Wulu kɔ nuhua edwɛkɛ ne azo

Wulu kɔ nuninyɛne ne azo

Nyamenle ɛkpɔnedeɛ ahyɛlɛdeɛ ne mɔɔ maa yɛnyia dahuu ngoane nwo anyelazo la tɛla biala

 EDWƐKƐ TITILI | AHYƐLƐDEƐ MƆƆ TƐLA BIALA LA A LE BONI?

Ahyɛlɛdeɛ Mɔɔ Tɛla Biala La A Le Boni?

Ahyɛlɛdeɛ Mɔɔ Tɛla Biala La A Le Boni?

“Ahyɛlɛdeɛ kpalɛ biala nee ɛlolɛdeɛ biala mɔɔ di munli la vi anwuma, ɔvi Selɛ ne mɔɔ bɔle anwuma ahɛnlaneɛ la ɛkɛ.” (Gyemise 1:17) Zɔhane ngɛlɛlera ne ka yɛ anwuma selɛ Gyihova Nyamenle kpalɛyɛlɛ nwo edwɛkɛ. Noko, ahyɛlɛdeɛ dɔɔnwo mɔɔ Gyihova ɛva ɛmaa alesama la, nuhua ko bie wɔ ɛkɛ mɔɔ tɛla ɔ muala a. Boni ɔ? Gyisɛse edwɛkɛ mɔɔ wɔ Dwɔn 3:16 la ka kɛ: “Na Nyamenle hulole ewiade ne kpole kpalɛ yemɔti ɔvale ɔ Ra kokye ne ɔmaanle, amaa awie biala mɔɔ kɛnyia diedi wɔ ye nu la bɛanzɛkye ye na yeanyia dahuu ngoane.”

Nyamenle ara kokye ne mɔɔ ɔvale ɔmaanle yɛ la le ahyɛlɛdeɛ mɔɔ sonle bolɛ tɛla biala mɔɔ yɛ sa bahola aha ye a, amaa yɛanyɛ ngɛkɛlɛ yɛammaa ɛtane, mgbanyinliyɛlɛ nee ewule. (Edwɛndolɛ 51:5; Dwɔn 8:34) Yɛ mɔdenlebɔlɛ ɛnrɛhola ɛnrɛlie yɛ ɛnrɛvi ngyegyelɛ ɛhye mɔ anu. Noko ɔlua Nyamenle ɛlɔlɛ kpole ne ati, ɔmaanle yɛ mɔɔ yɛhyia nwo amaa yealie yɛ yeavi ngyegyelɛ ɛhye abo. Gyihova Nyamenle vale ɔ Ra mɔɔ ɔwole ye kokye, Gyisɛse, ɔmaanle alesama mɔɔ bɛlɛ bɛ nwo aze la kɛ ɛkpɔnedeɛ amaa bɛanyia dahuu ngoane nwo anyelazo. Duzu a le ɛkpɔnedeɛ ne? Duzu ati a nwolɛ hyia a? Kɛ ɔkɛyɛ na yɛanyia zolɛ nvasoɛ ɛ?

Ɛkpɔnedeɛ le ezukoa mɔɔ bɛtua bɛdie debie mɔɔ awie ɛminli ye anzɛɛ ɔdie awie ɔfi akɛlɛzonlenlɛ bo. Baebolo ne maa yɛnwu kɛ bɛbɔle yɛ awovolɛ mɔɔ bɛlimoa, Adam nee Yive la ɛnee ɛtane ɛnle bɛ nwo, amaa bɛava anyelielɛ bɛ nee bɛ mra mɔɔ bɛbawo bɛ la adɛnla paladaese azɛlɛ ne azo dahuu. (Mɔlebɛbo 1:26-28) Ɔyɛ alɔbɔlɛ kɛ bɛandie Nyamenle na ninyɛne ɛhye mɔ amuala vile bɛ sa​—bɛrayɛle ɛtanevolɛma. Boni a vile nu rale a? Baebolo ne bua kɛ: “Ɔlua sonla ko anwo zo ɛtane rale ewiade na ewule luale ɛtane nwo zo rale la, yɛɛ ewule dɛlɛle hanle menli kɔsɔɔti a, ɔluakɛ bɛ muala bɛyɛ ɛtane.” (Wulomuma 5:12) Kɛ anrɛɛ bɛbawo ngakula mɔɔ di munli la, Adam vale ɛtane nee zolɛ ahatualɛ​—ewule​—a wole bɛ a.

Wɔ ɛkpɔnedeɛ ne anwo, ɔwɔ kɛ bolɛ mɔɔ bɛtua la nee mɔɔ bɛminlinle ye la yɛ ko. Kɛmɔ Adam anye fuu andie Nyamenle la ati, ye ngoane mɔɔ di munli la vile ɔ sa. Kɛ mɔɔ Baebolo ne ka la, ɛhye maanle Adam abo zo amra yɛle ngɛkɛlɛ maanle ɛtane nee ewule. Yemɔti nwolɛ rahyianle kɛ awie mɔɔ di munli la​—Gyisɛse​—fa ye ngoane bɔ afɔle die yɛ fi akɛlɛzonlenlɛ ɛhye anu. (Wulomuma 5:19; Ɛfɛsɛsema 1:7) Kɛmɔ Nyamenle duale ɛkpɔnedeɛ ɛhye la ati a alesama ɛnyia anyelazo kɛ bɛbazia bɛanyia tɛnlabelɛ kɛnlɛma ne mɔɔ Adam minlinle la​—dahuu ngoane wɔ paladaese.​—Yekile 21:3-5.

