Wulu kɔ nuhua edwɛkɛ ne azo

Wulu kɔ nuninyɛne ne azo

Asafo Nu Mgbanyima ‘Boa Maa Yɛ Nye Die’

Asafo Nu Mgbanyima ‘Boa Maa Yɛ Nye Die’

“Yɛle bɛ gɔnwo mɔ gyimayɛvoma mɔɔ boa maa bɛ nye die.”—2 KƆL. 1:24, NW.

1. Duzu a manle Pɔɔlo anye liele Keleseɛnema mɔɔ ɛnee wɔ Kɔlente la anwo a?

WƆ ƐVOLƐ 55 Y.M. anu, ɛnee ɛzoanvolɛ Pɔɔlo wɔ Tulowase mɔɔ meli gyinla ɛkɛ la, noko ɛnee ɔtɛdwenle Kɔlentema anwo. Wɔ ɛvolɛ ne mɔlebɛbo, ɔdele kɛ mediema mɔɔ wɔ ɛkɛ ne la di butule na ɛhye yɛle ye nyane. Ɛhye ati ɔhɛlɛle kɛlata ɔdule bɛ folɛ kɛ selɛ. (1 Kɔl. 1:11; 4:15) Eza ɔzoanle Taetɛse mɔɔ ɔ nee ye yɛ gyima la wɔ ɛkɛ na ɔzele ye kɛ ɔva nwolɛ amaneɛbɔlɛ ɔrɛlɛ ye wɔ Tulowase. Kɛkala, Pɔɔlo ɛlɛkendɛ Taetɛse wɔ Tulowase, ɔkpondɛ kɛ ɔte mɔɔ ɛlɛkɔ zo wɔ Kɔlente la. Taetɛse ɛmba, yemɔti Pɔɔlo anwo ɛndɛ ye fee. Duzu a Pɔɔlo bahola ayɛ a? Ɔhɔyiale ye wɔ Masidonea, na ɛhye manle ɔ nye liele kpalɛ. Taetɛse hanle kɛ mediema mɔɔ bɛwɔ Kɔlente la ɛva edwɛkɛ mɔɔ wɔ Pɔɔlo kɛlata ne anu la ɛyɛ gyima na bɛ nwo ɛlɛdɔ ye. Pɔɔlo dele amaneɛ fɛlɛko ne la, ɔ “nye [liele] kpole kpalɛ.”—2 Kɔl. 2:12, 13; 7:5-9.

2. (a) Diedi nee anyelielɛ nwo edwɛkɛ boni a Pɔɔlo hɛlɛle manle Kɔlentema a? (b) Kpuyia boni mɔ a yɛbazuzu nwo a?

2 Yeangyɛ, Pɔɔlo hɛlɛle Kɔlentema ne kɛlata mɔɔ ɔtɔ zo nwiɔ. Ɔzele bɛ kɛ: “Yɛnle bɛ diedi zo tumivolɛma, emomu yɛle bɛ gɔnwo mɔ gyimayɛvoma mɔɔ yɛboa yɛmaa bɛ nye die, ɔluakɛ bɛ diedi ne ati a bɛgyi ɛkɛ a.” (2 Kɔl. 1:24, NW) Duzu a ɛnee Pɔɔlo kpondɛ ahile a? Na kɛzi edwɛkɛ ɛhye fane Asafo nu mgbanyima mɔɔ bɛwɔ ɛkɛ ɛnɛ la anwo ɛ?

YƐ DIEDI NEE YƐ ANYELIELƐ

3. (a) Mekɛ mɔɔ Pɔɔlo hɛlɛle kɛ: “Bɛ diedi ne ati a bɛgyi ɛkɛ” la, duzu a ɛnee ɔlɛkile a? (b) Kɛzi mgbanyima mɔɔ bɛwɔ ɛkɛ ɛnɛ la sukoa Pɔɔlo neazo ne ɛ?

