Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILI | AHYƐLƐDEƐ MƆƆ TƐLA BIALA LA A LE BONI?

Kɛzi Ɛbanwu Ahyɛlɛdeɛ Mɔɔ Fɛta La

Kɛzi Ɛbanwu Ahyɛlɛdeɛ Mɔɔ Fɛta La

Ɔnla aze kɛ ɛbanwu ahyɛlɛdeɛ mɔɔ fɛta mɔɔ ɔwɔ kɛ ɛfa ɛkyɛ awie la. Ɔluakɛ ahenle mɔɔ die ahyɛlɛdeɛ ne la a bahile kɛzi ɔsonle bolɛ a. Yɛɛ asolo kɛzi awie biala nwu ahyɛlɛdeɛ bie a.

Kɛ neazo la, kakula bie anye balie ɛlɛtɔlɔneke ninyɛne nwo kɛ ahyɛlɛdeɛ mɔɔ sonle bolɛ. Noko, kpanyinli bie anye balie ahyɛlɛdeɛ mɔɔ le ngakyile noko ɔsonle bolɛ kpalɛ la anwo, le kɛ abusua agyadeɛ bie mɔɔ ɛhyɛ la. Wɔ amaamuo bie mɔ anu, ezukoa le ahyɛlɛdeɛ mɔɔ ngakula nee mgbanyinli anye die nwo ɔluakɛ ɔboa ɔmaa bɛtɔ ninyɛne mɔɔ bɛ nye die nwo la.

Ɔnva nwo ngyegyelɛ ɛhye mɔ, menli dɔɔnwo ɛlɛbɔ mɔdenle akpondɛ ahyɛlɛdeɛ mɔɔ fɛta la amaa bɛ alɔvolɛ. Ɔnla aze kɛ yɛbanyia ahyɛlɛdeɛ ɛhye mɔ, noko saa yɛmaa ninyɛne bie mɔ tɛnla yɛ adwenle nu wɔ mekɛ mɔɔ yɛlɛkpondɛ ahyɛlɛdeɛ mɔɔ fɛta la a, ɔbaboa yɛ. Yɛzuzu ninyɛne nna mɔɔ bamaa ahenle mɔɔ die ahyɛlɛdeɛ ne anye alie la anwo.

Mɔɔ ahenle kulo la. Nrenyia bie mɔɔ vi Belfast, Northern Ireland la hanle kɛ, basekɛ mɔɔ bɛvale bɛmaanle ye wɔ mekɛ mɔɔ ɛnee yeli ɛvolɛ 10 anzɛɛ 11 la le ahyɛlɛdeɛ mɔɔ tɛla biala a. Duzu ati ɔ? Ɔhilele nu kɛ; “Ɛnee mehyia nwo.” Ɛhye kile kɛ, mɔɔ awie hyia nwo la a bahile kɛ ɔ nye balie ahyɛlɛdeɛ bie anwo anzɛɛ ɔ nye ɛnrɛlie nwo a. Yemɔti suzu ahenle mɔɔ ɛkulo kɛ ɛkyɛ ye debie la anwo. Bɔ mɔdenle kɛ ɛbanwu mɔɔ sonle bolɛ maa ahenle la, ɔluakɛ menli kulo ninyɛne mɔɔ sonle bolɛ maa bɛ la. Kɛ neazo la, mbusua mɔɔ bɛbɔ nu bɛyɛ ninyɛne la anwo hyia mgbanyima kpalɛ. Bɛ nye balie kɛ bɛ nee bɛ mra nee bɛ nlɔnra babɔ nu ayɛ ninyɛne. Saa abusua ne ɛlɛkɔ akpɔsa bie na bɛ nee bɛ kɔ a bɛ nye die nwo tɛla ahyɛlɛdeɛ biala.

Debie mɔɔ baboa wɔ yeamaa wɔanwu mɔɔ ahenle kulo la a le kɛ ɛbayɛ tievolɛ kpalɛ. Baebolo ne maa yɛ anwosesebɛ kɛ ‘yɛyɛ ye ndɛ yɛdie edwɛkɛ, yɛmmapele yɛ nwo yɛtendɛ.’ (Gyemise 1:19) Saa dahuu ɛ nee ɛ gɔnwo mɔ anzɛɛ wɔ mbusuafoɔ ɛlɛbɔ adawu a, tie bɛ kpalɛ na nea saa ɛbanwu mɔɔ bɛkulo nee mɔɔ bɛngulo la a. Ɛhye baboa wɔ yeamaa  wɔanwu ahyɛlɛdeɛ mɔɔ saa ɛfa ɛmaa bɛ a, bɛ nye balie nwo la.

