Wulu kɔ nuhua edwɛkɛ ne azo

Wulu kɔ nuninyɛne ne azo

Asoo ngoane ngɛkɛba mɔɔ bɛyɛ ye fofolɛ la ɛhola ɛmaa sonla ngoane mekɛ ɛwa ɔ?

Ngoane Tendenle Ɛkpondɛlɛ

Ngoane Tendenle Ɛkpondɛlɛ

“Menwu gyima mɔɔ Nyamenle ɛva ɛmaa menli kɛ bɛyɛ la. Yeyɛ debie biala kɛnlɛma wɔ ye mekɛ nloa; eza yeva [mekɛ] mɔɔ ɛnlɛ awieleɛ yewula sonla adwenle nu noko.”Nolobɔvo ne 3:10, 11.

BELEMGBUNLI Sɔlɔmɔn mɔɔ dɛnlanle aze tete ne la edwɛkɛ ne fale alesama kɔsɔɔti anwo. Ɔvi tete ne amuala, menli akunlu a anrɛɛ bɛbadɛnla aze bahyɛ, noko sonla ɛngyɛ yɛɛ yɛnlɛ ewule nwo zo tumi. Tetedwɛkɛ kile kɛ menli ɛkpondɛ adenle mɔɔ bɛbalua zo bɛanyia ngoane tendenle la.

Yɛva Sumer belemgbunli Gilgamesh kɛ neazo. Bɛha ɔ nwo tetedwɛkɛ dɔɔnwo. Nuhua ko a le adenle ɛzulolɛ bie mɔɔ ɔdule kɛ ɔkazukoa kɛ ɔkɛyɛ na yeanriandi ewule la. Wɔ ye mɔdenlebɔlɛ ne kɔsɔɔti anzi ne yeanyɛ boɛ.

Abɔdeɛ nwo nrɛlɛbɛvo bie wɔ ye neɛnleanu ɛleka ne

Wɔ ɛvoya nna K.Y.M. anu, Chinama bie bɔle mɔdenle kɛ bɛyɛ ayile bie mɔɔ bɛsuzu kɛ ɔbamaa bɛadɛnla ngoane nu bɛahyɛ la. Bɛvale ninyɛne bie mɔɔ bahola ayɛ pɔezen la a bɛyɛle ayile ne a. Ɔbayɛ kɛ ayile ɛhye a hunle China amɛnladoma dɔɔnwo la. Wɔ kɛyɛ ɛvolɛ 500 nee 1500 Y.M. anu, neɛnleanuma bie bɔle mɔdenle kɛ bɛkolo nvutuke bɛayɛ ayile, ɛnee bɛsuzu kɛ nvutuke ɛnzɛkye la ati, saa bɛfa bɛyɛ ayile na sonla no a ɔnrɛwu.

Ɛnɛ, abɔdeɛ nwo nrɛlɛbɛvoma bie mɔ ɛlɛbɔ mɔdenle kɛ bɛkpondɛ deɛmɔti sonla yɛ ɛrelera la. Bɛ mɔdenlebɔlɛ ne le daselɛ mɔɔ kile kɛ amgba menli ɛlɛkpondɛ debie mɔɔ bɛyɛ a bɛnrɛyɛ mrelera na bɛawu a. Noko boni a ɛvi neɛnleanu ɛhye anu ɛra a?

NYAMENLE ƐVA MEKƐ MƆƆ ‘ƐNLƐ AWIELEƐ LA ƐWULA SONLA ADWENLE NU.’​—NOLOBƆVO NE 3:10, 11

BƐLƐKPONDƐ DEƐMƆTI YƐYƐ MRELERA LA

Abɔdeɛ nwo nrɛlɛbɛvoma mɔɔ bɛsukoa sonla ngoane ngɛkɛba nwo debie la ɛha kɛ ɔlua ninyɛne mɔɔ bo 300 la ati a sonla yɛ ɛrelera na ɔwu a. Kenle nsa ye, bɛhola bɛyɛ debie mɔɔ kola maa ngoane ngɛkɛba mɔɔ wɔ nane yɛɛ sonla nu la tɛnla aze kyɛ. Ɔlua ɛhye ati azukoavolɛ bie mɔ ɛmaa abɔdeɛ nwo nrɛlɛbɛvoma ezukoa amaa bɛakpondɛ “deɛmɔti yɛwu la.” Boni a bɛhola bɛyɛ a?