3 Pɔɔlo hanle ninyɛne nwiɔ mɔɔ nwolɛ hyia wɔ yɛ ɛzonlenlɛ nu la—diedi nee anyelielɛ nwo edwɛkɛ. Kakye kɛ ɔhɛlɛle ye wɔ diedi nwo kɛ: “Yɛnle bɛ diedi zo tumivolɛma, . . . ɔluakɛ bɛ diedi ne ati a bɛgyi ɛkɛ a.” Pɔɔlo hanle edwɛkɛ ɛhye vale hilele kɛ tɛ ɔdaye anzɛɛ dasanli  bie ati a mediema mɔɔ wɔ Kɔlente la gyi ye kpundii a, emomu diedi mɔɔ bɛlɛ ye wɔ Nyamenle anu la ati ɔ. Yemɔti, Pɔɔlo nwunle kɛ ɔnle kɛ ɔyɛ tumivolɛ wɔ ɔ mediema diedi zo, yɛɛ ɛnee ɔngulo kɛ ɔyɛ zɔ bɔbɔ. Ɛnee ɔlɛ anwodozo kɛ bɛle Keleseɛnema mɔɔ bɛdi nɔhalɛ na bɛkulo kɛ bɛyɛ mɔɔ ɔtenrɛ. (2 Kɔl. 2:3) Ɛnɛ, asafo nu mgbanyima di Pɔɔlo neazo ne anzi, bɛnyia bɛ mediema diedi nee adwenle mɔɔ bɛlɛfa bɛazonle Nyamenle la anu anwodozo. (2 Tɛs. 3:4) Mgbanyima ne mɔ ɛnli mɛla kyengye ɛmmaa asafo ne, emomu bɛfa bɛ nwo bɛto ngyinlazo mɔɔ wɔ Ngɛlɛlera ne anu nee adehilele mɔɔ vi Gyihova ahyehyɛdeɛ ne ɛkɛ la azo. Ɔluakɛ, mgbanyima ne mɔ ɛnle tumivolɛma wɔ bɛ mediema diedi zo.—1 Pita 5:2, 3.

4. (a) Mekɛ mɔɔ Pɔɔlo hɛlɛle kɛ: “Yɛle bɛ gɔnwo mɔ gyimayɛvoma mɔɔ yɛboa yɛmaa bɛ nye die” la, duzu a ɛnee ɔlɛkile a? (b) Kɛzi mgbanyima mɔɔ bɛwɔ ɛkɛ ɛnɛ la sukoa mɔɔ Pɔɔlo yɛle la ɛ?

4 Eza Pɔɔlo hanle kɛ: “Yɛle bɛ gɔnwo mɔ gyimayɛvoma mɔɔ yɛboa yɛmaa bɛ nye die.” Wɔ ɛke ɛnee ɔlɛka ɔ nee ɔ gɔnwo mɔ mɔɔ bikye ye la anwo edwɛkɛ. Duzu ati a yɛka ye zɔ a? Wɔ kɛlata ko ne ala anu, Pɔɔlo hanle ɔ gɔnwo ɛhye mɔ anu nwiɔ anwo edwɛkɛ ɔhilele Kɔlentema ne kɛ: “Gyisɛse . . . mɔɔ me nee Seleveenɛse nee Temɔte yɛbɔle ɔ nwo edwɛkɛ ne nolo yɛhilele bɛ la.” (2 Kɔl. 1:19) Bieko, mekɛ biala mɔɔ Pɔɔlo bava edwɛkɛ ‘me mediema anzɛɛ me gɔnwo mɔ gyimayɛvoma’ yeali gyima la, ɛnee ɔlɛka menli mɔɔ ɛnee bikye ye kpalɛ le kɛ Apɔlɔso, Akoyela, Pelesela, Temɔte nee Taetɛse mɔ anwo edwɛkɛ. (Wulo. 16:3, 21; 1 Kɔl. 3:6-9; 2 Kɔl. 8:23) Ɛhye ati, mekɛ mɔɔ Pɔɔlo hanle kɛ: “Yɛle bɛ gɔnwo mɔ gyimayɛvoma mɔɔ yɛboa yɛmaa bɛ nye die” la, ɔmanle Kɔlentema ne anwosesebɛ kɛ ɔ nee ɔ gɔnwo mɔ kpondɛ kɛ bɛyɛ debie biala mɔɔ ɔbamaa asafo ne anu amra kɔsɔɔti anye alie la. Zɔhane ala a mgbanyima mɔɔ bɛwɔ Asafo ne anu ɛnɛ la noko kpondɛ kɛ bɛyɛ a. Bɛkpondɛ kɛ bɛyɛ mɔɔ bɛbahola la biala bɛmaa mediema ne mɔ ‘fa fɛlɛkolilɛ sonle Gyihova.’—Edw. 100:2; Fel. 1:25.