Mɔɔ ahenle ne hyia nwo la. Saa ahyɛlɛdeɛ bie ɛnzonle bolɛ bɔbɔ na ɔdi ngyianlɛ titili bie anwo gyima a, menli nye die nwo. Noko kɛ ɔkɛyɛ na wɔanwu awie ngyianlɛ ɛ?

Adenle sikalɛ mɔɔ bie a ɛbahola wɔalua zo wɔanwu ye la a le kɛ ɛbabiza ahenle ne debie mɔɔ ɔhyia nwo anzɛɛ mɔɔ ɔkulo la. Noko wɔ bie mɔ afoa nu, ɛhye ɛyɛlɛ te bɛ anyelielɛ zo, ɔluakɛ bɛkulo kɛ bɛkyɛ awie mɔ debie wɔ mekɛ mɔɔ bɛ nye ɛnla la. Bieko, menli bie mɔ bahola aha ninyɛne mɔɔ bɛkulo nee mɔɔ bɛngulo la anwo edwɛkɛ, noko bɛnda bɛnga bɛ ngyianlɛ nwo edwɛkɛ.

Yemɔti gua ɛ nye aze na nea ahenle tɛnlabelɛ nu. Ɔle kakula, kpanyinli, ɔtɛgyale, yegya, yebɔ ewole, ɔ hu anzɛɛ ɔ ye ɛwu, ɔyɛ gyima anzɛɛ yekpɔne gyima ɔ? Akee suzu ahyɛlɛdeɛ mɔɔ bahola ali ahenle ngyianlɛ nwo gyima la anwo.

Amaa wɔanwu ahenle ne mɔɔ ɛfa ahyɛlɛdeɛ ne wɔamaa ye la ngyianlɛdeɛ la, ɛ nee menli mɔɔ ɛhɔ tɛnlabelɛ ko ne ala bie anu la ɛli adwelie. Bɛbahola bɛamaa wɔanwu ngyianlɛ titili bie mɔɔ menli dɔɔnwo ɛnze la. Ninyɛne ɛhye mɔ bahola aboa wɔ yeamaa wɔava ahyɛlɛdeɛ mɔɔ di awie mɔ ngyianlɛ titili bie anwo gyima la wɔamaa wɔ mekɛ mɔɔ bɛ nye ɛnla la.

Mekɛ mɔɔ fɛta la. Baebolo ne ka kɛ: “Edwɛkɛ kpalɛ wɔ ye mekɛ nloa le kpalɛ somaa!” (Mrɛlɛbulɛ 15:23) Ngɛlɛlera ɛhye maa yɛnwu kɛ nvasoɛ dɔɔnwo wɔ edwɛkɛ kpalɛ mɔɔ bɛka ye wɔ ye mekɛ nloa la azo. Kɛ ɔde wɔ yɛ nyɛleɛ nu la ɛne. Kɛ mɔɔ edwɛkɛ mɔɔ bɛka ye wɔ ye mekɛ nloa la maa tievolɛ ne anye die la, zɔhane ala a ahyɛlɛdeɛ mɔɔ bɛfa bɛmaa wɔ mekɛ kpalɛ nu la bahola amaa ahenle mɔɔ die deɛ ne la anye alie a.

Ɛ gɔnwo bie ɛlɛgya. Ɔnrɛhyɛ kakula bie bawie sukulu. Agyalɛma bie ɛlɛnea bɛ ra fofolɛ mɔɔ bɛbawo ye la ade. Ɛhye mɔ le mekɛ kpalɛ mɔɔ yɛbahola yɛava ahyɛlɛdeɛ yɛamaa la anwo neazo ekyi. Bie mɔ yɛ mekɛ titili ɛhye mɔ mɔɔ bazi wɔ ɛvolɛ ne anu la anwo kɛlɛtokɛ. Ɛhye boa bɛ maa bɛsiezie bɛ nwo bɛsie na ɔmaa bɛnwu ahyɛlɛdeɛ mɔɔ ɔwɔ kɛ bɛfa bɛmaa la. *

