Wulu kɔ nuhua edwɛkɛ ne azo

Wulu kɔ nuninyɛne ne azo

Kɛzi Ɛnee Gyisɛse De Ɛ?

Kɛzi Ɛnee Gyisɛse De Ɛ?

Awie biala ɛnlɛ Gyisɛse nvoninli. Yeangyinla yeangye nvoninli anzɛɛ awie biala anyɛ ye nvoninli ɛlɛ. Noko ɔvi mekɛ tendenle, ye nvoninli ɛbu mbuluku, vidio nee ɛleka ngakyile dɔɔnwo.

Nɔhalɛ nu, menli ɛhye mɔ anu biala annwu Gyisɛse. Bie mɔ gyinla bɛ amaamuo, bɛ ɛzonlenlɛ nu diedi nee mɔɔ bɛ nye die nwo la azo yɛ Gyisɛse anwo nvoninli. Noko bɛ nvoninli ne mɔ bahola anyia menli nwo zo tumi anzɛɛ azɛkye adwenle mɔɔ bɛlɛ ye wɔ Gyisɛse nee ye ngilehilelɛ nwo la.

Menli mɔɔ dolɔdolɔ ninyɛne la maa ɔyɛ kɛ asɛɛ Gyisɛse ɛnee le sonla anwunvɔne bie mɔɔ ɔ ti zo enrinli wale, yezie ɔ kɛsa na yeyɛ ɔ nyunlu alɔbɔlɛ la. Wɔ nvoninli bie mɔ anu noko, bɛyɛ Gyisɛse kɛ sunsum nu abɔdeɛ anwo ɛzulolɛ bie mɔɔ ɛlɛta na awie biala ɛngola ɛmbikye ye la. Asoo zɔhane a amgba ɛnee Gyisɛse de a? Kɛ ɔkɛyɛ na yɛanwu ye ɛ? Mɔɔ baboa yɛ la a le kɛ, yɛbanlea mɔɔ Baebolo ne ka ye wɔ kɛzi ɛnee Gyisɛse de anwo la. Eza ɔbaboa yeamaa yɛanyia Gyisɛse anwo adwenle kpalɛ.

“ƐZIEZIELE SONLABAKA ƐMAANLE ME”

Ɛhye a Gyisɛse hanle ye wɔ asɔneyɛlɛ nu wɔ mekɛ mɔɔ bɛbɔle ye azu la a. (Hibuluma 10:5; Mateyu 3:13-17) Kɛzi ɛnee sonlabaka zɔhane de ɛ? Wɔ ɛvolɛ 30 anzi kolaa na ɛhye azi la, anwumabɔvolɛ Geebeleɛle yele hilele Mɛle kɛ: “Ɛbanrenzɛ wɔawo ralɛ nrenyia, . . . Nyamenle Ara.” (Luku 1:31, 35) Yemɔti ɛnee Gyisɛse di munli kɛ Adam la. (Luku 3:38; 1 Kɔlentema 15:45) Ɔkɛyɛ kɛ ɛnee Gyisɛse le nrenyia kɛnlɛma mɔɔ zɔho ye mame Mɛle mɔɔ le Dwuunli la.

Kɛ mɔɔ ɛnee Dwuuma amaamuo ne de la, ɛnee Gyisɛse ɛzie ɔ kɛsa. Ɛ nee bɛnle kɛ Wulomuma mɔɔ ɛnzie bɛ kɛsa la. Saa ɛnee ɛlɛ ɛ kɛsa a, ɔle enililɛ nee anyunlunyia; bɛngyakyi ye buzuu yɛɛ bɛdi ye eni. Ɔkɛyɛ kɛ Gyisɛse zieziele ɔ kɛsa nee ye enrinli ne kɛnlɛma. Ɛnee menli mɔɔ bɛkpa bɛ kɛ Nazalaema le kɛ Samesɛn la ala a ɛmpepɛ bɛ enrinli a.​—Ɛdianlɛ 6:5; Maanlebuvolɛma 13:5.

