Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILI | ANWUMABƆVOLƐMA​—ASOO BƐWƆ ƐKƐ? DEƐMƆTI ƆHYIA LA

Bɛ Nwo Nɔhalɛ Edwɛkɛ

Bɛ Nwo Nɔhalɛ Edwɛkɛ

Ɛkulo kɛ ɛnwu anwumabɔvolɛ ne mɔ anwo nɔhalɛ edwɛkɛ​—kɛzi bɛde, kɛzi bɛrale nee ninyɛne mɔɔ bɛyɛ la ɔ? Ɛleka kpalɛ biala ɛnle ɛkɛ mɔɔ yɛbanwu bɛ nwo edwɛkɛ kɛ Baebolo ne anu ala. (2 Timote 3:16) Duzu a Baebolo ne ka a?

  • Kɛmɔ Nyamenle le sunsum la, zɔhane ala a anwumabɔvolɛma noko de a, ‘bɛnlɛ nwonane nee mbowule.’ Anwumabɔvolɛma mɔɔ di nɔhalɛ la nee Nyamenle a wɔ anwuma a.​—Luku 24:39; Mateyu 18:10; Dwɔn 4:24.

  • Ɔdwu mekɛ ne bie a, bɛkakyi bɛ nwo menli na bɛbayɛ gyima mɔɔ Gyihova ɛva ɛwula bɛ sa la, bɛwie a, bɛazia bɛahakyi bɛ nwo.​—Maanlebuvolɛma 6:11-23; 13:15-20.

  • Ɔwɔ nu kɛ Baebolo ne ka anwumabɔvolɛma anwo edwɛkɛ kɛ bɛle mrenyia yɛɛ saa dahuu bɛkakyi a bɛyɛ mrenyia noko saa ɛkɔ anwuma a, bɛnle mrenyia anzɛɛ mraalɛ. Bɛngya yɛɛ bɛnwo mralɛ. Eza bɛanlimoa bɛambɔ anwumabɔvolɛma kɛ menli bɛangua azɛlɛ ye azo kɛ​—mbɔdɔma, ngakula, anzɛɛ mgbavolɛ. Gyihova a bɔle anwumabɔvolɛ ne mɔ a; ɔti Baebolo ne fɛlɛ bɛ kɛ “Nyamenle . . . amra.”​—Dwobu 1:6; Edwɛndolɛ 148:2, 5.

  • Baebolo ne ka “menli nee anwumabɔvolɛma aneɛ ngakyile” nwo edwɛkɛ fa kile kɛ sunsum nu menli noko lɛ ɛdendɛlɛ nee aneɛ mɔɔ bɛka a. Ɔwɔ nu kɛ Nyamenle dua anwumabɔvolɛma anwo zo nee yɛ tendɛ, noko ɔngulo kɛ yɛsonle bɛ anzɛɛ yɛyɛ asɔne yɛkile bɛ.​—1 Kɔlentema 13:1; Yekile 22:8, 9.

  • Anwumabɔvolɛma apenle apenle dɔɔnwo mɔɔ bie a bɛbayɛ kɛyɛ mgbe mgbe la a wɔ ɛkɛ a. *​—Yekile 5:11; 9:16.

  • Anwumabɔvolɛma le “katakyiema”​—bɛlɛ tumi bɛtɛla alesama​—yɛɛ bɛze nrɛlɛbɛ bɛtɛla menli. Bɛ nwo yɛ ndɛ kpalɛ tɛla debie biala mɔɔ yɛze ye wɔ ewiade la.​—Edwɛndolɛ 103:20; Daneɛle 9:20-23.

  • Ɔnva nwo kɛ bɛ adwenle nu ɛbuke na bɛlɛ tumi kpole la, tɛ debie biala a bɛkola ye yɛ a yɛɛ tɛ debie biala a bɛze ye a.​—Mateyu 24:36; 1 Pita 1:12.

  • Bɛvale subane ngakyile mɔɔ le ngɛnlɛma la bɛbɔle bɛ yɛɛ bɛbɔle bɛ mɔɔ bɛlɛ adenle bɛsi bɛ ti anwo kpɔkɛ. Yemɔti bɛkola bɛkpa kɛ bɛbayɛ mɔɔ le kpalɛ anzɛɛ ɛtane. Ɔyɛ alɔbɔlɛ kɛ anwumabɔvolɛ ne mɔ bie yɛle Nyamenle anwo anzosesebɛ la.​—Dwuudu 6.

^ ɛden. 8 Wɔ aneɛ mɔɔ bɛvale bɛhɛlɛle Baebolo ne la anu edwɛkɛkpɔkɛ mɔɔ bɛhile ɔ bo apenle apenle kile 10,000. Apenle bulu fane apenle bulu le mgbe 100. Noko Yekile buluku ne ka anwumabɔvolɛma mgbe mgbe dɔɔnwo anwo edwɛkɛ!