5. Kpuyia boni anwo mualɛ a yɛbazuzu nwo a, na duzu a ɔwɔ kɛ yɛdwenle nwo a?

5 Bɛbizale mediema mrenya nee mraalɛ mɔɔ bɛwɔ ewiade ɛleka dɔɔnwo na bɛbɔ mɔdenle la kpuyia ɛhye kenlensa ye ala, “Kpanyinli bie edwɛkɛ nee ye nyɛleɛ boni a ɛmaa wɔ anyelielɛ ɛyɛ kpole a?” Mekɛ mɔɔ yɛlɛsuzu mediema ne mɔ mualɛ ne anwo la, fa to mɔɔ anrɛɛ ɛdawɔ noko ɛbaha la anwo nea. Bieko, bɛmaa yɛdwenle kɛzi yɛ muala yɛbamaa anyelielɛ ara asafo ne mɔɔ yɛwɔ nu anu la anwo. *

‘MEBIZA YƐ GƆNWO KPALƐ PƐSESE’

6, 7. (a) Adenle ko mɔɔ mgbanyima dua zo fa Gyisɛse, Pɔɔlo nee Nyamenle azonvolɛ gyɛne agyakɛ la a le boni? (b) Duzu ati a saa yɛkakye yɛ mediema ne mɔ aluma a ɔmaa bɛ anyelielɛ yɛ kpole a?

6 Yɛ mediema dɔɔnwo ka kɛ saa asafo nu mgbanyima kile bɛ nwo anyelielɛ a, ɔmaa bɛ anyelielɛ yɛ kpole. Adenle titile mɔɔ mgbanyima ne mɔ dua zo yɛ ɛhye la a le kɛ bɛfa Devidi, Ɛlaehu, yɛɛ Gyisɛse mumua ne agyakɛ. (Bɛgenga 2 Samoɛle 9:6; Dwobu 33:1; Luku 19:5.) Gyihova azonvolɛ ɛhye mɔ hilele kɛ bɛ nye die bɛ gɔnwo mɔ anwo ɔlua bɛ duma mɔɔ bɛvale bɛvɛlɛle bɛ la azo. Ɛnee Pɔɔlo noko ze kɛ nwolɛ hyia kɛ ɔnwu ɔ gɔnwo mɔ diedima aluma na ɔfa ɔfɛlɛ bɛ. Wɔ ye kɛlata ne mɔ ko anu, ɔbɔle mediema mrenya nee mraalɛ mɔɔ bɛbo 25 mɔɔ Pɛsese boka nwo la aluma ɔbizale bɛ ahye. Pɔɔlo hanle ye wɔ Keleseɛnenli raalɛ ɛhye anwo kɛ: ‘Mebiza yɛ gɔnwo kpalɛ Pɛsese ahye.’—Wulo. 16:3-15.

 7 Ɔyɛ se ɔmaa mgbanyima bie mɔ kɛ bɛkɛhakye mediema bie mɔ aluma. Noko akee, saa bɛbɔ mɔdenle bɛkakye a, ɛnee bɛlɛka bɛahile bɛ mediema diedima kɛ, ‘Bɛ nwo hyia me.’ (Ade. 33:17) Saa mgbanyima ɛlɛnea Ɛzinzalɛ Arane anzɛɛ debiezukoalɛ gyɛne bie azo na bɛkakye mediema ne mɔ aluma bɛfa bɛfɛlɛ bɛ a, ɔmaa bɛ anyelielɛ yɛ kpole.—Fa to Dwɔn 10:3.