Gyisɛse kanyia ɛvolɛ 30 la ɛnee ɔle kapentanli. Ɔnle kɛ ɛnɛ mɔɔ bɛlɛ adwuleso ninyɛne la. (Maake 6:3) Ɔti ɔbayɛ kɛ ɛnee ɔ nwo yɛ se kpalɛ. Wɔ ye ɛzonlenlɛ gyima ne anu, ɔ ngomekye “ɔvoanle bɛdabɛ mɔɔ bɛlɛ mboane nee nlankɛ wɔ ɛzonlenlɛ sua ne anu la kɔsɔɔti na ɔwolale menli mɔɔ ɛlɛsenza ezukoa la ezukoa ne ɔguale na ɔbutubutule bɛ ɛkponle ne mɔ.” (Dwɔn 2: 14-17) Kyesɛ sonla mɔɔ anwo yɛ se la na ahola ayɛ ɛhye. Gyisɛse vale sonlabaka ne mɔɔ Nyamenle zieziele maanle ye la yɛle gyima mɔɔ bɛva bɛwula ɔ sa la. Ɔhanle kɛ: “Ɔwɔ kɛ mebɔ Nyamenle Belemgbunlililɛ ne anwo edwɛkpa ne nolo wɔ azua mɔɔ ɛha la noko azo, ɔluakɛ ɛhye ati a bɛzoanle me a.” (Luku 4:43) Ɛnee ɔhyia anwosesebɛ kpole amaa yeahola yeapɛ adenle tendenle yeahɔha edwɛkɛ ne wɔ Palɛsetanye.

“BƐRƐLA ME NWO ƐKE, NA MEBAMAA BƐALIE BƐ MENLE”

Anyelielɛ nee nganeɛdelɛ mɔɔ Gyisɛse vale hanle edwɛkɛ ɛhye la ammaa yeanyɛ se yeammaa “bɛdabɛ mɔɔ bɛvɛ na bɛzo adesoa la” kɛ bɛbara ɔ nwo ɛkɛ. (Mateyu 11:28-30) Ɛnee kɛzi ɔ nwo kpundi ye  na ɔyɛ nyele la di daselɛ kɛ amgba menli mɔɔ batie ye ngilehilelɛ ne la anwo badɔ bɛ. Ɛnee ngakula bɔbɔ kulo kɛ bɛkɔ Gyisɛse anwo ɛkɛ. Baebolo ne ka kɛ: “Na ɔmaanle ngakula ne mɔ zo ɔziele ɔ gyakɛ azo”​—Maake 10:13-16.

Gyisɛse dele nyane kolaa na yeawu ɛdeɛ, noko ɛnee ɔnle awie mɔɔ ɔ nwo yɛ anwunvɔne a. Kɛ neazo la, ɔboale wɔ atɔfolɛlielɛ bie abo wɔ Kana, ɔvale nzule ɔhakyile nwanye. (Dwɔn 2:1-11) Wɔ ayia fofolɛ bie abo noko, ɔhilehilele ɛzukoalɛdeɛ bie mɔɔ bɛ rɛle ɛnrɛvi ye ɛlɛ la.​—Mateyu 9:9-13; Dwɔn 12:1-8.

Mɔɔ tɛla biala la, Gyisɛse ngilehilelɛ gyima ne maanle menli nyianle dahuu ngoane nwo anyelazo. (Dwɔn 11:25, 26; 17:3) Mekɛ mɔɔ ye ɛdoavolɛ 70 rahanle mɔɔ bɛnwunle ye wɔ bɛ edwɛkɛhanlɛ gyima ne anu la, ɔlile “fɛlɛko” na ɔhanle kɛ: “Bɛli fɛlɛko kɛ bɛhɛlɛ bɛ aluma wɔ anwuma” la.​—Luku 10:20, 21.

