Wulu kɔ nuhua edwɛkɛ ne azo

Wulu kɔ nuninyɛne ne azo

Kɛ Ɔkɛyɛ Na Wɔanyia Asetɛnla Kpalɛ Ɛ?

Kɛ Ɔkɛyɛ Na Wɔanyia Asetɛnla Kpalɛ Ɛ?

ƐNƐ, ɛbɛlabɔlɛ mɔɔ alesama wɔ nu la ɛnle kɛ mɔɔ Nyamenle zuzule la. Anrɛɛ ɔwɔ kɛ bɛdabɛ mɔɔ bɛde azɛlɛ ye azo la die Bɔvolɛ ne tumililɛ to nu, bɛmaa ɔkile bɛ adenle na bɛda ye subane ngɛnlɛma ne mɔ ali. Ɛnee Nyamenle kulo kɛ bɛfa anyelielɛ bɛkyekye bɛ awuke, bɛsukoa ninyɛne fofolɛ na bɛmaa azɛlɛ ne amuala yɛ paladaese.

NYAMENLE ƐBƆ ƐWƆKƐ KƐ ƆBAMAA YƐ ASETƐNLA AYƐ KƐ MƆƆ ƆKULO LA

  • ‘Ɔbamaa bɛagyakyi konle wɔ azɛlɛ ye amuala azo.’​Edwɛndolɛ 46:9.

  • ‘Mekɛ dwule kɛ Nyamenle sɛkye bɛdabɛ mɔɔ bɛlɛsɛkye azɛlɛ ne la.’Yekile 11:18.

  • “Awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’”Ayezaya 33:24.

  • “Me menli ne mɔɔ mekpa nu meye bɛ la badidi bɛ sa anloa gyima nwo bɛ nye alie ahyɛ.”​Ayezaya 65:22.

Kɛzi ngapezo ɛhye mɔ amuala bara nu ɛ? Nyamenle ɛkpa ɔ Ra, Gyisɛse kɛ ye anwuma arane ne mɔɔ banlea azɛlɛ ye azo la azo Belemgbunli. Baebolo ne fɛlɛ arane ɛhye Nyamenle Belemgbunlililɛ ne. (Daneɛle 2:44) Eza ɔka Gyisɛse anwo edwɛkɛ kɛ: ‘Nyamenle bava belemgbunli ebia ne amaa ye, na ɔbali Belemgbunli.’​—Luku 1:32, 33.

Mɔɔ Gyisɛse wɔ azɛlɛ ye azo la, ɔyɛle nwanwane gyima dɔɔnwo ɔvale ɔhilele kɛ kɛ Belemgbunli la, ɔbamaa alesama anyia asetɛnla kpalɛ.

GYISƐSE MAANLE ALESAMA NWUNLE NINYƐNE MGBALƐ MƆƆ ƆBAYƐ YEAMAA BƐ LA

  • Ɔyɛle anwodolɛ nee ewule ngakyile mɔɔ menli lɛ la ayile ɔvale ɔhilele kɛ ɔbaye ewule biala mɔɔ gyegye alesama la yeavi ɛkɛ.​Mateyu 9:35.

  • Ɔmaanle nyevile ne gyinlanle koonwu ɔvale ɔhilele kɛ ɔlɛ abɔdeɛ nu tumi azo tumi.​Maake 4:36-39.

  • Ɔmaanle menli dɔɔnwo aleɛ ɔvale ɔhilele kɛ ɔbamaa menli anyia bɛ ngyianlɛdeɛ.​Maake 6:41-44.

  • Ɔhakyile nzule nza wɔ atɔfolɛlielɛ bie abo ɔvale ɔhile kɛ ɔkulo kɛ menli nye die wɔ ɛbɛlabɔlɛ nu.​Dwɔn 2:7-11.

Kɛ ɔkɛyɛ na wɔanyia ɛbɛlabɔlɛ kpalɛ mɔɔ Nyamenle kulo kɛ menli mɔɔ bɛkulo ye la nyia la bie ɛ? “Adenle” bie wɔ ɛkɛ mɔɔ ɔwɔ kɛ ɛdua nu a. Baebolo ne ka nwolɛ edwɛkɛ kɛ, “adenle ɛdenraa [mɔɔ] kɔ ngoane nu, na menli ekyi bie a nwu ye a.”​—Mateyu 7:14.

