Wulu kɔ nuhua edwɛkɛ ne azo

Wulu kɔ nuninyɛne ne azo

Mekɛ Boni A Nyamenle Belemgbunlililɛ Ne Bali Tumi Wɔ Azɛlɛ Ye Azo A?

Mekɛ Boni A Nyamenle Belemgbunlililɛ Ne Bali Tumi Wɔ Azɛlɛ Ye Azo A?

Ɛnee Gyisɛse ɛdoavolɛ nɔhavoma bie mɔ kulo kɛ bɛnwu mekɛ mɔɔ Nyamenle Belemgbunlililɛ ne babɔ ɔ bo ali tumi la. Gyisɛse buale bɛ kɛ bɛnrɛnwu mekɛ kpɔtee ne mɔɔ ɔbali tumi wɔ azɛlɛ ye azo la. (Gyima ne 1:6, 7) Noko ɛnee yelimoa yɛha yehile bɛ kɛ saa bɛnwu kɛ ninyɛne bie mɔ ɛbɔ nu ɛlɛsisi wɔ mekɛ ko anu a, “bɛnwu ye kɛ Nyamenle Belemgbunlililɛ ne ɛbikye” na mekɛ ɛdwu kɛ ɔbɔ ɔ bo ɔdi azɛlɛ ye azo tumi.​—Luku 21:31.

NINYƐNE BONI A GYISƐSE HANLE KƐ ƆBASISI A?

Gyisɛse hanle kɛ: “Maanle badwazo atia maanle yɛɛ belemgbunlililɛ badwazo atia belemgbunlililɛ. Azɛlɛkpusulɛ mgbole bara, na ɛhɔne nee ewulenzane bara ɛleka ngakyile.” (Luku 21:10, 11) Ninyɛne ɛhye mɔ mɔɔ babɔ nu asisi mekɛ ko anu wɔ ewiade amuala la le sɛkɛlɛneɛ wienyi mɔɔ kile kɛ Nyamenle Belemgbunlililɛ ne ɛbikye a. Asoo wɔnwu kɛ ɛhye ɛra nu ɔ? Yɛzuzu daselɛ bie mɔ anwo.

1. KONLE KONLE

Wɔ 1914, ewiade amuala konle mɔɔ bie ɛtɛsile ɛlɛ wɔ alesama tetedwɛkɛ nu la bɔle ɔ bo! Tetedwɛkɛ kɛlɛvoma ka kɛ 1914 le ɛvolɛ mɔɔ ninyɛne hakyile bɔkɔɔ wɔ alesama tetedwɛkɛ nu a, ɔluakɛ nuhua a bɛhonle ewiade amuala konle mɔɔ limoa la a. Zɔhane konle ne anu a bɛlimoale bɛvale konle kale, anwomanyunlu bɔmbo, etu mɔɔ ɔto ɔtoɔdoa zo, gaase mɔɔ le pɔezen yɛɛ konle ninyɛne mɔɔ yɛ ɛzulolɛ la dɔɔnwo bɛlile gyima a. Ewiade konle mɔɔ tɔ zo nwiɔ la doale zo na bɛvale nukelea akodeɛ bɛlile gyima. Ɔvi 1914, alesama ɛho konle ngakyile wɔ ɛleka ngakyile na bɛhu menli dɔɔnwo kpalɛ.

2. AZƐLƐKPUSULƐ

Britannica Academic ne ka kɛ, ɛvolɛ biala azɛlɛkpusulɛ mgbole kɛyɛ 100 mɔɔ “ɔsɛkye ninyɛne kpalɛ” la sisi. Yɛɛ United States gyima ekpunli bie bɔ amaneɛ kɛ, “kɛ mɔɔ kɛlɛtokɛ bie mɔɔ ɛhyɛ (ɔvi kɛyɛ 1900) kile la, yɛ nye la kɛ wɔ ɛvolɛ biala azɛlɛkpusulɛ mgbole kɛyɛ 16 basisi.” Bie mɔ dwenle kɛ ɔluakɛ bɛnyia ninyɛne mɔɔ ɔmaa bɛkola bɛnwu azɛlɛkpusulɛ mɔɔ ɔbazi la ndɛndɛ la ati a ɔle kɛ asɛɛ ɔ nyunlu ala a ɔkɔ la. Edwɛkɛ ne a le kɛ azɛlɛkpusulɛ mgbole mɔɔ ɛlɛsisi la ɛlɛmaa menli dɔɔnwo anwu amaneɛ yɛɛ yepɛ bie mɔ ngoane zo.

