Wulu kɔ nuhua edwɛkɛ ne azo

Wulu kɔ nuninyɛne ne azo

Bɛdule Bɛ Nwo Bɛmanle—Wɔ Norway

Bɛdule Bɛ Nwo Bɛmanle—Wɔ Norway

WƆ ƐVOLƐ ekyi mɔɔ ɛze la anu, ɛnee Roald nee Elsebeth, agyalɛma mɔɔ bɛbo ɛvolɛ 40 la de Bergen, Norway suakpole mɔɔ tɔ zo nwiɔ la azo bɛ nwo tɔ bɛ. Bɛ nee bɛ ra raalɛ Isabel nee bɛ ra nrenya Fabian vale bɛ nwo wulale asafo ne gyimalilɛ nu kpalɛ. Ɛnee Roald le asafo nu kpanyinli, Elsebeth le adekpakyelɛnli, yɛɛ Isabel nee Fabian le nolobɔlɛma mɔɔ bɛbɔ mɔdenle.

Noko, wɔ September 2009 anu, abusua ɛhye bɔle kpɔkɛ kɛ bɛkabɔ edwɛkpa ne nolo dapɛne ko wɔ azɛlɛsinli bie mɔɔ ɛde ɔ nwo la anu. Yemɔti, Roald nee Elsebeth yɛɛ Fabian mɔɔ ɛnee ɛli ɛvolɛ 18 la hɔle Nordkyn, sua bie mɔɔ azule asɛɛ ɛbɔ ye ɛyia wɔ Finnmark maanle nu la azo. Ɔwɔ Arctic Circle ne anwuma (azɛlɛ ne sɔlɔ kpalɛ kpalɛ). Bɛ nee mediema mɔɔ bɛdabɛ noko bɛrale zɔhane azɛlɛsinli ne anu la bɔle edwɛkpa ne nolo wɔ Kjøllefjord namule ne azo. Roald ka kɛ, “Wɔ dapɛne ne mɔlebɛbo, me nye liele kɛ mentotole ninyɛne boɛ mɔɔ ɔbamaa meayɛ gyima titile ɛhye dapɛne ko a.” Noko, wɔ zɔhane dapɛne ne ala anu, Roald anyelielɛ ne minlinle. Duzu ati ɔ?

 KPUYIA MƆƆ BƐ NYE ƐNLA

Roald ka kɛ, “Arɛlevilɛ nu ala, Mario, adekpakyelɛnli bie mɔɔ ɛnee ɛlɛsonle wɔ Finnmark la bizale yɛ saa yɛkɛhulo kɛ yɛkɛra suakpole Lakselv azo yɛkɛraboa asafo mɔɔ nolobɔlɛma 23 wɔ nu la a.” Kpuyia ɛhye zinle Roald anwo. Ɔka kɛ: “Ɛnee me nee Elsebeth ɛzuzu nwo kɛ yɛbahɔzonle ɛleka mɔɔ moalɛ nwo hyia la ɛdeɛ, noko ɛnee ɛhye bayɛ mekɛ mɔɔ ngakula ne mɔ ɛyɛ mgbanyinli la.” Noko akee, mekɛ ekyi ne mɔɔ Roald vale hanle edwɛkɛ ne wɔ ɛleka ɛhye mɔɔ ɛde ɔ nwo la, ɔnwunle kɛ menli dɔɔnwo kulo kɛ bɛsukoa Gyihova anwo debie. Ɛnee bɛhyia moalɛ ndɛndɛ. Ɔka kɛ, “Kpuyia ɛhye gyegyele me adwenle yeammaa meanla wɔ mekɛ dɔɔnwo anu.” Akee Mario vale Roald nee ye abusua ne hɔle Lakselv, ɔbayɛ mayɛle 150 (km 240) wɔ Kjøllefjord nyiankɛ. Ɛnee Mario kpondɛ kɛ nyɛvolɛ ne mɔ fa bɛ nye nwu asafo ekyi ne mɔɔ ɔwɔ ɛkɛ la.

Wɔ Lakselv, Andreas mɔɔ le mgbanyima nwiɔ ne mɔɔ bɛwɔ ɛkɛ anu ko la, hilele nyɛvolɛ ne mɔ ɛleka mɔɔ Belemgbunlililɛ Asalo ne wɔ la. Asafo ne liele bɛ kɛnlɛma na bɛhanle bɛhilele Roald nee Elsebeth kɛ bɛ nye balie kɛ bɛ nee bɛ abusua ne baraboa bɛ bayɛ Belemgbunlililɛ gyima ne wɔ ɛkɛ. Andreas vale anyelielɛ hanle kɛ yeyɛ gyima nwo ngyehyɛleɛ yemaa Roald nee Fabian! Duzu a nyɛvolɛ ne mɔ bayɛ a?

