Wulu kɔ nuhua edwɛkɛ ne azo

Wulu kɔ nuninyɛne ne azo

Amaneɛnwunlɛ​—Asoo Nyamenle Fa Twe Yɛ Nzo Ɔ?

Amaneɛnwunlɛ​—Asoo Nyamenle Fa Twe Yɛ Nzo Ɔ?

LUZIA TIA TƆ Ɔ GYAKƐ BƐNE NE AZO. Ɔle kakula la ɔnyianle poliomyelitis, ewule bie mɔɔ sɔ sonla ndinli nee ɔ nzi bowule kɔdwu ye amelɛ ne anu, na ɔsalo ndɛndɛ la. Mɔɔ Luzia nyianle ɛvolɛ 16 la ye gyimamenle hanle hilele ye kɛ, “ɔlua wɔ mame anwo anzosesebɛ mɔɔ ɛnee ɛyɛ la ati a Nyamenle ɛmaa wɔyɛ abubura a.” Ɛhye zile la ɛhyɛ, noko Luzia tɛkakye kɛzi ɔmaanle ɔlile nyane la.

MEKƐ MƆƆ DAMARIS NWULE KƐ ƆLƐ KANSA WƆ YE AMELƐ NE ANU LA, ye papa bizale ye kɛ: “Duzu a wɔyɛ mɔɔ ɛhye ɛdo wɔ a? Bie a wɔyɛ ɛtane bie, na yemɔti a Nyamenle ɛlɛtwe ɛ nzo wɔ nwo la.” Edwɛkɛ ɛhye maanle Damaris anwo bubule ye.

Adwenle mɔɔ menli lɛ kɛ anwodolɛ le anzohwenlɛ mɔɔ vi Nyamenle la bɔle ɔ bo la ɛhyɛ. Manners and Customs of Bible Lands buluku ne ka kɛ menli dɔɔnwo mɔɔ ɛnee wɔ Kelaese mekɛ zo la die di kɛ “mɔɔ maa awie anwo to ye la a le ye ɛtane anzɛɛ ye busuanli bie ɛtane.” Medieval Medicine and the Plague hanle kɛ, wɔ Avinli Mekɛ ne anu, “Ɛnee menli bie mɔ die di kɛ Nyamenle vale ewulenzane hwenle bɛ nzo ɔlua bɛ ɛtane ti.” Yemɔti wɔ mekɛ mɔɔ ewulenzane hunle menli mgbe dɔɔnwo wɔ Europe wɔ ɛvoya 14 ne anu la, asoo ɛnee Nyamenle ɛlɛtwe ɛtanevolɛma anzo ɔ? Anzɛɛ ngɛkɛba a vale ewulenzane ne rale kɛ mɔɔ neɛnleanu mɔɔ ayileyɛlɛma ɛyɛ la ɛmaa yela ali la ɔ? Bie mɔ babiza kɛ, asoo amgba Nyamenle dua anwodolɛ zo maa menli nwu bɛ ɛtane nwo amaneɛ ɔ? *

SUZU NWO: Saa Nyamenle dua anwodolɛ nee amaneɛnwunlɛ zo twe yɛ nzo a, duzu ati a Gyisɛse yɛle menli mɔɔ ɛnde kpɔkɛ la ayile a? Asoo anrɛɛ yemɔ ɛnrɛhile kɛ ɔlɛdwazo yeatia Nyamenle pɛlepɛle nee ye tenlene ngyinlazo ne mɔ ɔ? (Mateyu 4:23, 24) Gyisɛse ɛnrɛyɛ debie mɔɔ nee Nyamenle ɛhulolɛdeɛ ɛnyia la. Ɔhanle kɛ: “Meyɛ mɔɔ sɔ ɔ nye la dahuu” yɛɛ, “melɛyɛ mɔɔ Selɛ ne ɛha ɛhile me kɛ menyɛ la ala.”​—Dwɔn 8:29; 14:31.

Mɔɔ Baebolo ne ka la anu la ɛkɛ. Gyihova Nyamenle ‘di pɛlepɛle.’ (Mɛla ne 32:4) Kɛ neazo la, Nyamenle ɛnrɛmaa alopile ɛnrɛdɔ aze, ɛnrɛhu menli ɛya dɔɔnwo mɔɔ bɛnze nwolɛ bie la, ɔluakɛ ɔkulo kɛ ɔtwe sonla ko bie mɔɔ wɔ nu la anzo la ati! Mɔɔ nee Nyamenle pɛlepɛlelilɛ yia la, Ebileham, Nyamenle sonvolɛ mɔɔ le nɔhavo la hanle kɛ Nyamenle ‘ɛnrɛzɛkye tenlenema ɛnrɛboka amumuyɛma anwo ɛlɛ.’ Ɔhanle kɛ, “Munzule ɛhɔ ɛbɔ nu,” kɛ ɔkɛyɛ debie mɔɔ le zɛhae la. (Mɔlebɛbo 18:23, 25) Baebolo ne eza ka kɛ, “Nyamenle ɛnrɛyɛ amumuyɛ”; ɔnrɛyɛ “ɛtane.”​—Dwobu 34:10-12.

