Wulu kɔ nuhua edwɛkɛ ne azo

Wulu kɔ nuninyɛne ne azo

 EDWƐKƐ TITILI | ANWUMABƆVOLƐMA​—ASOO BƐWƆ ƐKƐ? DEƐMƆTI ƆHYIA LA

Kɛzi Anwumabɔvolɛma Bahola Aboa Wɔ La

Kɛzi Anwumabɔvolɛma Bahola Aboa Wɔ La

Anwumabɔvolɛ nɔhavoma anye die alesama anwo na bɛboa bɛmaa Gyihova bodane ba nu. Mɔɔ Nyamenle bɔle azɛlɛ ye la anwumabɔvolɛma “dole edwɛne na Nyamenle amra kɔsɔɔti vale fɛlɛkolilɛ deɛdeanle nu.” (Dwobu 38:4, 7) Ɔvi tete ne amuala anwumabɔvolɛma anye ɛbolo kɛ “bɛkɛde” ngapezo mɔɔ fale mɔɔ bazi azɛlɛ ye azo kenle bie la abo.​—1 Pita 1:11, 12.

Baebolo ne kile kɛ, ɔdwu mekɛ ne bie a anwumabɔvolɛma bɔ Nyamenle azonvolɛ nwo bane fa di ye bodane nwo gyima. (Edwɛndolɛ 34:7) Kɛ neazo la:

  • Mɔɔ Nyamenle vale ɛzɛkyelɛ rale Sodɔm nee Gomɔla anwo zo la, anwumabɔvolɛma boale Lɔɔto nee ye abusua ne maanle bɛvile ɛkɛ.​—Mɔlebɛbo 19:1, 15-26.

  • Mekɛ mɔɔ bɛvale Hibulu mgbavolɛ nsa ne bɛguale senle nu wɔ tete Babelɔn la ‘Nyamenle zoanle anwumabɔvolɛ maanle ɔraliele bɛ.’​—Daneɛle 3:19-28.

  • Mɔɔ tenlenenli Daneɛle lale awenade tunli nu nɔɔzo ne amuala la, ɔhanle kɛ ɔde ngoane nu ɔluakɛ ‘Nyamenle zoanle anwumabɔvolɛ maanle ɔratotole awenade ne mɔ anloa anu’​—Daneɛle 6:16, 22.

Ɔvi tete ne anwumabɔvolɛma ɛboa menli mɔɔ di nɔhalɛ la

ANWUMABƆVOLƐ NE MƆ BOALE ALIMOA KILISIENE ASAFO NE

Nyamenle anwumabɔvolɛma mɔɔ ɔsoɔzoa bɛ la vale bɛ nwo liele alimoa Kilisienema asafo ne gyimalilɛ nu, saa yemɔ bamaa Gyihova bodane ara nu a. Kɛ neazo la:

  • Anwumabɔvolɛ bie bukele efiade nlenkɛ maanle ɛzoanvolɛma ne hɔdoale bɛ edwɛkɛhanlɛ gyima ne azo wɔ ɛzonlenlɛ sua ne anu.​—Gyima ne 5:17-21.

  • Mekɛ mɔɔ Yiteyopeanli bie hɔzonlenle wɔ Gyɛlusalɛm na ɔlɛkɔ Gaza la, anwumabɔvolɛ maanle edwɛkpakavolɛ Felepe hɔhanle edwɛkɛ ne bie hilele ye.​—Gyima ne 8:26-33.

  • Mekɛ dwule kɛ Nyamenle maa menli mɔɔ ɛnle Dwuuma la arayɛ Kilisienema la, anwumabɔvolɛ bie yele ɔ nwo hilele Wulomu sogya kpanyinli Kɔnileɛse kɛ ɔlie ɛzoanvolɛ Pita wɔ ye sua nu.​—Gyima ne 10:3-5.

  • Mɔɔ ɛnee ɛzoanvolɛ Pita la efiade la, anwumabɔvolɛ rayele ye vile ɛkɛ.​—Gyima ne 12:1-11.