KPƆKƐ BONI A ƆWƆ KƐ BƐSI A?

Fabian lumuale hanle kɛ: “Ɛnee mengulo kɛ metu mekɔ ɛkɛ.” Me nye anlie nwo kɛ mebagyakyi me gɔnwo mɔ mɔɔ me nee bɛ nyinli wɔ me sua zo asafo ne anu la ɛkɛ meahɔdɛnla sua ekyi bie azo. Bieko, ɛnee ɔtɛwiele kɛnlaneɛ nwo gyima mɔɔ ɔlɛsukoa la. Noko akee, mekɛ mɔɔ bɛbizale Isabel (mɔɔ ɛnee ɛli ɛvolɛ 21) ɛhɔlɛ ne anwo edwɛkɛ la, ɔhanle kɛ: “Ɛhye a ɛnee mekulo kɛ meyɛ a!” Akee Isabel ka kɛ: “Mekɛ mɔɔ mendwenlenle nwolɛ mengɔle moa la, menganle kɛ, ‘Asoo ɛhye le adwenle kpalɛ? Asoo me nwo ɛnrɛlɔ me gɔnwo mɔ? Asoo ɔwɔ kɛ metɛnla me asafo ne mɔɔ ninyɛne kɔ boɛ wɔ nu la ala anu?’” Duzu a Elsebeth yɛle ye wɔ ɛsalɛdolɛ ne anwo a? Ɔka kɛ, “Mendele nganeɛ kɛ Gyihova ɛmaa yɛ abusua ne gyima, noko eza menzuzule yɛ sua ne mɔɔ yɛziezie ye fofolɛ nee ninyɛne mɔɔ yɛnyianle ye wɔ ɛvolɛ 25 mɔɔ ɛze anu la anwo.”

Elsebeth nee Isabel

Mekɛ mɔɔ dapɛne titile ne pɛle nu la, Roald nee ye abusua ne ziale rale Bergen, noko bɛhɔle zo bɛdwenlenle bɛ mediema Keleseɛnema mɔɔ bɛwɔ Lakselv mɔɔ ɔbayɛ mayɛle 1,300 (km 2,100) la anwo. Elsebeth ka kɛ, menzɛlɛle Gyihova fane dɔɔnwo memanle bɛ na me nee bɛ hɔle zo lile ngitanwo. Roald ka kɛ: “Ɛnee mehyia mekɛ dɔɔnwo na meava meazuzu me ɛhɔlɛ ne anwo. Bieko, ɛnee ɔwɔ kɛ mesuzu nwo saa ɔle kpalɛ kɛ yɛkɔ a. Kɛzi yɛbahola yɛanlea yɛ nwo ɛ? Menzɛlɛle Gyihova fane dɔɔnwo na me nee me abusua ne nee mediema mɔɔ bɛlɛ anwubielɛ la lile nwolɛ adwelie.” Fabian ka kɛ: “Mekɛ mɔɔ melɛsuzu nwolɛ dɔɔnwo la, ɛnee melɛte ɔ bo kpalɛ kɛ menlɛ debie biala mengyinla zo menga kɛ menrɛhɔ. Menganle nwolɛ edwɛkɛ mengilele Gyihova fane dɔɔnwo na ɛhulolɛ mɔɔ melɛ kɛ mebahɔ la yɛle kpole.” Na Isabel noko ɛ? Ɔbɔle ɔ bo ɔyɛle adekpakyelɛ gyima ne wɔ ye sua zo ɔvale ɔzieziele ɔ nwo ɔmanle ye ɛhɔlɛ ne. Siane nsia mɔɔ ɔvale ɔyɛle adekpakyelɛ gyima ne nee bɛ ngome Baebolo ɛzukoalɛ la, manle ɔnwunle kɛ yeziezie ɔ nwo yemaa ye ɛhɔlɛ ne.