MƆƆ BAEBOLO NE KA YE WƆ AMANEƐNWUNLƐ NWO LA

Tɛ Nyamenle a maa yɛnwu amaneɛ a, kɛ ɔfa yɛahwe yɛ nzo ɔlua ɛtane bie mɔɔ yɛyɛ la ati. Gyisɛse maanle edwɛkɛ ɛhye anu lale ɛkɛ wienyi wɔ mekɛ mɔɔ ɔ nee ye ɛdoavolɛ ne mɔ nwunle nrenyia bie mɔɔ bɛwole ye la ɛnee ɔ nye ɛzi la. “Ye ɛdoavolɛma ne bizale ye kɛ: ‘Relabae, nwane a yɛle ɛtane a, nrenyia ɛhye anzɛɛ ye awovolɛ ɔ, mɔɔ ɔti bɛwo ye anyenzinliravolɛ a?’ Gyisɛse buale kɛ: ‘Tɛ nrenyia ɛhye ɛtane anzɛɛ ye awovolɛ ɛtane a ɛmaa yeyɛ anyenzinliravolɛ a. Ɛhye ɛra ye zɔ amaa menli anwu Nyamenle gyima.’”​—Dwɔn 9:1-3.

Ɔlua adwenle mɔɔ ɛndenrɛ mɔɔ ɛnee ɔwɔ ɛkɛ ne zɔhane mekɛ ne la ati, bie a ɔbayɛ Gyisɛse ɛdoavolɛ ne mɔ nwanwane wɔ mekɛ mɔɔ ɔhanle ɔhilele bɛ kɛ tɛ nrenyia ne anzɛɛ ye awovolɛ ɛtane a ɛva  esiane zɔhane ɛra la. Gyisɛse anyɛ nrenyia ne ayile ala emomu eza ɔvale ɔhakyile diedi funli mɔɔ ɛnee bɛlɛ kɛ amaneɛnwunlɛ le anzohwenlɛ mɔɔ vi Nyamenle ɛkɛ ne la. (Dwɔn 9:6, 7) Ɛnɛ, menli mɔɔ ɛlɛnwu amaneɛ ɔlua anwodolɛ ti la bahola anyia arɛlekyekyelɛ kɛ ɔnvi Nyamenle.

Saa Nyamenle vale anwodolɛ hwenle menli nzo wɔ bɛ ɛtane nwo a, ɛnee duzu ati a Gyisɛse yɛle bɛ ayile a?

Ngɛlɛlera ne maa yɛnyia anwodozo

  • “Bɛngola bɛnva ninyɛndane bɛnzɔ Nyamenle bɛnnea, yɛɛ ɔdaye noko ɔnzɔ awie biala ɔnnea.” (GYEMISE 1:13) Nɔhalɛ nu, bɛbaye “ninyɛndane” le kɛ anwodolɛ, nyane, nee ewule mɔɔ ɛgyegye alesama ɛvolɛ dɔɔnwo la bɛavi ɛkɛ ne bɔkɔɔ.

  • Gyisɛse Kelaese “yɛle bɛdabɛ mɔɔ bɛlɛnwu amaneɛ la kɔsɔɔti ayile.” (MATEYU 8:16) Gyisɛse yɛle menli mɔɔ rale ye ɛkɛ ne la amuala ayile vale hilele kɛ wɔ Nyamenle Belemgbunlililɛ ne anu, bɛbayɛ awie biala mɔɔ wɔ ewiade ye la ayile.

  • “[Nyamenle] bakyikyi bɛ nye anwo monle kɔsɔɔti, na ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko. Alimoa ninyɛne ne ɛpɛ nu.”​—YEKILE 21:3-5.

NWANE A ƆWƆ KƐ YƐBƆ YE SOMOLƐ A?

Ɛnee duzu ati a alesama nwu amaneɛ dɔɔnwo zɔhane a? Alesama ɛbiza kpuya ɛhye ɔvi mekɛ tendenle. Saa ɔnle kɛ yɛbɔ Nyamenle somolɛ a, ɛnee nwane a ɔwɔ kɛ yɛbɔ ye somolɛ a? Yɛbazuzu kpuya ɛhye mɔ anwo wɔ edwɛkɛ mɔɔ doa zo la anu.

^ ɛden. 4 Nyamenle hwenle menli bie mɔ anzo wɔ tete ne ɔlua ɛtane titili bie mɔ mɔɔ bɛyɛle la ati, noko Baebolo ne ɛngile kɛ kɛkala Gyihova ɛlɛdua anwodolɛ anzɛɛ esiane zo ahwe menli nzo wɔ bɛ ɛtane nwo.