ƆBƆLE “MƆDENLE KPALƐ WƆ AWULAE GYIMA NE ANWO”

8. Adenle titile ko mɔɔ Pɔɔlo luale zo zukoale Gyihova nee Gyisɛse la a le boni?

8 Pɔɔlo eza hanvolɛ ɔ gɔnwo mɔ ɔvale ɔhilele kɛ ɔ nye die bɛ nwo. Ɛhye le adenle titile mɔɔ ɔtɔ zo nwiɔ mɔɔ maa yɛ mediema diedima anyelielɛ yɛ kpole a. Ɛhye ati, wɔ kɛlata ko ne ala mɔɔ ɔhanle ye wɔ nu kɛ ɔboa ɔmaa ɔ mediema anye die la, Pɔɔlo hɛlɛle kɛ: “Mefa bɛ metu me nwo!” (2 Kɔl. 7:4) Ɔbayɛ kɛ edwɛkɛ ɛhye manle mediema mɔɔ ɛnee wɔ Kɔlente la ahonle dɔle bɛ azule nu. Pɔɔlo yɛle asafo dɔɔnwo zɔhane ala. (Wulo. 1:8; Fel. 1:3-5; 1 Tɛs. 1:8) Pɔɔlo bɔle Pɛsese duma wɔ ye kɛlata ne mɔɔ ɔhɛlɛle Wulomu asafo ne anu la, eza ɔhanle kɛ: “Pɛsese ɛbɔ mɔdenle kpalɛ wɔ Awulae gyima ne anwo.” (Wulo. 16:12) Nea kɛzi nganvolɛ ɛhye bamaa adiema raalɛ ɛhye mɔɔ di nɔhalɛ la ali fɛlɛko a! Pɔɔlo zukoale kɛzi Gyihova nee Gyisɛse hanvole awie mɔ la.—Bɛgenga Maake 1:9-11; Dwɔn 1:47; Yek. 2:2, 13, 19.

9. Duzu ati a saa bɛkanvo yɛ anzɛɛ yɛkanvo awie mɔ a ɔmaa anyelielɛ mɔɔ wɔ asafo ne anu la yɛ kpole a?

9 Mgbanyima mɔɔ bɛwɔ ɛkɛ ɛnɛ la noko ze kɛ ɔhyia kɛ bɛkile mɔɔ bɛ mediema yɛ la anwo anyezɔlɛ. (Mrɛ. 3:27; 15:23) Mekɛ biala mɔɔ kpanyinli bie kɛyɛ zɔ la, ɛnee ɔlɛka yeahile ɔ mediema ne mɔ kɛ: ‘Menwunle mɔɔ bɛyɛle la. Medwenle bɛ nwo.’ Yɛ mediema diedima hyia mgbanyima ne mɔ anwosesebɛmanlɛ. Adiema raalɛ bie mɔɔ yebo ɛvolɛ 50 la hanle menli dɔɔnwo akunlu edwɛkɛ kɛ: “Bɛnda bɛnganvo me wɔ gyima nu. Awie ɛndendɛ awie anwo wɔ ɛkɛ yɛɛ bɛsu. Yemɔti saa kpanyinli bie kanvo me wɔ debie mɔɔ mebayɛ ye wɔ asafo ne anu la anwo a, ɔmaa me ahonle tɔ me azule nu na menyia anwosesebɛ! Ɔmaa mete nganeɛ kɛ me anwuma selɛ ne kulo me edwɛkɛ.” Zɔhane ala a adiema nrenya bie mɔɔ ɔle ɛrɛladane ko na ɔlɛnea ngakula nwiɔ la dele nganeɛ a. Asafo nu kpanyinli bie vile ahonle nu hanvole ye kenlensa ye ala. Kɛzi yɛ diema ne dele nganeɛ ɛ? Ɔka kɛ: “Kpanyinli ne edwɛkɛ ne manle me anwosesebɛ kpalɛ!” Ɛhɛe, saa asafo nu kpanyinli kanvo mediema diedima nɔhalɛ nu a, ɔmaa bɛ sunsum nu anwosesebɛ na bɛ anyelielɛ yɛ kpole. Ɔboa bɛ ɔmaa bɛdua ngoane adenle ne azo dahuu “na bɛnrɛvɛ.”—Aye. 40:31.

‘BƐNLEA NYAMENLE ASAFO NE’

10, 11. (a) Kɛzi mgbanyima bahola ayɛ mɔɔ Nihɛmaya yɛle la bie ɛ? (b) Saa kpanyinli kɔkpɔla awie mɔ a, duzu a baboa ye na yeahola yeamaa bɛ sunsum nu ahyɛlɛdeɛ a?

