Wulu kɔ nuhua edwɛkɛ ne azo

Wulu kɔ nuninyɛne ne azo

Duzu Ati A Yɛyɛ Mrelera Na Yɛwu A?

Duzu Ati A Yɛyɛ Mrelera Na Yɛwu A?

NYAMENLE ambɔ sonla kɛ ɔrawu. Bɛvale nwonane nee adwenle mɔɔ di munli la a bɛbɔle yɛ awovolɛ mɔɔ limoa, Adam nee Yive a; ɔti anrɛɛ bɛtɛte aze. Yɛnwu ɛhye wɔ edwɛkɛ mɔɔ Gyihova hanle hilele Adam wɔ mekɛ mɔɔ ɔka bakama bie mɔɔ fifile wɔ Yidɛn tola ne anu la anwo edwɛkɛ la.

Nyamenle zele Adam kɛ, “kenle ko ne mɔɔ ɛkɛli [bakama ne] bie la, ɛbawu.” (Mɔlebɛbo 2:17) Anrɛɛ mɛla ɛhye anwo ɛngyia saa ɛnee ɔwɔ kɛ Adam yɛ ɛrelera na ɔwu a. Ɛnee Adam ze kɛ saa yeanli bakama ne bie a ɔnrɛwu ɛlɛ.

NYAMENLE AMBƆ SONLA KƐ ƆRAWU

Ɛnee ɔngyia kɛ Adam nee Yive di bakama zɔhane ɔluakɛ ɛnee bakama dɔɔnwo wɔ tola ne anu mɔɔ bɛbahola bɛali bie a. (Mɔlebɛbo 2:9) Saa agyalɛma mɔɔ limoa la anli bakama ne bie a, anrɛɛ ɔbahile kɛ bɛyɛ tieyɛ bɛmaa Ahenle mɔɔ bɔle bɛ la. Eza anrɛɛ ɔbahile kɛ bɛdie bɛto nu kɛ Nyamenle angome a kola kile bɛ mɔɔ ɔwɔ kɛ bɛyɛ la a.

DEƐMƆTI ADAM NEE YIVE WULE LA

Saa yɛbade deɛmɔti Adam nee Yive wule la abo a, ɔwɔ kɛ yɛdimoa yɛneɛnlea adawubɔlɛ bie mɔɔ fale yɛ muala yɛ nwo la anu. Seetan Abɔnsam luale ɛwɔlɛ nwo zo bɔle adalɛ kpole bie. Baebolo ne ka kɛ: “Ɛwɔlɛ le mɛlɛbɛla tɛla ɛbɔ nu nane biala mɔɔ [Gyihova] Nyamenle bɔle la. Ɔbizale raalɛ ne kɛ, ‘Yemɔti Nyamenle ɛze bɛ kɛ bɛmmadi mbakama mɔɔ wɔ tola ye anu la biala bie ɔ?’”​—Mɔlebɛbo 3:1.

Yive buale kɛ: “Yɛkola yɛdi mbakama mɔɔ wɔ tola ye anu la biala bie; na Nyamenle zele yɛ kɛ, ‘Bɛmmadi baka ne mɔɔ gyi tola ne avinli lɔ la ma ne bie, eza bɛmmafa bɛ sa bɛka ye anrɛɛ bɛkɛwu.’” Ɛwɔlɛ ne zele raalɛ ne kɛ, “Bɛnrɛwu. Nyamenle ze kɛ saa bɛdi baka ne ma ne bie a bɛ nye babuke na bɛayɛ kɛ ɔdaye Nyamenle la, na bɛanwu mɔɔ le kpalɛ, bɛanwu mɔɔ le ɛtane la.” Adenle fofolɛ zo, Seetan ɛlɛka kɛ Gyihova le adalɛ na ɔlɛfa ninyɛne mgbalɛ yeavea Adam nee Yive.​—Mɔlebɛbo 3:2-5.

Yive liele mɔɔ ɔdele la ɔlile. Ɔnleanle baka ne na ɔnwunle kɛ bakama ne le kɛnlɛma na bɛdi a ɔle kpalɛ! Yemɔti ɔdele bakama ne bie na ɔbɔle ɔ bo kɛ ɔdi. Baebolo ne ka kɛ: ‘Nzinlii ɔdele bie ɔhɔmanle ɔ hu lile.’​—Mɔlebɛbo 3:6.

Nyamenle zele Adam kɛ: “Kenle ko ne mɔɔ ɛkɛli bie la, ɛbawu.”​—MƆLEBƐBO 2:17

Nea kɛzi ɔbayɛ Nyamenle nyane kɛ ɔ mra mɔɔ ɔkulo bɛ la anye fuu ɛyɛ ɔ nwo anzosesebɛ a! Duzu a ɔyɛle a? Gyihova zele Adam kɛ: ‘Ɛbazia wɔahɔ azɛlɛ ye anu bieko, ɔluakɛ nuhua yɛɛ ɛvi ɛrale a; ɛle ndɛtɛlɛ na ɛbazia wɔahɔ ndɛtɛlɛ nu.’ (Mɔlebɛbo 3:17-19) Ɔlua ɛhye ati, “Adam lile ɛvolɛ ɛya ngɔnla abulasa, na ɔwule.” (Mɔlebɛbo 5:5) Adam angɔ anwuma anzɛɛ sunsum nu ɛleka biala. Ɛnee ɔnle ɛleka biala kolaa na Gyihova ava ndɛtɛlɛ abɔ ye. Yemɔti wɔ mekɛ mɔɔ ɔwule la ɔziale ɔyɛle ndɛtɛlɛ. Ɛnee ɔnle ngoane nu bieko. Ɔyɛ alɔbɔlɛ kɛ!

DEƐMƆTI YƐNLI MUNLI LA

Adam nee Yive anye fuu yɛle ɛtane ɔti ɛnee bɛnli munli bieko yɛɛ bɛnrɛhola bɛnrɛdɛnla aze dahuu. Bɛ nwonane ne hakyile; bɛrayɛle menli mɔɔ bɛnli munli na ɛtane wɔ bɛ nwo. Noko tɛ bɛ ngomekye a bɛ anzosesebɛ ne gyegyele bɛ a. Ɔgyegyele bɛ mra ne mɔ noko. Wulomuma 5:12 ka kɛ: “Kɛ mɔɔ ɔlua sonla ko [Adam] anwo zo ɛtane rale ewiade na ewule luale ɛtane nwo zo rale la, yɛɛ ewule dɛlɛle hanle menli kɔsɔɔti a, ɔluakɛ bɛ muala bɛyɛ ɛtane.”

Baebolo ne ka kɛ ɛtane nee ewule le kɛ “debie . . . mɔɔ bɛva bɛyɛ aguzo bɛheda maanle maanle ne mɔ azo la.” (Ayezaya 25:7) Zɔhane aguzo ne mɔɔ le kɛ ɛbɔlɛ mɔɔ pɔezen wɔ nu la hedale alesama kɔsɔɔti anwo zo mɔɔ bɛyɛ nwolɛ ɛhwee a ɔnyɛ boɛ a. Nɔhalɛ nu, “Adam ati menli kɔsɔɔti wu.” (1 Kɔlentema 15:22) Ɛhye maa yɛdwenle ɛzoanvolɛ Pɔɔlo kpuya ne mɔɔ ɔbizale la anwo: “Nwane a kɛlie me kɛvi sonlabaka ɛhye mɔɔ ɛlɛkɔ ewule nu la anu a?” Awie wɔ ɛkɛ mɔɔ ɔbahola ɔ?​—Wulomuma 7:24.