ɛke wɔ ɛvolɛ 36/37 Y.M. anu. Mekɛ mɔɔ Caligula rayɛle maanle maanle belemgbunli la ɔziele Hɛlɔdo belemgbunli ɔvale ɔduale ye kakɛ.—Gyi. 12:1.