10 Adenle mɔɔ nwolɛ hyia kpole kpalɛ mɔɔ mgbanyima balua zo ahile kɛ bɛ nye die bɛ mediema nwo na bamaa anyelielɛ mɔɔ wɔ asafo ne anu la ayɛ kpole la a le boni? Yemɔ a le kɛ bɛdabɛ mumua ne bɛbaboa menli mɔɔ hyia anwosesebɛmanlɛ la. (Bɛgenga Gyima ne 20:28.) Saa mgbanyima yɛ ɛhye a, bɛbava tete sunsum nu mboaneneavolɛma agyakɛ. Kɛ neazo la, yɛ mɔɔ nɔhavo Nihɛmaya yɛle wɔ mekɛ mɔɔ ɔnwunle kɛ ɔ mediema Dwuuma bie mɔ ɛyɛ bɛtɛɛ wɔ sunsum nu la nzonlɛ. Kɛlɛtokɛ ne ka kɛ, ɔdwazole ndɛndɛ ɔmanle bɛ anwosesebɛ. (Nih. 4:14) Mgbanyima mɔɔ bɛwɔ ɛkɛ ɛnɛ la noko kpondɛ kɛ bɛyɛ zɔ. Bɛtu agyakɛ bɛboa bɛ mediema bɛmaa bɛgyinla kpundii wɔ diedi ne anu. Saa nwolɛ adenle wɔ ɛkɛ a, bɛkɔkpɔla bɛ mediema  ɛhye mɔ wɔ bɛ azua nu amaa bɛamaa bɛ anwosesebɛ. Bɛmaa bɛ “Sunsum nu ahyɛlɛdeɛ” wɔ bɛ ɛkpɔlalɛ ɛhye mɔ anu. (Wulo. 1:11) Duzu a baboa mgbanyima yeamaa bɛayɛ ɛhye a?

11 Kolaa na asafo nu kpanyinli ahɔkpɔla awie la, ɔwɔ kɛ ɔdumua ɔdwenle ahenle anwo. Ngyegyelɛ boni a ahenle wɔ nu a? Edwɛkɛ boni a bahola aboa ye a? Ngɛlɛlera anzɛɛ Baebolo nu anwubielɛ boni a fane ye tɛnlabelɛ ne anwo a? Saa kpanyinli dumua suzu ɛhye mɔ anwo a, ɔbamaa bɛali adwelie mɔɔ nvasoɛ wɔ zo na ɔboa la. Kpanyinli kɔkpɔla ɔ mediema a, ɔwɔ kɛ ɔmaa bɛ adenle bɛtendɛ na ɔtie bɛ kpalɛ. (Gye. 1:19) Adiema raalɛ ko hanle kɛ: “Saa kpanyinli fa ye ahonle tie edwɛkɛ a ɔmaa arɛlekyekyelɛ.”—Luku 8:18.

Wɔ bɛ ɛkpɔlalɛ ne anu, saa mgbanyima siezie bɛ nwo a bɛbava “Sunsum nu ahyɛlɛdeɛ” bamaa

12. Nwane mɔ a hyia anwosesebɛmanlɛ wɔ asafo ne anu a, na duzu ati ɔ?

12 Nwane mɔ a mgbanyima ɛkpɔlalɛ bahola aboa bɛ a? Pɔɔlo dule ɔ gɔnwo mɔ mgbanyima folɛ kɛ, “bɛnlea mboane ne mɔ.” Nɔhalɛ nu, mboane ne mɔ amuala mɔɔ bɛwɔ asafo ne anu la hyia anwosesebɛmanlɛ, nolobɔlɛma nee adekpakyelɛma mɔɔ bɛva nɔhalɛlilɛ bɛzonle ɛvolɛ dɔɔnwo la boka nwo. Duzu ati a bɛhyia sunsum nu mboaneneavolɛma moalɛ ɛ? Ɔluakɛ saa ɔdwu mekɛ ne bie a ngyegyelɛ mɔɔ wɔ ewiade ye anu la kola maa menli ɛhye mɔ mɔɔ anwo yɛ se wɔ sunsum nu la asa nu to. Maa yɛzuzu edwɛkɛ bie mɔɔ zile Belemgbunli Devidi ɛbɛlabɔlɛ nu la anwo yɛva yɛhilehile deɛmɔti ɔdwu mekɛ ne bie a Nyamenle azonvolɛ mɔɔ bɛbɔ mɔdenle hyia bɛ gɔnwo mɔ moalɛ la anu.