Ɔnle kɛ ɛkyɛ debie wɔ mekɛ titili bie anu ala. Ɛbahola wɔahyɛ debie wɔ mekɛ biala amaa wɔanyia anyelielɛ. Noko ɔwɔ kɛ ɛnea boɛ. Kɛ neazo la, saa nrenyia bie dwazo ala a ɔkyɛ raalɛ bie debie a, wɔannea a raalɛ ne banyia adwenle bie kɛ ɔ nye die ɔ nwo. Saa tɛ zɔhane bodane ne ati a ɛlɛfa ahyɛlɛdeɛ ne wɔamaa a, ɔbava ngyegyelɛ yeara. Ɛhye maa yɛnwu deɛmɔti ɔwɔ kɛ yɛsuzu debie bieko mɔɔ anwo hyia kpalɛ anwo la​—deɛmɔti ɛlɛfa ahyɛlɛdeɛ ne wɔamaa la.

Deɛmɔti ɛlɛfa ahyɛlɛdeɛ ne wɔamaa la. Kɛ mɔɔ neazo ne mɔɔ limoa la kile la, ɔle kpalɛ kɛ yɛbazuzu nwo saa ahenle mɔɔ yɛkyɛ ye debie la banyia adwenle ngakyile wɔ nwolɛ a. Bieko, ɔwɔ kɛ ahenle mɔɔ ɔlɛfa ahyɛlɛdeɛ ne yeamaa la suzu deɛmɔti ɔlɛyɛ zɔ la anwo. Menli dɔɔnwo bahulo kɛ bɛfi ahonle kpalɛ nu bɛfa ahyɛlɛdeɛ bɛmaa. Noko bie mɔ fa ahyɛlɛdeɛ maa wɔ mekɛ titili bie anu wɔ ɛvolɛ ne anu ɔluakɛ bɛte nganeɛ kɛ ye biala anu ɔwɔ kɛ bɛkyɛ debie la ati. Eza bie mɔ kyɛ debie amaa awie mɔ noko ahyɛ bɛ debie.

Duzu a ɛyɛ a ɔkile kɛ ɛfa adwenle kpalɛ a ɛkyɛ debie a? Baebolo ne ka kɛ: “Bɛva ɛlɔlɛ bɛyɛ debie biala mɔɔ bɛyɛ la.” (1 Kɔlentema 16:14) Saa ɛdwenle ahenle mɔɔ ɛfa ahyɛlɛdeɛ ne wɔamaa ye la anwo na ɛfi ɛlɔlɛ nu ɛkyɛ debie a, bɛbava anyelielɛ bɛalie wɔ ahyɛlɛdeɛ ne na ɛhye bamaa ɛ nye alie kpalɛ. Saa ɛfi wɔ ahonle nu ɛkyɛ debie a, ɔmaa yɛ anwuma selɛ ne anye die. Mekɛ mɔɔ Kilisienema mɔɔ wɔ tete Kɔlente la vile bɛ ahonle nu vale anyelielɛ boale wɔ esiane mekɛ nu wɔ Dwudiya la,  ɛzoanvolɛ Pɔɔlo hanvole bɛ. Ɔhanle kɛ, “Nyamenle kulo mɔɔ te ɔ nyunlu kyɛ debie la.”​—2 Kɔlentema 9:7.

Saa ɛdwenle ninyɛne mɔɔ yɛzuzu nwolɛ la anwo kpalɛ a, ɔbaboa wɔ yeamaa wɔahyɛ menli ninyɛne mɔɔ bamaa bɛ nye alie la. Ninyɛne ɛhye mɔ nee dɔɔnwo mɔɔ boka nwo la a Nyamenle zuzule nwo wɔ mekɛ mɔɔ ɔlɛfa ahyɛlɛdeɛ mɔɔ tɛla biala yeamaa alesama la a. Yɛsɛlɛ wɔ kenga ahyɛlɛdeɛ kpole zɔhane anwo debie wɔ edwɛkɛ mɔɔ doa zo la anu.

^ ɛden. 13 Menli dɔɔnwo noko kyɛ debie wɔ awolɛ kenle ɛlilɛ nee ɛvoyialilɛ ngakyile nu. Noko fane dɔɔnwo ne ala ninyɛne mɔɔ kɔ zo wɔ ɛvoyialilɛ ɛhye mɔ abo la nee mɔɔ Baebolo ne kilehile la ɛnyia. Nea edwɛkɛ “Kengavolɛma Biza Kɛ​—Ɔwɔ Kɛ Kilisienema Di Bolonyia Ɔ?” mɔɔ wɔ magazine ɛhye anu la.