Wulu kɔ nuhua edwɛkɛ ne azo

Wulu kɔ nuninyɛne ne azo

Kɛzi Bɛbali Kpɔvolɛ Ewule Anwo Zo Konim Ɛ?

Kɛzi Bɛbali Kpɔvolɛ Ewule Anwo Zo Konim Ɛ?

ƆLUA yɛ awovolɛ mɔɔ bɛlimoa, Adam nee Yive anzosesebɛ ti, bɛvale ɛtane nee ewule bɛrɛlɛle alesama, noko yemɔ angakyi bodane mɔɔ Nyamenle lɛ maa alesama la. Nyamenle ɛmaa yela ali fane dɔɔnwo wɔ ye Edwɛkɛ Baebolo ne anu kɛ ye bodane ne ɛtɛkakyile.

  • “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.”Edwɛndolɛ 37:29.

  • “Ɔbame ewule bɔkɔɔ, na Awulae Nyamenle ne bakyikyi awie biala anye anwo monle.”​Ayezaya 25:8.

  • “Kpɔvolɛ mɔɔ li amozi mɔɔ ɔbazɛkye ye la a le ewule.”​1 Kɔlentema 15:26.

  • “Ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko.”Yekile 21:4.

Kɛzi Nyamenle ‘bame ewule’ na yeaye ye yeavi ɛkɛ ne bɔkɔɔ ɛ? Baebolo ne ka kɛ, ‘tenlenema bɛadɛnla azɛlɛ ne azo dahuu.’ Eza ɔka kɛ “tenlenenli biala ɛnle azɛlɛ ye azo mɔɔ kpalɛ ngome ala a ɔyɛ” a. (Nolobɔvo ne 7:20) Asoo Nyamenle babu ɔ nye agua ye ngyinlazo zo amaa yeali ewule nwo zo konim ɔ? Ɛhye ɛnrɛzi ɛlɛ! Ɔnrɛyɛ zɔ ɔluakɛ ɔle “Nyamenle mɔɔ ɔngola ɔmbɔ adalɛ.” (Taetɛse 1:2) Ɛnee duzu a Nyamenle bayɛ kolaa na yeamaa ye bodane mɔɔ ɔlɛ ɔmaa alesama la ara nu a?

NYAMENLE ‘BAME EWULE BƆKƆƆ.’​—AYEZAYA 25:8

BƐDUALE ƐKPƆNEDEƐ NE BƐLILE EWULE NWO ZO KONIM

Gyihova Nyamenle yɛle ɛlɔlɛ ngyehyɛleɛ ɔvale ɔliele alesama ɔvile ewule nu, ɔlua ɛkpɔnedeɛ ne mɔɔ ɔduale la azo. Ye sikalɛ nu, ɛkpɔnedeɛ le ezukoa mɔɔ sa debie bolɛ tua mɔɔ bɛtua bɛsie debie mɔɔ bɛzɛkye ye la agyakɛ anu amaa pɛlepɛlelilɛ ara la. Alesama amuala le ɛtanevolɛma na bɛvea ewule tumi bo, ɔti Baebolo ne ka kɛ: “Nɔhalɛ, awie biala ɛnrɛhola ɔ nwo kpɔne, anzɛɛ ye ngoane nwo kakɛ tua maa Nyamenle, ɔluakɛ ye ngoane ɛkpɔnedeɛ ne bolɛ yɛ se mɔɔ ɔnrɛhola ye tua ɛlɛ.”​—Edwɛndolɛ 49:7, 8.

Awie wu a, ɛnee yedua ɔdaye mumua ne ye ɛtane nwo kakɛ; ɔnrɛhola ɔnrɛkpɔne ɔ nwo anzɛɛ ɔnrɛhola awie biala ɛtane nwo kakɛ tua. (Wulomuma 6:7) Ɔti ɛnee yɛhyia awie mɔɔ ɔdi munli mɔɔ ɔbava ye ngoane yeabɔ afɔle wɔ yɛ ɛtane ti, na tɛ ɔdaye ye ɛtane ti la.​—Hibuluma 10:1-4.

Ɛhye pɛpɛɛpɛ a Nyamenle yɛle a. Ɔzoanle ɔ Ra Gyisɛse ɔmaanle bɛwole ye wɔ azɛlɛ ye azo kɛ sonla mɔɔ di munli. (1 Pita 2:22) Gyisɛse hanle kɛ ‘ɔrale kɛ ɔbava ye ngoane yeayɛ ɛkpɔnedeɛ yealie menli dɔɔnwo.’ (Maake 10:45) Ɔwule ɔlile kpɔvolɛ ewule nwo zo konim amaa yɛanyia ngoane.​—Dwɔn 3:16.

MEKƐ BONI A BƐBALI EWULE NWO ZO KONIM A?

Kɛmɔ Baebolo ngapezo ɛmaa yɛnwu ye la, ɛnɛ yɛde “mekɛ mɔɔ anu yɛ se” la anu, ɛhye di daselɛ kɛ yɛbikye ɛtane ewiade ɛhye “mekɛ mɔɔ li awieleɛ la.” (2 Timote 3:1) Awieleɛ mekɛ ne bara awieleɛ wɔ “ndɛnebualɛ kenle ne nee amumuyɛma ɛzɛkyelɛ ne” anu. (2 Pita 3:3, 7) Noko bɛbalie menli mɔɔ bɛkulo Nyamenle la na bɛanyia “dahuu ngoane.”​—Mateyu 25:46.

Gyisɛse rale kɛ ‘ɔbava ye ngoane yeayɛ ɛkpɔnedeɛ yealie menli dɔɔnwo.’​—Maake 10:45

Menli mgbe dɔɔnwo mɔɔ bɛbadwazo bɛ la banyia nwolɛ adenle adɛnla ngoane nu dahuu. Mɔɔ Gyisɛse hɔle suakpole Neeyen azo la, ɔdwazole kunlavolɛ raalɛ bie ara nrenyia kokye mɔɔ yewu la ɔluakɛ ɛnee raalɛ ne ‘anwo yɛ ye alɔbɔlɛ.’ (Luku 7:11-15) Ɔlua nwanwane ninyɛne ɛhye mɔ ati, ɛzoanvolɛ Pɔɔlo hanle kɛ: “Melɛ anyelazo wɔ Nyamenle anu, . . . kɛ, bɛbadwazo tenlenema nee bɛdabɛ mɔɔ bɛnle tenlenema la bɛavi ewule nu.” Anyelazo ɛhye le daselɛ mɔɔ kile kɛ Gyihova kulo alesama kpalɛ.​—Gyima ne 24:15.

Menli mgbe mgbe dɔɔnwo bahola anlea adenle kɛ bɛbadɛnla aze dahuu. Baebolo ne ka kɛ: “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.” (Edwɛndolɛ 37:29) Mekɛ zɔhane, bɛ nye balie na bɛanwu kɛ ɛzoanvolɛ Pɔɔlo edwɛkɛ mɔɔ ɔhɛlɛle ye ɛvolɛ kɛyɛ 2,000 mɔɔ ɛze la ɛra nu: “Ewule, wɔ konimlilɛ ne wɔ ni? Ewule, wɔ bɔlɔ ne wɔ ni?” (1 Kɔlentema 15:55) Bɛbaye alesama kpɔvolɛ anwo ɛzulolɛ ne bɛavi ɛkɛ ne bɔkɔɔ!