“ABEHYAE RABOALE YE”

13. (a) Ɔlua tɛnlabelɛ mɔɔ Devidi hɔle nu la ati, duzu a anrɛɛ Yehyebaebinɔbo yɛ ye a? (b) Kɛ ɔyɛle mɔɔ Abehyae holale liele Devidi ɛ?

13 Mɔɔ bɛkpokpale Devidi kɛ belemgbunli la, yeangyɛ ɔ nee Golayate, Gate kakanyinlima ne anu ko bɔle ye zo. Devidi mɔɔ ɛnee lɛ akɛnrazilɛ la hunle kakanyinli ne. (1 Sam. 17:4, 48-51; 1 Edk. 20:5, 8) Ɛvolɛ bie anzi mɔɔ bɛ nee Filisitiama ɛlɛko bieko la, Devidi eza hɔvindele sonla kakanyinli bieko anyunlu. Bɛfɛlɛ ye Yehyebaebinɔbo,  ɔdaye noko ɔle Filisitia menli kakanyinlima ne mɔ anu ko. (2 Sam. 21:16) Noko akee, wɔ mekɛ ɛhye anu, ɔhale kyɛkyɛ, na kakanyinli ne ahu Devidi. Duzu ati ɔ? Tɛ kɛ ɛnee Devidi ɛnlɛ akɛnrasesebɛ ɔ, emomu ɛnee yevɛ. Kɛlɛtokɛ ne ka kɛ: “Ɛnee akee Devidi ɛvɛ kpole kpalɛ.” Mekɛ mɔɔ Yehyebaebinɔbo nwunle kɛ Devidi ɛvɛ la ɔyɛle ye adwenle kɛ “ɔkahu Devidi.” Noko mɔɔ ɔyɛle kɛ ɔye ye konle dadeɛ ne yeawɔ Devidi ala la, “Zɛluaya ara Abehyae raboale [Devidi]; ɔtetale Filisitianli kakanyinli ne na ɔhunle ye.” (2 Sam. 21:15-17) Ɔhale ekyii na bahu Devidi! Nea kɛzi Devidi anye balie kɛ Abehyae manle ɔ nye hɔle ɔ nwo na ɔboale ye ndɛndɛ wɔ mekɛ mɔɔ ɛnee ye ngoane la esiane nu la ɛ! Duzu a yɛbahola yɛazukoa yɛavi edwɛkɛ ɛhye anu a?

14. (a) Kɛzi yɛkola yɛdi ngyegyelɛ mɔɔ le kɛ Golayate la azo ɛ? (b) Kɛzi mgbanyima bahola aboa awie mɔ bamaa bɛanyia bɛ anwosesebɛ na bɛ nye alie bieko ɛ? Maa neazo.

14 Yɛle Gyihova menli, yemɔti yɛlɛyɛ yɛ ɛzonlenlɛ gyima ne wɔ ewiade amuala ɔnva nwo adenzilɛ biala mɔɔ Seetan nee ye menli ne fa ba yɛ nwo zo la. Yɛ nuhua bie mɔ ɛgyinla ngyegyelɛ mɔɔ le kakanyinli la anloa, noko kɛmɔ yɛfa yɛ nwo yɛto Gyihova anwo zo bɔkɔɔ la ati, yɛdi “Golayate” ɛhye mɔ anwo zo konim. Noko akee, ɔdwu mekɛ ne bie a, ngyegyelɛ ɛhye mɔɔ ewiade ne fa ba yɛ nwo zo la maa yɛfɛ na yɛ sa nu to. Wɔ tɛnlabelɛ zɛhae anu, yɛyɛ bɛtɛɛ mɔɔ ngyegyelɛ mɔɔ anrɛɛ yɛbahola yɛali zolɛ konim bɔbɔ la kola maa yɛ sa nu to a. Wɔ mekɛ ɛhye mɔ anu, moalɛ mɔɔ asafo nu kpanyinli bie bava amaa yɛ la bahola aboa yɛ yeamaa yɛ nye alie na yɛanyia anwosesebɛ bieko kɛmɔ yɛ mediema dɔɔnwo anwubielɛ kile la. Adekpakyelɛnli bie mɔɔ yebo ɛvolɛ 60 la hanle kɛ: “Mekɛ bie mɔɔ ɛze ɛhɔ la, ɛnee me nwo ɛnva me kpalɛ yemɔti daselɛlilɛ maa mefɛ. Kpanyinli bie nwunle kɛ menlɛ anwosesebɛ yemɔti ɔhwenle ɔbikyele me. Yɛbɔle Baebolo ne anu adawu mɔɔ maa anwosesebɛ la. Menvale ye nzuzulɛ ne minlinle gyima na menyianle nvasoɛ wɔ zo.” Eza ɔhanle kɛ: “Nea ɛlɔlɛ mɔɔ ɔwɔ nu kɛ kpanyinli zɔhane nwunle me bɛtɛɛyɛlɛ ne na ɔboale me a!” Ɛhɛe, yɛ nye die kɛ yɛlɛ mgbanyima mɔɔ bɛmaa bɛ nye kɔ yɛ nwo kɛ Abehyae na bɛziezie bɛ nwo kɛ ‘bɛbaboa yɛ la.’