3. ƐHƆNE

Konle, nzisi, ezukoa yɛɛ ɛyazonlɛ nwo ngyegyelɛ ɛva ɛhɔne ɛra. Ɛvolɛ 2018 Ewiade Aleɛ Nwo Gyimalilɛ Ngyehyɛleɛ ne bɔ amaneɛ kɛ: “Wɔ ewiade amuala, menli mgbe 821 ɛnnyia aleɛ mɔɔ sa bɛ la yɛɛ menli mgbe 124 da ɛhɔne.” Aleɛ kpalɛ mɔɔ bɛnnyia ye bɛnli la ati, ngakula kɛyɛ mgbe nsa apenle ɛya ko wu ɛvolɛ biala. Yɛkyehyɛ nu a, ewiade amuala, ngakula mɔɔ ɛhɔne ti bɛwule wɔ ɛvolɛ 2011 la le kɛyɛ ɛya ko ngyɛnu 45.

4. EWULE NGAKYILE

Ewiade Amuala Kpɔkɛdelɛ Fane ne ka kɛ: “Ewule ngakyile dɔɔnwo ɛra wɔ ɛvoya 21 ye anu. Ewule dɛba le kɛ ahunlundulɛ, ewulenzane yɛɛ ebunlu ɛra bieko yɛɛ fofolɛ le kɛ SARS, influenza, MERS, Ebola yɛɛ Zika ɛraboka nwolɛ.” Ɔnva nwo anyuhɔlɛ mɔɔ dɔketama yɛɛ abɔdeɛ nwo nrɛlɛbɛvolɛma ɛnyia ye wɔ ayileyɛlɛ nu la, bɛtɛkolale bɛtɛtule ewule bo bɔkɔɔ.

5. EWIADE AMUALA EDWƐKƐHANLƐ GYIMA NE

Gyisɛse eza hanle sɛkɛlɛneɛ bieko anwo edwɛkɛ kɛ: “Bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala bɛava bɛali maanle maanle ne amuala daselɛ, kolaa na awieleɛ ne ara.” (Mateyu 24:14) Ngyegyelɛ ɛbu zo wɔ ewiade amuala, noko menli mɔɔ bo mgbe mɔtwɛ mɔɔ vi maanle ngakyile nu la ɛlɛfa aneɛ kɛyɛ 1,000 abɔ Belemgbunlililɛ ne nolo wɔ maanle 240 azo. Ɛhye bie ɛtɛsile wɔ alesama tetedwɛkɛ nu ɛlɛ.

 DUZU A SƐKƐLƐNEƐ NE KILE MAA YƐ A?

Ninyɛne mɔɔ Gyisɛse hanle kɛ ɔbabɔ nu yeasisi kɛ sɛkɛlɛneɛ la amuala ɛra nu. Duzu ati a ɔwɔ kɛ ɛhye kyia yɛ a? Ɔluakɛ Gyisɛse hanle kɛ: “Saa bɛnwu kɛ ninyɛne ɛhye mɔ ɛlɛsisi a, bɛnwu ye kɛ Nyamenle Belemgbunlililɛ ne ɛbikye.”​—Luku 21:31.

Ɔnrɛhyɛ Belemgbunlililɛ ne bamaa bɛayɛ Nyamenle ɛhulolɛdeɛ wɔ azɛlɛ ye azo

Sɛkɛlɛneɛ mɔɔ Gyisɛse hanle nwolɛ edwɛkɛ nee Baebolo mgbondabulɛ maa yɛnwu kɛ Nyamenle vale ye Belemgbunlililɛ ne ziele ɛkɛ wɔ anwuma wɔ 1914. * Mekɛ zɔhane a ɔvale ɔ Ra Gyisɛse Kelaese ɔziele Belemgbunli a. (Edwɛne 2:2, 4, 6-9) Ɔnrɛhyɛ, Nyamenle Belemgbunlililɛ ne bali tumi wɔ azɛlɛ ye azo, na ɔbazɛkye tumililɛ mɔɔ wɔ azɛlɛ ye azo la amuala na yeayɛ azɛlɛ ne paladaese yeamaa alesama adɛnla zo dahuu.

Ɔnrɛhyɛ asɔneyɛlɛ nwo neazo mɔɔ Gyisɛse hilele yɛ la bara nu: “Wɔ Belemgbunlililɛ ɛrɛla. Wɔ ɛhulolɛdeɛ ɛyɛ ɛkɛ wɔ azɛlɛ ye azo kɛ anwuma la.” (Mateyu 6:10) Duzu a Belemgbunlililɛ ne ɛlɛyɛ ɔvi mekɛ mɔɔ bɛvale bɛziele ɛkɛ wɔ 1914 la a? Yɛɛ duzu a yɛ nye bahola ala ye ade wɔ mekɛ mɔɔ Belemgbunlililɛ ne ɛlɛdi tumi bɔkɔɔ wɔ alesama anwo zo la a?

^ ɛden. 17 Amaa wɔanwu 1914 anwo edwɛkɛ dɔɔnwo la, nea Duzu A Baebolo Ne Kola Kilehile Yɛ A? buluku ne mɔɔ Gyihova Alasevolɛ ɛyɛ la, awieleɛ edwɛkɛ 22.