“NOKO BƐMƐ, ƆNLE KƐ BƐYƐ ZƆ”

Ɛzonlenlɛ nu mgbanyima mɔɔ ɛnee wɔ Gyisɛse mekɛ zo la bɔle mɔdenle biala kɛ bɛtwe menli adwenle bara bɛ nwo zo na bɛahile bɛ tumi. (Ɛdianlɛ 15:38-40; Mateyu 23:5-7) Gyisɛse anyɛ zɔ, emomu ɔzele ye ɛzoanvolɛ ne mɔ kɛ “bɛmmakile bɛ tumi wɔ awie mɔ anwo zo.” (Luku 22:25, 26) Gyisɛse bɔle kɔkɔ kɛ, “Bɛnlea boɛ wɔ mɛla kilehilevolɛma mɔɔ bɛkulo kɛ bɛwula adɛladeɛ ndendenle bɛkpɔsa na bɛkulo gua zo ahyebizalɛ” la anwo.​—Maake 12:38.

Mɔɔ nee ɛhye le ngakyile la, ɛnee Gyisɛse ɛngile ɔ nwo wɔ menli nu. (Dwɔn 7:10, 11) Wɔ ye ɛzoanvolɛ nɔhavo 11 ne anu bɔbɔ ɛnee ɔnyɛ ɔ nwo sonla ngakyile. Yemɔti a mekɛ mɔɔ Dwudase ye ye amaa la, ɔvole ɔ nloa anwo ɔvale ɔyɛle “sɛkɛlɛneɛ” la.​—Maake 14:44, 45.

Yemɔti yɛnlɛ daselɛ dɔɔnwo ɛdeɛ noko ɔda ali kɛ tɛ kɛzi ɛnee Gyisɛse de la a bɛyɛ ye wɔ nvoninli dɔɔnwo anu la. Mɔɔ anwo hyia kpalɛ la a le kɛzi Gyisɛse de kɛkala la.

“YEHA MEKƐ EKYI BIE, EWIADE NE ƐNRƐNWU ME BIEKO”

Gyisɛse wule Kenle ko ne ala mɔɔ ɔhanle edwɛkɛ ɛhye la. (Dwɔn 14:19) Ɔvale ye ngoane ne ɔmaanle kɛ ‘ɛkpɔnedeɛ ɔliele menli dɔɔnwo.’ (Mateyu 20:28) Wɔ ye kenle nsa ne azo, Nyamenle “dwazole ye wɔ sunsum nu” na “ɔmaanle ɔyele ɔ nwo ɔhilele” ye ɛdoavolɛma bie mɔ. (1 Pita 3:18; Gyima ne 10:40) Mekɛ zɔhane mɔɔ Gyisɛse ɛdoavolɛ ne mɔ nwunle ye la ɛnee kɛzi ɔde ɛ? Ɔda ali kɛ ɛnee yehakyi mɔɔ ɔ gɔnwo mɔ kpalɛ bɔbɔ anwu ye sonla holɛ ɛkɛ ne ala. Mɛle Magedalene bɔbɔ zuzule kɛ ɔle awie mɔɔ nea tola zo yɛɛ ɛdoavolɛma nwiɔ ne mɔɔ ɛnee lua adenle zo ɛlɛkɔ Ɛmeeyɛse la nwunle ye kɛ ɔle ɛyɛvolɛ.​—Luku 24:13-18; Dwɔn 20:1, 14, 15.

Kɛzi Gyisɛse de ye ɛnɛ ɛ? Mɔɔ Gyisɛse wule la anzi ɛvolɛ 60, ɛzoanvolɛ Dwɔn nwunle ye wɔ ɛnyelɛzodeɛnwunlɛ nu. Dwɔn annwu kɛ ɛnee ɔlɛwu wɔ meanubaka zo. Emomu ɔnwunle ye kɛ “arelemgbunli Belemgbunli yɛɛ awulae mɔ Awulae,” wɔ Nyamenle Belemgbunlililɛ ne anu. Ɔnrɛhyɛ ɔbali Nyamenle agbɔvolɛ mɔɔ le sunsum evinli ne mɔ nee menli anwo zo konim, na yeava dahuu ngoane yearɛlɛ alesama.​—Yekile 19:16; 21:3, 4.