Saa yɛnea gyima mɔɔ Nyamenle ɛkpɔnedeɛ ahyɛlɛdeɛ ne di la a, ɔnyɛ nwanwane kɛ ahyɛlɛdeɛ ɛhye mɔɔ tɛla biala la ɛbuke dahuu ngoane nwo adenle ɛmaa yɛ la. Amaa yɛahile “ɛlolɛdeɛ” ɛhye anwo anyezɔlɛ la, bɛmaa yɛzia yɛzuzu ninyɛne mɔɔ maa zɔhane ahyɛlɛdeɛ ne yɛ mɔɔ sonle bolɛ bo zolɛ la anwo, kɛ mɔɔ yɛha ye wɔ edwɛkɛ mɔɔ li ɛhye anyunlu anu la.

Ɔmaa yɛ sa ka mɔɔ yɛkulo. Sonla ko biala akunlu a anrɛɛ ɔnrɛwu ɛlɛ. (Nolobɔvo ne 3:11) Noko yɛdayɛ yɛnrɛhola yɛnrɛha kɛ yɛtɛnla aze mekɛ tendenle mɔɔ yɛkulo la. Ɛkpɔnedeɛ ne bahola amaa ɛhye ara nu.  Baebolo ne ka kɛ: “Ɔluakɛ ɛtane ahatualɛ a le ewule na ahyɛlɛdeɛ ne mɔɔ Nyamenle fa maa la a le dahuu ngoane wɔ yɛ Awulae Kelaese Gyisɛse ati.”​—Wulomuma 6:23.

Ɔdi yɛ ngyianlɛ nwo gyima. Alesama angola anva ɛkpɔnedeɛ ne ammaa. Baebolo ne kile nu kɛ: ‘Bɛ ngoane ɛkpɔnedeɛ ne bolɛ yɛ se mɔɔ bɛnrɛhola ye tua ɛlɛ.’ (Edwɛndolɛ 49:8) Ɛnee yɛhyia nwo ɛsesebɛ na ɔwɔ kɛ Nyamenle fa ɔ nwo die nu na ɔdie yɛ ɔfi ɛtane nee ewule akɛlɛyɛlɛ bo. Noko ‘ɔlua Kelaese Gyisɛse ɛkpɔnedeɛ ne mɔɔ ɔduale la azo,’ Nyamenle ɛva mɔɔ yɛhyia nwo la ɛmaa yɛ.​—Wulomuma 3:23, 24.

Ɔvale ɔmaanle wɔ mekɛ kpalɛ nu. Baebolo ne ka kɛ: “Mekɛ mɔɔ ɛnee yɛtɛde ɛtanevolɛma la, Kelaese wule maanle yɛ.” (Wulomuma 5:8) Kɛmɔ ɔvale ɛkpɔnedeɛ ne ɔmaanle mekɛ mɔɔ “ɛnee yɛtɛde ɛtanevolɛma la” ati, ɔle adenle mɔɔ Nyamenle luale zo lale ye ɛlɔlɛ ne ali hilele yɛ ɔnva nwo kɛ yɛnli munli la. Yɛlɛyia yɛ ɛtane ne anwo ngyegyelɛ ɛdeɛ noko yemaa yɛnyia anyelazo.

Ɔda adwenle kpalɛ ali. Baebolo ne ka deɛmɔti Nyamenle vale ɔ Ra ne maanle kɛ ɛkpɔnedeɛ la anwo edwɛkɛ kɛ: “Ɛhye azo a bɛluale bɛlale Nyamenle ɛlɔlɛ ne ali wɔ yɛ nwo a, Nyamenle zoanle ɔ Ra kokye ne wɔ ewiade amaa ɔlua ɔ nwo zo yɛanyia ngoane. Ɛhye anu a ɛlɔlɛ ne wɔ a, tɛ yɛdayɛ a yɛhulole Nyamenle a, emomu yemɔ a ɔhulole yɛ a.”​—1 Dwɔn 4:9, 10.

Kɛzi yɛbahile kɛ yɛ nye sɔ ahyɛlɛdeɛ ɛhye ɛ? Kakye kɛ Gyisɛse hanle ye wɔ Dwɔn 3:16 kɛ “awie biala mɔɔ kɛnyia diedi wɔ ye nu la” banyia ngoane. Baebolo ne kile diedi nu kɛ “ɔle anwodozo mɔɔ yɛfa yɛkendɛ debie mɔɔ yɛ nye la zo.” (Hibuluma 11:1) Amaa yɛanyia anwodozo ɛhye la, ɔwɔ kɛ yɛnyia nɔhalɛ ndelebɛbo. Ɛhye ati, yɛmaa wɔ anwosesebɛ kɛ tɔ alagye sukoa Gyihova Nyamenle mɔɔ vale “ɛlolɛdeɛ” ɛhye maanle la anwo debie. Na nwu debie mɔɔ saa ɛyɛ a ɛbanyia dahuu ngoane ne mɔɔ bɛva bɛbɔ ɛwɔkɛ ɔlua Gyisɛse ɛkpɔnedeɛ ne azo la.

Ɛbahola wɔazukoa Baebolo nu edwɛkɛ ɛhye mɔ wɔ www.jw.org azo. Gyihova Alasevolɛ anye balie kɛ bɛbaboa wɔ. Yɛlɛ anwodozo kɛ mekɛ mɔɔ ɛlɛsukoa nvasoɛ mɔɔ wɔ ahyɛlɛdeɛ kpole ɛhye azo anwo debie la, ɛbava anyelielɛ wɔaha kɛ: “Melua yɛ Awulae Gyisɛse Kelaese anwo zo meyɛ Nyamenle mo!”​—Wulomuma 7:25.