 KƐZI ANWUMABƆVOLƐMA BAHOLA ABOA WƆ LA

Daselɛ biala ɛnle ɛkɛ mɔɔ kile kɛ ɛnɛ Nyamenle maa anwumabɔvolɛma boa menli wɔ nwanwane adenle zo kɛmɔ bɛha wɔ Baebolo ne anu la. Noko akee, Gyisɛse hanle yɛ mekɛ ye azo anwo edwɛkɛ kɛ: “Na bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala bɛava bɛali maanle maanle ne amuala daselɛ, kolaa na awieleɛ ne ara.” (Mateyu 24:14) Asoo ɛze kɛ anwumabɔvolɛma ɛlɛboa Gyisɛse ɛdoavolɛma wɔ gyima ɛhye anu?

Anwumabɔvolɛma boa ewiade amuala edwɛkɛhanlɛ gyima ne

Yekile buluku ne maa yɛnwu kɛ anwumabɔvolɛma anye die kɛ bɛbaboa menli kɔsɔɔti bɛamaa bɛade Gyihova nee ye bodane mɔɔ ɔlɛ ɔmaa alesama la anwo edwɛkɛ. Ɛzoanvolɛ Dwɔn hɛlɛle kɛ: “Menwunle anwumabɔvolɛ bieko kɛ ɔlua anwomanyunlu, na ɔlɛ dahuu edwɛkpa ne kɛ ɔkabɔ ye nolo yeahile bɛdabɛ mɔɔ bɛde azɛlɛ ye azo la, maanle nee mbusua nee aneɛ nee menli kɔsɔɔti. Ɔvale ɛnelɛ kpole ɔhanle kɛ: ‘Bɛzulo Nyamenle na bɛwula ye anyunlunyia, ɔluakɛ ye ndɛnebualɛ mekɛ ne ɛdwu, yemɔti bɛzonle Mɔɔ bɔle anwuma nee azɛlɛ ye nee nyevile nee azule muala la.’” (Yekile 14:6, 7) Yɛ mekɛ ye azo anwubielɛ dɔɔnwo kile kɛ anwumabɔvolɛma ɛlɛboa ewiade amuala Belemgbunlililɛ edwɛkɛhanlɛ gyima ne. Nɔhalɛ nu, saa ɛtanevolɛ ko nu ɔ nwo na ɔsia ɔba Gyihova ɛkɛ a, “anwumabɔvolɛma di fɛlɛko.”​—Luku 15:10.

Saa edwɛkɛhanlɛ gyima ne ba awieleɛ a, duzu a bazi a? “Anwuma ɛlɔnema” baboa Gyisɛse Kelaese, arelemgbunli nu Belemgbunli ne, wɔ “Nyamenle, Tumivolɛ Bedevinli ne kenle kpole ne anu konle ne,” wɔ Amagɛdɔn. (Yekile 16:14-16; 19:14-16.) Anwumabɔvolɛma mɔɔ lɛ tumi la nee Gyisɛse bayɛ ndɛnebuavolɛma na bɛali “bɛdabɛ mɔɔ bɛndie yɛ Awulae Gyisɛse anwo edwɛkpa ne la nzenralɛ.”​—2 Tɛsalonaekama 1:7, 8.

Nyia anwodozo kɛ, anwumabɔvolɛ ne mɔ anye die ɛ nwo. Bɛ nye die menli mɔɔ kulo kɛ sonle Nyamenle la anwo kpalɛ yɛɛ Gyihova ɛlua bɛ nwo zo ɛboa ye nɔhalɛ azonvolɛ mɔɔ wɔ azɛlɛ ye azo la fane dɔɔnwo.​—Hibuluma 1:14.

Ɔwɔ kɛ yɛ nuhua ko biala si kpɔkɛ mɔɔ anwo hyia la. Asoo ɛbadie na wɔali edwɛkpa ne mɔɔ bɛlɛbɔ ye nolo wɔ ewiade amuala la azo ɔ? Gyihova Alasevolɛ mɔɔ de wɔ kpalɛ ne azo la anye balie nwo kɛ bɛbaboa wɔ amaa wɔanyia Nyamenle anwumabɔvolɛ ne mɔ moalɛ.