Bɛlɛbɔ mɔdenle kɛ yɛbadɛnla ngoane nu yɛahyɛ. Abɔdeɛ nwo nrɛlɛbɛvoma bie mɔ suzu kɛ debie titili ko mɔɔ maa yɛyɛ mrelera la a le kɛzi telomere (debie bie mɔɔ le kɛ nyɛma wɔ ngoane ngɛkɛba ne ati) yɛ gyima wɔ yɛ nu la. Telomere ne mɔ bɔ ngoane ngɛkɛba mɔɔ yɛ nwo edwɛkɛ wɔ nu la anwo bane wɔ mekɛ mɔɔ bɛ nwo ɛlɛso la. Ngoane ngɛkɛba ne mɔ anwo ɛlɛso la ɛnee telomere ne mɔ ɛlɛyɛ nzinrenzinra. Ɛhye a maa yɛyɛ mrelera la.

Abɔdeɛ nwo nrɛlɛbɛvo Elizabeth Blackburn mɔɔ nyianle ahyɛlɛdeɛ wɔ 2009 la nee ye ekpunli ne nwunle debie bie mɔɔ ɔmmaa telomere ne mɔ ɛnyɛ nzinrenzinra ndɛndɛ na ɔlua zo yɛayɛ mrelera ndɛndɛ la. Noko bɛhanle kɛ telomere ne mɔ “ɛnyɛ nwanwane debie biala mɔɔ maa yɛ ngoane mekɛ wa a.”

Ngoane ngɛkɛba mɔɔ bɛyɛ bɛ fofolɛ la le adenle bieko mɔɔ bɛlɛbɔ mɔdenle bɛalua zo bɛazi mrelerayɛlɛ adenle a. Saa ngoane ngɛkɛba mɔɔ wɔ yɛ nu la nyi somaa na bɛ nwo ɛnzo bieko a, bɛngola bɛnyɛ bɛ gyima kpalɛ. Ɛhye fa anwofofolɛ, ɛnwunwulɛ yɛɛ ewule ngakyile ba. Kenlensa ye France abɔdeɛ nwo nrɛlɛbɛvoma yɛle mrelera bie mɔ ngoane ngɛkɛba ne fofolɛ, akee bɛbɔle ɔ bo bɛyɛle gyima kpalɛ. Abɔlɔba Jean-Marc Lemaître mɔɔ gyi ekpunli ne ati la hanle kɛ bɛ gyima ɛhile kɛ ngoane ngɛkɛba mɔɔ “ɛnyi somaa la bahola ayɛ fofolɛ bieko.”

ABƆDEƐ NWO NRƐLƐBƐVOMA BAHOLA AMAA YƐ NGOANE MEKƐ AWA Ɔ?

Tɛ abɔdeɛ nwo nrɛlɛbɛvoma kɔsɔɔti a die to nu kɛ nyile mɔɔ bɛyɛ la bahola amaa yɛ ngoane mekɛ awa a. Nɔhalɛ nu, ɔvi ɛvoya 19 mɔɔ ba la, menli kola tɛnla ngoane nu kyɛ ɔlua bɛ nwo enililɛ, banebɔlɛ nyile nee agbuya ngakyile ti. Abɔdeɛ nwo nrɛlɛbɛvoma bie mɔ ɛnwu ye kɛ sonla ngoane mekɛ ne ala ɛne.

Kɛyɛ ɛvolɛ 3,500 mɔɔ ɛze la, Baebolo kɛlɛvo Mosisi hɛlɛle kɛ: “Yɛ ngoane mekɛ le ɛvolɛ abulasuu, saa anwosesebɛ wɔ nu a, abulatwɛ; noko nuhua le ɛvɛlɛ nee nyane ngome; ɔngyɛ ɛnee bɛpɛ nu, ɛnee yɛminli.” (Edwɛndolɛ 90:10) Ɔnva nwo mɔdenle biala mɔɔ alesama ɛlɛbɔ la, yɛ ngoane mekɛ ne le kɛ mɔɔ Mosisi hanle la ala.

Noko akee, nyevile nu fɛlɛ bie mɔ kola tɛnla aze ɛvolɛ 200 nee ɔ nzi, yɛɛ mbaka bie mɔ noko kola nyia ɛvolɛ apenle nee ɔ nzi. Saa yɛfa yɛ ngoane mekɛ yɛtoto abɔdeɛ ɛhye mɔ nee gyɛne nwo a, ɔmaa yɛbiza kɛ, ‘Ɛbɛlabɔlɛ ne ala a le ɛvolɛ 70 anzɛɛ 80 ye ala ɔ?’