BƐNWU “KƐ MESI MEKULO BƐ LA”

15, 16. (a) Duzu ati a ɛnee Pɔɔlo amediema diedima kulo ye edwɛkɛ kpalɛ a? (b) Kɛmɔti a yɛkulo asafo nu mgbanyima mɔɔ bɛdwenle yɛ nwo la edwɛkɛ ɛ?

15 Mboaneneavolɛ le gyima ɛsesebɛ. Ɔdwu mekɛ ne bie a mgbanyima ɛnla, bɛfa asɔneyɛlɛ bɛsuzu Nyamenle mboane ne anwo anzɛɛ bɛboa bɛ wɔ sunsum nu. (2 Kɔl. 11:27, 28) Noko akee, mgbanyima ne mɔ fa anyelielɛ yɛ bɛ gyima ne bɔkɔɔ kɛmɔ Pɔɔlo yɛle la. Ɔhɛlɛle Kɔlentema kɛ: “Ɔkɛyɛ me kɛnlɛma kɛ menwɔva mɔɔ melɛ la amuala, nee medame me sonlabaka ne menwɔboa bɛ.” (2 Kɔl. 12:15) Ɔlua ɛlɔlɛ mɔɔ ɛnee Pɔɔlo lɛ maa ɔ mediema la ati, ɔyelele ɔ nwo ɔboale bɛ kpalɛ. (Bɛgenga 2 Kɔlentema 2:4; Fel. 2:17; 1 Tɛs. 2:8) Ɔnyɛ nwanwane kɛ ɛnee mediema ne mɔ kulo Pɔɔlo edwɛkɛ la!—Gyi. 20:31-38.

16 Kɛ Nyamenle azonvolɛ mɔɔ bɛwɔ ɛkɛ ɛnɛ la, yɛdayɛ noko yɛkulo asafo nu mgbanyima mɔɔ bɛdwenle yɛ nwo la edwɛkɛ yɛɛ yɛda Gyihova ase wɔ yɛ nzɛlɛlɛ nu kɛ yeva bɛ yemaa yɛ la. Saa bɛkile kɛ bɛ nye die yɛ nwo a, bɛmaa yɛ anyelielɛ yɛ kpole. Bɛ ɛkpɔlalɛ maa yɛ nwo yɛ se sunsum nu. Bieko, yɛ nye sɔ kɛ bɛziezie bɛ nwo kɛ bɛbaboa yɛ wɔ mekɛ biala mɔɔ yɛbahyia moalɛ ɔlua ngyegyelɛ mɔɔ wɔ ewiade ɛhye anu la ati. Nɔhalɛ nu, Asafo nu mgbanyima ɛhye mɔ mɔɔ anye la ɛkɛ la le ‘yɛ gɔnwo mɔ gyimayɛvoma mɔɔ boa maa yɛ nye die.’

^ ɛden. 5 Eza bɛbizale mediema ɛhye mɔ kɛ, “Subane boni a saa kpanyinli lɛ a ɛ nye die nwo kpalɛ a?” Nuhua dɔɔnwo kpalɛ buale kɛ ɔwɔ kɛ “Bɛkola bɛbikye ye.” Yɛbahilehile subane kɛnlɛma ɛhye anu wɔ edwɛkɛ fofolɛ mɔɔ ɔbara la anu.