KƐZI BƐDWULE BƐ BODANE NE ANWO LA

Mekɛ mɔɔ ɛhulolɛ mɔɔ abusua ne lɛ kɛ bɛbahɔboa ɛleka mɔɔ bɛhyia nolobɛlɛma dɔɔnwo yɛle kpole la, bɛyɛle ninyɛne mɔɔ ɔbamaa bɛadwu bɛ bodane ne anwo la. Ɛnee Roald yɛ gyima mɔɔ bɛtua ye kakɛ kpalɛ na ɔ nye die nwolɛ la, noko ɔzɛlɛle adenle ɛvolɛ ko. Noko akee, ye gyima menle ne zele ye kɛ ɔva dapɛne nwiɔ ɔyɛ gyima na ɔdɛnla sua nu dapɛne nsia—siane nwiɔ biala. Roald ka kɛ, “Bɛdele me ahatualɛ ne azo bi, noko ninyɛne hɔle zo kɛnlɛma.”

Elsebeth ka kɛ: “Me hu zele me kɛ memkpondɛ sua wɔ Lakselv na yɛva yɛ sua ne mɔɔ wɔ Bergen la yɛhaye. Ɛnee ɔhyia mekɛ nee mɔdenlebɔlɛ noko yɛlile konim. Mekɛ ekyi guale nu la, ngakula ne mɔ nyianle gyima mɔɔ bɛfa mekɛ foa bɛyɛ la, na bɛboale yɛ bɛmanle yɛduale yɛ aleɛ nee yɛ kale kakɛ.”

Isabel ka kɛ: “Kɛmɔ sua ne mɔɔ mengɔle zo la le ekyi la ati, ɛnee mengyegyelɛ kpole a le kɛ mebanyia gyima mɔɔ mebava meanlea me nwo kɛ adekpakyelɛnli la. Ɛnee ɔdwu mekɛ ne bie a ɔyɛ me kɛ anyelazo biala ɛnle ɛkɛ la.” Noko akee, gyima ngyikyi  ngɔnla mɔɔ Isabel vale ye mekɛ ne foa yɛle wɔ ɛvolɛ ne mɔɔ ɔlumua la anu la manle ɔholale ɔduale ɔ nwo kakɛ kɔsɔɔti. Kɛzi ninyɛne hɔle zo manle Fabian ɛ? “Ɛnee ɔwɔ kɛ metoa awie me nee ye yɛ gyima kolaa na meahola meawie kɛnlaneɛ nwo gyima ne mɔɔ ɛnee melɛsukoa ye wɔ sukulu la bɔkɔɔ. Menyɛle ye zɔ wɔ Lakselv. Nzinlii, menlile konim wɔ me sɔnea ne anu na menyianle kɛnlaneɛ nwo gyima mɔɔ bɛfa mekɛ foa bɛyɛ la.”

KƐZI BIE MƆ DƐLƐLE BƐ ƐZONLENLƐ NU LA

Marelius nee Kesia ɛlɛdi Saminli raalɛ bie daselɛ wɔ Norway

Ɛnee Marelius nee ɔ ye Kesia noko kpondɛ kɛ bɛkɔsonle wɔ ɛleka mɔɔ bɛhyia nolobɔlɛma dɔɔnwo la. Marelius mɔɔ yenyia ɛvolɛ 29 la ka kɛ: “Maangyeba nyianu bo ɛdendɛlɛ nee edwɛkɛbizebizalɛ mɔɔ fane adekpakyelɛ gyima ne anwo la manle menzuzule nwolɛ kɛ mebadɛlɛ me ɛzonlenlɛ gyima ne anu.” Noko akee, adwenle mɔɔ Kesia mɔɔ yenyia ɛvolɛ 26 nyianle kɛ ɔbavi ye abusua ne anwo la manle ɔyiale adenzile. Ɔse, “Adwenle mɔɔ menyianle kɛ mebade me nwo meavi menli mɔɔ mekulo bɛ anwo la manle ɛzulolɛ hanle me.” Bieko, Marelius vale ye mekɛ kɔsɔɔti yɛle gyima duale sua mɔɔ ɛnee bɛbɔ bosea bɛdɔ la. Ɔka kɛ: “Ɔlua Gyihova moalɛ nee nzɛlɛlɛ dɔɔnwo mɔɔ yɛyɛle kɛ ɔboa yɛ ɔmaa yɛyɛ nzenzaleɛ la azo, yɛholale yɛdule yɛhɔle.” Mɔɔ lumua la, bɛvale mekɛ dɔɔnwo bɛzukoale Baebolo ne. Akee agyalɛma ne dɔnenle bɛ sua, gyakyile bɛ gyima, na bɛdule bɛhɔle suakpole Alta, mɔɔ wɔ Norway sɔlɔ la azo wɔ August 2011. Marelius yɛle ezukoa nwo gyima yɛɛ Kesia yɛle gyima wɔ sotɔɔ amaa bɛahola bɛanlea bɛ nwo wɔ adekpakyelɛ gyima ne anu.