KPONDƐ ADENLE NE MƆƆ KƆ NGOANE NU LA

Duzu a le adenle ne mɔɔ kɔ ngoane nu la? Nyamenle ɛha kɛ: ‘Medame a mele Gyihova bɛ Nyamenle ne, mɔɔ kilehile bɛ maa bɛyɛ kpalɛ, na ɔdi bɛ nyunlu ɔkilehile bɛ adenle mɔɔ ɔwɔ kɛ bɛdua nu la.’ (Ayezaya 48:17) Saa ɛdua adenle ɛhye anu a wɔ ɛbɛlabɔlɛ bayɛ kpalɛ.

Gyisɛse hanle kɛ: “Mame a mele adenle ne nee nɔhalɛ ne nee ngoane ne a.” (Dwɔn 14:6) Saa yɛyɛ mɔɔ Gyisɛse ka la na yɛsukoa ye neazo ne a, yɛbabikye Nyamenle na yɛ ɛbɛlabɔlɛ ne ayɛ kpalɛ.

Kɛ ɔkɛyɛ na wɔanwu ngoane adenle ne ɛ? Ɛzonlenlɛ dɔɔnwo wɔ ɛkɛ noko Gyisɛse bɔle kɔkɔ kɛ: “Tɛ awie biala mɔɔ kɛze me kɛ, ‘Awulae, Awulae,’ la a bahɔ anwuma Belemgbunlililɛ ne anu a, emomu mɔɔ ɔyɛ mɔɔ me Ze mɔɔ wɔ anwuma la kulo la angome a bahɔ nu a.” (Mateyu 7:21) Eza ɔhanle kɛ: “Bɛ ma ne mɔ a bɛbava bɛanwu bɛ a.” (Mateyu 7:16) Baebolo ne baboa wɔ yeamaa wɔanwu ngakyile mɔɔ wɔ nɔhalɛ ɛzonlenlɛ nee adalɛ ɛzonlenlɛ nu la.​—Dwɔn 17:17.

Kɛ ɔkɛyɛ na wɔalua ngoane adenle ne anu ɛ? Nwu ngoane maavolɛ ne: Yemɔ a le nwane? Kɛ bɛfɛlɛ ye ɛ? Kɛzi ɔde ɛ? Duzu a ɔlɛyɛ yeamaa yɛ a? Duzu a ɔkulo kɛ yɛyɛ a? *

Tɛ gyima, aleɛ, nwɔhoa nee abusua angome a Nyamenle ɛva ɛmaa alesama a. Ɔwɔ kɛ yɛnwu yɛ Bɔvolɛ ne na yɛyɛ ɔ gɔnwo. Yɛkola yɛyɛ ye ɛhulolɛdeɛ yɛfa yɛkile kɛ yɛkulo ye. Gyisɛse zele kɛ: “Ɛhye a le dahuu ngoane a, kɛ bɛkɛnwu wɔ, nɔhalɛ Nyamenle kokye ne.”​—Dwɔn 17:3.

NYAMENLE DUA BAEBOLO NE AZO ‘KILEHILE WƆ MAA ƐYƐ KPALƐ.’​—AYEZAYA 48:17

TU AGYAKƐ MƆƆ LIMOA

Ɔwɔ kɛ yɛyɛ nzenzaleɛ wɔ yɛ ɛbɛlabɔlɛ nu, amaa yɛazɔ Gyihova anye. Ɛhye ɛyɛlɛ ɛnla aze. Ɔle kɛ ɛdialɛ la, ɔwɔ kɛ ɛdimoa ɛtu agyakɛ mɔɔ limoa. Gyihova Alasevolɛ ɛyɛ Baebolo ɛzukoalɛ nwo ngyehyɛleɛ mɔɔ bamaa wɔanyia Nyamenle anwo kpuya bie mɔ anwo mualɛ wɔ mekɛ nee ɛleka mɔɔ le kpalɛ maa wɔ la. Ɛbahola wɔalua www.jw.org/nzi wɛbsaete ne azo ɛ nee yɛ ali ngitanwo.