Kɛlɛtokɛ mɔɔ ba Yearbook nu mɔɔ fane bɛdabɛ mɔɔ bɛsonle wɔ ɛleka mɔɔ bɛhyia Belemgbunlililɛ ne anwo nolobɔlɛma anwo la, hanle Knut nee Lisbeth mɔɔ ɛnee bɛbo ɛvolɛ 30 la ahonle. Lisbeth ka kɛ, “Anwubielɛ ɛhye mɔ manle yɛdwenlenle nwolɛ kɛ yɛbahɔzonle wɔ maanle gyɛne zo, noko mendwenlehwenlele me bo aze ɔboalekɛ me adwenle yɛle me kɛ awie mɔɔ ɔle kɛ medame la ɛnrɛhola ɛnrɛyɛ deɛ ɛhye.” Noko akee, bɛbɔle mɔdenle kɛ bɛbadwu bɛ bodane ne anwo. Knut ka kɛ: “Yɛdɔnenle yɛ sua kpole ne noko amaa yɛazie ezukoa la, yɛdule yɛ nee me maame hɔdɛnlanle. Nzinlii, amaa yɛanyia ɛhulolɛ kɛ yɛbazonle wɔ maanle gyɛne zo la, yɛdule yɛhɔle asafo mɔɔ bɛka Nrelenza wɔ nu la anu ɛvolɛ ko wɔ Bergen, ɛkɛ ne yɛɛ yɛ nee Lisbeth maame hɔdɛnlanle la.” Yeangyɛ, Knut nee Lisbeth nwunle kɛ bɛziezie bɛ nwo bɛwie, na ɛnee bɛbahɔ moa kpalɛ—Uganda. Wɔ ɛvolɛ ko biala anu bɛbayɛ gyima wɔ Norway siane nwiɔ. Ɛhye maa bɛnyia ezukoa bɛnea bɛ nwo na bɛfa bɛ mekɛ kɔsɔɔti bɛka edwɛkɛ ne wɔ mekɛ mɔɔ ɛha wɔ ɛvolɛ ne anu la anu wɔ Uganda.

‘BƐZƆ GYIHOVA BƐNLEA NA BƐKƐNWU KƐ ƆLE KPALƐ’

“Yɛ abusua ne ɛbikye nwolɛ kpalɛ.”—Roald

Kɛzi ninyɛne hɔle zo manle mediema ɛhye mɔ ɛ? Roald ka kɛ: “Yɛnyianle mekɛ dɔɔnwo yɛmanle yɛ nwo kɛ abusua wɔ ɛleka ɛhye mɔɔ te ɔ nwo la tɛla mekɛ mɔɔ ɛnee yɛwɔ Bergen la. Yɛ abusua ne ɛbikye  nwolɛ kpalɛ. Saa yɛnwu sunsum nu anyuhɔlɛ mɔɔ yɛ mra ne mɔ ɛnyia la a, ɔle nyilalɛ ɔmaa yɛ.” Ɔhanle ɔzɔle zo kɛ: “Ɛnɛ, yɛ nye ɛmbolo nwonane afoa nu ninyɛne. Nwolɛ ɛngyia yɛ kɛ dɛba ne la.”

Elsebeth nwunle kɛ ɔwɔ kɛ ɔsukoa aneɛ gyɛne. Duzu ati ɔ? Ɛnee Lakselv Asafo ne azɛlɛsinli ne bie a le Karasjok namule ne mɔɔ wɔ Samima avinli la. Menli ɛhye mɔ de Norway, Sweden, Finland, nee Russia sɔlɔ. Amaa yeahola yeali menli ɛhye mɔ daselɛ la, Elsebeth zukoale Sami aneɛ ne. Kɛkala ɔkola ɔka ye ekyii. Asoo ɔ nye die ye azɛlɛsinli fofolɛ ne anu ɔ? Ɔfa anyelielɛ ɔka kɛ: “Melɛ Baebolo sukoavoma nsia. Mekulo kɛ metɛnla ɛke tɛla kɛ mebahɔ ɛleka gyɛne!”

Fabian mɔɔ ɛnɛ sonle kɛ adekpakyelɛnli nee sonvolɛ la ka kɛ, ɔ nee Isabel ɛboa ngakula nsa mɔɔ bɛtɛnyianle ɛvolɛ abunlanwiɔ mɔɔ bɛwɔ bɛ asafo fofolɛ ne anu mɔɔ ɛnee bɛhyia anwosesebɛmanlɛ amaa bɛahola bɛayɛ gyima dɔɔnwo wɔ asafo ne anu la. Kɛkala ngakula nsa ɛhye mɔ ɛlɛbɔ mɔdenle wɔ ɛzonlenlɛ gyima ne anu. Nɔhalɛ nu, bɛzɔne bɛ nuhua nwiɔ na bɛzonlenle kɛ adekpakyelɛ boavolɛ wɔ March 2012. Ngakula ne mɔ ko mɔɔ anrɛɛ twe ɔ nwo avi asafo ne anwo la lale Fabian nee Isabel ase kɛ bɛboa ye bɛmaa “yegyinla ɔ gyakɛ azo bieko la.” Fabian ka kɛ: “Mekɛ mɔɔ ɔhanle ɛhye la me nye liele kpole. Anyelielɛ boni a tɛla kɛ ɛbaboa awie a!” Isabel ka kɛ: “Wɔ me gyimalilɛ ne anu, ‘mezɔ Gyihova menlea menwu kɛ ɔle kpalɛ.’” (Edw. 34:8) Ɔvale ɔzɔle zo kɛ: “Ɛke mɔɔ yɛlɛsonle la maa yɛ nye die kpalɛ!”

Marelius nee Kesia ɛde bɛ ninyɛne zo, noko bɛ nye die. Asafo mɔɔ bɛhɔle nu wɔ Alta la ɛnyia nolobɔlɛma 41 kɛkala. Marelius ka kɛ: “Saa meto me nye me nzi a, me nye die kɛ yɛ ɛbɛlabɔlɛ ɛhakyi la. Yɛyɛ Gyihova mo kɛ yɛkola yɛsonle ye kɛ adekpakyelɛma wɔ ɛke a. Debie biala ɛnyɛ anyelielɛ ɛndɛla ɛhye.” Kesia ka kɛ: “Mezukoa kɛzi mefa me nwo meto Gyihova anwo zo bɔkɔɔ la, yɛɛ yenlea yɛ kpalɛ noko. Eza menwu kɛ me nwo mɔɔ mendele menvile me mbusuafoɔ anwo la, ɛmaa menwu nvasoɛ mɔɔ ɔwɔ zo kɛ me nee bɛ babɔ kpalɛ la. Metɛnunle me nwo wɔ yɛ kpɔkɛzilɛ ne anwo fee.”

Knut nee Lisbeth nee abusua bie ɛlɛsukoa debie wɔ Uganda

Kɛzi ninyɛne ɛlɛkɔ zo amaa Knut nee Lisbeth wɔ Uganda ɛ? Knut ka kɛ: “Ɔliele mekɛ na ɛkɛ ne nee me nwo ali. Ɛnee yɛlɛ nzule nee lateleke nwo ngyegyelɛ yɛɛ me ko gyegyele me, noko yɛyɛle Baebolo ɛzukoalɛ dɔɔnwo kɛmɔ yɛkpondɛ la!” Lisbeth ka kɛ: “Ɛnee ɔvi yɛ ɛkɛ mɔɔ ɔkɔ azɛlɛsinli bie mɔ anu la le dɔnehwele foa ko ala, noko bɛtɛkanle edwɛkpa ne wɔ ɛkɛ ne ɛlɛ. Saa yɛkɔ ɛkɛ a, yɛnwu kɛ menli ɛlɛkenga Baebolo ne na bɛka bɛkile yɛ kɛ yɛhilehile bɛ. Menli ɛhye mɔ mɔɔ bɛlɛ bɛ nwo aze mɔɔ yɛhilehilele bɛ Baebolo ne la manle me nye liele kpalɛ!”

Nea kɛzi yɛ Adekilevolɛ, Kelaese Gyisɛse mɔɔ de anwuma lɔ la nwu kɛzi edwɛkɛhanlɛ gyima mɔɔ ɔbɔle ɔ bo la anu ɛlɛtɛlɛ ahɔ azɛlɛ ye azo ɛleka biala la a ɔ nye bahola alie a! Ɛhɛe, Nyamenle menli kɔsɔɔti anye die nwo kɛ bɛbadu bɛ nwo bɛamaa bɛali Gyisɛse mɛla mɔɔ se “bɛmaa menli ɛrayɛ me ɛdoavolɛma” la azo.—Mat. 28:19, 20.